Jeremiah 47:1-7
47 Féro tʼah doo Géíza kin haalʼá yikʼeh didleehgóó Filístiya dineʼé* bídéétʼiʼgo Diyin God yá halneʼii Jeremáíyah kótʼéego Bóhólníihii bichʼįʼ hanáánáádzííʼ.
2 Bóhólníihii kóní, Jó, náhookǫsdę́ę́ʼ tó dah didoonah áádóó tó dooląąłgo kéyah tʼáá átʼéé nítʼééʼ índa biiʼ dahólóonii tʼáá ałtso, kin haalʼáii índa ákwii kéédahatʼíinii bikʼi didoolkǫǫł, diné chooʼı̨́ı̨́ł yíká nidadilghaash doo, áádóó ákwii kéyahgi diné kéédahatʼíinii chandeidisiʼ doo.
3 Bilı̨́ı̨́ʼ dahayóigo bikétłʼin dadiitsʼaʼgo bitsindaabąąs bijáád naakiígíí bijáád dadiitsʼaʼgo tʼáá łahjįʼ deíjeehgo hodiitsʼaʼígíí bąą azhéʼé danilíinii bitah nidahaztseedígíí biniinaa badaʼáłchíní dah deididooʼish biniyé tʼáadoo tʼą́ą́ʼ nináhaazhjéeʼ da.
4 Háálá Filístiya dineʼé ałtso nidootsiłgo Táir índa Sáídan kin haalʼáii* yíká anájahii daadziihígíí tʼáá ałtso ádooldįįłgo bichʼįʼ hoolzhish, áko Bóhólníihii éí Káftor kéyahdóó Filístiya dineʼé daadziihígíí yidooghą́ą́ł.
5 Géízagi éí hodiilkǫʼ; Áshkelan kin haalʼá* íísdįįd. Honítsʼaaʼdóó daohdziihii, haash nízáágóó nidaʼádiyołgéesh doo?
6 Bóhólníihii bidiltłish nílíinii, hahgoshąʼ índa hashtʼédidíítʼeeł? Nizis biih náníkęęs; hashtʼeʼdinítʼéego háánílyı̨́ı̨́h.
7 Áshkelan kin haalʼá bikʼijįʼ índa tónteel bibąąhgóóígíí bikʼijįʼ naʼanish dooleełgo Bóhólníihii ákótʼéego bá haadzíiʼgoshąʼ haa yitʼéego hashtʼedítʼée doo?
Footnotes
^ Filístiya dineʼé bikin hadaasʼá ashdlaʼgo łaʼ Géíza hoolyé. Is. 14:29-31; Ezek. 25:15-17; Joel 3:4-8; Amos 1:6-8; Zeph. 2:4-7; Zech. 9:5-7.
^ Filístiya dineʼé bikʼisóó Finííshiya dineʼé éí bikin haalʼá átʼé.
^ Filístiya dineʼé bikin haalʼá náánáłaʼígíí.
