Joel 3:1-21
3 Éí yoołkáałdi hoolzhishígíí biyiʼ Júdah áádóó Jerúsalem dineʼé yisnááh danilı̨́ı̨́dóó nahjįʼ kódeeshłíiłgo daabííʼ yę́ę bííʼ nídadoodleełgo ádeeshłííł, jóʼakon.
2 Ałʼąą dineʼé tʼáá ałtso áłah ádeeshłííł áádóó Jiiháshafat yę́ę biyíldzisjįʼ ahodeeshʼish; áadi bá nahodiyeeshʼááł áádóó shidineʼé Ízrel éí shííʼ danilínígíí beiníshtʼı̨́įgo bá yáshtiʼ doo, háálá dadineʼé bitahgóó tadeinooskaadgo shikéyah ałtaa deisdzo nítʼééʼ.
3 Shidineʼé binahjįʼ yááʼiiltʼeʼ yaa naaskai, áádóó ashkii éí ałjiłnii yił ałgháádaʼastı̨́, índa wáin deidoodlı̨́ı̨́ł biniyé atʼééd baa nidahaazʼniiʼ.
4 Táir áádóó Sáídan* índa Filístiya kéyahgi* kéédahohtʼíinii haʼátʼíísh nihee ádeeshłííł? Tʼáadoo leʼésh biniyé kʼééhodideeshdlííł? danohsin. Ákódaahnéehgo shí tʼáá nihí nihitsiiʼkáaʼjįʼ tʼáadoo hodinaʼí índa tsxı̨́įłgo kʼéénihidideeshdlííł.
5 Shibéésh łigaii áádóó shiʼóola nídadoonilgo shiyódí aláahdi ílíinii éí nihikin biiʼ nidahohłáii biih dahishoojaaʼgo
6 áádóó Júdah índa Jerúsalemdóó dineʼé kéédahatʼı̨́ı̨́ nítʼééʼ yę́ędóó bitsʼą́ąjįʼ nízaadgóó kódadoohłííł biniyé Gríik dineʼé bichʼįʼ nihaa nidahaazniiʼ.
7 Kʼad nihaa nidahaazniiʼ yę́ędóó náábidideeshjahgo ádaohdzaa yę́ę biniinaa nihitsiiʼkáaʼjįʼ kʼéénihidideeshdlííł, jóʼakon.
8 Nihiyeʼké áádóó nihitsiʼké éí Júdah dineʼé bichʼįʼ nahideeshnihgo Sabíyadóó dineʼé, éí dineʼé nízaadi kéédahatʼíinii yichʼįʼ nináádahodiyoołnih; jó, Bóhólníihii yee haadzííʼ.
9 Dadineʼé bitahgóó díí baa dahołneʼ: Anaaʼ biniyé hashtʼeʼádadołnééh, diné ayóó ádaatʼéii bee bidaʼnołnííh. Bíniʼ diné tʼáá ałtso nidaabaahii yitʼááh nájah; bíniʼ ákǫ́ǫ́ dah hidikááh.
10 Nihibee nidahwiildlaadí bitsiitsʼiin háádahohtseełgo diltłish ádaahłééh, áádóó tsin bitsʼáozʼaʼ bee higéshí háádahohtseełgo tsiidétáán ádaahłééh. Bíniʼdii doo dabidziilii éí, Shidziil, daaníi leʼ.
11 Tsxı̨́įłgo áłah wohłeeh; hágo, nihokááʼ dineʼé danohłíinii, tʼáá ałtsodę́ę́ʼ áłah wohłeeh. Bóhólníihii áadi nisiláo dahayóii hadaniʼéésh.
12 Bíniʼdii ałʼąą dineʼé danilíinii nídoojeehgo Jiiháshafat yę́ę biyíldzis góde dadookah, háálá áadi ałʼąą dineʼé tʼáá ałtso bá nihwiishʼaahgo dah sédáa doo.
13 Bee iikaałí nídahohłááh, háálá agizh baa hoolzhiizh. Aljizh góyaa dínááh, háálá biiʼ aljizhí chʼil naʼatłʼoʼii biiʼ hadéébįįd. Chʼil naʼatłʼoʼii bitooʼ wóʼą́ą́lı̨́, háálá yee doo yáʼádaashóonii kʼeeʼąą deeshzhiizh.
14 Diné doo jóołtaʼ ánéelą́ą́ʼ éí yíldzisgi ánihwiitʼaah bá hazʼánídi yílʼá; yíldzisgi ánihwiitʼaah bá hazʼánídi Bóhólníihii bijı̨́ kʼadę́ę baa hoolzhíísh.
15 Jı̨́honaaʼéí índa tłʼééhonaaʼéí yidoojı̨́ı̨́ł áádóó sǫʼ doo daʼdiníłdíin da doo.
Júdah dineʼé yisdádooʼnił
16 Bóhólníihii éí Záíyandóó biinééʼ yéego didootsʼı̨́ı̨́ł, áádóó Jerúsalem kin haalʼáádóó hadoodzih, áko yótʼááh biiʼ hiníláii áádóó nahasdzáán dahidiʼdooʼnááł. Nidi Bóhólníihii éí bidineʼé bineʼ aʼniichéehii yá nilı̨́; Ízrel dineʼé yá bineʼ naʼadziʼii nilı̨́.
17 Áko shí, Bóhólníihii nihiDiyin God nishłı̨́įgo shidził diyinii Záíyandi kééhashtʼı̨́įgo nihił béédahodoozįįł. Áádóó Jerúsalemgi hodiyin doo índa déʼéyóní tsʼídá doo ákǫ́ǫ́ chʼínáádoodáał da.
18 Áko éí bijı̨́ dził naaznilígóó wáin ániidíii nídahodoodleeł, índa dah daaskʼidę́ę́ʼ abeʼ danílı̨́į doo, áko Judíya kéyahdóó dabikoohgóó tooh danílı̨́į doo áádóó Bóhólníihii bikin biiʼ sohodizindóó tó hadaazlı̨́į doo índa Shíttim yíldzis góyaa adaazlı̨́į doo.
19 Ííjip kéyahígíí tʼáá ádzaaí nídoodleeł áádóó Íídam kéyah* ałdóʼ éí honoojíhígíí tʼáá ádzaaí nídoodleeł, háálá Júdah baʼáłchíní tʼáá naʼníleʼdii ádajííłʼįįdgo bikéyahgi tʼáadoo ádąąh dahastʼáanii nidadzistseedgo bidił bitsʼádaazlı̨́įgo ádajiilaa.
20 Nidi Judíya kéyahgi hoolʼáágóó kéédahojitʼı̨́į doo, áko Jerúsalemgi ałdóʼ hoolʼáágóó hááʼayoochíił doo.
21 Shidineʼé bidił bee ádidahozhdiiltʼiʼii tʼah doo kʼéédadishdléehii kʼéédahodideeshdlííł, háálá Záíyangi Bóhólníihii kééhatʼı̨́.
Footnotes
^ Fiiníshiya dineʼé bikin haalʼá. Is. 23:1-18; Ezek. 26:1-28:26; Amos 1:9,10; Zech. 9:1-4; Mt. 11:21,22; Lk. 10:13,14.
^ Tónteel Ayóóʼátʼéii bibąąhgóó Judíyah kéyahdóó eʼeʼaahjígo kéyah. Is. 14:29-31; Jer. 47:1-7; Ezek. 25:15-17; Amos 1:6-8; Zeph. 2:4-7; Zech. 9:5-7.
^ Beʼekʼid Dókʼǫ́zhí shádiʼáahjigo kéyah.
