John 6:1-71
6 Kódaadzaadóó bikʼijįʼ Gálilii beʼekʼid tséʼnaagóó Jesus bił dah nídiiʼéél, tʼáá éí Taibííriyas beʼekʼid wolyé.
2 Áko diné tʼóó ahayóí hakééʼ yíkai, háálá bąąh nidahałniihígíí habee adziilii bee béédahózinii bá ájiilaaígíí dayiiłtsą́.
3 Áko Jesus dah daaskʼid łaʼ bąąh híjiiyáago ákwii hódahoołʼaahii bił nidzíiztą́ą́ nítʼééʼ.
4 Jew dineʼé hodílzingo áłah náʼádleehígíí, tʼáá éí atisʼadeesdzá bee bééhániihii, kʼadę́ę baa hoolzhíísh.
5 Jesus jidééʼı̨́ı̨́ʼ, nítʼééʼ diné tʼóó ahayóí hachʼįʼ dayíkáahgo jiiłtsą́, áko Philip ábizhdííniid, Háádę́ę́ʼ lá bááh nidahidiilnihgo díí diné daʼdooyı̨́ı̨́ł lá?
6 Éí tʼáá daatsʼí íiyisí shijoodlą́ nízingo áháłní, háálá ádoonílígíí tʼáá bí bił bééhózin.
7 Áko Philip áhodííniid, Bááh éí denériyas* naakidi neeznádiin bíighahgo nahaazniiʼ nidi tʼáadoo bidínóołnah da, azhą́ tʼááłáʼí nítínígo áłchʼı̨́ı̨́dígo badaʼiistsood nidi doo bidínóołnah da.
8 Nítʼééʼ hódahoołʼaahii łaʼ Andrew, Sáíman Peter yił hááʼázhígíí, áhodííniid,
9 Kǫ́ǫ́ ashkii léiʼ tłʼoh naadą́ą́ʼ bideeʼí łeesʼáán ashdlaʼgo áádóó łóóʼ áłtsʼíísígíí naakigo neijaah, nidi éísh ákózhnéelą́ąʼgo hodínóołnah?
10 Áko Jesus ádííniid, Diné tʼáá ałtso dadinohbįįh bidiní. Éí hazʼánígi tłʼoh yílʼáago ákwii diné ashdladi míilgo daatsʼí dineezbin.
11 Áko Jesus éí łeesʼáán néidiinilgo, Diyin God yichʼįʼ yaa ahééh niizı̨́įʼgo, [bídahoołʼaahii yitaizniiʼ, áádóó bídahoołʼaahii éí] dadineezbinígíí yitaa deizniiʼ; łóóʼ ałdóʼ tʼáá bee hwiih ódleʼ bíighahgo yitaizniiʼ.
12 Hwiih daazlı̨́įʼgo hódahoołʼaahii ábizhdííniid, Biʼoh nidaʼiisdą́ʼígíí áłah áńdaahdlééh, áko doo tʼáá ádzaaí dooleeł da.
13 Áko tłʼoh naadą́ą́ʼ bideeʼí łeesʼáán ashdlaʼ neheestiʼgo dajííyą́ąʼii, éí biʼoh daʼjííyą́ʼígíí tsʼiizis naakitsʼáadah biiʼ hadazhdééłbįįd.
14 Áko Jesus habee adziilii bee bééhózinii baa nijiyáhígíí dayiiłtsą́ągo ádadííniid, Díí tʼáá aaníí Diyin God yá halneʼii nahasdzáán bikáaʼgi doogááł hodooʼniidii átʼı̨́ı̨́ lá.
15 Áko Jesus aláahgo naatʼáanii jidooleełjįʼ ahóʼdiʼdoodził biniyé kʼadę́ę aadę́ę́ʼ hachʼįʼ dah adiildéehgo baa ákodziniizı̨́įʼgo dziłgóó tʼáá sáhí dah náázdiidzá.
Jesus táłkááʼ yigááł (Mt. 14:22,23; Mk. 6:45-52)
16 Iʼííʼą́ągo beʼekʼid góyaa hódahoołʼaahii hadanáákaigo,
17 tsinaaʼeeł yiih náákai, áádóó Kapérniyamgóó tséʼnaa bił dah adiiʼéél. Áko hiłiijı̨́įʼgo Jesus tʼah doo haa nádáah da.
18 Nítʼééʼ ayóó átʼéego deeyolgo biniinaa tó náádadiidááh.
19 Áko tááʼ daatsʼí, dı̨́ı̨́ʼ daatsʼí tsin sitą́ ánízahgóó daʼjíłʼeełgo Jesus táłkááʼgóó tsinaaʼeeł yichʼįʼ yigáałgo dajiiłtsą́. Áko bikʼee hoł yééʼ dahazlı̨́ı̨́ʼ,
20 nidi áhodííniid, Shíyeeʼ áshtʼı̨́; tʼáadoo nídaałdzidí.
21 Áko haa bił dahóózhǫǫdgo tsinaaʼeeł yiih dahastʼeʼgo, tʼáá áko kéyah bichʼįʼ daʼjíłʼeełígíí baa daʼdzisʼéél.
Diné éí Jesus hadeintá
22 Tʼáá ákǫ́ǫ́ dabiiskánígíí náwónaaníjí tsinaaʼeeł doo łaʼ siʼą́ą́góó dayiiłtsą́, tsinaaʼeeł Jesus bídahoołʼaahii yiih yikai yę́ę tʼéiyá. Hódahoołʼaahii tsinaaʼeeł doo bił biih jookai da niʼ, nidi hódahoołʼaahii tʼéiyá tʼáá sáhí bił dah adiiʼéelgo bił béédahózin.
23 Ákondi Bóhólníihii łeesʼáán yikʼi sodoolzingo ahééh niizı̨́ı̨́ʼdóó bikʼijįʼ daʼjííyą́ą́ʼ yę́ędóó tʼáá áyídígi tsinaaʼeeł łaʼ Taibííriyasdę́ę́ʼ nidahaazʼéél lá.
24 Áko diné éí Jesus áádóó bídahoołʼaahii doo kweʼé nidaakaigóó bił béédahoozingo, bí ałdóʼ Jesus yíkadantáago tsinaaʼeeł yiih yikaigo Kapérniyamgóó bił dah náádaʼdiiʼéél.
Jesus éí bááh bee iináanii nilı̨́
25 Beʼekʼid wónaanídi hakʼídaaskaigo ádahodííniid, Naʼnitiní, hádą́ąʼshąʼ kweʼé yíníyá?
26 Jesus áhodííniid, Tʼáá aaníí, tʼáá aaníígóó ánihidishní, Nihinááł shibee adziilii bee béédahózinii baa niséyáhígíí doo biniyé shíkadanohtáa da, nidi łeesʼáán daoyą́ąʼgo bee hwiih dasoolı̨́ʼígíí éí tʼéiyá biniyé shíkadanohtá.
27 Chʼiyáán áádįįłii tʼéiyá tʼáadoo bíká nidaahkaí, nidi iiná doo ninítʼiʼii bá chʼiyáán doo ádįįhii hádaahtʼı̨́, éí Diné Silı̨́įʼii nihaididooʼááł, háálá Diyin God aTaaʼ nilíinii hwee lą́ asłı̨́ʼígíí bee hwééhoʼdílzingo áhoolaa.
28 Áko ádahodííniid, Haashąʼ deiitʼı̨́įgo tʼéí Diyin God naanish yaa bił hózhóonii baa neiikai doo?
29 Jesus ánááhodooʼniid, Diyin God yiníłʼaʼii deinohdlą́ągo baa dadzíínóhłíigo éí naanish Diyin God bił hóshǫ́.
30 Áko ánáádahodooʼniid, Haʼátʼíishąʼ nibee adziilii bee bééhózinii ádíílíiłgo, dadíníilʼįįłgo daniidiidląął? Haʼátʼíísh ádíílííł?
31 Danihizhéʼé yę́ę honoojíigi mána dayííyą́ą́ʼ; tʼáá bee akʼeʼashchínígi átʼéego, Yáʼąąshdę́ę́ʼ bááh bazʼníłtsood.
32 Áko Jesus ánááhodooʼniid, Tʼáá aaníí, tʼáá aaníígóó ánihidishní, Yáʼąąshdę́ę́ʼ bááh éí doo Mózes nihaʼníłtsood da, nidi shiTaaʼ éí yáʼąąshdę́ę́ʼ bááh tʼáá aaníinii nihaʼiiłtsóód.
33 Háálá bááh Diyin God bíhígíí éí yáʼąąshdę́ę́ʼ hadahóóleʼgo nihokááʼ dineʼé iiná yeidiiʼaah.
34 Áko ánáádahodiʼní, Bóhólníihii, tʼáá áłahjįʼ díí bááh nihanáʼíltsoʼ doo.
35 Jesus ánááhodooʼniid, Shí bááh bee iináanii nishłı̨́; shaazhníyáhígíí éí doo dichin náázhdoodleeł da, áádóó shijoodlą́ągo sheidzólíii éí doo dibááʼ náázhdoodleeł da.
36 Nidi ánihidííniid, Dashoołtsą́ą nidi tʼah doo daʼoohdląąh da.
37 ATaaʼ sheidiiʼaahígíí tʼáá ałtso éí shaa hidookah; shaazhníyáhígíí éí tʼáá íiyisí doo nówehjįʼ hodideeshniił da.
38 Háálá doo tʼáá shí íinisinígi átʼéego ádeeshnííł biniyé yáʼąąshdę́ę́ʼ hadááyáa da, nidi shiníłʼaʼii íinízinígíí éí ádeeshnííł biniyé níyá;
39 díí éí [aTaaʼ] shiníłʼaʼii yee íinízinii átʼé, éí tʼáá ałtso shaazhnínilígíí doo łaʼ yóóʼadeeshtʼeeł da, nidi niiníłką́ądi éí tʼáá ałtso daneeznáádę́ę́ʼ náádabidideeshjah.
40 Háálá shiTaaʼ díí yee íinízinii átʼé, éí tʼáá aYeʼ jiiłtsánígíí áádóó joodlą́ągo beijólíhígíí, iiná doo ninítʼiʼii hwee hólǫ́ǫ dooleeł, áko niiníłką́ądi dadziztsą́ą́dę́ę́ʼ nááhodideeshłááł.
41 Shí éí bááh yáʼąąshdę́ę́ʼ hadahóóleʼígíí nishłı̨́, jinínígíí biniinaa Jew dineʼé saad dahasłı̨́ı̨́ʼ.
42 Áko ádadííniid, Daʼ díísh doo Jesus, Jóseph biyeʼ átʼı̨́į da? Bizhéʼé áádóó bimá béédahoniilzin. Haʼátʼéegoshąʼ áko kʼad, Shí yáʼąąshdę́ę́ʼ hadááyá, jiní?
43 Áko Jesus ánááhodooʼniid, Tʼáadoo shiniinaa ałchʼįʼ nihiyiʼ nidahodiʼniʼí.
44 Diné doo łaʼ shaa doogáał da, aTaaʼ shiníłʼaʼígíí shaa honílóozgo tʼéiyá, áko niiníłką́ądi dadziztsą́ą́dę́ę́ʼ nááhodideeshłááł.
45 Diyin God yá dahalneʼii binaaltsoos yiiʼ kódaaníigo yee akʼedaʼashchı̨́, Áko tʼáá ádzíłtso Diyin God nidahodínóotįįł. Tʼááłáʼí nítínígo aTaaʼ deidiiztsʼą́ąʼgo ídahoołʼą́ʼígíí éí shaa hakááh.
46 Ákondi éí diné łaʼ aTaaʼ nilíinii yiyiiłtsą́, doo dishníigo ádíshníi da, tʼáá hazhóʼó Diyin God bitsʼą́ą́dę́ę́ʼ hojílónígíí tʼéiyá, éí aTaaʼ jiiłtsą́.
47 Tʼáá aaníí, tʼáá aaníígóó ánihidishní, Shoodlą́ągo shaa dzólíhígíí éí iiná doo ninítʼiʼii bee hólǫ́.
48 Shí éí bááh bee iináanii nishłı̨́.
49 Danihizhéʼé yę́ę honoojíigi mána dayííyą́ą́ʼ, ákondi éí daneezná.
50 Díí tʼéiyá yáʼąąshdę́ę́ʼ bááh hadahóóleʼígíí átʼé, áko tʼáá háiida éí yiyííyą́ʼígíí doo dadootsaał da.
51 Shí éí bááh hináanii yáʼąąshdę́ę́ʼ hadahóóleʼii nishłı̨́; tʼáá háiida díí bááh jiyánígíí hoolʼáágóó jiináa dooleeł, áko nihokááʼ dineʼé bááh yee hináa dooleełgo baa deeshʼáłígíí éí shitsįʼ.
52 Ákohgo Jew dineʼé ałghadaʼditʼáahgo ádaʼahidooʼniid, Haitʼéegoshąʼ díí diné tʼáá bí bitsįʼ nihaʼdoołtsołgo dadiidı̨́ı̨́ł?
53 Áko Jesus áhodííniid, Tʼáá aaníí, tʼáá aaníígóó ánihidishní, Diné Silı̨́įʼii bitsįʼ doo daoyą́ą́ʼgóó áádóó bidił doo daohdlą́ą́ʼgóogo, iiná doo nihee dahólǫ́ǫ da doo;
54 tʼáá háiida shitsįʼ jiyánígíí áádóó shidił jidlánígíí éí iiná doo ninítʼiʼii hwee hólǫ́, áko niiníłką́ądi dadziztsą́ą́dę́ę́ʼ nááhodideeshłááł.
55 Háálá shitsįʼ éí tʼáá aaníí yidą́ átʼé, índa shidił tʼáá aaníí yidlą́ átʼé.
56 Tʼáá háiida shitsįʼ jiyánígíí áádóó shidił jidlánígíí éí shiyiʼ hojílǫ́, áádóó bidiníná hayiʼ honishłǫ́.
57 Tʼáá aTaaʼ hináanii shiníłʼaʼgo aTaaʼ bee hinishnánígi átʼéego, tʼáá háiida shijííyą́ʼígíí shee jiináa dooleeł.
58 Díí yáʼąąshdę́ę́ʼ bááh hadahóóleʼígíí átʼé. Azhą́ danihizhéʼé yę́ę mána dayííyą́ąʼ nidi daneezná. Tʼáá háiida díí bááh jííyą́ʼígíí éí hoolʼáágóó jiináa dooleeł.
59 Kapérniyamgi kin biiʼ áłah náʼádleeh góneʼ nazhʼnitingo díí bee hadziisdzííʼ.
Saad binahjįʼ iiná doo ninítʼiʼii ee hodooleełii
60 Áko hódahoołʼaahii éí deidiiztsʼą́ąʼgo ląʼí ádadííniid, Díí áháʼnínígíí tʼáá íiyisí nantłʼa; háísh ałdóʼ yiyíistsʼą́ąʼ doo?
61 Nidi Jesus éí hódahoołʼaahii doo bił ákódaatʼéégóó yaa nídaatʼínígíí doo jidiiztsʼą́ąʼ da nidi hoł bééhoozingo ábizhdííniid, Díí saadísh bikʼee nidaałtal?
62 Ákoshąʼ Diné Silı̨́įʼii áłtséédą́ą́ʼ hólǫ́ǫ́ nítʼéʼí góde náádáałgo daołtsą́ągo haa yitʼéego baa nitsídaahkees doo?
63 Níłchʼi Diyinii éí iiná eidiiʼaah, nidi atsʼíís éí tʼáadoo nídoodleełí da; saad bee nihichʼįʼ hahásdzíʼígíí éí Níłchʼi Diyinii bitsʼą́ą́dóó bee iináanii átʼé.
64 Nidi nihí łaʼ doo daʼiinohdlą́ą da. Háálá Jesus tʼóó haʼníítą́ą́ʼ yę́ędą́ą́ʼ doo daʼoodláanii bił bééhózin, índa diné nináhodidooʼáłígíí ałdóʼ bił bééhózin.
65 Áko ázhdííniid, Díí biniinaa ánihidííniid, Diné doo łaʼ shaa doogáał da, shiTaaʼ hadiʼníʼą́ągo tʼéiyá.
66 Kódaadzaadóó bikʼijįʼ hódahoołʼaahii ląʼí hatsʼánáhaazhjéeʼgo tʼáadoo hakééʼ tánáádookai da.
67 Áko Jesus éí naakitsʼáadahígíí bichʼįʼ hadzoodzíiʼgo ábizhdííniid, Daʼ nihíísh ałdóʼ shitsʼádoohjah?
68 Sáíman Peter áhodííniid, Bóhólníihii, háísh ałdóʼ bichʼįʼ dah náádidiikah? Ni tʼéí saad binahjįʼ iiná doo ninítʼiʼii hodooleełii nee hólǫ́,
69 áko ni éí tʼáá aaníí Diyin God hináanii biYeʼ Diyinii Christ nílı̨́įgo deisiidląąd.
70 Jesus ánááhodooʼniid, Daʼ shíísh doo naakitsʼáadah nołtʼéego nánihidiinil da, nidi łaʼ níłchʼi biʼiiníziinii nohłı̨́?
71 Éí Sáíman, Iskáriyat biyeʼ nilíinii, Júdas ábijiní, háálá tʼáá éí nináhodidooʼááł, éí naakitsʼáadahígíí łaʼ atah nilı̨́.
Footnotes
^ Łaʼa jı̨́ naʼanishgo denériyas tʼááłáʼí nídahábįįh nítʼééʼ.
