Jonah 1:1-17
1 Amítai biyeʼ Jónah éí Bóhólníihii bichʼįʼ haadzíiʼgo ábíłní,
2 Nídiidáahgo nílááh, Níneveh kin haalʼáágóó* dínááh, éí ayóó átʼéego kin haalʼáii biʼayíłníihgo bichʼįʼ ahidílgháásh, háálá éí tsʼídá bidoo yáʼáshǫʼ shinááł yaa deeskai.
3 Nidi Jónah dah diiyáago Társhish kin haalʼáajigo Bóhólníihii bitsʼąą yóóʼajilyeedgo Jápa kin haalʼáá góyaa ajííyá áádóó Társhishgóó tsinaaʼeeł deezʼéél léiʼ bikʼízhníyá, áko bikʼé nazhʼníláago biih jííyáago Társhish kin haalʼáajigo atah hoł dah adiiʼéelgo Bóhólníihii hólǫ́ǫ́dóó yóóʼajilyeed.
4 Nidi Bóhólníihii éí ayóó átʼéego tónteel bichʼįʼ níyolgo áyiilaa, áko tʼóó báhádzidgo deeyolgo tsinaaʼeeł tʼáá ádeígo neheltǫʼ.
5 Ákohgo nidaʼałʼeełii nídaasdzíidgo tʼááłáʼí nítínígo bidiyin dabidiʼníinii yichʼįʼ hadadeeshghaazhgo tsinaaʼeeł ászólí dooleeł biniyé naalyéhé dajíyeehígíí taah dadziistłʼííd. Nidi Jónah éí tʼah doo diyóółgóó tsinaaʼeeł biih jííyáago náʼáyaídi jineeztı̨́įgo ajiiłhaazh.
6 Ákohgo nidaʼałʼeełii binanitʼaʼí haa níyáago áhodííniid, Haa lá áhoodzaa, ałhoshí nílíinii? Nídiidáahgo nidiyin néinikąąh; eii shı̨́ı̨́ nidiyin nihąąh tsídookosgo doo ádiidįįł da.
7 Áádóó ádaʼahidooʼniid, Hágo, haaʼíshąʼ yááʼiiltʼeʼ ádadiilníiłgo díí doo yáʼáshóonii nihikʼi hooleʼígíí baa ákodadíníidzįįł. Áko yááʼiiltʼeʼ ádayiilaa, nítʼééʼ Jónah bikʼi hodiitʼą́.
8 Áádóó ádahodííniid, Nihił hólneʼ, baa nídaniikąąh. Háishąʼ díí doo yáʼátʼéehii nihikʼijįʼ kóyiilaa? Haʼátʼíishąʼ ninaanish? Háádę́ęʼshąʼ naniná? Háadish nikéyah? Haʼátʼíí dineʼé shı̨́įshąʼ nílı̨́?
9 Áádóó ábizhdííniid, Hííbrew dineʼé nishłı̨́, áko Bóhólníihii dinisin; éí Diyin God yáʼąąshdi hólóonii, tónteel áádóó nahasdzáán áyiilaii nilı̨́.
10 Ákohgo diné tʼáá íiyisí nídaasdzíidgo ádahodííniid, Haʼátʼíishąʼ biniyé ánítʼı̨́? Háálá nidaʼałʼeełii Jónah éí Bóhólníihii hólǫ́ǫ́dóó yitsʼąą yóóʼeelwodígíí bił béédahoozin; jó, tʼáá ákótʼéego bił hojoolneʼ.
11 Áádóó ádahodííniid, Haashąʼ dandiilníiłgo tónteel nihá ánáhodidoolzih? Háálá tónteel tʼáá íiyisí náádadiidáahgo yéego yilkʼooł.
12 Áádóó ábizhdííniid, Nídashidoołteehgo tónteel biih dashiyołhan, áko tónteel nihá ánáhodidoolzih, háálá shił bééhózingo shí shiniinaa ayóó átʼéego nihichʼįʼ deeyol.
13 Azhą́ ákózhdííniid nidi, nidaʼałʼeełii táłtsʼá daʼdiilʼoł daznízin, nidi chʼééh ádajíítʼįįd, háálá tónteel tʼáá íiyisí hakʼijįʼ náádadiidáahgo yilkʼooł.
14 Ákohgo Bóhólníihii yichʼįʼ hadadeeshghaazhgo ádaaní, Nídaniikąąh, Bóhólníihii, nídaniikąąh, tʼááká díí diné beʼiinaʼ biniinaa ánihóółdįįh lágo; dił doo bohodiitʼiʼii bee doo nihikʼi hodidííʼáał da, háálá, Bóhólníihii nílíinii, nił yáʼátʼéhígi íinidzaa.
15 Ákohgo Jónah nídeidiiłtı̨́įgo tónteel yiih dayiisxan, áko tónteel tʼóó báhádzidgo náádadiidáhígíí áhodiilzeeʼ.
16 Áádóó diné éí Bóhólníihii yikʼee tʼáá íiyisí bił yééʼ dahazlı̨́įʼgo yichʼįʼ náádaʼiisniiʼ índa yichʼįʼ ádee hadaasdzííʼ.
17 Ákohgo Bóhólníihii éí łóóʼ ayóó áníldíilii hashtʼeyiilaago Jónah iidoołnah yiniyé yiníłʼaʼ, áádóó Jónah éí łóóʼ bibid biyiʼ dziztı̨́įgo tágí jı̨́ áádóó tágí tłʼééʼ azlı̨́ı̨́ʼ.
Footnotes
^ Asíriya kéyahgi.
