Jonah 3:1-10
3 Áádóó naakidi aleeh góneʼ Bóhólníihii éí Jónah yichʼįʼ hanáánáádzíiʼgo ííłní,
2 Nídiidáahgo nílááh, Níneveh ayóó átʼé kin haalʼáajįʼ dínááh, áádóó nidishnínígíí bee bił hodíílnih.
3 Áko Bóhólníihii bizaad kʼehgo Jónah hashtʼeʼádiilyaago Nínevehgóó dashdiiyá. Ákohgo Níneveh ayóó átʼé kin haalʼá haʼnaa nijígháahgo tágí jı̨́ oodááł bíighah.
4 Áádóó Jónah dashdiiyáago kin haalʼáá góneʼ ajííyáago łaʼa jı̨́ oodááł ánízahgóó nizhníyá, áko jidilwoshgo ájíní, Dízdiin jı̨́ tʼah hadziih áádóó índa Níneveh kin haalʼá ałtso ádooldįįł!
5 Ákohgo Níneveh dineʼé Diyin God dayoosdląąd, áádóó hodílzingo doo adą́ nídaołʼaah, dadííniid áádóó aláahgo ádajítʼéii índa aʼohgo ádajítʼéii tłʼoh yishbizh biih dadziskai.
6 Níneveh dineʼé aláahgo binanitʼaʼí haneʼ yidiiztsʼą́ąʼgo yikááʼdóó nahaʼáii yikááʼdóó nídiiʼnaʼgo biʼéénééz agháago yáʼátʼéhígíí haidiiltsooz áádóó tłʼoh yishbizh yiih yíyáago łeeshchʼiih yahiikaahígi neezdá.*
7 Áádóó aláahgo naatʼáanii índa bikéédę́ę́ʼ naatʼáanii danilíinii éí bee nihootʼáanii kóníigo Níneveh kin haalʼáagi tʼáá níłtéél nítʼééʼ baa dahaneʼgo ádayiilaa, Diné áádóó nidaaldlooshii, daʼalı̨́ı̨́ʼ dah danéelkaadii tʼááká haʼátʼíhída dayólįh lágo; bíniʼdii tʼáadoo daʼayání índa tʼáadoo daʼadlání doo,
8 nidi diné índa nidaaldlooshii bíniʼdii tłʼoh yishbizh bikʼídaastiʼgo yéego Diyin God nídayookąąh; bíniʼdii tʼáá ádzíłtso doo yáʼáshǫ́ǫ́góó dajíkáahii índa tʼáá naʼníleʼdii ádajooníiłii yóóʼadazhdidooʼááł.
9 Háísh díí bił bééhózin? Diyin God daatsʼí łahgo átʼéego tsíńdookos áádóó báhóóchįįdii łahgo átʼéego ánéidoodlíiłgo daʼátʼé, áko doo ádiidįįł da.
10 Ákohgo Diyin God éí ádajooníiłii doo yáʼáshǫ́ǫ́góó dajíkááh nítʼééʼ yę́ę łahgo áńdajiidlaago yiyiiłtsą́ągo Diyin God éí áhodoołdįįłgo tsídeezkéezii łahgo ánááyiidlaa; atíhodoolíiłgo yee haadzíiʼii tʼáadoo áyiilaa da.
Footnotes
^ Achʼįʼ nahwiiʼnáago atínídindleeh bee ééhózin.
