Job 15:1-35
15 Ákohgo Tííman kin haalʼáádóó Élifaz wolyéii ánááhodooʼniidgo ání,
2 Diné hóyáaniísh tʼáadoo biniyéhígóó bił bééhoozinii yee yáłtiʼ doo,áádóó haʼaʼaahdę́ę́ʼ níyolígíísh yee nídínóochał?
3 Índa doo bee aʼdoodiłiísh yee yáłtiʼ doo?Éí doodaiiʼ saad doo idééłníiniísh yee yáłtiʼ doo?
4 Tʼáá aaníí Diyin God doo dólzingóó yeeʼ íínísinínda Diyin God doo bichʼįʼ sohodizingóó yeeʼ íínísin.
5 Jó, doo ákwii ánítʼéhígíí yeeʼ ákótʼéego yániiłtiʼínda diné binídahwéedǫ́ǫsii yádaałtiʼígi átʼéego yáshtiʼ dooleeł nínízingo nihidíʼaah.
6 Tʼáá ni ádínínígíí bee ádá nináhonítʼaah; shí éí doo nánihonishʼaah da;tʼáá aaníí, tʼáá ni ádínínígíí bee ádaa nahólneʼ.
7 Niísh áłtsé niʼdizhchı̨́?Deílkʼidígíí tʼah doo ádaalnééhdą́ą́ʼásh ándiilyaa?
8 Diyin God yinahaʼáiísh tʼáá disínítsʼą́ą́ʼ?Tʼáásh ni tʼéiyá honíyą́ągo ádaa nitsíníkees?
9 Haʼátʼíísh nił bééhózin shı̨́ı̨́ doo nihił béédahózin da?Haʼátʼíí bikʼidiʼnitą́ą́ shı̨́ı̨́ nihí doo bikʼidaʼdiitįįh da?
10 Bitsiiʼ deibaʼii áádóó tʼáá íiyisí hadaastihii nizhéʼé yilą́ąjįʼ nidaakaii yeeʼ nihitahgóó kéédahatʼı̨́.
11 Diyin God bitsʼą́ą́dę́ę́ʼ bee haʼahóníiniísh doo nił hwiih daínda hazhóʼógo nichʼįʼ yátiʼígíísh doo nił sih da?
12 Haʼátʼíísh biniyé ákótʼéego yáníłtiʼ?Índa haʼátʼíísh biniyé hashké nínídzin yínílnáaʼgo
13 Diyin God bikʼijįʼ nílı̨́įgo tsídíníkééz,áádóó saad doo adaaníinii bee hahídziih?
14 Dinéshąʼ haʼátʼíí átʼéego baʼátʼeʼ ádin doo,índa biʼdizhchı̨́įgo tʼáá ákogi átʼée doo?
15 Jó, Diyin God tʼáá bí bidiyı̨́ı̨́ʼ doo yaʼólíi da;tʼáá aaníí, yádiłhił yiníłʼı̨́įgo doo dadílzin da.
16 Tʼah nááyówehgo diné doo yildingóó índa tʼóó baaʼihgo dahiná;éí tó jidlą́ nahalingo doo ákwii átʼéii adeisłı̨́.
17 Nił chʼíhodeeshʼáałgo shíísíníłtsʼą́ą́ʼáádóó yiiłtsáanii bee nił hodeeshnih:
18 éí hastóí dahóyáanii dabizhéʼé yę́ę bitsʼą́ą́dóó yaa nidahasneʼ,áádóó tʼáadoo deidínéesʼı̨́įʼ da.
19 Éí dabizhéʼé yę́ę tʼáá sáhí kéyah baa deetʼą́,índa déʼéyóní nidi tʼáadoo łaʼ hatahjįʼ deeyáa da.
20 Diné doo yáʼáshóonii niʼníłdįįdjįʼ tiʼhooníihgo diʼní,áádóó diné ade áhósinii ákwíí béédoohahgo bá nídeetʼą́.
21 Ił dahółyéeʼii bił íitsʼaʼ doo;bighangi tʼáá ałtsoní bee ídaʼíízįįdgo atíbidiʼdoolnííł.
22 Chahałheeł yitsʼádoogáłígíí doo nayólíi da,áádóó łaʼ diltłish yee hodiyoołhéełgo haa héesdá.
23 Chʼiyáán lá háá hólǫ́? níigo adókeedgo tádíghááh.Tʼóó bił chahodoołhiłígíí koshídę́ę́ʼ bichʼįʼ hoolzhishgo yaa ákonízin.
24 Tʼáadoo anáánáoʼneʼígóó índa bił hodiniihígíí yikʼee bił yéeʼ doo;aláahgo naatʼáanii deezbaaʼgo hashtʼeʼádiilyaaígíí akʼeh deesdlı̨́ı̨́ʼ nahalingo hakʼeh didoodleeł.
25 Háálá Diyin God bikʼijįʼ jílı̨́įgo bichʼįʼ kʼízhdeeshchidáádóó Aláahgo Ayóóʼábóodziilii bichʼįʼ nidzildzilgo ízhʼdiilyaa.
26 Naagé ditáanii áchʼą́ą́h nijiʼáago Diyin God bichʼįʼ nijichǫʼgo bikʼijįʼ dzideesdzil.
27 Jó, ałkʼízhniilkʼaiigo haniiʼjįʼ neeskʼah silı̨́ı̨́ʼáádóó hanííʼ gónaa hakʼahígíí ahééhineeskʼool silı̨́ı̨́ʼ.
28 Kin hadaasʼáajįʼ doo naʼadáágóó hazʼánígi kééhojitʼı̨́áádóó kin doo biiʼ dahooghanii kʼadę́ę ahiih nídaałdaasgo yáádaaʼáa dooígi kééhojitʼı̨́.
29 Doo náázhdootʼįįł da, áádóó jitʼínígíí doo didoonaał da,índa nihokáaʼgi doo hatsʼííd nááhwiizhdoołʼaał da.
30 Chahałheeł doo bitsʼázhdoogáał da;jidínóoséłígíí éí kǫʼ ałtso yidoozis,áádóó biyol yee yóóʼahóʼdoosoł.
31 Bíniʼ ádinʼjidloʼii éí tʼáadoo biniyéhí daígíí tʼáadoo beijólíhí doo;jó, tʼáadoo biniyéhí daígíí kʼééhodidoodlííł.
32 Tʼah doo dadzitsaahgóó tʼáadoo biniyéhí daígíí ałtso hachʼįʼ nidoolyééł, índa hatʼąąʼ tʼéiyá tsʼídá doo yidootsoh da.
33 Chʼil naʼatłʼoʼii bineestʼąʼ tʼáadoo nitʼání ádąąh nayoogádígíí nahalingo honeestʼąʼ tʼáadoo nitʼání ádąąshdoogał,áádóó áliv tsin bílátah daʼdiigai ádąąh nayoogádígíí nahalingo honeestʼąʼ ádąąshdootʼįįł.
34 Doo Diyin God kʼehgo ádaatʼéii baʼáłchíní doo dahodooleeł da,áádóó bee nahodiʼyoonihii hoł yáʼádaatʼéhígíí dahaníbaal adadidookʼą́ą́ł.
35 Ádílááh yidaʼniiltsąąh índa tʼáadoo biniyéhí daígíí bee nidahwiileeh,áko naʼadloʼgo nahagiz yídaaltsą́ą łeh.
