Job 26:1-14
26 Áádóó Job ánááhodooʼniidgo ání,
2 Diné dziil bee ádinii yeeʼ bíká íínílwod lá!Diné doo bidziilii yeeʼ yisdéíníłtı̨́ı̨́ lá!
3 Diné hódzą́ bee ádinii yeeʼ kótʼéego dooleeł bidííníniidáádóó ląʼígóó ił ééhózin bee bichʼįʼ háínídzííʼ lá!
4 Háísh bíniikʼehgo kótʼéego hahínídzííʼ?Háíyeeʼ nitsíniiłkeesgo kótʼéego hahídziih?
5 Dazneeznánígíí há hazʼą́ądi áádóó tónteel biiʼdóó áadi dahojílóonii hatah dahoditłid.
6 Diyin God éí chʼı̨́įdiitah doo bichʼą́ą́h hólónígóó yooʼı̨́áádóó hoolʼáágóó atíʼéłʼínígíí tʼáadoo bahatʼaadí hólǫ́.
7 Yádiłhił biyiʼdi sǫʼ doo naaznilgi náhookǫs yiníłbaal;nahasdzáán tʼáadoo bótąʼígóó dah yizʼą́.
8 Tʼáá bí kʼos diłhił biiʼ tó háidiłbı̨́ı̨́h,áko kʼos biyaadę́ę́ʼ doo bighádlaad da.
9 Bibikááʼdóó nahatʼáii yinéesʼı̨́ı̨́ʼáádóó tʼáá bí kʼosígíí yikʼínéíłtih.
10 Tónteel bikááʼ názbąsgo hodeezooígíí beeadinídíín éí chahałheeł yił ałtsʼánéiʼnił.
11 Yáʼąąshdi áyah daniiʼáii daditłid áádóó Diyin God biditehgo tʼóó bił adahayói łeh.
12 Bibee adziil bee tónteel hashtʼéidoołtʼeeł;yikʼidiʼyiitįįhígíí bee ádaa haʼniihii atíyiiłʼįįh.
13 BiNíłchʼi Diyinii yee yótʼááh hiníláii ayóó áhonóolningo áhoolaa;bibee adziil yee tłʼiish nooltłʼishgo yiʼnahii áyiilaa.
14 Shoo, díí éí Diyin God átʼéii tʼįįhdígo yeeʼ daahʼı̨́;tʼįįhdígo yeeʼ baa dahodoohtsʼaʼ.Nidi bibee adziilii bee iiʼniʼ diitsʼaʼígíísh háí yikʼidiʼdootı̨́ı̨́ł?
