Jeremiah 49:1-39
49 Bóhólníihii éí Áman dineʼé kwííłní, Ízrel dineʼéésh biyeʼké doo dahólǫ́ǫ da? Bííʼ dadooleełiísh doo łaʼ hólǫ́ǫ da? Ákoshąʼ haʼátʼíí biniyé Málkam wolyéii* Géed kéyah bííʼ áyiilaago bidineʼé éí kin hadaasʼáágóó kéédahatʼı̨́?
2 Bóhólníihii ání, Éí bąą Áman dineʼé bikin haalʼá Rábahdi anaaʼ haleehgo dilní didootsʼı̨́ı̨́ł áádóó éí ahiih nídahineezkaadgo yanáaʼáa doo; bikin naazhjaaʼígíí adahididoolkʼą́ą́ł, jóʼakon, áko índa Ízrel dineʼé bííʼ yę́ę bííʼ nídoodleeł, ní Bóhólníihii.
3 Héshban yinílyéii, Rábah nichago ákʼidiitʼaah, háálá Éíʼai kin haalʼá hoolchxǫʼgo ályaa. Rábahdóó atsiʼké danohłíinii, yéego daohcha; tłʼoh yishbizh bee áká daołzisgo atínídadinohdleehgo kin haalʼá binaa ahéédaʼastłʼinígíí bineʼdę́ę́ʼ ałnááhohjah, háálá Málkam wolyéii áádóó bináádaʼiiłniihii índa bá nidaalʼaʼí naatʼáanii danilíinii tʼáá yił biʼdisnáágóó dadooleeł.
4 Háishąʼ shikʼiidoojah? níigo binaalyeʼé yaa dzólíii, achʼéʼé yóóʼanáádzáii nílíinii, haʼátʼíísh biniyé nihonítsʼaaʼgóó bee ádaʼazįįdígíí bee ádaa hóʼniih?
5 Tʼáá ałtsoní bee Bóhólníihii ání, Jó, tʼáá ałtso ninaagóó kéédahatʼínígíí bééníldzidgo ándeeshłííł, áádóó tʼáá ałtso tʼáadoo łaʼ tʼą́ą́ʼ nídéestʼı̨́ʼí tsʼídá tsı̨́įłgo chʼídínóolkał índa áłah ánábidoodlíiłii tʼáá ádin doo.
6 Áádóó bikʼijįʼ Áman dineʼé yisnááh danilíinii nahjįʼ kódeeshłíiłgo daabííʼ yę́ę bííʼ nídadoodleełgo ádeeshłííł, ní Bóhólníihii.
Íídam dineʼé bichʼįʼ náasdi áhodoonííł baa haneʼ
7 Tʼáá ałtsoní bee Bóhólníihii éí Íídam dineʼé* yaa haadzíiʼgo kóní, Tííman kéyahdiísh hódzą́ ásdįįd? Diné akékʼeh hooʼı̨́įgo bił ééhózinii kótʼéego nínígíísh bitsʼą́ą́ʼ ásdįįd? Bibee dahódzánígíísh bee ádaasdįįd?
8 Díídan kéyahgi kéédahohtʼíinii, naanáhkáahgo dah dínóohdzoodgo hazhóʼó nídadohtʼįįh, háálá Íídam atéshłéehgo Íísa bee atéshłaa yę́ę bee atíhodeeshłííł.
9 Chʼil naʼatłʼoʼii dayóbéii naa yíkaigo łaʼ tʼáá bąąh dah naaznilgo ádeidoolííł; aniʼįįhii tłʼéeʼgo yíkaigo hwiih daazlı̨́įʼjįʼ atídaʼdoolííł.
10 Íísa éí tʼáá łichíʼígo naagháago áshłaa; nínádítʼı̨́ı̨́h yę́ęgóó báádaʼdíłtsooz, áko doo nídótʼı̨́łígi ádzaa da. Baʼáłchíní índa bikʼisóó danilíinii áádóó yił kéédahatʼíinii atídaalyaa áádóó hó ałdóʼ ájídin.
11 Áłchíní bizhéʼé bąąh ádaasdįįdígíí bíniʼ tʼáá ákǫ́ǫ́ nidaakaigo shí baa áháshyą́ą doo, áádóó asdzání bąąh ádahasdįįdii niiʼ kéédahatʼíinii hániʼdii shaa dadzólí.
12 Háálá Bóhólníihii kóní, Jó, doodlı̨́įłii doo deidoodlı̨́ı̨́łgóó bá hadaʼiisdzíiʼii éí tʼáá aaníí deidoodlı̨́ı̨́ł, áko ni daatsʼí doo atíndiʼdoolníił da; tʼáá atíndiʼdoolnííł; doodlı̨́įłii tsʼídá díídlı̨́ı̨́ł,
13 háálá tʼáá shí ádee hadeesdzííʼ, ní Bóhólníihii, Bázra kin haalʼá tʼóó bikʼee ił ahayói doo; tʼóó bá nahatʼiʼ doo, kintsʼiil tʼéí hadaasʼáa doo, hóyéeʼgo bá haʼoodzíiʼgo hazʼą́ą doo áádóó kin hadaasʼáhígóó tʼáá áłahjįʼ kintsʼiil tʼéí dah naazhjaaʼgo ahóyéelʼáa doo.
14 Bóhólníihii éí haneʼ shichʼįʼ áyiilaago disétsʼą́ą́ʼ áádóó ałʼąą dineʼé bitahgóó haneʼ neiʼáii eelʼaʼgo kóní, Ahíʼáhoohjáahgo bichʼįʼ dohnéehgo bikʼiohjeeh.
15 Jó, ałʼąą dineʼé bitahgóó tʼáá díkwíigo áádóó dadineʼé daniʼı̨́įgo ándeeshłííł.
16 Tséghą́ąʼdi tsé binídaʼastséélgóó kéédahohtʼíinii, bee nihádahadzidii índa bee ádaa dadzíínóhdlíii nihinaʼazloʼ; azhą́ atsá bitʼoh ííłʼínígi ánízáadi nihitʼoh ádaohłaa nidi, áádę́ę́ʼ adanihidiyeeshtłʼił, ní Bóhólníihii.
17 Íídam kéyah ałdóʼ tʼóó bikʼee ił ahayói doo; ákǫ́ǫ́ yą́ą́h nídadikahii tʼáá ałtso bikʼee tʼóó bił adahayóigo, Tłehee yéiʼ, daaníigo doo yáʼáshónígi áálʼįįdii nídeinílʼįįh doo.
18 Bóhólníihii ání, Sádam áádóó Gomárah kin haalʼáii índa binaagóó kin dah naazhjaaʼígíí atélyaa yę́ęgi átʼéego diné łaʼ índa baʼáłchínída doo łaʼ ákwii kééhatʼı̨́į da doo.
19 Jó, bidziilgo kééhatʼínígíí bichʼįʼ Jórdan tooh nílínígi hodíłchʼiltahdę́ę́ʼ náshdóítsoh bitsiijįʼ daditłʼooígíí nahalingo hachʼįʼ nídidoodááł, háálá tʼáadoo hooyání hatsʼą́ąjįʼ yóóʼadoojahgo ádeeshłííł áádóó nídiiltínígíí honiyé nideeshtééł. Háishąʼ shígi átʼé? Háishąʼ aa hwiinítʼı̨́įjįʼ áchʼą́ą́h hadeesdzih biniyé shiidoosįįł áádóó háí éí dibé yaa áhályą́ągo shíníłdzil doo?
20 Éí bąą Bóhólníihii éí Íídam dineʼé yinahazʼánígíí áádóó Tííman kin haalʼáagi kéédahatʼíinii yinahazʼánígíí deísółtsʼą́ą́ʼ: tʼáá aaníí, hó áádóó haʼáłchíní tʼáá hoł adahodínóołkał; tʼáá aaníí kéédahojitʼínígi doo naagháhígóó áhodoolííł.
21 Hakʼeh hodeesdlı̨́įʼgo niʼ nahaasnááʼ; dajichaígíí Tónteel Łichííʼgóó nidi hodiistsʼą́ą́ʼ.
22 Jó, atsá nahalingo chʼídootʼahgo Bázra kin haalʼáii yikʼijįʼ nilı̨́įgo bitʼaʼ yidoołbał áádóó éí bijı̨́įdi Íídam dineʼé dahayóii dabijéí éí asdzání awééʼ bídiiʼnahgo bijéí átʼéhígi átʼéego bił daayéeʼ doo.
Damáskas bichʼįʼ náasdi áhodoonííł baa haneʼ
23 Damáskas kin haalʼá éí kótʼée doo; Héímath kin haalʼá áádóó Ákpad kin shijaaʼ doo yáʼáshónígi átʼéégóó dayííniiʼígíí bąą tʼóó baa yáhásinígi áhoʼdiilyaa, áko bąąh nidahazkaad. Tónteel doo hashtʼeditʼeehii nahalingo doo hashtʼedaditʼeeh da.
24 Damáskas éí yee ákʼidooldziłii bee ásdįįd; yóóʼadoolwoł yiniyé náhaayáago neesyiz. Asdzání iʼniiłchínígi átʼéego bił hodiniihgo yínííł nilı̨́.
25 Dooládóʼ kin haalʼáago baa shił hózhónígíí éí tʼáadoo bikʼi honoodzood da.
26 Éí bąą hakin haalʼáagi kintah daʼnítiingóó hadineʼé ániid nidaakaii daninéego naaʼahidínóodah. Áádóó éí jínígíí biyiʼ diné nidaabaahii tʼáá ałtso nidadootsił, ní tʼáá ałtsoní bee Bóhólníihii.
27 Áádóó Damáskas ditą́ągo binaa ahééʼítłʼinii bohodideeshniłgo Ben-héídad wolyéii bibineʼ naʼadziʼii adidookʼą́ą́ł.
Kíídar dineʼé áádóó Héízar dineʼé bichʼįʼ náasdi áhodoonííł baa haneʼ
28 Kíídar dineʼé índa Héízar dineʼé bee bóhólníihgo nahazʼáanii éí Bábilan dineʼé aláahgo binanitʼaʼí Nébukadnézzar yikʼeh deesdlı̨́įʼii íídą́ą́ʼ Bóhólníihii haa halneʼgo kóní, Hashtʼeʼádadołnéehgo haʼaʼaahjigo Kíídar dineʼé kéédahatʼíinii atínílééh.
29 Dahaníbaal adeidiyoojih áádóó nidazhniłkaadii adeidínóołkał índa dáńʼdazhdiłbałii áádóó dahaleetsʼaaʼ áádóó dahaghą́ą́ʼaskʼidii ałtso ádá shódeidoołtʼeeł, áádóó haatįįh yínáago, Tʼáá ałtsodę́ęʼgo yééʼ hólǫ́! dahałníi doo.
30 Héízargi kéédahohtʼíinii, yóóʼanoohdzoodgo nízaadgóó yóóʼadahołyeed; tsédaanííʼgóó nídadohtʼįįh, háálá Bábilan dineʼé aláahgo binanitʼaʼí Nébukadnézzar nihinahazʼą́ áádóó nihinahazgiz, ní Bóhólníihii.
31 Hashtʼeʼádílnéehgo diné daʼatʼíinii tʼáadoo bidaʼdiiłʼáhígóó kéédahatʼíinii bichʼįʼ dínééh; tʼáá sahdii kéédahatʼı̨́įgo doo dáńʼdaditı̨́įh da índa doo bichʼą́ą́h dáńʼdadilkał da, ní Bóhólníihii.
32 Dabighą́ą́ʼaskʼidii éí bąąh nidaʼaztseedii dadooleeł índa dabibéégashii éí bąąh daʼoogą́ą́ʼ dooleeł áádóó dabitsiiʼ bibąąhgóó nídeishihii* tadahwiidínéeshkał áádóó atídahodoolíiłii tʼáá ałtsodę́ę́ʼ haatįįh dadookahgo ádeeshłííł, ní Bóhólníihii.
33 Héízargi éí mąʼii dabiʼáan doo áádóó hoolʼáágóó doo naagháhí da doo. Diné doo łaʼ ákweʼé índa baʼáłchíní doo łaʼ ákwii kééhatʼı̨́į da doo.
Íílam dineʼé bichʼįʼ náasdi áhodoonííł baa haneʼ
34 Júdah dineʼé aláahgo binanitʼaʼí Zedekáíyah tʼóó hodeesááʼ yę́ędą́ą́ʼ Bóhólníihii éí Íílam dineʼé,* Kótʼée dooleeł, níigo Diyin God yá halneʼii Jeremáíyah yichʼįʼ haadzíiʼgo kóní,
35 Tʼáá ałtsoní bee Bóhólníihii kóní, Íílam dineʼé beʼałtı̨́ı̨́ʼ éí agháago bee bidziilii kʼídeeshtih, jóʼakon.
36 Áádóó Íílam dineʼé éí tʼáá dı̨́ı̨́ʼdę́ę́ʼ hachʼįʼ daníyolgo ádeeshłíiłgo tʼáá dı̨́ı̨́ʼgóó hoł taidooyoł. Áádóó Íílam dineʼé chʼíneelkaadii éí ałʼąą dineʼé tʼáá ałtso bitahgóó tadzooswod doo.
37 Íílam dineʼé éí bidaʼanaʼí dabinááł índa dabidooghą́ąłii dabinááł nitsidaakaigo ádeeshłííł áádóó tʼóó báhádzidgo sháhóóchįįdígíí bee doo yáʼáshónígi áhodeeshłííł. Ałtso áhoséłdįįdjįʼ diltłish hakééʼ deeshʼaał, ní Bóhólníihii.
38 Áádóó Íílam kéyahgi shibikááʼdóó nahatʼáii nideeshʼááł, áko áádóó aláahgo naatʼáanii índa naatʼánii danilíinii áhodeeshdįįł, ní Bóhólníihii.
39 Nidi akéeʼdi yoołkáałdi díí baa hodoolzhish: Íílam dineʼé yisnááh danilíinii nahjįʼ kódeeshłíiłgo daabííʼ yę́ę bííʼ nídadoodleełgo ádeeshłííł, ní Bóhólníihii.
Footnotes
^ Málkam éí Mólek ałdóʼ wolyé. Éí Áman dineʼé bidiyin bidiʼníinii nilı̨́įgo aláahgo binanitʼaʼí yiłní.
^ Jéíkab bínaaí Íísa baʼáłchíní daʼahílchíihii éí Íídam dineʼé danilı̨́. Gen. 27:30-40; Is. 34:5-17; 63:1-6; Ezek. 25:12-14; 35:1-15; Amos 1:11,12; Obad. 1-14; Mal. 1:2-5.
^ Hííbrew kʼehjí kóní. Lev. 19:27; Jer. 9:25,26.
^ Bábilan kéyah haʼaʼaahjigo kéyah.
