John 21:1-25
21 Kódzaadóó bikʼijįʼ Taibííriyas beʼekʼid bibąąhgi Jesus éí hódahoołʼaahii bichʼįʼ yitʼíní ánáázhʼdiilyaa; kótʼéego bichʼįʼ yitʼíní ízhʼdiilyaa.
2 Ákwii Sáíman Peter, áádóó Thomas, éí Naakií hodiʼnínígíí, áádóó Natháneiyel éí Kéínadę́ę́ʼ naagháhígíí, éí kéyah Gálilii biyiʼdóó, áádóó Zébedii biyeʼ nidiltʼéego, índa łaʼ Jesus bíhoołʼaahii nidiltʼéego bił ahíjiikai.
3 Nítʼééʼ Sáíman Peter áhodííniid, Łóóʼ hahideestsosgóó déyá. Nítʼééʼ, Nihí ałdóʼ ákǫ́ǫ́ nił diikah, dahodííniid. Áko chʼíjíkaigo tsinaaʼeeł biih jookai, nidi éí bitłʼééʼ tʼáadoo łóóʼ łaʼ hadadzistsooz da.
4 Nítʼééʼ hayííłką́ągo tábąąhgi Jesus sizı̨́įgo dajiiłtsą́, nidi ídahoołʼaahii Jesus átʼı̨́įgo tʼáadoo yéédahoosįįd da.
5 Áko Jesus áhodííniid, Shaʼáłchíní, łóóʼósh nihee dahólǫ́? Nítʼééʼ, Ádin, dabizhdííniid.
6 Áko áhodííniid, Tsinaaʼeeł binishʼnáájígo łóóʼ bee hahaltsósí taah daałtsóosgo łaʼ bee hadadoołtsos. Áko taah dadzistsooz, nítʼééʼ łóóʼ tʼóó ahayóigo biniinaa chʼééh hadadziłtsóós.
7 Áko íhoołʼaahii Jesus ayóóʼábóʼnínígíí Peter áyidííniid, Bóhólníihii átʼı̨́ı̨́ lá! Sáíman Peter éí Bóhólníihii átʼı̨́įgo yidiiztsʼą́ąʼgo, biʼééʼ yee ákászas, háálá dejiʼ biʼééʼ tʼáágéedgo naalnish nítʼééʼ, áádóó táyiʼ góneʼ dah diilwod.
8 Nidi łaʼ ídahoołʼaahii łóóʼ bee hahaltsósí yee łóóʼ dayíshoodgo tsinaaʼeeł yázhí bił níʼéél, háálá tábąąhjįʼ tʼáá áyídí, achʼoozhlaaʼdóó álaʼ bílátahjįʼ áníłtsoígíí éí naakidi neeznádiindi ahą́ą́hdíʼá ánízah.
9 Táłtsʼájíkaigo, ákǫ́ǫ́ tsííd kǫʼgo dajiiłtsą́, tsííkáaʼgi łóóʼ sinilgo áádóó łahjí łeesʼáán sinil.
10 Áko Jesus áhodííniid, Łóóʼ hadasoołtsoozígíí łaʼ nídoohjááh.
11 Áko Sáíman Peter tsinaaʼeeł yiih yíyáago łóóʼ bee hahaltsósí, łóóʼ biiʼ hadeezbingo táłtsʼéiníshóód, nítʼééʼ łóóʼ dantsxaazígíí neeznádiindóó baʼaan ashdladiindóó baʼaan tááʼ lá. Azhą́ tʼóó ahayóí lá nidi, łóóʼ bee hahaltsósí tʼáadoo neheezdláad da lá.
12 Jesus áhodííniid, Hágo, daʼohsą́. Áko hódahoołʼaahii tʼáadoostiʼee, Háí lá ánítʼı̨́? tʼáadoo dahodííniidí da, háálá Bóhólníihii átʼı̨́įgo bił béédahózin.
13 Áádóó Jesus dah diiyáago łeesʼáán néidiinilgo hataizniiʼ, índa łóóʼ ałdóʼ.
14 Dadziztsą́ą́dę́ę́ʼ náázdiidzáádóó bikʼijįʼ díí bił kʼad táadi hódahoołʼaahii bichʼįʼ yitʼíní ánízhʼdiilyaa.
Jesus áádóó Peter
15 Daʼjííyą́ąʼgo Jesus, éí Sáíman Peter áyidííniid, Sáíman, John biyeʼ nílíinii, daʼ díidíígíísh biláahgo ayóóʼáshííníʼní? Áko, Aooʼ, Bóhólníihii; ayóóʼánóshʼníigo nił bééhózin, bizhdííniid. Áádóó ánááhodooʼniid, Shidibé yázhí baʼíłtsoʼ.
16 Naakidi aleeh góneʼ ánááhodooʼniid, Sáíman, John biyeʼ nílíinii, daʼ ayóóshʼáshííníʼní? Áko ánáábizhdiʼní, Aooʼ, Bóhólníihii; ayóóʼánóshʼníigo nił bééhózin. Áádóó ánááhodooʼniid, Shidibé baa áhólyą́.
17 Táadi azlı̨́ı̨́ʼ góneʼ ánááhodooʼniid, Sáíman, John biyeʼ nílíinii, daʼ ayóóshʼáshííníʼní? Táadi Peter, Daʼ ayóóshʼáshííníʼní? hoʼdooʼniidígíí biniinaa yíní biih níjíítłizh. Áko ábizhdííniid, Bóhólníihii, tʼáá ałtsoní nił bééhózin; ayóóʼánóshʼníigo nił bééhózin. Jesus ánááhodooʼniid, Shidibé baʼíłtsoʼ.
18 Tʼáá aaníí, tʼáá aaníígóó ándishní, Ániid naniná yę́ędą́ą́ʼ áká nánílzisgo tʼáá ni nínízingóó nanináá nítʼééʼ, nidi hasínítihgo ałtsʼą́ąjįʼ kʼídidíílchił, áko łaʼda áká nidoosisgo doo deesháał da nínízin yę́ęgóó nidoołtééł.
19 Díí kótʼéego dazdootsaałígíí bee Diyin God baa hozhdoonih biniyé yee hachʼįʼ haadzííʼ. Áádóó kóhodííniid, Shikééʼ yínááł.
Íhoołʼaahii ayóóʼóóʼníinii
20 Áko Peter nídzízyiz, nítʼééʼ íhoołʼaahii Jesus ayóóʼábóʼnínígíí hakééʼ yigáałgo jiiłtsą́, éí daʼjííyą́ą́ nítʼéʼígi Jesus biyid binahjįʼ dziztı̨́įgo, Bóhólníihii, háishąʼ ninándidooʼááł? bizhdííniidii.
21 Áko Peter éí yiyiiłtsą́ągo Jesus áyidííniid, Bóhólníihii, díí diné éí haitʼée doo?
22 Jesus áhodííniid, Náánísdzáajįʼ hániʼdii shibaʼ nijighá hwííníshʼníigo, éí daashąʼ díílííł? Ni éí shikééʼ yínááł!
23 Áko éí íhojiiłʼaahii doo dazdootsaał da haʼnínígíí ałkʼisóó bitahgóó adahideezdláád, nidi Jesus, Éí doo dazdootsaał da, doo dííniid da nidi, Náánísdzáajįʼ hániʼdii shibaʼ nijighá hwííníshʼníigo, éí daashąʼ díílííł? dííniid.
24 Díí íhoołʼaahii haa hwiinítʼínígíí hoł bééhózingo baa hojilneʼ, áádóó tʼáá hó díidíígíí bee akʼeʼjishchı̨́, áko baa hojilneʼígíí éí tʼáá aaníigo nihił béédahózin.
25 Nidi Jesus yaa naayáii náánáłaʼ tʼóó ahayóí ałdóʼ yaa naayá; éí tʼáá ałtso bee akʼeʼashchı̨́įgo naaltsoos tʼóó ahayóí dooleeł, nahasdzáán nidi bikáaʼgi doo bá hazʼą́ą da doo shaʼshin nisin.
