Job 35:1-16
35 Nááʼáłdóʼ Iiláíhu ánáádooʼniidgo ání,
2 Díí bee hahínídzíʼígíísh tʼáá ákódaatʼé nínízin?Tʼáá ákogi áníshtʼéii éí Diyin God biláahgo átʼé, diníigoósh ádíní?
3 Jó, ádíní, Tʼáadoo ádił asésiihgóó haʼátʼíí bee nídidíílééłínda ádił asésiihgo biláahgo haʼátʼíí shaa doodił?
4 Áko ni lá áádóó nikʼisóó danilíinii bił nihichʼįʼ hahideesdzih.
5 Shoo, yótʼáahdi hiníláii níníłʼı̨́índa niláahdi kʼos deílzhoodígíí níníłʼı̨́.
6 Ádił asínísiihgo haash yitʼéego Diyin God bikʼijįʼ nílı̨́?Bee hazʼáanii hítíihgo tʼóó ahayóí yileehgo bee Diyin God haa niłʼı̨́?
7 Tʼáá ákogi ááníiłgo bee haʼátʼíí Diyin God baa hínííł?Haʼátʼíí éí nitsʼą́ą́dóó néidiyiilé?
8 Doo yáʼáshǫ́ǫ́góó ááníłígíí tʼáá éí bee diné tʼáá nigi átʼéii atíníłʼı̨́,áádóó tʼáá ákogi ááníłígíí bee éí diné nilíinii bá íʼiideeł.
9 Tʼóó ahayóí bee ade áhólzinii biniinaa diné saał hahóółʼá;Ayóó ádabóodziilii hachʼįʼ nidahwiiłnánígíí bąą nihíká oohjeeh, daaní.
10 Nidi Diyin God áshiilaii éí tłʼéeʼgo sin eidiiʼaahii háájí lá ííyá? doo níní da.
11 Éí nihokááʼgóó naaldlooshii danilíinii yiláahgo nanihinitin;tsídii wótʼáahdi naaldeehii biláahgo dahoniidzą́ągo ádanihileʼ.
12 Diné sodadilzin nidi doo yáʼádajíshóonii ádaa dahojiʼniihígíí bąą bichʼįʼ doo ééhoosįįh da.
13 Tʼáadoo biniyéhígóó sohodizingo tʼáá aaníí Diyin God doo yidiitsʼaʼ da,índa Aláahgo Ayóóʼábóodziilii doo yikʼítsídíłkees da.
14 Azhą́, Doo yideestséeł da, diníi nidi,bidááhdóó nidíínááł; éí bąą baa dzíínílíigo hiníná.
15 Díí kʼad hoolzhishígíí biyiʼ Diyin God báháchįįhgo doo atéʼéłʼı̨́į dagoáádóó bee hazʼáanii doo yikʼeh dahółʼínígíí doo yaa ákonízin dago biniinaa
16 Job tʼáadoo biniyéhígóó hayánídíníltih;tʼáadoo bił bééhóziní saad tʼóó ahayóí tʼóó ałkééʼ néidiłtʼih.