Joshua 13:1-33
13 Íídą́ą́ʼ Jáshowa ląʼí binááhaigo biʼniitihgo, áko Bóhólníihii ábidííniid, Tʼáá íiyisí hasínítih áádóó tʼóó ahayóí ninááhai, ákondi kéyah ííʼ dadooleełii ląʼí daadziih.
2 Díí kéyah tʼah daadziih: éí Filístiya dineʼé bikéyah tʼáá átʼé áádóó Gíísher dineʼé bikéyah tʼáá átʼé
3 éí Ííjip kéyah haʼaʼaahjígo Sháíhar hazʼánídóó, náhookǫs bichʼįʼgo Ékran kéyah hoodzojįʼ; éí Kéínan dineʼé bígo baa nitsáhákees, áádóó Filístiya dineʼé aláahgo binanitʼaʼí ashdlaltʼéego bikédaayah, éí Géíza dineʼé, Áshdad dineʼé, Áshkelan dineʼé, Gath dineʼé índa Ékran dineʼé aláahgo binanitʼaʼí danilíinii bikédaayah, áádóó Éívim dineʼé bikéyah náhásdzooígíí ałdóʼ
4 shádiʼáahjigo Kéínan dineʼé bikéyah tʼáá átʼé, áádóó Miiʼéírah hoolyéhígíí éí Sáídan dineʼé daabíhígíí, Éífekgóó Ámor dineʼé bikéyah hoodzojįʼ
5 áádóó Gííbal dineʼé bikéyah áádóó Dził Lébanan níʼáhígíí tʼáá átʼé, haʼaʼaah bichʼįʼgo Dził Hérman bitsı̨́įgi Béíyal-géed kin shijaaʼ áádóó Héímathjįʼ ahóótʼiʼígíí bíighahgo.
6 Dził Lébanan siʼánídóó kéyah aghá dahazʼáágóó kéédahatʼíinii tʼáá ałtso Mísrefath-méíyim kin shijaaʼjįʼ éí tʼáá átʼé Sáídan dineʼé tʼah daadziih. Ízrel dineʼé danilíinii bilą́ąjįʼ éí tʼáá ałtso chʼídínéeshkał, ákondi Ízrel dineʼé éí kéyah bííʼ dadooleeł biniyé nichʼįʼ bee haasdzíʼígi átʼéego bá ałtsʼádadíízo.
7 Éí bąą kʼad díí kéyah bííʼ dadooleeł biniyé náhástʼéiigo dadineʼé índa Manáseh dineʼé ałnííʼdóóígíí bá ałtsʼádadíízo.
Kéyah éí Manáseh áádóó Rúben índa Géed bá atsʼádeetʼánígíí
8 Rúben dineʼé áádóó Géed dineʼé índa Manáseh dineʼé ałnííʼdóóígíí kéyah yił bííʼ daazlı̨́įʼgo éí Mózes beidiníʼą́; Jórdan tooh wónaanídi haʼaʼaahjigo Mózes éí Bóhólníihii yá naalʼaʼí nilı̨́įgo haidiníʼáanii hóóʼ daazlı̨́ı̨́ʼ.
9 Árnan tooh bibąąhgóó Aróʼer kin haalʼáádóó áádóó yíldzis ałníiʼgi kin haalʼáádóó áádóó Médiiba dzígaigóó tʼáá átʼé Dáíban bíighahjįʼ,
10 áádóó Ámor dineʼé aláahgo binanitʼaʼí Sáíhan éí Héshbangi aláahgo naatʼáanii bikin hadaasʼáii tʼáá átʼé yinantʼáá nítʼééʼ yę́ę, Áman dineʼé bihoodzo bíighahjįʼ hóóʼ daazlı̨́ı̨́ʼ,
11 áádóó Gíliyad kéyah áádóó Gíísher dineʼé áádóó Méíyakah dineʼé bikéyah áádóó Dził Hérman tʼáá átʼé, áádóó Béíshan kéyahgóó tʼáá átʼé Sálkah kin haalʼáajįʼ hóóʼ daazlı̨́ı̨́ʼ.
12 Béíshan kéyahgi Ag aláahgo bee bóhólníhígíí tʼáá átʼé éí Áshtarath kin haalʼáagi áádóó Édriyai kin haalʼáagi aláahgo naatʼáanii nilı̨́ı̨́ nítʼééʼ yę́ę, tʼáá bí tʼéiyá yéʼiitsoh daadzíʼígíí nilı̨́ı̨́ nítʼééʼ; díí Mózes hakʼeh deesdlı̨́įʼgo chʼíhoniiskaad.
13 Nidi Ízrel dineʼé éí Gíísher dineʼé índa Méíyakah dineʼé tʼáadoo baa chʼídahaazhjéeʼ da, nidi dííshjı̨́įjįʼ Gíísher dineʼé índa Méíyakah dineʼé éí Ízrel dineʼé yitahgóó kéédahatʼı̨́.
14 Líívai dineʼé bííʼ dooleełii Mózes tʼáadoo beidiníʼą́ą da, Bóhólníihii Ízrel dineʼé biBóhólníihii Diyin God bichʼįʼ didlidgo náádahaniihii tʼéí bííʼ dadooleeł átʼé; tʼáá ákótʼéego yee áyidííniid niʼ.
15 Áko Rúben dineʼé daʼahílchíihii ahiiʼ hááʼahiyoolchíłígíí bikʼehgo kéyah ííʼ dooígíí Mózes beidiníʼą́.
16 Áádóó éí bikéyah Árnan tooh bibąąhgóó Aróʼer kin haalʼáádóó áádóó yíldzis ałníiʼgi kin haalʼáádóó índa Médiiba dzígaigóó tʼáá átʼé,
17 Héshban kin haalʼáii áádóó dzígaigi kin hadaasʼáhígíí tʼáá bił, éí Dáíban áádóó Béímath-béíyal áádóó Beth-béíyal-míyan dahoolyéhígíí,
18 áádóó Jahéíza áádóó Kíídemath áádóó Méfeiyath
19 áádóó Kíriyathéíyim áádóó Síbmah índa yíldzisgi yanáalkʼidígíí bighą́ąʼgi Záreth-shéíhar kin hadaasʼáii
20 áádóó Beth-píyor áádóó Áshdath-pízgah índa Beth-jéshimath dahoolyéhígíí
21 áádóó tʼáá átʼé dadzígaidi kin hadaasʼáii áádóó Ámor dineʼé aláahgo binanitʼaʼí Sáíhan éí Héshban kin haalʼáagi aláahgo naatʼáanii bee bóhólnííh nítʼééʼ yę́ę tʼáá átʼé, éí Mídiyan dineʼé binanitʼaʼí danilíinii éí Íívai áádóó Rííkem áádóó Zer áádóó Her índa Rííba daolyéii, Sáíhan yá naatʼáanii danilı̨́ı̨́ nítʼééʼ; éí Mózes hakʼeh deesdlı̨́ı̨́ʼ.
22 Bíyor biyeʼ Béílam ałdóʼ éí náásgóó áhodoonííł yaa halneʼii áhodilʼíinii ałdóʼ tʼáá yił diltłish bee ayóó átʼéego Ízrel dineʼé ádahasdįįd.
23 Áádóó Rúben dineʼé bikéyah éí Jórdan tooh bihoodzo nítʼééʼ. Díí kéyah Rúben dineʼé ahiiʼ hááʼahiyoolchííłgóó ákwii kin hadaasʼáii áádóó kin dah naazhjaaʼígíí tʼáá bił bííʼ átʼé.
24 Áádóó Géed dineʼé ałdóʼ kéyah ííʼ dadooleełii Mózes beidiníʼą́; éí Géed dineʼé ahiiʼ hááʼahiyoolchíiłii bikʼehgo baa deetʼą́.
25 Dabikéyahígíí éí Jéízer kin haalʼáádóó áádóó Gíliyad kéyahdóó kin hadaasʼáii tʼáá ałtso áádóó Áman dineʼé bikéyah ałnííʼdóó Rábah kin haalʼáii haʼaʼaahjígo Aróʼer kin haalʼáajįʼ baa deetʼą́.
26 Áádóó Héshban kin haalʼáádóó Réímath-mízpah kin haalʼáajįʼ áádóó Bétonim kin haalʼáajįʼ índa Meihanéíyim kin haalʼáádóó Dííbir kin haalʼáii bikéyahjįʼ,
27 áádóó yíldzisgóó Beth-éíram kin shijaaʼígíí, Beth-nímrah kin haalʼáii, Sákath kin shijaaʼígíí áádóó Zéífan kéyahígíí áádóó Héshban kin haalʼáii aláahgo binanitʼaʼí Sáíhan wolyéii bee bóhólnííh nítʼééʼ yę́ę łahjįʼ yidziihígíí, éí Jórdan tooh bee hoodzooígíí, Kíniireth tó siyíníjįʼ nihoodzo áádóó haʼaʼaahjigo tʼáá átʼé baa hodeetʼą́.
28 Díí kéyahígíí Géed dineʼé ahiiʼ hááʼahiyoolchííłgóó bikʼehgo ákwii kin hadaasʼáii índa kin naazhjaaʼígíí tʼáá bił bííʼ átʼé.
29 Áádóó Manáseh dineʼé ałnííʼdóóígíí éí kéyah ííʼ dadooleełii Mózes beidiníʼą́; éí Manáseh dineʼé ałnííʼdóóígíí ahiiʼ hááʼahiyoolchíłígíí bikʼehgo bá ałtsʼáádzo.
30 Éí bikéyahígíí Meihanéíyim kin shijaaʼdóó, Béíshan kéyahgóó tʼáá átʼé, Béíshan dineʼé aláahgo binanitʼaʼí Ag wolyéii bee bóhólnííh nítʼééʼ yę́ę tʼáá átʼé, áádóó Jéíyer wolyéii bikin naazhjaaʼígíí tʼáá ałtso, éí Béíshan kéyahgi hastą́diingo kin hadaasʼáii,
31 áádóó Gíliyad kéyah ałnííʼdóóígíí índa Béíshan dineʼé aláahgo binanitʼaʼí Ag wolyéii bee bóhólnííh nítʼééʼ yę́ę biyiʼ Áshtarath áádóó Édriyai kin hadaasʼáii, díí éí Manáseh biyeʼ Méíkir bidineʼé ałnííʼdóóígíí ahiiʼ hááʼahiyoolchíłígíí bikʼehgo bá ałtsʼádaasdzo.
32 Díí kéyah ííʼ dooleeł biniyé Jórdan tooh wónaanídi Jériko haʼaʼaahjigo Móʼab dzígaigóó Mózes hataideezʼą́.
33 Nidi Líívai dineʼé bííʼ dooleełii Mózes tʼáadoo beidiníʼą́ą da; Ízrel dineʼé biBóhólníihii Diyin God éí bííʼ dooleełii bá jílı̨́, tʼáá ákótʼéego yee áyidííniid niʼ.
