Job 32:1-22
32 Áko Job tʼáá ákogi áníshtʼé nízinígíí bąą díí diné táltʼéego tʼáadoo hanáádaasdzíiʼ da.
2 Ákohgo Ram baʼáłchíní ahoolchíiłii Baz nahósʼaʼdę́ę́ʼ diné nilíinii Bárakel biyeʼ Iiláíhu wolyéii báhóóchįįd. Job éí Diyin God yáʼátʼéehgo bá hazdoodzih yę́ęgi, jó, hóda tʼáá ákogi áníshtʼé jiníigo hadzoodzíʼígíí yikʼee báhóóchįįd.
3 Job bikʼisóó táltʼéegoígíí ałdóʼ yichʼįʼ báhóóchįįd, háálá áhoʼdiilyaaígíí biniyéii tʼáadoo bee hachʼįʼ háádaasdzíiʼ da, nidi tʼóó hakʼídahaʼááh.
4 Áko diné táltʼéego Job yił ahił dahalneʼígíí éí Iiláíhu yilą́ąjįʼ nidaakaígíí bąą tʼah índa Job bichʼįʼ hadeesdzih jinízingo ahoolzhiizh.
5 Áko díí diné táltʼéego yee hadahidoodzihígíí bee ádaadingo éí Iiláíhu yaa ákoniizı̨́įʼgo yikʼee báhóóchįįd.
6 Áko Baz nahósʼaʼdę́ę́ʼ diné nilíinii Bárakel biyeʼ Iiláíhu haadzíiʼgo ání,
Shí tʼáá íiyisí tʼah ániid naashá,ni éí náásínílı̨́įʼgo łą́ ninááhai;éí bąą shí ákótʼéego baa nitsískees nidideeshniiłgo bee nił hodeeshnihígi binásdzid áádóó bikʼee shił yééʼ nítʼééʼ.
7 Áko łą́ biiskáanii índa łą́ binááhaii yáłtiʼgo hódzą́ yee naʼnitin doo nítʼééʼ, dííniid.
8 Nidi diné níłchʼi biiʼ hólǫ́áádóó Aláahgo Ayóóʼábóodziilii biyol akʼizhdiʼyiitįįhgo áhósin.
9 Diné ayóó ádaatʼéii doo áłahjįʼ dahóyą́ą da,índa hadaastihii daatsʼí tʼáá ákogi ádaatʼéii doo yikʼidadiʼyiitįįh da.
10 Éí bąą dashíísółtsʼą́ą́ʼ;shí ałdóʼ íinisinii bee nihił hodeeshnih.
11 Jó, saad bee hadahidoohdzihígíí nidasoołkáaʼgoínda bee hadahidoohdzihígíí bíká íínístsʼą́ąʼgo biniyé sédáá nítʼééʼ.
12 Tʼáá aaníí, hazhóʼó nihíísístsʼą́ą́ʼ nítʼééʼ,áko jó, nihí łaʼ tʼáadoo Job bíniʼ bá áhoołaa da,índa saad yee hahaasdzíʼígíí tʼáadoo łaʼ bichʼįʼ saad bee bighadinohtʼą́ą da.
13 Bee hódzáanii bikʼíniikai, doo dadidoohniił da.Diyin God yeeʼ naaʼahoyííłhan; diné éí dooda.
14 Job doo shikʼijįʼ saad ayiiznil da,áádóó aadę́ę́ʼ bichʼįʼ saad bee hadahisoohdzíʼígíí doo bee bichʼįʼ hadeesdzih da.
15 Áko bikʼee tʼóó bił adahóóyóí áádóó tʼáadoo hanáádaasdzíiʼ da,índa tʼáadoo yánáádááłtiʼ da.
16 Hanáádadoodzihígíísh bibaʼ áníshtʼée doo?(Jó, tʼáadoo hanáádaasdzííʼgóó tʼóó naazı̨́ áádóó tʼáadoo ánáádadooʼniidí da.)
17 Shí ałdóʼ kótʼéego hadeesdzih;shí íinisinígíí ałdóʼ baa hodeeshnih.
18 Shí saad ląʼí bee hahideesdzihii shee hólǫ́;níłchʼi shiiʼ sizíinii, Yáníłtiʼ, shiłní.
19 Jó, shibid éí wáin bizis doo biiʼdę́ę́ʼ hááchʼi daígíí nahalin,índa wáin bizis ániidíii kʼadę́ę diilchxoshígíí nahalin.
20 Shikʼééhodootah biniyé hadeesdzih;hadeesdzihgo énáhodeesįįł.
21 Náánáłaʼ diné bił hashneʼgo doo diné tʼááłáʼíígíí bichʼijí nishłı̨́įgo hadeesdzih da,índa diné tʼáadoo ádaatʼéégóó dahayóí, doo dishníigo baa yáshtiʼ da dooleeł.
22 Háálá tʼóó áháʼníigo saad bee ąąh aldéehii bee yátiʼ dooleełígíí doo shił bééhózin da,doodaiiʼ ákódíshníigo éí Áshiilaii nahjįʼ kóshidoolííł.
