Joshua 12:1-24
12 Ízrel dineʼé díí kéyahdóó aláahgo binanitʼaʼí danilíinii nideistseed áádóó éí bikédaayah Jórdan tooh biláahdi haʼaʼaahjígo áádóó Árnan yíldzisdóó Dził Hérman siʼáníjįʼ Áraba haʼaʼaahjígo tʼáá átʼé nídahodiiʼą́ągo bííʼ daazlı̨́ı̨́ʼ:
2 Ámor dineʼé aláahgo binanitʼaʼí Sáíhan éí Héshban kin haalʼáagi kééhatʼı̨́ı̨́ nítʼééʼ áádóó Árnan yíldzisígíí bíighahgi Aróʼer kin haalʼáhídóó yinantʼáá nítʼééʼ, áádóó éí yíldzisígíí ałnííʼdóó índa Gíliyad kéyah ałnííʼdóó Áman dineʼé bihoodzooígíí Jábak tooh nílíníjįʼ yee bóhólnííh nítʼééʼ,
3 áádóó haʼaʼaahjigo Áraba dzígaidóó beʼekʼid Kíniirathjįʼ áádóó Beth-jéshimath kin shijaaʼ bichʼijígo Áraba dzígaigi beʼekʼidíjįʼ, tʼáá éí Tónteel Dókʼǫ́ǫzhii hoolyéejįʼ índa shádiʼáahjigo Dził Pízgah bitsı̨́įjįʼ yee bóhólnííh nítʼééʼ,
4 áádóó Béíshan nahósʼaʼgi aláahgo naatʼáanii Ag wolyéii, éí yéʼiitsoh daadzíʼígíí łaʼ nilı̨́įgo, Áshtarath kin haalʼáadi áádóó Édriyai kin shijaaʼdi kééhatʼı̨́ı̨́ nítʼééʼ,
5 áádóó Dził Hérman siʼánígíí áádóó Sálkah kin haalʼáii áádóó Béíshan hoolyéii tʼáá átʼé, Gíísher dineʼé áádóó Méíyakah dineʼé bihoodzojįʼ índa Gíliyad kéyah ałnííʼdóó Héshban kin haalʼáádóó aláahgo naatʼáanii Sáíhan bihoodzojįʼ yinantʼáá nítʼééʼ.
6 Éí aláahgo naatʼáanii nidiltʼéego Mózes éí Bóhólníihii yá naalʼaʼí nilíinii índa Ízrel dineʼé yił hakʼeh dadeesdlı̨́ı̨́ʼ áádóó Mózes éí Bóhólníihii yá naalʼaʼí nilı̨́įgo hakédaayah Rúben dineʼé áádóó Géed dineʼé índa Manáseh dineʼé ałnííʼdóóígíí bííʼ dadooleełgo yeidiníʼą́.
Jáshowa éí aláahgo naatʼáanii danilíinii yikʼeh deesdlı̨́ı̨́ʼ
7 Áádóó díí kéyahdóó aláahgo naatʼáanii danilíinii éí Jáshowa áádóó Ízrel dineʼé danilíinii Jórdan tooh eʼeʼaahjígo Lébanan yíldzisgi Béíyal-géed hoolyéhídóó Dził Héílak éí Dził Síyer bichʼįʼgo deezʼáhíjįʼ nidadzistseed, áko éí bikédaayah Jáshowa éí Ízrel dineʼé bííʼ dadooleełii yá ahádeizooígíí bikʼehgo yitaideezʼą́.
8 Díí dziłgo nahazʼánígíí, dayíldzisígíí, dadzígaígíí, tó hadaazlínígíí, dahonoojíhígíí índa shádiʼáahjigo nahósʼaʼígíí éí Het dineʼé, Ámor dineʼé, Kéínan dineʼé, Píírez dineʼé, Háíva dineʼé índa Jííbas dineʼé bikédaayah nítʼééʼ.
9 Jériko dineʼé aláahgo binanitʼaʼí tʼááłáʼí, Béthel bíighahgiígíí Éíʼai dineʼé aláahgo binanitʼaʼí tʼááłáʼí,
10 Jerúsalem dineʼé aláahgo binanitʼaʼí tʼááłáʼí, Hííbran dineʼé aláahgo binanitʼaʼí tʼááłáʼí,
11 Jármath dineʼé aláahgo binanitʼaʼí tʼááłáʼí, Léíkish dineʼé aláahgo binanitʼaʼí tʼááłáʼí,
12 Églan dineʼé aláahgo binanitʼaʼí tʼááłáʼí, Gíízer dineʼé aláahgo binanitʼaʼí tʼááłáʼí,
13 Dííber dineʼé aláahgo binanitʼaʼí tʼááłáʼí, Gííder dineʼé aláahgo binanitʼaʼí tʼááłáʼí,
14 Hórmah dineʼé aláahgo binanitʼaʼí tʼááłáʼí, Éírad dineʼé aláahgo binanitʼaʼí tʼááłáʼí,
15 Líbna dineʼé aláahgo binanitʼaʼí tʼááłáʼí, Adálam dineʼé aláahgo binanitʼaʼí tʼááłáʼí,
16 Makíídah dineʼé aláahgo binanitʼaʼí tʼááłáʼí, Béthel dineʼé aláahgo binanitʼaʼí tʼááłáʼí,
17 Tapúwah dineʼé aláahgo binanitʼaʼí tʼááłáʼí, Híífer dineʼé aláahgo binanitʼaʼí tʼááłáʼí,
18 Éífek dineʼé aláahgo binanitʼaʼí tʼááłáʼí, Lasháran dineʼé aláahgo binanitʼaʼí tʼááłáʼí,
19 Méídan dineʼé aláahgo binanitʼaʼí tʼááłáʼí, Héízor dineʼé aláahgo binanitʼaʼí tʼááłáʼí,
20 Shímran-mííran dineʼé aláahgo binanitʼaʼí tʼááłáʼí, Ákshaf dineʼé aláahgo binanitʼaʼí tʼááłáʼí,
21 Téíyanak dineʼé aláahgo binanitʼaʼí tʼááłáʼí, Megído dineʼé aláahgo binanitʼaʼí tʼáá łáʼí,
22 Kíídesh dineʼé aláahgo binanitʼaʼí tʼááłáʼí, Dził Kármelgi Jákniyam dineʼé aláahgo binanitʼaʼí tʼááłáʼí,
23 Dóor agháhóóʼáadi kin haalʼáhígóó kéédahatʼíinii aláahgo binanitʼaʼí tʼááłáʼí, Gílgal dineʼé aláahgo binanitʼaʼí tʼááłáʼí,
24 Térza dineʼé aláahgo binanitʼaʼí tʼááłáʼí; éí tʼáá ałtsogo tádiindóó baʼaan tʼááłáʼí aláahgo naatʼáanii danilı̨́ı̨́ nítʼééʼ.
