Job 1:1-22
1 Diné léiʼ Job wolyéego Uz kéyahdi kééhatʼı̨́; éí diné tʼáadoo bee bikʼíhótʼahí da nítʼééʼ áádóó tʼáá ákogi ááníiłii nilı̨́ı̨́ nítʼééʼ índa Diyin God yidósin áádóó bąąhági átʼéii yá doolnih nítʼééʼ.
2 Éí hayeʼké tsostsʼid há neheezhchı̨́ áádóó hatsiʼké tááʼ há neheezhchı̨́.
3 Hadibé tsostsʼidi mííl áádóó haghą́ą́ʼaskʼidii táadi mííl áádóó habéégashii ahąąh naazı̨́įgo nidaʼałbąąsígíí ashdladi neeznádiin áádóó hatéliitsaʼii ashdladi neeznádiin índa há nidaalʼaʼí tʼóó ahayóí, áko díí diné bidziilgo dah oolééł; haaʼaʼaahjigo diné kéédahatʼínígíí tʼáá ałtso yiláahgo átʼéé nítʼééʼ.
4 Áádóó hayeʼké bitah hoolzhishgo tʼááłáʼí nítínígo baa náhwiilzhíishgo bighandi áńdaʼazįįh, áko dabilahkéí táltʼéhígíí hoł daʼdooyı̨́ı̨́ł áádóó hoł deidoodlı̨́ı̨́ł biniyé hágo nídeidiʼniih nítʼééʼ.
5 Áko ádaʼazįįd ałtso yaa ninákahgo Job háká anáʼáłʼaahgo dazhdiyingo ánáhoolʼįįh áádóó tʼóó haiłkááhdą́ą́ʼ náádiiʼnahgo tʼáá ádzíłtso há didlidgo náádahaniihii nááyiiłnih nítʼééʼ, háálá áńdíʼniih, Shiyeʼké daatsʼí ádił daʼasiih índa bijéí tłʼááhdę́ę́ʼ Diyin God dayódziih dóʼóshłí. Job hayeʼké bá nááʼjiiłnihgo hoolzhish nítʼééʼ.
6 Ákohgo diyingo nidaalʼaʼí danilíinii Bóhólníihii yidááhdóó ádéédahodoolzįįł biniyé yíkai bijı̨́ı̨́ góneʼ; níłchʼi bidaʼiiníziinii binanitʼaʼí Séítan wolyéii ałdóʼ atah níyá.
7 Áádóó Bóhólníihii éí Séítan áyidííniid, Háádę́ęʼshąʼ yínááł? Ákohgo Séítan éí Bóhólníihii áyidííniidgo ání, Nahasdzáán bikááʼgóó táhodishłeeh áádóó nahasdzáán bikááʼgóó háádiishdááh.
8 Áko Bóhólníihii éí Séítan áyidííniid, Shá naalʼaʼí Job wolyéiísh baa ákoninizı̨́ı̨́ʼ? Nahasdzáán bikááʼgóó tʼáadoo łaʼ ákójítʼéhí da; éí diné tʼáadoo bee bikʼíhótʼahíii nilı̨́ áádóó tʼáá ákogi ááníiłii nilı̨́ áádóó Diyin God yidósin índa bąąhági átʼéii yá doolnihii nilı̨́.
9 Ákohgo Séítan éí Bóhólníihii ánéidooʼniid, Daʼ Job joolyéiísh tʼáadoo nilínígóó Diyin God jidósin?
10 Bí áádóó baʼáłchíní índa bee hólóonii tʼáá ałtso daʼ éísh anítʼiʼ yineʼ nidaadziʼ dooleełii doo bá íinilaa da? Yinaashnishii bá bikʼijiisínídliʼ áádóó kéyahgóó binaalyeʼé kʼeeʼąą deeshzhiizh.
11 Nidi kʼad, bee hólóonii tʼáá ałtso bidinílchíidgo tídílééh, áko tʼáá niniiʼjįʼ níídóodzih.
12 Bóhólníihii éí Séítan áyidííniid, Jó, bee hólóonii tʼáá ałtso bee nóhólnííh, nidi tʼáá bí sizı̨́įgi tʼááká bidóólchííd yíilaʼ. Áádóó Bóhólníihii yitsʼą́ąjįʼ Séítan dah hodiileʼ.
13 Áádóó łah Job biyeʼké áádóó bitsiʼké danilíinii bínaaí alą́ąjįʼígíí bighan góneʼ daʼayą́ áádóó wáin deidlą́ą́ nítʼééʼ,
14 áko naalʼaʼí łaʼ Job yaa yílwodgo ání, Béégashii ahąąh naazı̨́įgo bee nidahojiildlaad nítʼééʼ áádóó télii éí hanaagóó nidaʼałchozh nítʼééʼ
15 índa Sabíyadóó dineʼé bikʼi dah yizhjéeʼgo adeiniiskaad, áko, tʼáá aaníí, nidaalʼaʼí ałtso diltłish bee nidabidiztseedgo tʼáá shí tʼéiyá yisdááshwodgo nił hashneʼ.
16 Tʼahdii yáłtiʼgo łaʼ náánálwodgo ání, Diyin God bitsʼą́ą́dóó kǫʼ yá biyiʼdę́ę́ʼ hadadíínáadgo dibé áádóó nidaalʼaʼí ałtso iidííłkʼą́ąʼgo tʼáá shí tʼéiyá yisdááshwodgo nił hashneʼ.
17 Tʼahdii yáłtiʼgo łaʼ náánálwodgo ání, Kaldíya dineʼé éí táádę́ęʼgo ghą́ą́ʼaskʼidii yaatįįh yínáago adeiniiskaad áádóó nidaalʼaʼí yę́ę ałtso diltłish bee nidabidiztseedgo tʼáá shí tʼéiyá yisdááshwodgo nił hashneʼ.
18 Tʼahdii yáłtiʼgo łaʼ náánálwodgo ání, Niyeʼké áádóó nitsiʼké danilíinii bínaaí alą́ąjįʼígíí bighan góneʼ daʼayą́ áádóó wáin deidlą́ą́ nítʼééʼ,
19 jó, honoojíídę́ę́ʼ tʼóó báhádzidgo deeyolgo tʼáá dı̨́ı̨́ʼdę́ę́ʼ kin biyah yiiyolgo ahiih néidinííyiizh, áádóó naʼáłchíní ałtso bikʼi hoołdáazgo daneezná, áko tʼáá shí tʼéiyá yisdááshwodgo nił hashneʼ.
20 Ákohgo Job nízhdiiʼnaʼ áádóó haʼééʼ ákʼinijooldláád; hatsiiʼ ałdóʼ ałtso jííshééʼ índa niʼjįʼ tséʼyaa jineeshjoolgo Diyin God bichʼįʼ nahodzisá,
21 áko ájíní, Tʼáá łinishchíʼígo shimá shishchı̨́, áádóó tʼáá łinishchíʼígo dah nídideeshdááł; Bóhólníihii sheidiníʼą́, Bóhólníihii shaa nááyiisdlááʼ; Bóhólníihii bízhiʼ bee biʼdójíigo baa haʼniih leʼ.
22 Díí tʼáá ałtso ákóhóótʼįįd nidi, Job tʼáadoo ádił asziihígi da, índa tʼáá áhoodzaagóó tʼáadoo Diyin God yikʼi hodiiʼą́ą da.
