Joshua 11:1-23
11 Ákódaadzaago Héízor kin haalʼáádóó aláahgo naatʼáanii Jéíbin wolyéii díí yaa hodiiztsʼą́ąʼgo éí Méídan kin haalʼáádóó aláahgo naatʼáanii Jóbab wolyéii áádóó Shímran kin haalʼáádóó aláahgo naatʼáanii índa Ákshaf kin haalʼáádóó aláahgo naatʼáanii bichʼįʼ iʼdziisʼaʼ,
2 áádóó aláahgo naatʼáanii danilíinii náhookǫsjígo dziłgo nahazʼánígóó kéédahatʼínígíí áádóó Kíniirath kin haalʼáádóó shádiʼááhjígo Áraba dzígaigóó kéédahatʼínígíí áádóó yíldzisgóó kéédahatʼínígíí índa eʼeʼaahjígo dah yiskʼid bighą́ąʼdi Dóor kin haalʼáagi kéédahatʼínígíí ałdóʼ bichʼįʼ iʼdziisʼaʼ,
3 áádóó Kéínan dineʼé haʼaʼaahjígo índa eʼeʼaahjígo kéédahatʼínígíí áádóó Ámor dineʼé áádóó Het dineʼé áádóó Píírez dineʼé índa Jííbas dineʼé dziłgo nahazʼánígóó kéédahatʼínígíí áádóó Mízpeh nahósʼaʼgi Dził Hérman bitsı̨́įdi Háíva dineʼé kéédahatʼínígíí díí tʼáá ałtso bichʼįʼ iʼdziisʼaʼ.
4 Áádóó éí áádę́ę́ʼ bisiláo tʼáá ałtso yił diné tsʼídá tʼóó ahayóigo yił chʼíníná; éí tónteel bibąąhgóó séígi ánéelą́ą́ʼ nahalingo łı̨́ı̨́ʼ áádóó tsindaabąąs bijáád naakiígíí tʼóó ahayóí yee chʼíníná.
5 Áko díí aláahgo naatʼáanii danilíinii tʼáá ałtso bisiláo áłah ádayiilaago Ízrel dineʼé yił ałkʼiidoojah biniyé beʼekʼid Mííram hoolyéegi tábąąhgóó niníná.
6 Áádóó Bóhólníihii éí Jáshowa áyidííniid, Éí tʼáadoo bééníldzidí, háálá yiską́ągo kóhoodzaago éí tʼáá ałtso naa dideeshʼáałgo Ízrel dineʼé dabinááł nidííłtsił áádóó dabilı̨́ı̨́ʼ dabijátsʼid kʼíhidííłniił índa dabitsindaabąąs bijáád naakiígíí adahididííłkʼą́ą́ł.
7 Áko Jáshowa éí hodineʼé anaaʼ daʼałʼíinii tʼáá ałtso bił tʼáadoo kótʼéʼílíní bikʼijįʼ hajizhjéeʼgo beʼekʼid Mííram hoolyéhí bíighahgi bikʼi jiijééʼ.
8 Áko Bóhólníihii éí Ízrel dineʼé yeidiníʼą́ągo ayóó átʼé Sáídan kin haalʼáágóó áádóó Mísriifath-méíyim kin shijaaʼgóó índa haʼaʼaahjígo Mízpeh yíldzisgóó baa deíjeehgo deiníłtseed, áko tʼáadoo łaʼ áádeisįįd da.
9 Áko Bóhólníihii éí Jáshowa áyidííniidígi átʼéego dabilı̨́ı̨́ʼ bijátsʼid yiyiisneʼ áádóó dabitsindaabąąs bijáád naakiígíí ałtso iidiyiiskʼą́ą́ʼ.
10 Áádóó ákwii hoolzhish yę́ędą́ą́ʼ Jáshowa hadineʼé bił tʼą́ą́ʼ níjíkaigo Héízor kin haalʼáii dadzisnáago éí aláahgo binanitʼaʼí diltłish bee dadziisxı̨́, háálá Héízor kin haalʼáii éí bítséédą́ą́ʼ díí aláahgo bee ídahólníihgo bił nahazʼáanii tʼáá ałtso yee bídahólnííh nítʼééʼ.
11 Áko ákwii kéédahatʼíinii diltłish bee ałtso ádadzisdįįd; dahináanii tʼáadoo łaʼ yidzíiʼ da, índa Héízor kin haalʼáii iidííłkʼą́ą́ʼ.
12 Áádóó aláahgo naatʼáanii danilíinii bikin hadaasʼáii tʼáá ałtso índa aláahgo binanitʼaʼí danilíinii tʼáá ałtso dadzisnáago éí Jáshowa hadineʼé bił diltłish bee nidadzistseedgo tsʼídá ałtso ádadzisdįįd; Mózes éí Bóhólníihii binaalʼaʼí nilı̨́įgo hachʼįʼ yee haadzíiʼii bikʼeh hojííłʼįįd.
13 Nidi dah daaskʼidgóó kin hadaasʼáii éí Ízrel dineʼé tʼáadoo adeideeskʼą́ąʼ da; tʼáá hazhóʼó Héízor kin haalʼáii tʼéiyá éí Jáshowa iidííłkʼą́ą́ʼ.
14 Áádóó díí kin hadaasʼáágóó anaʼí binaalyeʼé bąąh daʼoogą́ąʼii áádóó alı̨́įʼda éí Ízrel dineʼé tʼáá bí ádá áádeisįįd, nidi diné tʼááłáʼí nítínígo diltłish bee nidadziłtseedgo tsʼídá ałtso ádadzisdįįd, áko dahináanii tʼáadoo łaʼ áádadzisįįd da.
15 Bóhólníihii éí Mózes há naalʼaʼí nilı̨́įgo bichʼįʼ bee hadzoodzíʼígi átʼéego Mózes ałdóʼ tʼáá ákótʼéego Jáshowa yichʼįʼ yee haadzííʼ, áko Jáshowa éí tʼáá ákódzaa; Bóhólníihii éí Mózes yichʼįʼ yee haadzíiʼii bikʼehgo Jáshowa íʼjiilaaígíí ałtso łaʼ dajiilaa.
Jáshowa éí kéyah tʼáá átʼé yisná
16 Áko Jáshowa éí kéyah tʼáá átʼéé nítʼééʼ yisná; dah daaskʼidgóó áádóó kéyah shádiʼáahjigo tʼáá átʼé áádóó kéyah Góshen hoolyéhígíí tʼáá átʼé áádóó Áraba dzígaigóó áádóó Ízrel dineʼé bikéyah dah daaskʼidgóó índa dadzígaigóó
17 Dził Héílak siʼánídóó Dził Síyer bichʼįʼgo tʼáá Béíyal-géedjįʼ, éí Dził Hérman siʼání bitsı̨́įdi Lébanan yíldzisgóó akʼeh dadeesdlı̨́ı̨́ʼ. Áko aláahgo binanitʼaʼí danilíinii tʼáá ałtso dzisnáago atíjiilaago nidzistseed.
18 Jáshowa éí aláahgo naatʼáanii danilíinii yił anaaʼ dahółǫ́ǫgo nízaad nihoolzhiizh.
19 Kin hadaasʼáii tʼááłáʼí nidi tʼáadoo łaʼ Ízrel dineʼé yichʼįʼ kʼé daniidzı̨́įʼ da; tʼáá hazhóʼó Háíva dineʼé Gíbiyan kin haalʼáagi kéédahatʼínígíí tʼéiyá; łaʼígíí éí tʼáá ałtso bił anaaʼ dahojíłǫ́ǫgo nidadzistseed.
20 Háálá Bóhólníihii éí ákwii diné kéédahatʼíinii bijéí doo binídahazʼáágóó áyiilaago bąą Ízrel dineʼé yikʼi néijah nítʼééʼ, áko tsʼídá ałtso ábiʼdidooldįįłgo doo yikʼiinítʼı̨́ı̨́ʼgóó nidi tʼóó íidoołdįįł; Bóhólníihii éí Mózes yichʼįʼ yee haadzíʼígi íʼjiilaa.
21 Áádóó ákwii hoolzhish yę́ędą́ą́ʼ Jáshowa éí Éínak* dineʼé íísdįįd; dziłgo nahazʼánígi kéédahatʼíinii, Hííbran kin haalʼáagi áádóó Dííber kin haalʼáagi áádóó Éínab kin haalʼáagi índa Júdah dineʼé bikéyah dziłgo nahazʼánígi tʼáá átʼé áádóó Ízrel dineʼé bikéyah dziłgo nahazʼánígi tʼáá átʼé kéédahojitʼíinii tʼáá ałtso hakin hadaasʼáii tʼáá bił Jáshowa áhásdįįd.
22 Ízrel dineʼé bikéyah biyiʼ éí Éínak dineʼé tʼáadoo łaʼ yidzíiʼ da, tʼáá hazhóʼó Géíza kin haalʼáagi áádóó Gath kin haalʼáagi índa Áshdad kin haalʼáagi tʼéiyá łaʼ tʼáá daadzííʼ.
23 Ákohgo Jáshowa éí kéyah tʼáá átʼéé nítʼééʼ yisná; Bóhólníihii éí Mózes yichʼįʼ yee haadzíiʼii tʼáá ałtso bikʼehgo íʼjiilaa, áko Ízrel dineʼé tʼáá bí dadineʼíígíí bikʼehgo kéyah ííʼ dooleełii Jáshowa hataideezʼą́. Áko éí kéyahgi hashtʼehodíítʼeʼ.
Footnotes
^ Éínak éí Hííbrew kʼehjígo yéʼiitsoh jiníigo óolyé.
