Jeremiah 44:1-30
44 Ííjip kéyahdi Jew dineʼé tʼáá ałtso kéédahatʼíinii éí Mígdal nahósʼaʼdi áádóó Tahápaniiz kin haalʼáadi áádóó Naf kin haalʼáadi índa Páthras nahósʼaʼdi kéédahatʼíinii éí Jeremáíyah bichʼįʼ kótʼéego baa haʼoodzííʼ.
2 Ízrel dineʼé biDiyin God tʼáá ałtsoní bee Bóhólníihii kóní, Jerúsalem kin haalʼáagi índa Júdah kéyahgi kin hadaasʼáhígíí atídaashłaa yę́ę tʼáá átʼé daołtsą́, áko díí jı̨́įdi kin yę́ę ahiih nídahaasdááz áádóó ákwii diné doo łaʼ kééhatʼı̨́į da, jóʼakon.
3 Háálá diyin dabidiʼníinii tʼáadoo béédahonohsinii áádóó bí índa danihizhéʼé yę́ę tʼáadoo yéédahósinii éí yichʼįʼ nidahasá índa didlidgo nááhániihii* náádajiiłniihgo doo yáʼáshóonii baa nidziskaígíí biniinaa shá dahojííłchįįd.
4 Nidi shá dahalneʼgo shá nidaalʼaʼí dashíínéelą́ąʼdi nihichʼįʼ ninádaséłʼaʼ kódíshníigo, Díí jooshłxáii doo yíníshdinii tʼáadoo baa nidaahkaí.
5 Nidi tʼáadoo dazʼdiiztsʼą́ąʼ da; diyin dabidiʼníinii bichʼįʼ didlidgo nááhániihii náádajiiłniihii índa doo yáʼáshóonii baa jookahígíí tʼáadoo bitsʼádadziiskai da.
6 Éí bąą Júdahgi kin hadaasʼáágóó índa Jerúsalemgi tʼóó báhádzidgo bee atéʼéshʼíinii áádóó sháhóóchįįdígíí bee hodiiltłahgo dahóóchxǫʼ, áko díí jı̨́įdi kintsʼiil tʼéí dah naazhjaaʼ.
7 Éí bąą kʼad, Ízrel dineʼé biDiyin God tʼáá ałtsoní bee Bóhólníihii kóní, Haʼátʼíí lá biniyé díí doo yáʼáshóonii ayóó átʼéii bee atíʼadadołnéehgo Júdah dineʼé bitahdóó diné áádóó asdzání áádóó áłchíní índa awééchíʼí ádadoołdįįłgo doo łaʼ dadoohdzih da?
8 Jó, Ííjip góyaa oonáago áadi tádadohnééh índa tsin bijeeh dilidgo łikání halchinii diyin dabidiʼníinii bichʼįʼ náádahołniihgo nihílaʼ bee baa nidaohkaígíí bikʼee shádahoshoołchįįd, áko ánihidiʼdooldįįł áádóó hóyéeʼgo nihá haʼdoodzih índa nihokááʼgóó ałʼąą dineʼé bitahgóó tʼóó nihá nidahałtʼiʼ dooleeł.
9 Danihizhéʼé yę́ę doo yáʼáshónígi ádáátʼįįdii índa Júdah dineʼé aláahgo bindanitʼaʼí doo yáʼáshónígi ádáátʼįįdii índa bidaʼasdzą́ą́ doo yáʼáshónígi ádáátʼįįdii áádóó tʼáá nihí doo yáʼáshónígi ádaotʼįįdii índa Júdah kéyahdi áádóó Jerúsalemgi kintaa daʼaztiingóó nihedaʼasdzą́ą́ doo yáʼáshónígi ádáátʼįįdiísh baa deisoonah?
10 Nidi díí jı̨́įjįʼ tʼah doo ádaa dahojoolbáʼí ídaʼdilnéeh da índa shibee hazʼáanii áádóó bee nihoníʼáanii nihaa diníʼáanii índa danihitaaʼ baa diníʼáanii doo deidósin da nítʼééʼ áádóó tʼáadoo yikʼehgo deíkai da.
11 Éí bąą Ízrel dineʼé biDiyin God tʼáá ałtsoní bee Bóhólníihii kóní, Nihichʼįʼ nihodiyeeshnaał áádóó Júdah dineʼé tʼáá ałtso áhodeeshdįįł biniyé nihikʼijįʼ deeshłeeł, jóʼakon.
12 Júdah dineʼé daadziihígíí Ííjip kéyah góyaa diiʼnéełgo áadi kéédahwiitʼı̨́į doo danízinígíí nahjįʼ kóhodeeshłííł, áko éí Ííjip kéyahdi dazhdínóonééł; diltłish bee nidahodiʼdootsił áádóó dichin dahodooghą́ą́ł; aʼoh ádaatʼéédóó ayóó ádaatʼéejįʼ diltłish bee dazhdínóonééł índa dichin nidahodoołtsił; dabiʼdódziihii áádóó bikʼee tʼóó ił adahayóii áádóó doo yáʼáshǫ́ǫ́góó bá yátiʼii índa tʼóó bá nahatʼiʼii dazhdooleeł.
13 Jerúsalem atéshłaaígíigi átʼéego Ííjip kéyahgi kéédahatʼínígíí diltłish bee áádóó dichin bee índa naałniih bee atídeeshłííł.
14 Áko Júdah dineʼé daadzíʼígíí Ííjip kéyahdi kéédahatʼı̨́į dooleeł biniyé ákóyaa adahaaznáanii áádóó Júdah kéyahgóó nídadiiʼnéełgo tʼáá áadi kéédahwiitʼı̨́į doo, danízingo yídin danilíinii éí doo łaʼ yisdázhdoogáał da índa doo łaʼ jidoodzih da, háálá doo łaʼ nízhdoodáał da, tʼáá hazhóʼó tʼáá díkwíí yisdáhastłʼáhígíí éí tʼéí doodzih.
15 Ákohgo diné éí beʼasdzą́ą́ danilíinii diyin dabidiʼníinii yichʼįʼ didlidgo nááhániihii náádayiiłniihgo bił béédahózinii tʼáá ałtso áádóó asdzání ákǫ́ǫ́ naazíinii tʼáá ałtso índa Ííjip kéyahgi Páthras nahósʼaʼgi diné kéédahatʼíinii tʼáá ałtso ayóó ánéelą́ąʼgo áłah silı̨́įʼgo Jeremáíyah yichʼįʼ hadaasdzíiʼgo kódaaní,
16 Bóhólníihii bízhiʼ binahjįʼ saad bee nihichʼįʼ háínídzíʼígíí doo deisíníiltsʼą́ąʼ da doo.
17 Nidi tʼáá aaníí saad tʼááłáʼí níʼánígo bee hadahaadzíiʼii bidaʼdiilnííł; tʼáá nihí índa danihizhéʼé yę́ę áádóó aláahgo nihindantʼáii índa nihinanitʼaʼí danilı̨́ı̨́ nítʼééʼ yę́ę Júdah kéyahgi kin hadaasʼáágóó áádóó Jerúsalemgi kintah daʼnítiingóó didlidgo nááhániihii áádóó yanáadziʼgo nááhániihii éí wótʼááhdę́ę́ʼ asdzą́ą́ naatʼááh bidiʼníinii bichʼįʼ náádahiilniiʼii tʼáá ákótʼéego náádahiilniih doo; íídą́ą́ʼ tʼéiyá nihichʼiyąʼ bee ádaʼazįįd nítʼééʼ índa doo nihąąh daatéeh da nítʼééʼ índa doo nihichʼįʼ nidahwiiʼnáa da nítʼééʼ.
18 Nidi didlidgo nááhániihii éí wótʼááhdę́ę́ʼ asdzą́ą́ naatʼááh bidiʼníinii doo bichʼįʼ náádahiilniih da índa yanáadziʼgo nááhániihii doo bá yáádeiidziʼ da dasiidlı̨́ı̨́ʼdóó téʼéʼı̨́ biih niideeʼ áádóó diltłish bee índa dichin bee ánihidiʼniildįįd.
19 Wótʼááhdę́ę́ʼ asdzą́ą́ naatʼááh bidiʼníinii bichʼįʼ didlidgo nááhániihii nínádahiilniih yę́ędą́ą́ʼ áádóó yanáadziʼgo nááhániihii bá yáádeiidziʼ yę́ędą́ą́ʼ tsʼídá nihahastiin nihídaóltąʼgo ázhnoolninígíí bikʼehgo bááh yázhí ándeiilʼįįhgo bee bichʼįʼ nidahwiidláá nítʼééʼ áádóó yanáadziʼgo nááhániihii bá yáádeiidziʼ nítʼééʼ.
20 Ákohgo Jeremáíyah éí hastóí índa sáanii éí diné tʼáá ałtso tʼáá ákótʼéego hachʼįʼ hadahaasdzíʼígíí ábizhdííniid,
21 Júdah kéyahgi kin hadaasʼáágóó índa Jerúsalemgi kintaa daʼaztiingóó nihí áádóó danihizhéʼé yę́ę índa aláahgo nihindantʼáii áádóó nihinanitʼaʼí danilı̨́ı̨́ nítʼééʼ yę́ę índa diné nihikéyah yiiʼ kéédahatʼínígíí tsin bijeeh dilidgo łikání halchinii náádayiisniiʼii éí Bóhólníihii tsʼídá yénálniihgo yaa nitsíkees.
22 Doo yáʼáshǫʼ ádaohdzaaígíí índa doo yildinígi ádaohtʼįįdígíí biniinaa Bóhólníihii doo asohyidoosʼįįd da; éí bąą díí jı̨́įdi nihikéyah áhootʼéhígi áhootʼé: kintsʼiil tʼéí hadaasʼá áádóó bikʼee tʼóó ił adahayóí áádóó doo yáʼáshǫ́ǫ́góó bá yádaatiʼ índa doo nidaagháhí da.
23 Didlidgo nááhániihii náádahisoołniiʼígíí biniinaa Bóhólníihii bichʼįʼ ádił nidaʼayohsíʼígíí áádóó Bóhólníihii ánínígíí tʼáadoo bikʼeh dahosoołʼįįdígíí áádóó bibee hazʼáanii áádóó yee nihwiizʼáanii índa yee hahaasdzíiʼii tʼáadoo bikʼeh danohkaígíí biniinaa kótʼéego díí jı̨́įdi nihił áhootʼéhígi átʼéego doo yáʼáshónígi ánihiʼdiilyaa.
24 Áko Jeremáíyah éí diné tʼáá ałtso índa sáanii tʼáá ałtso áyidííniid, Júdah dineʼé danohłíinii, tʼáá ánółtso Ííjip kéyahgi kéédahohtʼíinii, Bóhólníihii áníinii deísínółtsʼą́ą́ʼ:
25 Ízrel dineʼé biDiyin God tʼáá ałtsoní bee Bóhólníihii kónihiłní, Nihí áádóó nihedaʼasdzą́ą́ bił hadasoohdzíiʼgo índa nihílaʼ bee bidaʼohłaago kódadohní, Bee ádee hadasiidzíiʼii éí tsʼídá bidaʼdiilnííł; wótʼááhdę́ę́ʼ asdzą́ą́ naatʼááh bidiʼníinii bichʼįʼ didlidgo nááhániihii náádahiilniih doo áádóó yanáadziʼgo nááhániihii bá yáádeiidziʼ doo. Nihílááháneeʼ bee ádee hadasoohdzíiʼii lą́ daʼsoohłı̨́įʼgo tsʼídá bidaʼohłééh.
26 Éí bąą Júdah dineʼé Ííjip kéyahgi kééhohtʼíinii, tʼáá ánółtso Bóhólníihii ánihiłníinii deísółtsʼą́ą́ʼ. Bóhólníihii ání, Shízhiʼ ayóó átʼéii bee ádee hadeesdzíiʼgo Júdah dineʼé Ííjip kéyah tʼáá átʼéé nítʼééʼ kéédahojitʼínígíí éí, Tsʼídá tʼáá aaníí Bóhólníihii hiná, ákótʼéego áhodoonííł; doo łaʼ náázhdidooʼniiłgo bee hanáázdoodzih da, jóʼakon.
27 Yáʼátʼéehii éí doo biniyé hahasíid da doo, nidi doo yáʼáshǫʼ hachʼįʼ áhodooníłígíí biniyé hahasíid doo; Ííjip kéyahgi Júdah dineʼé kéédahojitʼínígíí tʼáá ádzíłtso ałtso ádzísdįįdjįʼ diltłish áádóó dichin bee hodiʼdoogą́ą́ł.
28 Nidi diltłish bitsʼąą yóóʼádahidínóochéłígíí éí Ííjip kéyahdę́ę́ʼ hááhidoolwołgo Júdah kéyah yiih náhidookahígíí tʼáá díkwíltʼéhí doo; áadi índa Júdah dineʼé daadziihígíí ádaaníinii daatsʼí, doodaiiʼ shí ádíshníinii daatsʼí bohodoolníiłgo hoł béédahodoozįįł.
29 Bóhólníihii ání, Doo yáʼáshónígi ánihiʼdidoolnííł, dííniidii bohodoolníiłgo nihił béédahózin dooleeł biniyé kweʼé atínihideeshłíłígíí díí bee nihichʼįʼ ééhózin doo:
30 Bóhólníihii kóní, Júdah dineʼé aláahgo binanitʼaʼí Zedekáíyah biʼanaʼí bidiyoołhéełgo hátʼíinii Bábilan dineʼé aláahgo binanitʼaʼí Nébukadnézzar bílákʼee hodííʼą́ yę́ęgi átʼéego Ííjip dineʼé aláahgo binanitʼaʼí Féro-hófra éí biʼanaʼí danilíinii índa dabidiyoołhéełgo hádaatʼíinii baa hodideeshʼááł.
Footnotes
^ Hííbrew kʼehjí kóní.
