Jeremiah 52:1-34
52 Zedekáíyah éí naadiin łaʼ binááhaigo aláahgo naatʼáanii silı̨́ı̨́ʼ, áádóó Jerúsalem kin haalʼáagi łaʼtsʼáadah nááhaijįʼ aláahgo naatʼáanii nilı̨́ı̨́ nítʼééʼ. Bimá éí Hamútal wolyéego Líbnah kin haalʼáádóó Jeremáíyah yitsiʼ nilı̨́ı̨́ nítʼééʼ.
2 Áádóó Jiihóiyakim éí Bóhólníihii booʼı̨́įgo doo yáʼáshóonii yaa naayáii tʼáá éí bikʼehgo baa nijiyá.
3 Áko Bóhólníihii báhóóchįįdígíí bee Jerúsalemgi áádóó Júdah kéyahgi hólónídóó átsʼą́ąjįʼ nahjįʼ kóhoolaa; ákohgo Zedekáíyah éí Bábilan dineʼé aláahgo binanitʼaʼí yichʼįʼ nídiilteeʼ.
Jerúsalem kin haalʼá bikʼeh hodeesdlı̨́ı̨́ʼ(2Kgs. 24:20-25:7; Jer. 39:1-7)
4 Náhástʼéí náhááh góneʼ aláahgo naatʼáanii nilı̨́įgo neeznáá nídízííd binih índa neeznáágóó yoołkáałgo Bábilan dineʼé aláahgo binanitʼaʼí Nébukadnézzar áádóó bisiláo dah yinéełii tʼáá átʼé yił Jerúsalem deidoołnééł yiniyé niheezná, áko yinaagóó bíniilkʼidgo ádayiilaa.
5 Áko Zedekáíyah aláahgo naatʼáanii nilı̨́įgo łaʼtsʼáadah náháahjįʼ kin haalʼáhígíí tʼáá yináshzhiizh.
6 Dı̨́ı̨́ʼ nídízííd binih índa náhástʼéí yoołkááł góneʼ éí kin haalʼáagi ayóó átʼéego hodííchįįdígíí biniinaa diné éí chʼiyáán bitsʼą́ą́ʼ ádaasdįįd.
7 Ákohgo kin haalʼá tsé ahénátłʼinígíí tłʼóóʼdę́ęʼgo yighá daʼaznilgo, azhą́ Kaldíya dineʼé bisiláo éí kin haalʼá yinásʼáa nidi, siláo tʼáá ałtso éí aláahgo naatʼáanii bitsin bił dah nídzíltsogóó naakigo tsé yítłʼinígíí bitaʼ chʼíhonítʼiʼ góneʼ tłʼéeʼgo chʼídahineezhchą́ą́ʼ, áko siláo éí dzígaijigo adahineezhchą́ą́ʼ.
8 Nidi Kaldíya dineʼé bisiláo éí aláahgo naatʼáanii baa dadeeyáago Jériko dzígaidi yíníłná, áko hasiláo tʼáá ałtso hatsʼą́ą́ʼ taozhjééʼ.
9 Kótʼéego aláahgo naatʼáanii Zedekáíyah deisnáago Héímath kéyahgi Ríblah kin haalʼáadi Bábilan dineʼé aláahgo binanitʼaʼí yił yaa daaskai, áko áadi há nihootʼą́.
10 Áádóó Bábilan dineʼé aláahgo binanitʼaʼí éí Zedekáíyah tʼáá binááł hayeʼké neistseed áádóó tʼáá Ríblahgi Júdah dineʼé binanitʼaʼí danilíinii tʼáá ałtso yiyííghą́ą́ʼ.
11 Índa Zedekáíyah ałdóʼ binááʼ haaʼnil, áádóó Bábilan dineʼé aláahgo binanitʼaʼí éí béésh daʼahólzhaʼí yee dahwiistłʼǫ́ǫgo Bábilan kéyahgóó tsinaabąąs bee hoł aníbą́ą́z. Áko dajiztsą́ bijı̨́įjįʼ awáalyaa góneʼ ahóółtʼeʼ.
Júdah dineʼé dabiʼdisnááh (2Kgs. 25:8-21; 2Chr. 36:17-21; Jer. 39:8-10)
12 Nébukadnézzar éí Bábilan dineʼé aláahgo binanitʼaʼí nilı̨́įgo náhástʼéítsʼáadah náhááh góneʼ, ashdlaʼ nídízííd binih, neeznáá yoołkááł góneʼ, aláahgo naatʼáanii yá naalʼaʼí léiʼ éí siláo yinanitʼaʼí nilíinii Nébuzarʼéídan Jerúsalemjįʼ níyá.
13 Áádóó Bóhólníihii bikin biiʼ sohodizin áádóó aláahgo naatʼáanii bikin áádóó Jerúsalemgi daakinígíí tʼáá átʼé índa diné dahayóii dabighan tʼáá ałtso adeidiyiiskʼą́ą́ʼ.
14 Áko Kaldíya dineʼé bisiláo tʼáá ałtso siláo yinanitʼaʼí yił naakaígíí éí Jerúsalem binaagóó ahéédaʼastłʼinígíí naaʼadayiiskaad.
15 Diné bahojoobáʼígíí łaʼ áádóó kin haalʼáagi diné daadziihígíí índa Bábilan dineʼé aláahgo binanitʼaʼí yaa dahineezhchą́ąʼii tʼáá bił ahóltąʼgo tʼóó ahojíyóigo éí siláo binanitʼaʼí Nébuzarʼéídan ahwiizhʼeezh.
16 Nidi siláo yinanitʼaʼí Nébuzarʼéídan éí kéyahgi diné badahojoobáʼígíí łaʼ chʼil naʼatłʼoʼii yaa ádahalyą́ą dooleeł áádóó dáʼákʼeh yindaalnish doo biniyé tʼáá ákǫ́ǫ́ kéédahojitʼı̨́įgo áhoolaa.
17 Áádóó Bóhólníihii bikin biiʼ sohodizin góneʼ áyah daniiʼáhígíí béésh łitsoii bee ályaii áádóó béésh łitsoii biiʼ táʼádígisí bá siʼánígíí éí Bóhólníihii bikin daabíiʼii Kaldíya dineʼé nidayiiztiʼgo éí béésh łitsoígíí tʼáá átʼé Bábilan kéyahgóó adeizyı̨́.
18 Índa ásaaʼ dantsaaígíí, łeeshchʼiih bee hahakahí, kǫʼ bee daniltsésí, biiʼ táʼádígisí, tsin bijeeh dilidgo łikání halchinii bá łeetsʼaaʼ índa łeetsʼaaʼ béésh łitsoii bee ádaalyaii chodajoołʼı̨́ı̨́ nítʼéeʼii tʼáá átʼé Bábilangóó adeizyı̨́.
19 Áádóó łeetsʼaaʼ nímazí, áádóó tsííd bee nidaakáhí, biiʼ táʼádígisí, ásaaʼ dantsaaígíí, bee hoolʼiní bá yadaaʼáhígíí, tsin bijeeh dilidgo łikání halchinii bá łeetsʼaaʼ índa łeetsʼaaʼ bee yahiidzídígíí, éí óola nídoolyı̨́įʼii índa béésh łigaii nídoolyı̨́įʼii bee ádaalyaii, éí siláo binanitʼaʼí ayííyı̨́.
20 Áko áyah niiʼáii naakigo biiʼ táʼádígisí nitsaaígíí áádóó dóola naakitsʼáadahgo béésh łitsoii bee ádaalyaago biiʼ táʼádígisí biyaa sinilígíí éí aláahgo naatʼáanii Sálaman yę́ę Bóhólníihii bikin biiʼ sohodizin yiniyé áyiilaii ayííyı̨́; éí béésh łitsoii bee ádaalyaii tʼáá átʼé doo dah hizhdooleehígi aníłdáás.
21 Ííʼáhígíí tʼáá áłah dego naadiin tsostsʼid ké silá áníłnééz, tseebíítsʼáadah ké silá áníłtsááz, áko dı̨́ı̨́ʼ bikʼehgo íídéetą́ą́ʼ; biyiʼdę́ę́ʼ éí biiʼ hahodiidzą́.
22 Áádóó bílátah dah siʼánígíí éí tsostsʼidóó nááʼáłnííʼ ké silá áníłnééz; béésh łitsoii naneesdizgo daʼahólzhaʼgo áádóó tsin pámgrenit aneestʼąʼ nahalingo éí bílátah dah siʼánígíí bináztʼiʼgo ályaa; łahjí tʼáá ákótʼéego béésh łitsoii bikʼi naneesdizgo ałdóʼ ályaa.
23 Bááłkʼiisjígo náhástʼédiindóó baʼaan hastą́ą́h tsin pámgrenit bineestʼąʼ nahalingo dah sinil áádóó béésh łitsoii naneesdizgo daʼahólzhaʼí éí tʼááłáhídi neeznádiin tsin pámgrenit bineestʼąʼ nahalingo bąąh sinilgo ahééhoolʼá.
24 Siláo binanitʼaʼí éí aláahgo nááʼiiłniihii Siiréíyah áádóó bikééʼ góneʼ nááʼiiłniihii Zefanáíyah áádóó diné táaʼgo dáádílkał yaa ádahalyánígíí dah yidiiʼeezh.
25 Áádóó kin haalʼáádóó éí siláo yinanitʼaʼí nilíinii łaʼ áádóó diné tsostsʼidgo, éí aláahgo naatʼáanii yíighah naazíinii kin haalʼáagi nidaakaígíí áádóó siláo dah yinéełii yinanitʼaʼí binaaltsoos ííłʼíní, éí kéyahdóó dineʼé ahíyiinilígíí índa kéyahdóó diné hastą́diingo kin haalʼáagi nidaakaígíí dah yidiiʼeezh.
26 Áko éí dinéhígíí siláo yinanitʼaʼí Nébuzarʼéídan éí Ríblah kin haalʼáajįʼ Bábilan dineʼé aláahgo binanitʼaʼí yichʼįʼ yiníʼeezh.
27 Áádóó Bábilan dineʼé aláahgo binanitʼaʼí éí Héímath kéyahgi Ríblahdi nahastseed. Kótʼéego Júdah dineʼé hakéyahdóó dahodisnáago chʼíhoʼdiishtʼeezh.
28 Nébukadnézzar éí díí diné deisnáago ayííʼeezh ni: tsostsʼid náhááh góneʼ Jew dineʼé táadi mííldóó baʼaan naadiin tááʼ ayííʼeezh;
29 Nébukadnézzar aláahgo naatʼáanii nilı̨́įgo tseebíítsʼáadah náhááh góneʼ tseebíidi neeznádiindóó baʼaan tádiindóó baʼaan naaki Jerúsalem kin haalʼáádóó anááyííʼeezh.
30 Nébukadnézzar aláahgo naatʼáanii nilı̨́įgo naadiin tááʼ náhááh góneʼ siláo yinanitʼaʼí Nébuzarʼéídan éí Jew dineʼé tsostsʼidi neeznádiindóó baʼaan dízdiindóó baʼaan ashdlaʼ anááyííʼeezh, áko tʼáá átʼé aheeshtʼeezhígíí dı̨́įdi mííldóó baʼaan hastą́ądi neeznádiin.
Jehóíyakin chʼénáltʼeʼgo Bábilangi ił jíílįįd (2Kgs. 25:27-30)
31 Júdah dineʼé aláahgo binanitʼaʼí Jehóíyakin yisnááh nilı̨́įgo tádiindóó baʼaan tsostsʼid náhááh góneʼ, naakitsʼáadah nídízííd binih naadiin ashdlaʼ yoołkááł góneʼ Íível-meródak éí Bábilan dineʼé aláahgo binanitʼaʼí silı̨́įʼgo, Júdah dineʼé aláahgo binanitʼaʼí Jehóíyakin awáalyaadę́ę́ʼ chʼéiníłtʼeʼ.
32 Áko bá áhwiinítʼı̨́įgo hachʼįʼ yáłtiʼ, áádóó Bábilangi bił aláahgo naatʼáanii dajílínígíí biláahdi dah honeesdá.
33 Áádóó awáalyaají ééʼę́ę háázhdiiʼnilgo ahóyííłką́ąjįʼ tʼáá ákwíí jı̨́ aláahgo naatʼáanii náʼádı̨́hígi níjídı̨́ı̨́h nítʼééʼ.
34 Áko ahóyííłką́ąjįʼ łaʼa jı̨́ bijíłkiin dooígíí éí tʼáá ákwíí jı̨́ Bábilan dineʼé aláahgo binanitʼaʼí haa néidiʼááh nítʼééʼ.
