Jeremiah 9:1-26
9 Shidineʼé ahoolchíiłii naaztseedígíí biniinaa tʼáá ákwíí jı̨́ índa tʼáá ákwíí tłʼééʼ atínídinishdleeh dooleeł biniyé shitsiitsʼiin tó tʼéiyá laanaa áádóó shinákʼeeshtoʼ náálı̨́į laanaa!
2 Shidineʼé bitsʼą́ą́ʼ dashdooyaʼgo bitsʼá jóyaʼ biniyé honoojíidi diné deíkáhígíí hanínádaalyįh dooleełgo bá hosíłʼą́ laanaa! Háálá shidineʼé dah yinéełii doo baʼjóolíí ádaatʼéégóó tʼáá ałtso daʼdilé.
3 Woochʼííd biniyé dabitsooʼ ałtı̨́ı̨́ʼ nahalingo nídayiiłtas, áko doo shéédahósingóó doo yáʼádaashóonii tʼéiyá náás deíłtʼéhígíí biniinaa kéyah tʼáá nááhwiistʼą́ą́ nítʼééʼ bikááʼgóó tʼáá aaníinii tʼáadoo náás dínéesą́ą da, ní Bóhólníihii.
4 Haaʼíyeeʼ tʼááłáʼí jinítínígo bił kéédahojitʼíinii bitsʼąą ádaa ádahojilyą́ą doo áádóó akʼis danilíinii doo baa deijólíi da dooleeł, háálá akʼis tʼááłáʼí nítínígo bindaʼadloʼ áádóó bił kéédahojitʼíinii tʼááłáʼí nítínígo doo yáʼátʼééhgóó aa yádaałtiʼgo nidaakai.
5 Áádóó tʼááłáʼí nítínígo yił kéédahatʼíinii yindaʼaloʼ áádóó doo tʼáá aaníígóó dahalneʼ. Woochʼííd tʼéiyá yee yádaałtiʼ dooleełgo nidaʼádineestą́ą́ʼ. Doo ákwii ádadoonííłgóó haaʼí shı̨́ı̨́ doo nidaʼíłkeed da.
6 Naʼadloʼ baa naʼaldeeh ałníiʼgi kééhohtʼı̨́. Naʼadloʼ baa ooldahígíí biniinaa shéédahodoosįįł yę́ę doo dashinízin da, ní Bóhólníihii.
7 Éí bąą tʼáá ałtsoní bee Bóhólníihii kóní, Dazhdidoołhįh áádóó éí bee hwéédahodoozįįł. Shidineʼé ahoolchíiłii ádajíítʼįįdígíí biniinaa haash ałdóʼ náádeeshʼnííł?
8 Dabitsooʼ éí kʼaaʼ naʼałtseedii yee daʼdiłtʼohígíí nidahalin; atsooʼ biyoochʼíidgo yáłtiʼ. Łaʼ yił kééhatʼíinii kʼé yiłníigo yichʼįʼ yáłtiʼ łeh, nidi tʼáá biyiʼídi éí yaa nahaadáago áníi łeh.
9 Díí biniyé tsʼídá baa nidínéeshtaał, díí biniyé díí dineʼé tʼáá kééhatʼı̨́ı̨́ nítʼééʼ tsʼídá kʼéédideeshdlííł, ní Bóhólníihii.
10 Dził naaznilii baa atínídinishdleehgo dinishʼníi doo, índa honoojíígóó hootso yę́ę éí ałtso hoodeezígíí biniinaa yínííł nishłı̨́įgo yishcha doo. Ákóneʼ doo łaʼ chʼígháahgo dził yáátis yigháah da, índa béégashii doo náádazdiitsʼaʼ da, tsídii wótʼáahdi nidaatʼaʼii índa naaldlooshii yóóʼanoodzoodgo haaída doo łaʼ naagháa da.
11 Áádóó Jerúsalem kin haalʼáii tʼóó yáádaaʼáago índa mąʼii baʼáán áhodeeshłííł, áádóó Júdah kéyahgi kin hadaasʼáágóó doo naagháhígóó tʼóó dahodeeshzhahgo áhodeeshłííł.
Yíchxǫʼii áádóó yisnááh bee bił yééʼ áhoolyaii
12 Háí lá éí diné hóyáanii díí yikʼidiʼdootı̨́ı̨́ł lá, áádóó yaa hodoolnih biniyé Bóhólníihii bichʼįʼ haadzííʼ lá? Haʼátʼíí lá biniinaa kéyah atélyaa áádóó doodlidgo ákóneʼ diné łaʼ doo chʼígháah da?
13 Áádóó Bóhólníihii ání, Shibee hazʼáanii hadááhgóó ninínilii yóóʼadazdeezʼą́ áádóó ádíshníinii tʼáadoo bikʼeh dahojííłʼįįd da índa tʼáadoo bikʼehgo dajíkai da; díí lá biniinaa ni.
14 Nidi dooda bee nidzisteeʼgo tʼáá hó ádeiznízinígíí bikʼehgo dajíkai, áádóó dahazhéʼé yę́ę éí Béíyal diyin bidiʼníinii yínídahodiʼneestą́ą́ʼ yę́ę bikʼehgo dajíkai.
15 Éí bąą Ízrel dineʼé biDiyin God tʼáá ałtsoní bee Bóhólníihii kóní, Shoo, díí dineʼé díchʼíiʼii dabidiyeesı̨́ı̨́ł, áádóó tó atłʼizh bił ałtahgo deidoodlı̨́įłgo baa deeshkááł.
16 Áádóó ałʼąą dineʼé doo béédahodzísin da nítʼééʼ yę́ę índa dahazhéʼé yę́ę doo yéédahósin da nítʼééʼ yę́ę bitahgóó tahodínéeshkał, áádóó áhosíłdįįdjįʼ diltłish hakééʼ yitı̨́įłgo ádeeshłííł.
17 Tʼáá ałtsoní bee Bóhólníihii kóní, Baa nitsídaohkees, asdzání yínííł danilı̨́įgo daachaii dookah biniyé, Hágo, dabidohní, áádóó éí dayiichįįhgo yínííł danilı̨́įgo daachaii bíká daʼdołʼá;
18 bíniʼ tsı̨́įłgo dookah, áko nihinákʼeeshtoʼ nihinááʼ binínádaalzhishgo nihinákʼeeshtoʼ nidaazlı̨́į dooleeł biniyé hániʼdii ayóó íitsʼaʼgo nihá daacha dooleeł.
19 Danihighan yę́ędóó chʼídanihineeskaadígíí biniinaa kéyah yóóʼadasidiitʼánígíí biniinaa, Dooládóʼ nihiʼdoolchǫʼ da! Dooládóʼ tʼóó nihaa yáhóósįįd da! níigo Záíyandę́ę́ʼ iinééʼ ayóó íitsʼaʼgo yichago diitsʼaʼ.
20 Ákondi, asdzání nohłíinii, Bóhólníihii áníinii dadoohtsʼı̨́ı̨́h, áádóó hániʼdii ánihiłníinii dahidoohtsʼı̨́ı̨́h, áádóó nihichʼéʼé danilíinii ayóó íitsʼaʼgo daacha dooleełígíí bíńdabinołtin índa tʼááłáʼí nootínígo nihił kéédahatʼíinii yínííł ídlı̨́įgo achaaígíí bíńdabinołtin.
21 Háálá tłʼóoʼdi áłchíní nidaakaígíí índa kintaa daʼnítiingóó tsíłkéí nidaakaígíí nidadootsił biniyé nihitsédaasǫʼ góneʼ índa aláahgo nihinanitʼaʼí bighan naaznil yę́ęgóó aniné yah ahóóleʼ.
22 Handziihgo Bóhólníihii kóní, Dáʼákʼehgóó chąąʼ nideeztąądígi átʼéego índa ayizhii tłʼoh naadą́ą́ʼ yiyiigéeshgo bílákʼee hadadibingo bidinínáágóó ayiiłkaadígi átʼéego diné daneeznáanii bitsʼíís naaʼadínóodah, áko doo łaʼda náhodiyoolah da.
Nihokááʼ dineʼé éí Diyin God yééhósinígíí yee yaa haniih
23 Bóhólníihii kóní, Diné hóyáanii bibee hódząʼ tʼáadoo yee ádaa haʼniihí áádóó diné ayóó átʼéii nilíinii yee ayóó átʼéhígíí tʼáadoo yee ádaa haʼniihí índa diné atʼíinii biyódí tʼáadoo yee ádaa haʼniihí,
24 nidi diné ádaa hojiʼniihígíí éí akʼizhdiʼyiitįįhgo shééhodzísin, áko shí Bóhólníihii nihokáaʼgi aa aʼááh hasin áádóó doo haa deitʼéii índa tʼáá ákogi átʼéii ááshłííł, háálá kódaatʼéii bąą shił hózhǫ́, ní Bóhólníihii.
25 Shoo, bąąh nídanihineeshgizh lá nidi, biyiʼdi doo bąąh nídahineeshgizhii tʼáá ałtso atídeeshłíłígíí beidoołkááł, ní Bóhólníihii.
26 Éí Ííjip dineʼé áádóó Júdah dineʼé áádóó Íídam dineʼé áádóó Áman dineʼé áádóó Móʼab dineʼé índa honoojíidi diné kéédahatʼíinii tʼáá ałtso éí ádadoolzhéʼígíí atídeeshłííł, háálá ałʼąą dineʼé tʼáá ałtso doo bąąh nídahineeshgizh da, índa Ízrel dineʼé tʼáá ałtso biyiʼdi doo bąąh nídahineeshgizh da.
