Joshua 10:1-43
10 Ákódzaago Jerúsalem kin haalʼáádóó aláahgo naatʼáanii Adónai-zíídek wolyéii díí yaa hodiiztsʼą́ą́ʼ: Jáshowa éí Éíʼai kin haalʼáii yikʼeh deesdlı̨́įʼgo tsʼídá ałtso íísdįįdígíí áádóó Jériko kin haalʼáii aláahgo binanitʼaʼí tʼáá bił áyííłʼįįdígi átʼéego Éíʼai kin haalʼáii áádóó aláahgo binanitʼaʼí ákónááyiidlaaígíí índa Gíbiyan dineʼé éí Ízrel dineʼé yił kʼé daʼahóʼníigo áyiilaa áádóó bił kééhojitʼı̨́ı̨́ nítʼééʼ.
2 Áko hadineʼé tʼáá bił ayóó átʼéego hoł yééʼ dahazlı̨́ı̨́ʼ, háálá Gíbiyan kin haalʼáii éí ayóó átʼéego nahatʼá kin haalʼáii nahalin, áádóó Éíʼai biláahgo kin yílʼáá nítʼééʼ, índa diné danilíinii tʼáá ałtso dahayóí nítʼééʼ.
3 Ákohgo Jerúsalem dineʼé aláahgo binanitʼaʼí Adónai-zíídek wolyéii éí Hííbran kin haalʼáádóó aláahgo naatʼáanii Hóham wolyéii áádóó Jármath kin haalʼáádóó aláahgo naatʼáanii Páíram wolyéii áádóó Léíkish kin haalʼáádóó aláahgo naatʼáanii Jafáíya wolyéii índa Églan kin haalʼáádóó aláahgo naatʼáanii Dííber wolyéii yichʼįʼ iʼiisʼaʼgo kóní,
4 Hágo shaa nohkáahgo shíká oohjeeh; Gíbiyan kin haalʼáii atídadiilnííł, háálá éí Jáshowa índa Ízrel dineʼé yił kʼé daʼahóʼní.
5 Éí bąą Ámor dineʼé aláahgo bindanitʼaʼí ashdlaltʼéego, éí Jerúsalem dineʼé aláahgo binanitʼaʼí áádóó Hííbran dineʼé aláahgo binanitʼaʼí áádóó Jármath dineʼé aláahgo binanitʼaʼí áádóó Léíkish dineʼé aláahgo binanitʼaʼí índa Églan dineʼé aláahgo binanitʼaʼí, díí tʼáá łaʼ bizhiʼee áłah silı̨́ı̨́ʼ, índa bisiláo tʼáá ałtso yił dah diikaigo tʼáá dah oonééł nítʼééʼ; Gíbiyan kin haalʼáii yikʼiijeehgo anaaʼ dahasłı̨́ı̨́ʼ.
6 Áko Gíbiyan dineʼé éí Gílgaldi dah deínééhgóó Jáshowa bichʼįʼ adaʼdziisʼaʼgo ádabijiní, Ninaalʼaʼí niidlı̨́įgo ádandiiʼní tʼáadoo naʼáhodílziidí; tsʼídá tsı̨́įłgo nihaa nohkáahgo yisdádanihohnííł. Nihíká oohjeeh, háálá Ámor dineʼé aláahgo binanitʼaʼí danilíinii tʼáá ałtso dziłgo nahazʼánígóó kéédahatʼı̨́įgo áłah daazlı̨́įʼgo nihikʼiijeeh.
7 Áko Jáshowa éí Gílgaldóó dashdiiyá; diné anaaʼ daʼałʼíinii tʼáá ałtso bił índa diné ayóó átʼéego nidaabaahígíí bił dashdiikai.
8 Áko Bóhólníihii éí Jáshowa áyidííniid, Tʼáadoo bikʼee nił yéʼí, háálá éí nílákʼee dahodííʼą́ągo doo łaʼda nikʼeh didoodleeł da.
9 Éí bąą Jáshowa éí Gílgaldóó chʼíʼníʼeezhgo tłʼééʼ bíighah jookahgo yiską́, áko tʼáadoo kótʼé ílíní anaʼí bikʼijįʼ hajizhjééʼ.
10 Áko Bóhólníihii éí Ízrel dineʼé bidáahgi Ámor dineʼé yił hóółąądgo Gíbiyan kin haalʼáagi tʼóó ahayóí nidadzistseed; tʼáá Beth-hóran kin shijaaʼ bichʼįʼgo honítʼiʼ góde nidi haa adaazhjééʼ índa Azííkah kin shijaaʼ áádóó Makíídah kin haalʼáajįʼ dazníłtseed.
11 Áko Ízrel dineʼé bitsʼąą Ámor dineʼé yóóʼaheezhjéeʼgo Beth-hóran kin shijaaʼ góyaa dayíjeehgo Bóhólníihii éí wódahdę́ę́ʼ yikʼijįʼ nílótsoh Azííkah kin shijaaʼjįʼ ayóó átʼéego nayííłtą́ągo nidahastseed; Ízrel dineʼé danilíinii diltłish yee nidahastseedígíí biláahdi átʼéego nílótsoh yee nahwésdįįd.
12 Áko Bóhólníihii éí Ámor dineʼé danilíinii Ízrel dineʼé yeidiníʼą́ bijı̨́ı̨́dą́ą́ʼ Jáshowa éí Bóhólníihii yichʼįʼ haadzíiʼgo Ízrel dineʼé yinááł ání,
Jı̨́honaaʼéí nílíinii, niníltłáago Gíbiyan kin haalʼáajį iʼdííníłdíín,Índa tłʼéhonaaʼéí nílíinii, Éíjalan kin haalʼáii honíteeljįʼ iʼdííníłdíín.
13 Áádóó jı̨́honaaʼéí tʼááłáhígi siʼą́ silı̨́ı̨́ʼ índa tłʼéhonaaʼéí tʼáá ákweʼé siʼą́ silı̨́ı̨́ʼ;Ízrel dineʼé biʼanaʼí kʼéédeidiidlaajįʼ ákódzaa.
Daʼ díísh doo Jáshar binaaltsoos biyiʼ bee akʼeʼashchı̨́į da? Jı̨́honaaʼéí yá ałníiʼgi siʼą́ągo doo hah iʼííʼą́ą da nidi kʼasdą́ą́ʼ łaʼa jı̨́ bíighah nááʼásdlı̨́įʼgo índa iʼííʼą́.
14 Bóhólníihii éí diné bisodizin yidiiztsʼą́ʼígíí tʼah bítséedi áádóó bikʼijįʼ tʼah doo ákóhánéeh da nítʼééʼ, háálá Bóhólníihii éí Ízrel dineʼé yá anaaʼ áhoolaa.
15 Ákohgo Jáshowa nádzáago Ízrel dineʼé tʼáá ałtso hoł naakaígíí bił Gílgalgi dah daʼínéhígóó níjíkai.
16 Aláahgo naatʼáanii ashdlaltʼéhígíí adahineezhchą́ąʼgo Makíídah kin haalʼáadi tséʼáán góneʼ nídadeestʼı̨́ı̨́ʼ.
17 Áádóó Jáshowa bee bił hóóneʼgo áhodooʼniid, Aláahgo naatʼáanii ashdlaltʼéego Makíídahdi tséʼáán góneʼ nídadeestʼı̨́įʼgo bééhoozin.
18 Áádóó Jáshowa ádííniid, Tséʼáán góneʼ tsé ayóó ádaníłtsxooígíí bidááh dahididoołmasgo diné aa ádahalyánígíí biniyé nidadoohnił.
19 Nidi tʼáadoo tʼáá ákwii nidaahkaí; nihidaʼanaʼí bikééʼ dohjeehgo bikʼi dah shohjeeh; tʼáadoo tʼóó bikin hadaasʼáágóó anáhájeehí, háálá éí Bóhólníihii nihiDiyin God nihílákʼee hodííʼą́.
20 Ákódaadzaago Jáshowa áádóó Ízrel dineʼé éí bidaʼanaʼí ałtso nideistseedgo ayóó átʼéego nayídeisdįįdgo tʼáá chʼéékaígíí tʼéí kin hadaasʼáii ditą́ągo binaa ahéédaʼastłʼiní góneʼ yah aheezhjééʼ.
21 Diné tʼáá ałtso hashtʼehodítʼéego Makíídah kin haalʼáagi dah daʼínéhígóó Jáshowa yaa nákai. Łaʼí nidi tʼáadoo diné łaʼda Ízrel dineʼé yínííká haadzíʼí da.
22 Ákohgo Jáshowa ádííniid, Tséʼáán ąą ádaahłéehgo áádę́ę́ʼ aláahgo naatʼáanii ashdlaltʼéhígíí shichʼįʼ ninohʼéésh.
23 Áko ákódaadzaago tséʼáándę́ę́ʼ aláahgo naatʼáanii ashdlaltʼéhígíí deiizhʼeezh: éí Jerúsalemdóó aláahgo naatʼáanii áádóó Hííbrandóó aláahgo naatʼáanii áádóó Jármathdóó aláahgo naatʼáanii áádóó Léíkishdóó aláahgo naatʼáanii índa Églandóó aláahgo naatʼáanii danilı̨́ı̨́ nítʼééʼ.
24 Áko aláahgo naatʼáanii danilíinii Jáshowa yaa deizhʼeezhgo Jáshowa éí Ízrel dineʼé tʼáá ałtso hágo yidííniidgo, áko alą́ąjįʼ bídahólníihgo hoł anaaʼ daʼałʼínígíí ábizhdííniid, Hágo, bíighahjįʼ ninoohkáahgo díí aláahgo naatʼáanii dabikʼos bikʼi dadoołʼéés. Áko bíighahjįʼ nijíkaigo dabikʼos bikʼi dazdiilʼeez.
25 Áko Jáshowa áhodííniid, Tʼáadoo ádił dahonołyéʼí; tʼáadoo ádił nisidaahkaí; nihidziilgo ídaʼdííʼnółzin áádóó chánah ídaʼdííʼnółzin, háálá Bóhólníihii éí nihiʼanaʼí tʼáá ałtso bił daʼahohgánígíí nihá yikʼeh didlı̨́į dooleeł.
26 Áádóó bikʼijįʼ Jáshowa éí diné atíjiilaago nidzistseed áádóó tsin ashdlaʼgo bąąh dah hizhdiinil. Áko iʼííʼą́ąjįʼ tsin bąąh dahidéjéeʼgo ájiilaa.
27 Kʼadę́ę eʼeʼaahgo Jáshowa hachʼįʼ haadzíiʼgo bikʼehgo éí tsin bąąhdę́ę́ʼ nidahizhdiʼyiinilgo tséʼáandi nídadeestʼı̨́ʼí góneʼ adadziistłʼííd, áádóó tsé ayóó ádaníłtsxoii bidádazdeeznil. Éí díí jı̨́įjįʼ tʼahdii tʼáá ákótʼé.
28 Áko éí bijı̨́ Jáshowa éí Makíídah kin haalʼáii dadzisná áádóó diltłish bee ałtso nidadzistseed; aláahgo binanitʼaʼí tʼáá bił ádadzisdįįd, áko diné tʼáá átʼé ałtso nidadzistseedgo tʼááłáʼí nidi tʼáadoo łaʼ áádadzisįįd da; tʼáá Jériko kin haalʼáádóó aláahgo naatʼáanii ádajiilaa yę́ęgi átʼéego Makíídah kin haalʼáádóó aláahgo naatʼáanii ałdóʼ ákódajiilaa.
29 Áko Jáshowa éí Makíídah hoolyéédę́ę́ʼ Ízrel dineʼé tʼáá ałtso bił Líbna kin haalʼáajįʼ jíkaigo Líbna kin haalʼáii bikʼi jiijééʼ
30 áádóó Bóhólníihii éí Líbna dineʼé áádóó aláahgo binanitʼaʼí Ízrel dineʼé yílákʼeidííʼą́ągo atídayiilaa áádóó diltłish yee nideistseed, áko diné tʼáá átʼé ałtso nideistseedgo tʼááłáʼí nidi tʼáadoo łaʼ áádeisįįd da; tʼáá Jériko kin haalʼáádóó aláahgo naatʼáanii ádayiilaa yę́ęgi átʼéego díí aláahgo naatʼáanii ałdóʼ ákódayiilaa.
31 Áko Líbna kin haalʼáádę́ę́ʼ Jáshowa dah diiyáago Léíkish kin haalʼáajįʼ Ízrel dineʼé tʼáá ałtso hoł yíkaigo kin haalʼáii biníjíshzhiizh áádóó bikʼi jiijééʼ,
32 áádóó Bóhólníihii éí Léíkish dineʼé danilíinii Ízrel dineʼé yílákʼeidííʼą́ áádóó naaki jı̨́ aleeh góneʼ éí deisnáago diltłish yee nideistseed, áko diné tʼáá átʼé ałtso nideistseed; Líbna kin haalʼáadi ádaadzaaígi ánáádaadzaa.
33 Áko Gíízer kin haalʼáádóó aláahgo naatʼáanii Hóram wolyéii éí Léíkish dineʼé yíká adoolwołgo yiniyé níyá, áko Jáshowa éí Hóram áádóó bidineʼé tʼáá bił nideistseed; tʼááłáʼí nidi tʼáadoo łaʼ áádeisįįd da.
34 Áko Léíkish kin haalʼáádę́ę́ʼ Jáshowa dah diiyáago Églan kin haalʼáajįʼ Ízrel dineʼé tʼáá ałtso hoł yíkaigo kin haalʼáii biníjíshzhiizh áádóó bikʼi jiijééʼ,
35 áko éí bijı̨́ı̨́dą́ą́ʼ dadzisnáago diltłish bee nidadzistseed, áko éí bijı̨́ı̨́dą́ą́ʼ diné tʼáá átʼé tsʼídá ałtso ádadzisdįįd; Léíkish kin haalʼáagi ádadziidzaaígi ánáádajíítʼįįd.
36 Áko Jáshowa éí Églan kin haalʼáádę́ę́ʼ dah náádiidzáago Ízrel dineʼé tʼáá ałtso bił Hííbran kin haalʼáajįʼ jíkaigo éí bikʼi jiijééʼ,
37 áádóó éí dadzisnáago aláahgo binanitʼaʼí áádóó bikin hadaasʼáii índa ákwii diné tʼáá ałtso diltłish bee nidadzistseed; tʼááłáʼí nidi tʼáadoo łaʼ áádadzisįįd da; Églan kin haalʼáii tsʼídá ałtso ádadzisdįįdígi átʼéego diné tʼáá átʼé ałtso ádadzisdįįd.
38 Ákohgo Jáshowa éí Ízrel dineʼé tʼáá ałtso bił Dííber kin haalʼáajįʼ jíkaigo éí bikʼi jiijééʼ,
39 áádóó bikʼeh dazdeesdlı̨́ı̨́ʼ áádóó aláahgo binanitʼaʼí índa bikin hadaasʼáhígíí ałtso dadzisná, áádóó diltłish bee nidadzistseed índa ákwii diné tʼáá átʼé tsʼídá ałtso ádadzisdįįd; tʼááłáʼí nidi tʼáadoo łaʼ áádadzisįįd da; Hííbran kin haalʼáagi áádóó Líbna kin haalʼáádóó aláahgo naatʼáanii tʼáá bił ádajiilaa yę́ęgi átʼéego Dííber kin haalʼáádóó aláahgo naatʼáanii tʼáá bił ákónáádajiidlaa.
40 Ákohgo Jáshowa éí kéyah tʼáá átʼéé nítʼééʼ; dah daaskʼidígóó áádóó shádiʼááhjí kéyahígíí áádóó dadzígaigóó áádóó dziłtsı̨́ı̨́góó índa aláahgo bindanitʼaʼí tʼáá ałtso bikʼeh dazdeesdlı̨́ı̨́ʼ; tʼááłáʼí nidi tʼáadoo łaʼ áádadzisįįd da; dahináanii nidi tsʼídá tʼáá átʼé ałtso ádadzisdįįd. Ízrel dineʼé biBóhólníihii Diyin God ádííniidii bikʼeh dahojííłʼįįd.
41 Áko Kéídesh-barníya kin haalʼáádóó Géíza kin haalʼáajįʼ Jáshowa hadineʼé bił akʼeh dazdeesdlı̨́ı̨́ʼ, índa Góshen kéyahgóó tʼáá átʼé; tʼáá Gíbiyan kin haalʼáajįʼ nidi tʼáá átʼé akʼeh dazdeesdlı̨́ı̨́ʼ.
42 Áko díí aláahgo naatʼáanii danilíinii áádóó bikédaayah tʼááłáhídiígíí Jáshowa bikʼeh dazdeesdlı̨́ı̨́ʼ, háálá Ízrel dineʼé biBóhólníihii Diyin God nilíinii Ízrel dineʼé yá anaaʼ áhoolaa.
43 Ákohgo Jáshowa éí Ízrel dineʼé tʼáá ałtso Gílgalgi dah oonéłíjįʼ bił níjíkai.
