Jonah 4:1-11
4 Nidi Jónah éí tʼáá íiyisí doo bił yáʼátʼéeh da, áádóó tʼáá íiyisí báhóóchįįd.
2 Áko Bóhólníihii yichʼįʼ sodoolzingo ání, Nánooshkąąh, Bóhólníihii nílíinii, tʼah shikéyahdi naashá yę́ędą́ą́ʼ, Díí kin haalʼáii doo atídíílíił da, daʼ doósh nidííniid da? Éí bąą Társhish kin haalʼáajigo yóóʼeeshwod, háálá díí shił bééhózin: ni éí Diyin God joobaʼii áádóó aa aʼááh nízinii nílı̨́, índa doo hah báháchįįhii áádóó ayóó átʼéego bá áhwiinítʼı̨́ʼíii nílı̨́. Índa íʼdííłdįįłgo tsídíkos yę́ę łahgo ánáádlíiłii nílı̨́.
3 Éí bąą kʼad, Bóhólníihii nílíinii, nánooshkąąh, sheʼiinaʼ náádiidlé, háálá dasétsą́ą́jígo yáʼátʼééh, hinishnáa dooígíí éí dooda.
4 Áádóó Bóhólníihii ání, Daʼ náháchįʼígíísh éí yáʼátʼééh?
5 Ákohgo Jónah éí kin haalʼáádóó chʼíníyáago kin haalʼáádóó haʼaʼaahjígo chahaʼoh ádá áyiilaago yiyaagi neezdá, áko kin haalʼáhígíí haa doonííł jinízingo bibaʼ dzizdá.
6 Áádóó Bóhólníihii Diyin God éí Jónah yikʼijįʼ adeeʼ naʼatłʼoʼii hainíísą́; éí bee Jónah bikʼijįʼ chahaʼoh doo, áko doo hachʼįʼ nahwiiʼnáa da doo. Áko Jónah éí chʼilígíí tʼáá íiyisí yaa bił hózhǫ́.
7 Nidi náábiiskání abínígo Diyin God éí chʼosh yeiníłʼaʼgo éí chʼil kʼíinígháazhgo chʼil niiłnaʼ.
8 Ákódzaago nahgóó dah adiiʼą́ągo Diyin God haʼaʼaahdę́ęʼgo yéego níyolgo áyiilaa, áádóó Jónah bikʼi diidláadgo bitsiitsʼiin biih yíłdoigo bitah doo hwiinaʼ da, índa tʼáá biyiʼídi dadzótsaʼ laanaa nízin. Ákohgo ání, Dasétsą́ą́jígo éí shá yáʼátʼéeh doo. Hinishnáa dooígíí éí dooda.
9 Áádóó Diyin God éí Jónah ííłní, Daʼ chʼil biniinaa náháchįʼígíísh éí yáʼátʼééh? Áádóó Jónah ání, Yáʼátʼééh lą́ą sháháchįʼígíí, bikʼee dasétsą́ą nidi, tʼáá áko.
10 Bóhólníihii ání, Díí chʼil doo bikʼé nishínílnishii áádóó habiníínísáanii baa aʼááh ninizı̨́ı̨́ʼ; tʼáá łaʼ óotłʼééʼ haníísą́ áádóó tʼáá łaʼ óotłʼééʼ niiłnaʼ.
11 Daʼ ákoósh Níneveh ayóó átʼé kin haalʼáii doo baa aʼááh dínéesįįł da? Jó, ákweʼé tʼááłáhídi neeznádiindóó baʼaan naadiindi mííl bilááh ánéelą́ąʼgo áłchíní tʼah doo ákodaniizįįhígíí nishʼnáajigo índa nishtłʼajigo nitsáhákees doo bił béédahózin da, áádóó naaldlooshii daałı̨́ʼígíí ląʼída hólǫ́.
