Jeremiah 46:1-28
46 Ałʼąą dineʼé bídéétʼiʼii éí Bóhólníihii Diyin God yá halneʼii Jeremáíyah yichʼįʼ yee haadzííʼ,
2 Josáíyah biyeʼ Jiihóíyakim éí Júdah dineʼé aláahgo yinanitʼaʼí nilı̨́įgo dı̨́ı̨́ʼ náhááh góneʼ Bábilan dineʼé aláahgo binanitʼaʼí Nébukadnézzar éí Yufréítiiz tooh nílínígíí bíighahgi Kárkiimish hoolyéegi Ííjip dineʼé aláahgo binanitʼaʼí Féro-nííko bisiláo yikʼeh deesdlı̨́ı̨́ʼ; éí bídéétʼiʼgo Diyin God Ííjip dineʼé kótʼéego yaa haadzííʼ.
3 Naagé áchʼą́ą́h dah yitʼáałii índa naagé dah dadohjáahgo anaaʼjįʼ hidohkááh.
4 Łı̨́ı̨́ʼ bikʼi nidaʼołtʼiʼ áádóó łı̨́ı̨́ʼ bikááʼ haohjeeh; béésh chʼah danihichʼahgo łı̨́ı̨́ʼ nihił naazı̨́; tsiidétáán bikʼi nidazdidlaadgo ádaohłeʼ áádóó béésh ééʼ bee hadadohneʼ.
5 Shinááł haʼátʼíísh biniinaa tsídadeesyizgo tʼą́ą́ʼ náhideeskai? Diné dahayóigo bá nidaabaahii bikʼeh hodeesdlı̨́ı̨́ʼ áádóó tʼáadoo tʼą́ą́ʼ nídadeestʼı̨́ʼí yisdádoojahgo aheeswod; bikʼeʼíyéeʼii tʼáá ałtsodę́ę́ʼ hólǫ́, ní Bóhólníihii.
6 Doo nidadilnaʼii yóóʼoojeeh lágo índa diné hayóii nihił chʼaaʼoolyeed lágo; náhookǫsjígo Yufréítiiz tooh bíighahgi dadeezgoʼgo tʼáá aaníí naaʼahineezdeeʼ.
7 Háísh átʼı̨́įgo tooh yíląąd nahalingo de nídínílʼąąh áádóó tooh nahalingo bíígháán náádadiidááh?
8 Ííjip éí tooh Náil wolyéii yíląądígíí áádóó tooh bíígháán náádadiidáhígíí nahalin, áko ání, Ayóó áníshtʼé deeshłeeł; nihokááʼgóó shóhólníih doo; kin haalʼáii áádóó ákwii kéédahatʼíinii tʼáá bił áhodeeshdįįł.
9 Łı̨́ı̨́ʼ bee nidaohbaahii dadohbááh; tsindaabąąs bijáád naakiígíí bee nidaohbaahii atʼááh wohjeeh, áko diné dahayóii Iithiyópiya dineʼé áádóó Líbiya dineʼé éí naagé nideichʼidii áádóó Lídiya dineʼé éí ałtı̨́ı̨́ʼ nídayiiłtasgo nideichʼidii náás dadoobah.
10 Háálá éí jínígíí biyiʼ Diyin God tʼáá ałtsoní bee Bóhólníihii akʼeh didoodleełgo bá haʼdooʼááł; biʼanaʼí kʼéídidoodlííł biniyé éí jínígíí biyiʼ akʼeh didoodleeł; diltłish adooldiłgo dił ádiiʼ haididoolbı̨́įłgo bił hódínóołdoh, háálá náhookǫsjígo kéyahígíí Yufréítiiz tooh nílínígíí bíighahgóó Diyin God tʼáá ałtsoní bee Bóhólníihii nááhidoonihii bee hólǫ́.
11 Chʼikę́ę́h Ííjip bichʼéʼé nílíinii, Gíliyad kéyah góde hasínáahgo tłah azeeʼ nídiiʼaah; tʼáadoo biniyéhígóó azeeʼ tʼóó ahayóí choidííłʼįįł, háálá doo nándiʼdooldzih da.
12 Bee naa yáhóósįįdii ałʼąą dineʼé dayííniiʼ; chaał hahóółʼáii kéyah tʼáá náhwiistʼą́ą́ nítʼééʼ nihinéstʼeʼ, háálá diné dahayóii ałkʼą́ą́h dahaazhtłizhgo naaʼadahineezdeeʼ.
13 Kótʼéego Bábilan dineʼé aláahgo binanitʼaʼí Nébukadnézzar doonéełgo, Ííjip dineʼé yikʼeh dadidoodleeł, níigo Bóhólníihii éí Diyin God yá halneʼii Jeremáíyah yichʼįʼ haadzíiʼgo ání:
14 Hashtʼeʼádadołnéehgo yéego nisoozı̨́, háálá nihinaagóó diltłish adooldił, diníigo Ííjip kéyahdi áádóó Mígdal kin haalʼáadi áádóó Naf kin haalʼáadi índa Tahápaniiz kin haalʼáadi baa nahólneʼ.
15 Haa léitʼéego nidineʼé dahayóii niʼjįʼ abiʼdiistłʼííd? Doo bídazníłdzil da, háálá Bóhólníihii naaʼahwiiznil.
16 Tʼóó ahayóí naaʼayiiłtłʼiidgo tʼáá aaníí ałkʼi dahiniidéehgo áyiilaa áádóó ádadííniid, Sołtįʼéii, nihide áhósinii bidiltłish bitsʼą́ąjįʼ dah didiijahgo tʼáá nihí nihidineʼé índa kéyah biiʼ nidanihiʼdiizhchı̨́ yę́ęgóó nídiidleeł.
17 Ííjip dineʼé aláahgo binanitʼaʼí Féro éí tʼáadoo biniyéhígóó ayóó áálzaadgo nihootʼáanii bilááhgóó ahwiilzhíishgo áyósin, daaníigo ákwii hahóółʼá.
18 Aláahgo Naatʼáanii éí tʼáá ałtsoní bee Bóhólníihii wolyéii kóní, Tsʼídá tʼáá aaníí hinishná; ákótʼéego Dził Téíbor tʼáadoo bahatʼaadí dziłtahdi siʼánígíí nahalingo índa tónteel bibąąhdi Dził Kármel tʼáadoo bahatʼaadí siʼánígíí nahalingo tsʼídá tʼáá aaníí siláo doonééł.
19 Achʼéʼé nílíinii, Ííjip kéyahdi kééhótʼíinii, yisnááh dííleełígíí biniyé hashtʼeʼádílnééh, háálá Naf kin haalʼáii ałtso nidahidoolkałgo nihidílʼáago áhodoolnííł; ákwii doo naagháhí da doo.
20 Ííjip éí béégashii yáázh biʼádígíí ayóó ánoolninii nahalin nidi, náhookǫsdę́ęʼgo atíʼdoolíiłii hooleeł.
21 Hatahgi diné tʼóó há nidaalnishii ałdóʼ béégashii nidaneelkʼaii nidahalin; éí ałdóʼ tʼą́ą́ʼ hahaazhjéeʼgo tʼáá łaʼ yóóʼaheezhjééʼ, háálá atídahodiʼdoolníiłgo áhodiʼdooldįįłígíí baa honíyáago doo bídazníłdzil da.
22 Tłʼiish oołchʼíísh nahalingo hodiitsʼaʼ doo; siláo yił doonééł; tsin deitseełii nahalingo tsénił yił hadááh doonééł.
23 Azhą́ nahachagii yilááh ánéelą́ą́ʼ, áko doo jóołtaʼ ánéelą́ʼígíí biniinaa tʼáá íiyisí bee hodíłchʼil nidi, hatsin deidootsił, ní Bóhólníihii.
24 Ííjip dineʼé bichʼéʼé tʼóó haa yáhásinígi áhoʼdiʼdoolnííł; náhookǫsdę́ęʼgo dineʼé* bílákʼee hodiʼdooltééł.
25 Ízrel dineʼé biDiyin God, tʼáá ałtsoní bee Bóhólníihii kóní, Kin haalʼá Thiibz hoolyéii* bidiyin bidiʼníinii Áman wolyéii áádóó Féro índa Ííjip bidiyin dabidiʼníinii áádóó aláahgo binanitʼaʼí danilíinii bídaóltąʼgo, índa baa dadzólíhígíí éí atíhodeeshłííł, jóʼakon.
26 Nidahodiiltsił, danízingo hákadantáii baa hodideeshʼááł áádóó Bábilan dineʼé aláahgo binanitʼaʼí Nébukadnézzar índa bá nidaalʼaʼí baa hodideeshʼááł, áádóó bikʼijįʼ tʼáá ałkʼidą́ą́ʼ átʼéhígi átʼéego diné kénááhátʼı̨́į doo, ní Bóhólníihii.
27 Nidi tʼáadoo náníldzidí, Jéíkab shá naalʼaʼí nílíinii, tʼáadoo nitsindáhí, Ízrel yinílyéii, háálá doo deeghánídę́ę́ʼ yisdánídeeshtééł áádóó nitsʼą́ą́dóó oochíiłii yisnááh danilı̨́ı̨́dę́ę́ʼ yisdádeeshnił, jóʼakon, índa Jéíkab nídoodáałgo hanályı̨́įh doo áádóó doo nínáádzíldzid da doo; łaʼda doo hoł yééʼ áhodoolíił da.
28 Bóhólníihii kóní, Jéíkab, shá naalʼaʼí nílíinii, tʼáadoo náníldzidí, háálá nił honishłǫ́, háálá ałʼąą dineʼé bitahgóó tándínííyoodígóó ákǫ́ǫ́ niʼanaʼí tʼáá ałtso áhodeeshdįįł, nidi ni éí doo ałtso ándeeshdįįł da; doo tʼáá íiyisí atíndeeshłíił da, nidi atínániishʼįįhígíí bee hashtʼenideeshłííł!
