Jeremiah 8:1-22
8 Éí hoolzhishdi aláahgo naatʼáanii yę́ę dabitsʼin índa naatʼáanii danilı̨́ı̨́ nítʼééʼ yę́ę dabitsʼin áádóó náádaʼiiłniihii yę́ę dabitsʼin índa áhodoonííł yaa dahalneʼii danilı̨́ı̨́ nítʼééʼ yę́ę dabitsʼin áádóó Jerúsalemgi kéédahatʼı̨́ı̨́ nítʼééʼ yę́ę dabitsʼin yóóʼádaalyaadę́ę́ʼ háádeidiyooʼnił, ní Bóhólníihii.
2 Áádóó jı̨́honaaʼéí índa ooljééʼ áádóó wótʼááh hiníláii ayóóʼádayóʼníí nítʼééʼ yę́ę índa yichʼįʼ nidahałáago yikʼehgo deíkai yę́ę áádóó deidósin yę́ę índa yichʼįʼ nidahasá yę́ę yichʼįʼ nídeididoonił. Doo áłah ádoolníił da áádóó doo yóóʼadadoolníił da índa nihokááʼgóó chąąʼ nahalingo nihidílʼáa doo.
3 Díí doo yáʼátʼééhgóó dah oonéełii daadziihígíí daʼníłtsʼą́ąʼgi adahonííłkaad yę́ęgóó áadi nidajiltłʼéego tʼáá dajiináa dooleełígíí doo daznízin da doo, nidi dazhdínóonéłígíí éí nidahizhdiʼaah doo, ní tʼáá ałtsoní bee Bóhólníihii.
Ádił oodzííʼ áádóó aa hwiinítʼįįh
4 Áádóó anáábididííʼniił, Bóhólníihii kóní, Naaʼaníídeeʼgo tsʼídá náádidoojah. Atiin tsʼáníyáago tsʼídá nídoodááł.
5 Áko lá haʼátʼíí biniyé díí Jerúsalemgi kéédahatʼínígíí tʼáá tʼą́ą́ʼ anáákai nítʼééʼ? Tʼáá bizááká naʼadloʼ yąąh dah shijééʼ; nídookahígíí doo ádeinízin da.
6 Íínístsʼą́ąʼgo doo yáʼátʼééhgóó yádaałtiʼgo disétsʼą́ą́ʼ. Łaʼda, Haaléítʼįįd? doo níigo doo yáʼáshóonii yaa naayáii tʼáadoo łahgo átʼéego yaa nitsíńdeezkéez da. Łı̨́ı̨́ʼ nihidíníilʼą́ągo daʼahijigą́ąjįʼ iilwoʼígi átʼéego tʼáá bí yaa nidaakaígíí tʼéiyá yaa deíkááh.
7 Tʼáá aaníí, hoz wótʼáahdi naatʼaʼii, ákohgo nídootʼahígíí bił bééhózin, áádóó hasbídí índa hoz nahalinii tsídii índa táshjizhii, ákohgo nátʼą́ą́ʼ ninádahidootʼahígíí bił béédahózin, nidi shidineʼé éí Bóhólníihii yee nihodiiʼaahii doo bił béédahózin da.
8 Áko haʼátʼíí biniyé ádadohní, Dahoniidzą́ągo Bóhólníihii bibee hazʼáanii nihił hólǫ́? Nidi shoo, naaltsoos ííłʼíní tó bee akʼeʼalchíhí doo ákótʼéégóó yee akʼeʼashchı̨́įgo woochʼííd áyiilaa.
9 Diné dahóyáanii tʼóó ádaa yádadínóodzįįł; bił dahodooląąłgo dabidiʼdoolnééł. Shoo, Bóhólníihii bizaad doo deiniizı̨́įʼ da, ákoshąʼ haʼátʼíí hódzą́ shı̨́ı̨́ biiʼ dahólǫ́?
10 Tʼáá aʼoh átʼéédóó níléí aláahgo átʼéii nilı̨́įjįʼ adáhonooní yaa ádadeestʼą́ągo adádanoolní, áádóó áhodoonííł yaa dahalneʼii danilı̨́ı̨́dóó hodeesʼáago nááʼiiłniihii danilı̨́įjįʼ bindaʼadloʼ.
11 Hashtʼehodítʼé, tʼáá ałtsogóó hashtʼehodítʼé, daaníigo shidineʼé adadeeznihii tʼóó tʼįįhdígo nídayííłdzííʼ. Nidi doo hashtʼehodítʼée da.
12 Doo daaldinígi ádaadzaa yę́ędą́ą́ʼásh yaa yádaniizı̨́ı̨́ʼ? Nidagaʼ, tʼáadoo nidi yaa yádaniizı̨́įʼ da. Yikʼee yaa dadínóotʼáłígíí nidi, tʼáadoo bił béédahózin da. Éí bąą atíháshʼı̨́įjįʼ ahoolzhiizhgo hakʼeh hodidoodleełgo tʼáá íídą́ą́ʼ nidaaztseedii bitahgóó nidahodidootsił, ní Bóhólníihii.
13 Tʼáá aaníí, áhodeeshdįįł, ní Bóhólníihii. Chʼil naʼatłʼoʼii bineestʼąʼ bąąh ádin doo, índa fig sikaadii bineestʼąʼ bąąh ádin doo. Bitʼąąʼ daniiłnaʼ doo. Haa hidíʼáanii hatsʼą́ąjįʼ bił yóóʼahóóyá.
14 Haʼátʼíí lá biniyé tʼóó niháatą́? Haaʼíyeeʼ ahíidiikahgo kin hadaasʼá ditą́ągo binaa ahééʼítłʼinígóó dadiikahgo áadi ádiidįįł, háálá Bóhólníihii bichʼįʼ ádił nidaʼayeelzíʼígíí biniinaa kʼaasdaʼ tó dadiidlı̨́įłgo nihainíką́ągo Bóhólníihii nihiDiyin God ádiidįįłgo yee nihá nihoníʼą́.
15 Bee achʼįʼ hózhóonii nideíníidlíí nítʼééʼ, tʼáadoo nihaa yílyáa da. Níʼdooldzihígíí baa hodoolzhish daniidzin nítʼééʼ, achʼįʼ nahwiiʼná nihaa honíleʼ!
16 Dan dineʼé bikéyahdę́ę́ʼ anaʼí dabilı̨́ı̨́ʼ ídaʼdééłtłʼiidgo hodiitsʼaʼ. Bilı̨́ı̨́chogi ádaanínígíí bee kéyah tʼáá náhwiistʼą́ą́ nítʼééʼ niʼ hoditłid; łı̨́ı̨́ʼ yee nidaabaahii nánísą́ągo kin hadaasʼáii áádóó ákǫ́ǫ́ diné kéédahatʼíinii índa kéyah áádóó biiʼ dahólóonii éí tʼáá ałtso yaa nahodeeskai.
17 Tłʼiish éí tłʼiish báhádzidii doo yizhǫǫhii nihitahgóó adahideeshʼaał, jóʼakon. Éí adanihidiyoołhash, ní Bóhólníihii.
Júdah áádóó Jerúsalem yaa yínííł nilı̨́
18 Yínííł nishłínígíí doo nídoodzihígi ádzaa da; shiyiʼdi shijéí doo bitah hóótsʼíid da.
19 Geʼ, shoo, shidineʼé ahoolchíiłii doo deeghánídi kéédahatʼínígíí biniinaa daachago ádaaní, Bóhólníihiísh Záíyandi doo hólǫ́ǫ da? índa, Bitahgiísh aláahgo binanitʼaʼí doo sidáa da? daaní. Haʼátʼíí lá biniyé naaskʼęęʼgo biʼedaʼalyaii índa biʼedaʼalyaii tʼáadoo nídandlíinii yee shádahóółchįįd?
20 Ałtso daʼoogizh, ałtso ííshı̨́, áádóó tʼáadoo yisdánihiʼdooʼnil da.
21 Háálá shidineʼé ahoolchíiłii ádadideeznihígíí bikʼee shijéí nitsináltłiʼ. Yínííł shiiłhé áádóó tsídineesyiz.
22 Gíliyad kéyahdiísh bee níʼdoodzihii ádin? Ákweʼésh azeeʼ ííłʼíní ádin? Ákoshąʼ, haʼátʼíí biniinaa shidineʼé ahoolchíiłii doo bąąh tééh ánábiʼdilnéeh da?
