Jeremiah 50:1-46
50 Kótʼéego Diyin God yá halneʼii Jeremáíyah binahjįʼ Bóhólníihii éí Bábilan dineʼé índa Kaldíya dineʼé bikéyah yikʼijįʼ haadzííʼ.
2 Bábilan dineʼé éí biʼdisnááh; Bel diyin bidiʼníinii tʼóó baa yáhásinígi ábiʼdiilyaa, Mérodak diyin bidiʼníinii éí nibiʼdiistiʼ; biʼedaʼalyaii tʼóó baa yáhásinígi ádabiʼdiilyaago nidabiʼdiistiʼgo ałʼąą dineʼé bee bił dahołneʼgo dah naʼatʼaʼgo ádaohłééh. Baa dahołneʼgo haneʼ bitaadaohʼaʼgo tʼáadoo nidanołʼiní.
3 Háálá náhookǫsdę́ęʼgo łaʼ dineʼé hakʼijįʼ nídidoonéełgo hakéyah doo naagháhígóó ádahodoolíiłgo ákwii doo łaʼ kééhatʼíní da doo; diné éí naaldlooshii tʼáá ałtso yił chʼíheezná.
4 Éí hoolzhishdi índa éí yoołkáałdi Ízrel dineʼé índa Júdah dineʼé daachago biDiyin God hádaatʼı̨́įgo nídeíkáah doo, ní Bóhólníihii.
5 Záíyanjigo* dadéezʼı̨́įʼgo atiin yíndaʼídíłkidgo kódaaníi doo, Sołtįʼ, bee ahaʼdeetʼáanii doo baa hodiyooʼnahii hoolʼáágóó bee Bóhólníihii bididiikah.
6 Shidineʼé éí dibé yóóʼaheeskaígíí nidahalin; baa ádahalyáanii yóóʼadabiizhʼeezhgo dziłghą́ąʼdi tʼóó bidaʼasniiʼ; dziłghą́ą́ʼdóó dah daaskʼidgóó nidaakaigo háádahalyįhgi yaa dayooznah.
7 Bikʼídahaaskaígíí tʼáá ałtso dabooldéél áádóó biʼanaʼí ádaaní, Nihí doo ádidahodiiltʼiʼ da, háálá Bóhólníihii éí tʼáá ákogi éʼétʼéii bee hólónígíí, tʼáá éí Bóhólníihii bee dahazhéʼé yę́ę bił chodahooʼíinii bichʼįʼ ádił nidaʼjiisííʼ.
8 Bábilan dineʼé áádóó Kaldíya dineʼé bitahdóó nahjįʼ haohnéehgo tłʼízíchǫǫh éí tłʼízí yilą́ąjįʼ yikahígíí nidahonohłin.
9 Háálá náhookǫsdę́ęʼgo Bábilan dineʼé biniyé ałʼąą dineʼé ayóó ádaatʼéii ahiih dadoonéełgo yichʼįʼ nídidoonééł; yichʼįʼ ałkééʼ niʼahidooʼniłgo dahodoołnééł; diné doo naʼasiʼii bikʼaaʼ nidahalingo doo łaʼ chʼééh nidadoobah da.
10 Kaldíya dineʼé łíbidiʼdoocháásh áádóó diné łídahodoocháashii hwiih dadooleeł, ní Bóhólníihii.
11 Shííʼ dooleełii atídaohłaaígíí danohłíinii, baa nihił dahózhǫ́ǫgo áádóó baa nihił nidahoozhǫǫhgo biniinaa índa béégashii yáázh hootsogóó naalgeedígíí índa łı̨́ı̨́ʼchogi áníinii nidahonohłingo biniinaa
12 nihimá tʼóó nihaa yádínóozįįł; nihishchíinii tʼáá íiyisí ádaa yádínóozįįł, háálá ałʼąą dineʼé bitahdóó aʼohgo dineʼé jílı̨́į doo, hoł hazʼánígi honoojítah dooleeł índa tʼóó dzígaigo doo naagháhí da dooleeł, jóʼakon.
13 Bóhólníihii tʼóó báhádzidgo hashké niidzı̨́ʼígíí biniinaa ákwii diné doo łaʼ kééhatʼı̨́į da doo áádóó tʼáá átʼé doo naagháhí da doo. Bábilan dineʼé yą́ą́h nídadikahii tʼáá ałtso bikʼee tʼóó bił adahayói doo áádóó, Tłehee yéiiʼ, daaníi doo.
14 Ałtı̨́ı̨́ʼ nídaołtasii tʼáá ánółtso Bábilan dineʼé bináłzhíísh; kʼaaʼ tʼáadoo áádaohsįįhí deínółtʼóóh, háálá Bóhólníihii yichʼįʼ ádił asiih.
15 Anaaʼjįʼ hódadołwoshgo honáłzhíísh; ááhoostʼįįdgo yadidiilchid, yee niłdzilii naaʼahineezdeeʼ; binaa ahéédaʼastłʼinii naaʼaheeskaad, háálá kótʼéego Bóhólníihii kʼéédiidzaa. Kʼéédadohdlééh; łaʼ ádayííłʼįįdígi átʼéego tʼáá ákónídaohdlééh.
16 Bábilan kéyahdóó kʼééʼdídléehii áádóó daʼagizhgo bee iikaałí neichʼidii naniłtseed; diltłish bikʼee bił yééʼ dahazlı̨́įʼgo tʼáá bí bidineʼé yichʼįʼ nidahididoolwoł áádóó tʼáá bí bikédaayahgóó anídahidínóochééł.
17 Dibé nahalingo Ízrel dineʼé tabidiʼnooskaad; náshdóítsoh bitsiijįʼ daditłʼooígíí yóóʼabinííłkaad; tʼóó chʼóóshdą́ądi Asíriya dineʼé aláahgo binanitʼaʼí ałtso booldéél, áádóó akéeʼdi Bábilan dineʼé aláahgo binanitʼaʼí Nébukadnézzar bitahwiiztiʼ.
18 Éí bąą Ízrel dineʼé biDiyin God tʼáá ałtsoní bee Bóhólníihii kóní, Tʼáá Asíriya dineʼé aláahgo binanitʼaʼí atéshłaaígi átʼéego Bábilan dineʼé aláahgo binanitʼaʼí áádóó bikéyah atídeeshłííł, jóʼakon.
19 Áádóó índa Ízrel dineʼé kééhatʼı̨́ı̨́ nítʼééʼ yę́ęgi ninádeeshʼnił áádóó Dził Kármel áádóó Béíshan kéyahdi náádaʼayą́ą doo, áádóó Íífreiyim kéyahdi índa Gíliyad kéyahdi daadziłígóó biiʼ sizíinii hwiih nilı̨́į doo.
20 Éí yoołkáałdi índa éí hoolzhishdi Ízrel dineʼé yee ádił asiihii háʼdéestʼı̨́įʼ doo, nidi ádin doo, áádóó Júdah dineʼé yee ádił asiihii chʼééh hádazhdídóoʼįįł, háálá áádasísįįdii ádił nidaʼiisíʼígíí bá kʼéédaʼdeeshchxǫǫł, ní Bóhólníihii.
21 Merathéíyim* kéyahgóó áádóó Pííkad dineʼé bichʼįʼ doohnéełgo nidadoołtsiłgo tsʼídá ałtso ádadoołdįįł, áádóó bee nihichʼįʼ haasdzíiʼii bidaʼohłééh, ní Bóhólníihii.
22 Ayóó átʼéego atíʼoolníiłgo kéyahdi anaaʼ hólǫ́ǫgo hodiitsʼaʼ.
23 Dooládóʼ nahasdzáán bikááʼgóó bee naʼalneʼígíí ahááltǫʼ áádóó nibiʼdiistiʼ da! Dooládóʼ ałʼąą dineʼé bitahgóó Bábilan dineʼé yę́ę tʼóó bikʼee ił ahayóí silı̨́įʼ da!
24 Bábilan nílíinii, Bóhólníihii hooʼáłígíí doo nínízingóó biniinaa łoh ná niiníʼą́ągo biih yíníyá; doo baa ákonínízingóó nééhoozingo niʼdiiltsood.
25 Bóhólníihii éí bibee anahatʼíinii ąą áyiilaago doo bił hózhǫ́ǫ́jí bee anahatʼíinii chʼíinínil, háálá díí Kaldíya dineʼé bikéyahdi tʼáá ałtsoní bee Bóhólníihii binaanish átʼé.
26 Aghááʼ ádanízáádę́ę́ʼ bikʼijįʼ dadohnééh; binooʼ bá hooghan ąą ádaohłééh; tʼáadoo łaʼ chʼíneełnéhí tłʼoh naadą́ą́ʼ nahalingo yáádaohtséehgo ałtso ádaołdįįh.
27 Naʼatseedjįʼ bidóola* dahidikáahgo tʼáá ałtso nidaołtseed. Doo hojoobaʼ ájíníi da, háálá beiníłką́ atídabidiʼdoolníiłjįʼ ahoolzhiizh.
28 Bóhólníihii nihiDiyin God éí bikin biiʼ sohodizin yá kʼéédiidzaaígíí éí Dził Záíyangi yaa dahodoolnih biniyé Bábilan kéyahdóó yisdádahaaskaii dah díníidzoodgo biinééʼ diistsʼą́ą́ʼ.
29 Bábilan kin haalʼáii yikʼijįʼ ałtı̨́ı̨́ʼ yee nidaabaahii áłah ánílééh, ałtı̨́ı̨́ʼ nídaołtasii bikʼi dinaago bináłzhíísh; tʼááká łaʼ nihił chʼóoyaʼ lágo; yaa nidaaskaígíí bikʼehgo kʼéédadohłééh; yaa naayáhígíí tʼáá átʼé bikʼehgo ákónídadoohdlííł, háálá Bóhólníihii éí Ízrel dineʼé biDiyin nilíinii bichʼįʼ hwee áshohódliʼ nítʼééʼ.
30 Éí bąą hatsíłkéí kintah daʼnítiingóó nidadootsił áádóó éí bijı̨́įdi diné nidaabaahii ałtso nidootsił, ní Bóhólníihii.
31 Tʼáá ałtsoní bee Bóhólníihii Diyin God ání, Ayóo ádaa hóʼniihii nílíinii, nikʼijįʼ nishłı̨́; beidoołkáałgo atínídeeshłíłígíí baa hodoolzhish, jóʼakon.
32 Agháago ádaa haʼniihii didoogoh áádóó naaʼadoogoh áádóó doo łaʼ nábididoodzı̨́įs da; bikin hadaasʼáhígíí bohodideeshʼniłgo binaagóó ałtso hodidoolił.
33 Tʼáá ałtsoní bee Bóhólníihii kóní, Ízrel dineʼé áádóó Júdah dineʼé tʼáá áłah bide áhólzin nítʼééʼ; dabisnánígíí tʼáá ałtso yéego dabótąʼgo doo béédeidóchííd átʼée da nítʼééʼ.
34 Bikʼé nináʼdoodléełgo háábidooʼniłii ayóó ábóodziil; éí tʼáá ałtsoní bee Bóhólníihii wolyé. Nahasdzáán bikááʼgóó kʼé náhodoołeeł áádóó Bábilan kéyahgi nahoʼdigháahgo íidoolííł biniyé tʼáá nináʼdeetʼįįdjįʼ bidineʼé yá naʼakʼíyádoołtih.
35 Kaldíya dineʼé áádóó Bábilan kéyahgi kéédahatʼíinii áádóó binanitʼaʼí danilíinii índa bahastóí dahóyáanii bichʼįʼ diltłish deezʼá, ní Bóhólníihii.
36 Ádaa dadzódlíii bichʼįʼ diltłish deezʼá, áko doo ádahodoolyąął da; bidineʼé dahayóii bichʼįʼ diltłish deezʼá, áádóó nitsidadookah.
37 Dabilı̨́ı̨́ʼ bee nidaʼabaahii índa bitsindaabąąs bijáád naakiígíí bichʼįʼ diltłish deezʼá áádóó bitahgi déʼéyóní danilíinii tʼáá ałtso bichʼįʼ diltłish deezʼáhígíí biniinaa asdzání nidahalin doo; biyódí bichʼįʼ diltłish deezʼá silı̨́įʼgo ałtso bighadoogééł.
38 Tó ádadoodįįłgo nídahodooltsih, háálá éí kéyahgi eʼelyaii tʼéiyá dahólǫ́ áádóó biʼedaʼalyaii yiniinaa tsiʼdeeskai.
39 Éí bąą halbátahdę́ę́ʼ naaldlooshii daʼałchinii índa mąʼii dootłʼizhí ákwii dabighan doo áádóó néʼéshjaaʼ ákwii hólǫ́ǫ doo, áádóó hoolʼáágóó doo łaʼ diné kénááhátʼı̨́į da doo, índa náás oochííłgóó doo łaʼ diné ákwii kééhátʼı̨́į da doo.
40 Diyin God tʼáá Sádam áádóó Gomárah kin haalʼáii índa binaagóó kin dah naazhjaaʼígíí atíyiilaa yę́ęgi átʼéego tʼáá ákótʼéego diné doo łaʼ ákweʼé kééhatʼı̨́į da doo, ní Bóhólníihii.
41 Náhookǫsdę́ę́ʼ łaʼ dineʼé ayóó átʼéii danilı̨́įgo doonééł áádóó nahasdzáán nidahoneesʼą́ą́dę́ę́ʼ aláahgo naatʼáanii tʼóó ahayóí bił hadahodínóolchał.
42 Bikʼaayééł índa bitsiidétáán deíjáah doo; doo daatsʼíídgóó doo aa aʼááh danízin da doo. Biinééʼ éí tónteel diitsʼaʼígi íitsʼaʼ doo, Bábilan bichʼéʼé nílíinii, diné éí łı̨́ı̨́ʼ bił deeztʼiʼígi átʼéego nikʼijįʼ ałtʼááh doojah.
43 Bábilan dineʼé aláahgo binanitʼaʼí yaa hodiiztsʼą́ąʼgo bąąh nahókaadgo bigaan bąąh naníídeeʼ; nitseedzá áádóó asdzání awééʼ bídiiʼnaʼígi átʼéego bił honiigaii.
44 Jó, bidziilgo kééhatʼíinii bichʼįʼ Jórdan tooh nílínígi hodíłchʼiltahdę́ę́ʼ náshdóítsoh bitsiijįʼ daditłʼooígíí nahalingo hachʼįʼ nídidoodááł, háálá tʼáadoo hooyání hatsʼą́ąjįʼ yóóʼadoojahgo ádeeshłííł áádóó nídiiltínígíí honiyé nideeshtééł. Háishąʼ shígi átʼé? Háishąʼ aa hwiinítʼı̨́įjįʼ áchʼą́ą́h hadeesdzih biniyé shiidoosįįł, áádóó háí éí dibé yaa áhályą́ągo shíníłdzil doo?
45 Éí bąą Bóhólníihii éí Bábilan dineʼé yinahazʼánígíí índa Kaldíya dineʼé bikéyahdi yinahazʼánígíí deísółtsʼą́ą́ʼ: tʼáá aaníí, hó áádóó haʼáłchíní tʼáá hoł adahodínóołkał; tʼáá aaníí, kéédahojitʼínígi doo naagháhígóó áhodoolííł.
46 Bábilan dineʼé biʼdisnááh haʼníigo hodiistsʼą́ąʼgo nahasdzáán hideesnááʼ áádóó hacha éí ałʼąą dineʼé bitahgóó diistsʼą́ą́ʼ.
Footnotes
^ Jerúsalem kin haalʼá ááhyiłní.
^ Bábilan kéyah ááhyiłní.
^ Bisiláo éí didlidgo nááhániihii nahalingo ááhyiłní.
