Job 37:1-24
37 Áko daʼdiʼnínígíí bikʼee shijéí dilyisgo nitseeltłiʼ.
2 Hahadziihgo daʼdiʼnínígííáádóó hahadziihgo hodiitsʼaʼígíí tsʼídá hazhóʼó yísíníłtsʼą́ą́ʼ.
3 Yótʼáahdi daʼníłtsʼą́ą́ʼgóó adahosiiltsʼįįhgo ánáyiilʼįįháádóó nihokáaʼgi tʼáá ałtsogóó atsiniltłʼish tanooshzheeʼgo ánáyiilʼįįh.
4 Áádóó bikʼijįʼ ayóó átʼéego adiʼníigo biinééʼ bee anáhosiiltsʼı̨́ı̨́h;biinééʼ diitsʼı̨́įhgo éí atsiniltłʼish anídahataʼígíí doo ánéísįįh da.
5 Diyin God biinééʼ tʼóó bikʼeʼayóigo bee daʼdiʼní;ayóó átʼéii áyoolíłígíí doo tʼáá yíní átʼéejįʼ nihił béédahózin da.
6 Yas ííłní, Nahasdzáán bikáaʼjįʼ díchííł.Niʼdizhoołígíí índa ayóó átʼéego nahałtinígíí ííłní, Niʼ tʼózhoł,índa, Bidziilgo nidahółtin.
7 Diné tʼááłáʼí nítínígo bindaanish niʼ kónáyiilʼįįh,áko honaanish nilíinii diné tʼáá ałtso yaa ákodahiniizįįh.
8 Áko índa nidaaldlooshii aʼáán góneʼ anídahajeehgoáadi nídabeehah.
9 Shádiʼááhdę́ęʼgo náátsʼóʼoołdísii nídadilwoʼ,áádóó náhookǫsdę́ęʼgo éí nídadiłkʼas.
10 Diyin God biyol bee tó nídaatı̨́ı̨́h;beʼekʼid naazyínígóó tó nídaatı̨́ı̨́h.
11 Tósiil éí kʼos diłhił yiiʼ háidiłbı̨́ı̨́h,índa kʼos diłhił biyiʼ daʼníłtsʼą́ą́ʼgóó atsiniltłʼish anídahataʼgo ííłʼı̨́.
12 Kʼos yichʼįʼ hahadziihgo naanídeílzhoodgo áyósin,áko nahasdzáán nidahoneesʼą́ą́góó dineʼé kéédahatʼı̨́ı̨́góó tʼáá ałtso bohoolnííł.
13 Nihokááʼ dineʼé hashtʼéédoolnííł biniyé, doodaiiʼ bee nídahwiidootsoh biniyé,doodaiiʼ nihokááʼ dineʼé yaa aʼááh nízin doo biniyé nídahodiłtı̨́įhgo áyósin.
14 Shoo, Job, díí yísíníłtsʼą́ą́ʼ,geʼ, tʼóó bidaʼayóigo Diyin God binaanish danilíinii baa nitsíníkees.
15 Diyin God binaanish łaʼyiyiilaaígíísh nił bééhózin,áádóó kʼos diłhił biyiʼdóó atsiniltłʼish anídahataʼgo inídíłdlaʼgo ánáyiilʼįįhígíísh nił bééhózin?
16 Kʼos dah deílzhoodgo áyósinígíísh nił bééhózin?Tsʼídá tʼáá yíní átʼéegi bił ééhózinii éí tʼóó biʼayóigo binaanishígíísh nił bééhózin?
17 Shádiʼááhdę́ę́ʼ dichʼihgo nihokááʼ hodéezyéelgo,ééʼ bee honeezílíii biih nánídáahii nílíinii,
18 béésh nídoolyı̨́įʼgo biiʼ adéestʼı̨́ı̨́ʼ bidziilgo ályaaígi átʼéegoDiyin God bił yá dah dííłbałígíísh bíninilʼą́?
19 Bee bił dahodiilnihígíí bínanihiníłtin;jó, tʼóó nihił daatłʼéeʼgo biniinaa saad ałkééʼ nidadiiʼniłgi doo bídaniilʼą́ą da.
20 Hadeesdziihígíísh bee bił hodoonih?Diné łaʼ áshídiʼdooldįįłísh dínóozįįł?
21 Áko ałtso iiyołdóó yóóʼahalzhoʼgoyádiłhił biyiʼdę́ę́ʼ bee adinídíinii éí diné doo jinóołʼı̨́ı̨́ʼ átʼée da.
22 Óola biisdííłtóolii nahalingo náhookǫsdę́ę́ʼ ayóó ánóolninii hahwiileeh;Diyin God éí tʼóó bikʼeʼayóigo binaagóó hazʼą́.
23 Aláahgo Ayóóʼábóodziilii doo bikʼídaniikáah da;ayóó átʼéego ayóó ábóodziil áádóó doo haa dayitʼéii átʼé, índa tʼáá ákogi átʼéii tʼóó ahayóígíí binahjįʼ doo ade áhósin da.
24 Éí bąą nihokááʼ dineʼé dabidósin;nihokááʼ dineʼé honisą́ danízinii doo bił nilı̨́į da.
