Jeremiah 6:1-30
6 Bénjamin dineʼé danohłíinii, Jerúsalem kintahdóó hasih hazʼą́ąjįʼ chʼínóhjeeh! Tekówadi deenástsʼaaʼ bideeʼ bee íʼdílzoołí bee ádidoohniił, índa Beth-hákaremdi* bee ééhózin dooleeł biniyé didoołjeeh, háálá náhookǫsdę́ęʼgo doo yáʼáshǫ́ǫ́góó atíʼoolíiłii yitʼíní yileeh.
2 Záíyan bichʼéʼé éí asdzání ayóó ánóolninii áádóó yilzhólíii nahjįʼ kódeeshłííł.
3 Dibé yaa ádahalyáanii bidibé yił haadahidoonééł; hakʼi dinaago biníbaal nideidiyoonił. Tʼááłáʼí nítínígo bił nahazʼą́ą́góó bilı̨́ı̨́ʼ daʼałchozh doo.
4 Hakʼiidohjah biniyé hashtʼedadoohnééh. Nídoohjeehgo ałníʼníʼą́ągo hachʼįʼ hadiiʼnééł. Hatihíláaneʼ kʼadę́ę eʼeʼaah, bikáʼígi iiʼaʼgo chahaʼoh nineez daazlı̨́ı̨́ʼ.
5 Tłʼéeʼgo áajįʼ hadiiʼnéłígíí biniyé nídoohjeeh. Naatʼáanii danilíinii bighan naaznilii atídadiilnííł.
6 Jó, tʼáá ałtsoní bee Bóhólníihii ání, Daʼootsxeełgo tsin daotsxeełígíí Jerúsalem bináʼástłʼinígíí bíilkʼidgo ádaohłééh. Díí kin haalʼáhígíí atídoolníiłii átʼé; ade áhólzinii tʼéiyá ákwii hólǫ́.
7 Tó háálı̨́ı̨́dóó tó háálínígíí nahalingo hó ałdóʼ hatsʼą́ą́dóó doo yáʼáshóonii háálı̨́. Tʼáá naʼníleʼdii iiná índa atíʼélʼı̨́ áádóó yínííł índa adaʼdeeznih tʼéiyá tʼáá áłahjįʼ hólǫ́.
8 Jerúsalem nílíinii, shiiʼ sizíinii doo nitsʼą́ą́ʼ dahodidooleełígíí biniyé índa nihidíínítąądgo doo áándidoolníłígíí biniyé áádóó ákwii kéyahgi diné tʼáá kééhatʼı̨́į dooleełígíí biniyé naniʼdintingo íʼdíínílzin.
9 Tʼáá ałtsoní bee Bóhólníihii kóní, Chʼil naʼatłʼoʼii yaa nahodikaígíí nahalingo Ízrel dineʼé daadziihii tsʼídá ałtso yaa nahodidookah. Chʼil naʼatłʼoʼii yíníbı̨́įʼgo tʼáá ákǫ́ǫ́ bąąh náádidílnííh.
10 Dadiʼdootsʼı̨́łígíí biniyé háí lá bichʼįʼ hadeesdzihgo biʼdeeshnih lá? Bijaaʼ doo daalzı̨́ı̨́ʼgóó* doo tʼáá kʼad daʼdiiztsʼą́ąʼ da, jóʼakon. Shoo, Bóhólníihii bizaad tʼóó yá nidahałtʼiʼgo doo yaa bił dahózhǫ́ǫ da.
11 Éí bąą Bóhólníihii tʼóó báhádzidgo báhóóchįįdígíí shiiʼ hadeezbingo tʼą́ą́ʼ kwíínísingo bąąh nanííłnaʼ. Kintaa daʼaztiingóó áłchíní nidaakaígíí índa dinééh áłah danilínígíí bikʼijįʼ yaanííł. Ahastiin danilíinii índa eʼasdzą́ą́ danilíinii tʼáá ahídawóltąʼgo áádóó haastihii yíighah asłı̨́įʼii dadoolnééł.
12 Dahaghan áádóó hakédaayah índa hodaʼasdzą́ą́ éí náánáłaʼ baa dahididootʼááł, háálá éí kéyahgi kéédahojitʼíinii hachʼįʼ kʼídideeshnih, ní Bóhólníihii.
13 Tʼáá aʼoh átʼéédóó níléí aláahgo átʼéii nilı̨́įjįʼ adáhonooní yaa ádadeestʼą́ągo adádanoolní, áádóó áhodoonííł yaa dahalneʼii danilı̨́ı̨́dóó hodeesʼáago nááʼiiłniihii danilı̨́įjįʼ bindaʼadloʼ.
14 Hashtʼehodítʼé, tʼáá ałtsogóó hashtʼehodítʼé, daaníigo shidineʼé adadeeznihii tʼóó tʼįįhdígo nídayííłdzííʼ. Nidi doo hashtʼehodítʼée da.
15 Doo daaldinígi ádaadzaa yę́ędą́ą́ʼásh yaa yádaniizı̨́ı̨́ʼ? Nidagaʼ, tʼáadoo nidi yaa yádaniizı̨́įʼ da. Yikʼee yaa dadínóotʼáłígíí nidi, tʼáadoo bił béédahózin da. Éí bąą atíháshʼı̨́įjįʼ ahoolzhiizhgo hakʼeh hodidoodleełgo tʼáá íídą́ą́ʼ nidaaztseedii bitahgóó nidahodidootsił, ní Bóhólníihii.
16 Bóhólníihii kóní, Daʼnítiingóó nisoozı̨́įgo dasídóoʼı̨́ı̨́ʼ. Tʼáá náshiinídą́ʼídi bee nidaʼnitinii, éí yáʼátʼéehgo atiinígíí bíndaʼídółkidgo ákǫ́ǫ́ deínóhkááh, áko nihiiʼ naazíinii hááʼáyı̨́ı̨́h yikʼídahidookah. Nidi, Éí bikʼehgo doo dayíníikáah da doo, dadííniid.
17 Nááʼáłdóʼ hadaʼasíid dooleełii éí, Deenástsʼaaʼ bideeʼ bee íʼdílzoołí ánínígíí deísółtsʼą́ą́ʼ, daaníi doo biniyé nihá ninínil. Nidi, Doo tʼáá kʼad dasidiitsʼą́ąʼ da, daaní.
18 Éí bąą, ałʼąą dineʼé danohłíinii, daʼíísółtsʼą́ą́ʼ índa, dah oonéełii nohłíinii, haa dabidiʼdoolníłígíí nihił béédahoozı̨́ı̨́ʼ.
19 Nihokááʼ dineʼé nohłíinii, daʼíísółtsʼą́ą́ʼ: shizaad índa shibee hazʼáanii doo dadzíistsʼą́ą́ʼgóó áádóó doo dazhniizı̨́ʼígíí biniinaa díí dineʼé yaa nitsídaazkéezgo ádáátʼįįdii, éí doo yáʼáshǫʼ átʼéego hakʼijįʼ kódeeshłííł, jóʼakon.
20 Shííba kéyahdóó tsin bijeeh dilidgo łikání halchinii índa kéyah nízaadę́ę́ʼ akaz łikanii kálamas wolyéii haʼátʼíí biniyé shaa hageeh? Didlidgo nááhániihii doo nisxin da, índa náádahołníihii doo shił łikan da.
21 Éí bąą Bóhólníihii kóní, Díí dineʼé yikʼee dadidoogohii bidááhgóó nidahideeshnił, áko azhéʼé índa ayeʼ danilíinii tʼáá łaʼ yikʼee dadidoogoh; hánígóó dabighanii índa dabikʼis ádadoodįįł.
22 Bóhólníihii kóní, Náhookǫsdi kéyahdę́ę́ʼ łaʼ dineʼé yinééł, jóʼakon. Nahasdzáán nidahoneesʼą́ą́dę́ę́ʼ dineʼé ayóó átʼéii bił hadahodínóolchał.
23 Bikʼaayééł índa bitsiidétáán deíjááh. Doo daatsʼíid da. Doo aa aʼááh danízin da. Biinééʼ éí tónteel diitsʼaʼígi íitsʼaʼ. Łı̨́ı̨́ʼ yee deínéeh doo. Diné éí łı̨́ı̨́ʼ bił deeztʼiʼígi átʼéego nikʼijįʼ ałtʼááh doojah, Záíyan bichʼéʼé nílíinii.
24 Baa haneʼgo dasidiitsʼą́ąʼgo nihigaan nihąąh nidaneezdeeʼ. Asdzání éí awééʼ bídiiʼnáʼígi átʼéego nitsiniikaigo nihił dahoniigai.
25 Anaʼí bidiltłish tʼáá ałtsodę́ęʼgo nihichʼįʼ deidéesʼá áádóó yééʼ tʼáá ałtsodę́ęʼgo hólónígíí biniinaa tʼáadoo háajįʼ dah nidaahkaí índa atiingóó tʼáadoo nidaahkaí.
26 Shidineʼé bichʼéʼé nílíinii, tłʼoh azis bee áká nílzis, áádóó łeeshchʼiih biiʼ nanimaasgo hayáázh tʼáá łah diltʼéhígíí baa atínízhdindleehígi átʼéego yínííł naniná, háálá tʼáadoo hooyání atíndoolíiłii nikʼi hwiidooleeł.
27 Shidineʼé yaa nidaakaígíí hanisíidgo nił bééhodoozįįłígíí biniyé yaʼniiltłʼǫ́ǫgo bighą́ą́ʼdóó haʼalzíidii índa bee ohoníłdzilii ániishłaa.
28 Aa nídaatʼı̨́įgo tʼáá íiyisí bąąh yínínígi átʼéego tʼáá ałtso yąąh nidayiiłhaałgo yádaałtiʼ. Tʼáá ałtso béésh łitsoii índa béésh nitłʼizii danilı̨́įgo nidaʼiiłchxǫǫh.
29 Atsidii bibee alzoołí yéego asoł. Dilyı̨́hí ałtso díílid, áko tʼáadoo biniyéhígóó adilyı̨́ı̨́h, háálá diné doo yáʼádaashóonii tʼáadoo nahjįʼ kódaalyaa da.
30 Bóhólníihii doo biniizı̨́ʼígíí biniinaa béésh łigaii doo niidzı̨́įʼii deiłní.
Footnotes
^ Chʼil naʼatłʼoʼii yílʼáii bá kin ááhyiłní.
^ Hííbrew kʼehjí ąąh náhinoolgish bee akʼeʼashchı̨́ yilzı̨́ı̨́ʼ níigo ááhyiłní. Col. 2:11.
