Joel 1:1-20
1 Piithúwel biyeʼ Jówel éí Bóhólníihii kóníigo yidiiztsʼą́ą́ʼ.
2 Diné hadasootihii, díí dadoohtsʼı̨́ı̨́h; kéyahgóó kéédahohtʼíinii tʼáá ánółtso daʼdoohtsʼı̨́ı̨́h! Daʼ nihídayéełkaahdę́ę́ʼ, doodaiiʼ nihizhéʼé yę́ę dahináádą́ą́ʼásh ákóhoodzaa?
3 Éí nihadaʼáłchíní bee bił dahołneʼ, áko nihadaʼáłchíní banáádaʼáłchínígíí yee yił náádahalneʼ dooleeł áádóó éí banáádaʼáłchíní náás daʼahílchíhígíí yee yił náádahalneʼ dooleeł.
4 Nahachagiitsoh daʼagháazhii naniseʼ yiʼoh daʼííyą́ąʼii éí nahachagiitsoh naanááséłígíí dayííyą́ą́ʼ áádóó nahachagiitsoh naanááséłígíí naniseʼ yiʼoh daʼííyą́ąʼii éí chʼosh nidaaʼnaʼii dayííyą́ą́ʼ. Áko chʼosh nidaaʼnaʼii naniseʼ yiʼoh daʼííyą́ąʼii éí nahachagiitsoh naniseʼ yaa nahodikaii ałtso dayííyą́ą́ʼ.
5 Chʼéédanohdzííd, adláanii danohłíinii, daahcha; wáin daahdláanii tʼáá ánółtso, wáin ániidíii daahdlánígíí nahjįʼ kólyaago biniinaa dadołwoshgo daahcha.
6 Háálá dadineʼé ayóó ádabóodziilii índa doo jóołtaʼ ánéelą́ą́ʼgóó shikéyah yaatįįh yíná; náshdóítsoh bitsiijįʼ ditłʼooígíí biwooʼ índa náshdóítsohtsaʼii biwózhah nidahalin.
7 Shichʼil naʼatłʼoʼii yiyííłchxǫʼ áádóó shitsin fig sikaadii bikágí yíyííłdláadgo ałtso yóóʼayiiskaad índa bitsʼáozʼaʼ daalgaigo áyiilaa.
8 Chʼikę́ę́h éí tłʼoh yishbizh ééʼ yee ákászaazgo tʼah ániid naagháago báʼdooyehii yaa yicha nahalingo nicha.
9 Bóhólníihii bikin biiʼ sohodizin góneʼ akʼáán nááhániihii índa yanáadziʼgo nááhániihii bitsʼą́ąjįʼ kólyaa. Náádaʼiiłniihii éí Bóhólníihii yá nidaalʼaʼí danilı̨́įgo yínííł danilı̨́.
10 Dádaʼakʼeh tʼáá ádzaaí silı̨́ı̨́ʼ; kéyah yínííł nilı̨́, háálá tłʼoh naadą́ą́ʼ tʼáá ádzaaí silı̨́ı̨́ʼ; wáin ániidíii ásdįįd índa akʼah doo hózhǫ́ haleeh da silı̨́ı̨́ʼ.
11 Dádaʼakʼeh yaa ádahalyáanii danohłíinii, ádaa yádanohdzįįh; chʼil naʼatłʼoʼii yaa ádahalyáanii danohłíinii, tłʼoh naadą́ą́ʼ áádóó tłʼoh naadą́ą́ʼ bideeʼí baa daohchxa, háálá nídaohishę́ę ádaasdįįd.
12 Chʼil naʼatłʼoʼii daazgan; tsin fig naazkaadii daniiłnaʼ. Tsin pámgrenit wolyéii áádóó tsin páam wolyéii índa bilasáana bitsiin daazgan; tsin tʼáá ałtso dáʼákʼehgóó yílʼáii daazgan. Éí bąą diné biyeʼké danilíinii yaa bił dahózhóonii ádaasdįįd.
13 Nááʼiiłniihii danohłíinii, tłʼoh yishbizhii bee áká dasoołzaazgo daahcha; bikááʼ nááʼiiniihí baa ádahołyáanii, yéego daahcha. ShiDiyin God bá naalʼaʼí danohłíinii, yah ahohkáahgo tłʼééʼ bíighah tłʼoh yishbizhii biiʼ nishoojééʼ, háálá akʼáán nááhániihii índa yanáadziʼgo nááhániihii éí nihiDiyin God bikindóó nahjįʼ kólyaa.
14 Hodílzingo doo adą́ atsʼánóhʼaah; hodílzingo áłah doohłeeł biniyé bíká ádadohní. Hastóí aląąjįʼ naazíinii áádóó kéyahgóó kéédahatʼíinii tʼáá ałtso Bóhólníihii bikin góneʼ áłah ádaohłéehgo Bóhólníihii yéego nídaohkąąh.
15 Dooládóʼ héiʼgo hwiidooʼaał da, háálá Bóhólníihii nídoodáałjįʼ beiníłką́, índa Aláahgo Ayóóʼábóodziilii íʼdoołdįįł baa hodoolzhish.
16 Nihinááł chʼiyáán ádooldįįł. NihiDiyin God bikin biiʼ sohodizin bitsʼą́ą́dę́ę́ʼ bee ił hózhóonii áádóó baa hózhóonii ádooldįįł.
17 Kʼeelyéí łeeyiʼdi dadííłdzid; kin biiʼ nooh nídaʼachííh góneʼ doo siláhí da; kin biiʼ nooh nídaʼachíihii dááchxǫʼ, háálá tłʼoh naadą́ą́ʼ daazgan.
18 Dooládóʼ alı̨́ı̨́ʼ nidadiʼniʼ da! Béégashii nidanilkaadii tʼóó ahiiʼ naanáákah, háálá chʼil tʼáadoo bá nídahasdlı̨́įʼ da; tʼáá aaníí, dibé nidanilkaadii tiʼdahoonííh.
19 Bóhólníihii nílíinii, nichʼįʼ náʼiinishkąąh, háálá honoojíígóó kǫʼ naanídzoosxihgo tłʼoh deítsoígíí ałtso adahideezkʼą́ą́ʼ, índa kéyahgóó tsin naazkaadii ałtso dadíílid.
20 Nidaaldlooshii daʼałchinii nidi nichʼįʼ chaał hahóółʼá, háálá tó hadaazlínígóó nídahooltseii, índa honoojíígóó tłʼoh deílʼáii ałtso adahideezkʼą́ą́ʼ.
