Job 22:1-30
22 Ákohgo Tííman kin haalʼáádóó Élifaz wolyéii ánááhodooʼniidgo ání,
2 Diné hóyáanii tʼáá bí ádá ílíinii íidoolíłígi átʼéegołaʼdaásh Diyin God bá ílíinii ázhdoolíiłgo bízhneelʼą́?
3 Diné tʼáá ákogi átʼéii nílı̨́įgoósh bee Aláahgo Ayóóʼábóodziilii bił honíshǫ́ǫ dooleeł?Tsʼídá tʼáadoo iisihí hazhóʼó yínáałgo íʼdiinilyaaígíísh bee bá bilááh nídoodleeł?
4 Diyin God díínísinígíísh biniinaa nididooteh,áádóó hóyéeʼgo naa nídóotʼįįł?
5 Ayóó átʼéego doo yáʼáshónígi yeeʼ íínítʼįįdáádóó doo ákwii ááníłígíí yeeʼ tʼáá náás yíłtʼih.
6 Jó, nikʼéí bąąh háíníłʼáhígíí yeeʼ tʼáadoo biniyéhígóó nichʼįʼ nináʼdoodlééł.Nee áchą́ʼíídéeniʼgo tʼáadoo yił hanáádadólchídígóó tʼáá daalchíʼígo íinilaa.
7 Diné chʼééh deeyáago tʼáadoo tó łaʼ béíníką́ą da,índa diné dichin nilíinii tʼáadoo baʼííníłtsood da.
8 Diné bidziilgo dah ooléełii kéyah yótąʼ,índa diné bił ílíinii ákwii kééhatʼı̨́.
9 Asdzání bąąh ádahasdįįdii tʼáadoo deíléhígóó níwehjįʼ biʼayíníłniiʼ.Áłchíní bizhéʼé ádaadinii bidziilę́ę bąąh ndahwííníłkaad.
10 Díí bąą łoh nináhaazniláádóó tʼáadoo hooyání nił yééʼ hazlı̨́įʼgo ádił hodínílchił,
11 doodaiiʼ nił chahóółhélígíí bąą doo ííníʼı̨́į da;tó yíląądgo ałtso nikʼi diilkǫʼ.
12 Diyin God yeeʼ yáʼąąsh alááh ánízáadi hólǫ́.Dego díníʼı̨́įʼgo sǫʼ doo deighánídi naaznilígíí níníłʼı̨́!
13 Áko ádíní, Diyin God haitʼéegoshąʼ bił bééhózin?Kʼos diłhił biníkáádę́ę́ʼésh ánihodiiʼaahgo yíneelʼą́?
14 Bichʼą́ąhgi kʼos diłhiłgo biniinaa doo ahoyootʼı̨́į da,áádóó yáʼąąsh yiiʼgóó tádíghááh.
15 Diné doo yáʼádaashóonii tʼáá shiidą́ąʼdii honítʼiʼgóó nidaaskai yę́ęgi átʼéegoósh honítʼiʼgóó yínáał doo?
16 Éí dazhdínóonéłígíí tʼáadoo baa dahwiilzhíshí tʼáá bítséedi nahjįʼ kódahoʼdiilyaa.Bee dadzíłdzilii yę́ę adahaazʼéél.
17 Éí Diyin God ádeidííniid, Nihitsʼáhoníleeh.Aláahgo Ayóóʼábóodziiliishąʼ haʼátʼíí há íidoolíiłgo yíneelʼą́?
18 Azhą́ ákódaaníi nidi, dabighan góneʼ Diyin God yáʼátʼéehii há haidééłbįįd.Nidi diné doo yáʼádaashóonii kótʼéego dajinínígíí shí doo shídéétʼiʼ da.
19 Diné tʼáá ákogi ádaaníiłii éí dayiiłtséehgo bąą bił dahózhǫ́ǫ łeh;diné tʼáadoo bee bikʼídahótʼahí daígíí haadloh bighą́ągo há nidahałtʼiʼ
20 kódaaníigo, Nihiʼanaʼí danilíinii tʼáá aaníí nahjįʼ kódaalyaa;binaalyeʼé daadziihígíí ałtso adahideezkʼą́ą́ʼ.
21 Diyin God bił ahééhonílzįįhgo hózhǫ́ǫgo nił hazʼą́ą doo;ákwíindzaago yáʼátʼéehii nee hodooleeł.
22 Nánooshkąąh, nichʼįʼ yáłtiʼgo bee hazʼáanii yínaniniłtinígíí nídiilé,áádóó bizaad nijéí biiʼ hashtʼeʼnihidíʼnííł.
23 Aláahgo Ayóóʼábóodziilii baa néínídzáago hashtʼeʼninádíídááłáádóó doo ákwii éʼétʼéii niníbaal sinildóó nízaadgóó ádítsʼą́ąjįʼ kwíinilaago,
24 áádóó niʼóola łeezh nahalingo yóóʼanighaasgo,áádóó Óferdę́ę́ʼ óola éí bokooh góyaa tsé áwózí bitahjįʼ yanáaghaasgo,
25 áko tʼáá aaníí Aláahgo Ayóóʼábóodziilii éí niyódí nilı̨́į doo,áádóó nibéésh łigaii ayóo ílíinii nilı̨́į doo.
26 Índa Aláahgo Ayóóʼábóodziilii baa nił honeeni doo,áádóó Diyin God bichʼįʼgo dídííʼįįł.
27 Nááʼákóneʼ bichʼįʼ sodidíílzįįłgo nididootsʼı̨́ı̨́ł,áádóó ádee hadíínídzíiʼii biʼíílíił doo.
28 Baa nidíínaałgo nihidíʼaahígíí ná biʼoolníił dooleeł,áádóó yínááłgóó ná iʼdíídíin doo.
29 Yaa jidínídahgo ádidííniił, De ánádahodiʼdoolnííł,áádóó aʼohgo ídaʼdólzinígíí Diyin God yisdábiinííł.
30 Tʼáadoo bee bikʼídahótʼahíii yisdáyiinííł;yáʼádaatʼéehii íinilaaígíí bee yisdábiinííł.
