Job 13:1-28
13 Jó, díí tʼáá ałtso yiiłtsą́,áádóó tʼáá shí disétsʼą́ąʼgo bikʼidiitą́.
2 Nihił béédahózinígíí shí ałdóʼ shił bééhózin;doo nihiʼohgo áníshtʼée da.
3 Aláahgo Ayóóʼábóodziilii tʼáá aaníí bichʼįʼ hadeesdzih nisin;Diyin God díí kóníshtʼéhígíí bił nabikʼíyádeeshtih nisin.
4 Tʼáá ánółtso woochʼííd ádaołʼíinii danohłı̨́;tʼáá ánółtso azeeʼ ííłʼíní doo ílíinii danohłı̨́.
5 Dooládóʼ tʼóó dadíínółyéel dooleeł nisin,áko éí bee dahonohsą́ą doo nítʼééʼ.
6 Naʼákʼíyáshtiʼii índa baa náʼooshkąąhii kʼad deísółtsʼą́ą́ʼ.
7 Daʼ doo yáʼádaashóoniísh bee Diyin God bá hadahodziih doo,índa nihindaʼadloʼgoósh bá yádaołtiʼ doo?
8 Daʼ Diyin God bichʼijísh dadoohłeełgo bá yádaałtiʼ?Diyin Godshąʼ, daʼ éísh bá ałghadaʼdohtʼáah doo?
9 Nanihiskáaʼgo yáʼádanohtʼééhísh dooleeł?Diné ahiʼdeesdloʼígi átʼéegoósh Diyin God biʼdoołohgo átʼé?
10 Tʼáá nahontʼinee diné łaʼ bichʼijí dadoohłeełgotʼáá aaníí Diyin God nihididooteh.
11 Daʼ doósh Yee Ayóóʼátʼéii nilínígíí nihił yééʼ áhodoolíił da,índa bee báhádzidígíí naa anihidoonił da?
12 Hódzą́ bee ééjílniihgo bee hahídziihii éí łeeshchʼiih nahalin;áchʼą́ąhgi hólǫ́ǫgo ádeínóhsinígíí éí hashtłʼish nidahalin.
13 Tʼáadoo íitsʼaʼí nahísóotą́; tʼáadoo shaa nídaahtʼíní,áko nihichʼįʼ yáshtiʼ; hániʼ tʼáá áshnéehgi áshnééh.
14 Haʼátʼíí biniyé tʼóó shidaaʼ deestsxahgo sheʼiinaʼ bąąh dah sétı̨́į doo?
15 Azhą́ shidiyoołhéeł nidi, baa jóshłíi doo,nidi yishááłgóó tʼáá bí tʼéí bichʼįʼ áchʼą́ą́h yáshtiʼ doo.
16 Bí tʼéiyá bee yisdádeeshááł;tʼóó áhodilʼíinii éí doo Diyin God yidááhdóó nidoogáał da.
17 Ádíshnínígíí haleebee deísółtsʼą́ą́ʼ,áádóó bee nihił hashneʼígíí dadoohtsʼaʼ.
18 Jó, shá baa hwiidínóotʼįįłii hashtʼeishłaa,áko hazhóʼó shá hashtʼéédoolníiłgo shił bééhózin.
19 Háí tʼéí shił ałhaʼditʼáah doo?Áko kʼad doo ádíshnínígóó dadeestsaał.
20 Naakigo hazʼą́ doo shichʼįʼ nididííʼáał da,áko índa doo nitsʼąą nídideeshtʼı̨́įł da.
21 Doo deeghánígóó shitsʼádinílnííh,áádóó bee náhádzidígíí doo bikʼee shił yéeʼ da doo.
22 Áko índa shichʼįʼ handziihgo nichʼįʼ hadeesdzih,éí doodaiiʼ shí átsé haasdziih, áádóó shichʼįʼ hadíídzih.
23 Doo ákwii áátʼįįdii índa ádił niʼayésíiʼii lá haa néelą́ą́ʼ?Bee hazʼáanii heshtíhígíí índa ádił niʼayésíiʼii shił bééhonísįįh.
24 Haʼátʼíí lá biniyé shitsʼąą nanítʼá,áádóó haʼátʼíí lá biniyé niʼanaʼí nishłı̨́įgo shaa nitsíníkees?
25 Tʼiis bitʼąąʼ bił naanááyołígíísh didínííyish?Áádóó atsǫz bił yiyołígíísh bikééʼ yílwoł doo?
26 Jó, tʼáá íiyisí doodago shaa hólneʼgo akʼeʼíłchí,áádóó ániid naasháádą́ą́ʼ doo ákwii áátʼįįdii tʼáá shiiʼ hólǫ́ǫgo áshíínísin.
27 Tsin bighádínísʼeezgo ałdóʼ anáshiiniłʼįįh,tʼáá ninádíshtał bikʼeh shiníníłʼı̨́,shikékʼeh hashchı̨́į nidi bá nihoodzogo íinilaa.
28 Tʼáá haʼátʼíhída diłdzidígíí nahalingoáádóó chʼosh ałchozhii éí ééʼ dayííyą́ʼígi átʼéego ááshdįįł.
