Job 41:1-34
41 Łóóʼ bee hahadleehiísh bee Liiváíyathan wolyéii hadííloh bíninilʼą́?Doodaiiʼ tłʼóółísh bee bitsooʼ yaa ádíílíiłgo bíninilʼą́?
2 Tłʼóółísh bee bíchı̨́ı̨́h bighádííłtʼihgo bíninilʼą́?Doodaiiʼ béésh názhahiísh bee biyaatsʼiin dííshahgo bíninilʼą́?
3 Tʼóó ahayóidiísh nániidookąął?Łínidilchíigoósh nichʼįʼ yáłtiʼ doo?
4 Daʼ niłísh ahaʼdidootʼááł?Daʼ hoolʼáágóósh ná naalʼaʼ doo biniyé nídidííłtééł?
5 Tsídii bił naninéhígi átʼéegoósh bił naninée doo?Asdzání ná nidaalʼaʼí nideilóoz doo biniyé bee naadlóoziísh bizéédííłtʼih?
6 Dabizlohiísh yee ádaʼdoosįįłgo dabidoolghał?Baa nidaʼiiniihii bichʼįʼ nidahidoonihiísh biniyé ałtaidoolgish?
7 Daʼ tsiidétáán bee bikágí baa anoolzheeʼgo ádíílíiłgoósh bíninilʼą́?Doodaiiʼ łóóʼ bee hadah hadleehí deeshzhaaígíí bee bitsiitsʼiin baa anoolzheeʼgo ádíílíiłgoósh bíninilʼą́?
8 Yiisxił; ahíínígą́ʼígíí béénílniih;tsʼídá doo ákónáádííʼníił da.
9 Jó, diné bił chohooʼı̨́įgo nitsíkeesii tʼáadoo biniyéhí da yileeh;tʼóó dziiłtséeh nidi, bikʼee hąąh nahakaʼ.
10 Báhozhdoołchįįłgo doo łaʼ náznílyéesgo baa nízhdóotʼįįł da;ákoshąʼ háí tʼéí shidááhdóó yidoozįįłgo yíneelʼą́?
11 Háísh éí tʼáadoo leʼé sheiníláago bichʼįʼ nináʼdeeshdlééh?Yáʼąąsh biyaagi tʼáá átʼé tʼáá haʼátʼíhída dahólóonii éí tʼáá ałtso shí.
12 Liiváíyathan bijáád áádóó ayóó ábóodziilígíí índa bitsʼíís nizhónígo hadiilyaaígíí doo tʼóó bił dííníshhéélgóó baa hashneʼ.
13 Bikágí éí háí yikʼiidoozǫ́ǫsgo yíneelʼą́?Áádóó bikágí naaki ałkʼi sikaadígíí éí háí béésh bee bigházhdoołgołgo bízhneelʼą́?
14 Háishąʼ bizééʼ ąą ázhdoolíiłgo bízhneelʼą́?Biwooʼ jiníłʼı̨́įgo tʼóó báhádzid.
15 Bííghą́ą́dę́ę́ʼ éí naagé náásee ałkʼi hadah haazkaadgo,áádóó ahídadiiljééʼ nahalingo hadiitʼiʼgo yee ádaadzódlí.
16 Tʼáá íiyisí áhánígo ahininínilígíí bee doo yah ííchʼi da.
17 Ahineestihgo diwolígíí bąą doo ałtsʼá jónííł átʼée da.
18 Hátsʼíhyaa níigo inídídlaʼ;binááʼ éí naaniiníłkánígíí nahalin.
19 Bizééʼdę́ę́ʼ honooyééł hadahidinoodáádóó tsííd hidiłdaas.
20 Teeł dookʼą́łígi átʼéego áádóó tó yibézhígi átʼéegobínííʼdę́ę́ʼ łid hahíítı̨́įł łeh.
21 Biyol éí tsííd dookʼą́łígíí nahalinínda bizééʼdę́ę́ʼ kǫʼ hadinoʼ nahalin.
22 Bikʼos tʼáá íiyisí bitsxeʼ,índa bikʼee bitah dahoditłidii bitsʼą́ąjįʼ yóóʼahijeeh.
23 Bitéél gónaa bikágí daneelkʼoolígíí doo hizhdóółnááł átʼéégóótʼáá íiyisí ahineestidgo nitłʼiz.
24 Tsé nitłʼizígi átʼéego índa tsé daashjéeʼgi átʼéego bijéí nitłʼiz.
25 Nídiiʼnahgo ayóó ádahóodziilii bikʼee nídadzildzííh;tʼóó bił ádahadįįhgo tʼáadoo ánáádaoʼneʼ da łeh.
26 Azhą́ diltłish baa ajiłgéed nidi, doo baa iijíił da,índa tsiidétáán áádóó kʼaaʼda índa kʼaabéésh tsin bighą́ą́h díʼáii doo łaʼ baa iijíił da.
27 Béésh nitłʼizii éí tłʼoh naadą́ą́ʼ bitsǫz nahalingo yaa nitsíkees,índa béésh łitsoii éí tsin shih silı̨́įʼii nahalingo yaa nitsíkees.
28 Kʼaaʼ doo dah bidíníiłchéeh da;tsé bee dazhditłʼı̨́hígíí éí tłʼoh naadą́ą́ʼ behégod nahalin.
29 Tsihał éí tłʼoh naadą́ą́ʼ behégod nahalingo yaa nitsíkees;tsiidétáán anáhálghą́ąhgo diitsʼaʼígíí tʼóó yeidloh.
30 Ásaaʼtsʼiil sitsʼilgo áádahashchxiiʼígíigi átʼéego bitéél hodeelzhah;tłʼoh naadą́ą́ʼ bikʼi naalzhoodí nahalingo hashtłʼish yikááʼ yiʼnah łeh.
31 Ásaaʼ bee abézhígi átʼéego tónteel yiłbéézh;tónteel éí akʼah yibéézh nahalingo ííłʼı̨́.
32 Oołkǫ́ǫłgo éí bikééʼdę́ę́ʼ táłkááʼgóó adzoogaigo áyiiłʼįįh;éí łaʼda yiyiiłtsą́ągo néigahgo yąąh tsídookos.
33 Doo bił yéeʼ daígi átʼéegonihokááʼgóó naaldeehii doo łaʼ ákótʼéhí da.
34 Ayóó ádaatʼéii tʼáá ałtso yikʼi yaadéezʼı̨́ı̨́ʼ;diné ádaa dahaʼniihii tʼáá ałtso yinantʼá.