Joshua 14:1-15
14 Áádóó Kéínan kéyah biyiʼ díí kédaayah Ízrel dineʼé bííʼ daazlı̨́ı̨́ʼ; Eliyéízar nááʼiiłniihii nilíinii áádóó Nan biyeʼ Jáshowa índa Ízrel dadineʼé yá aląąjįʼ naazíinii éí kéyah bííʼ dadooleełígíí baa dahideestʼą́.
2 Yááʼiiltʼeʼ bikʼehgo ííʼ dooleełii bííʼ daazlı̨́ı̨́ʼ; Bóhólníihii éí Mózes binahjįʼ yee haadzíiʼii bikʼehgo ádzaa; jó, Ízrel dineʼé náhástʼéídóó nááʼáłníiʼgoígíí kéyah baa dahideestʼą́.
3 Háálá Ízrel dineʼé naakigo dah yikahígíí áádóó Manáseh nááʼáłníiʼgoígíí éí Jórdan tooh wónaanídi kéyah ííʼ dooleełii Mózes beidiníʼą́, nidi éí bitahgi Líívai dineʼé éí kéyah ííʼ dooleełii tʼáadoo łaʼ yeidiníʼą́ą da.
4 Háálá Jóseph dineʼé naakigo dah yikahígíí éí Manáseh áádóó Íífreiyim dineʼé ádaatʼı̨́; éí bąą Líívai dineʼé éí kéyah ííʼ dooleełígíí tʼáadoo łaʼ yaa deideezʼą́ą da, nidi kin hadaasʼáii yiiʼ kéédahatʼı̨́į dooígíí tʼéiyá; ákwii kéyah dahootsooígíí tʼáá bił éí dabilı̨́ı̨́ʼ bá índa ákwii bee dahólónígíí bá nahazʼą́.
5 Bóhólníihii éí Mózes yichʼįʼ haadzíʼígi átʼéego Ízrel dineʼé ákódaʼiilaago kéyah bííʼ dadooleełii ałtsʼádaʼdeesdzo.
Hííbran kéyah éí Kéíleb baa deetʼą́
6 Áko Júdah dineʼé éí Gílgalgi Jáshowa yaa yíkai áádóó Jiifáneh éí Kíínez dineʼé nilínígíí biyeʼ Kéíleb éí Jáshowa áyidííniid, Nił bééhózingo, Bóhólníihii Diyin God bitsʼą́ą́dóó diné jílíinii Mózes áyidííniidígíí, éí shí índa ni ałdóʼ ádínihídééltʼiʼgo Kéídesh-barníyadi kódííniid niʼ.
7 Dízdiin shinááhaigo Mózes éí Bóhólníihii yá naalʼaʼí nilíinii Kéídesh-barníyadóó naalchiʼí nishłı̨́įgo kéyah hadeesił biniyé chʼíshiníłʼaʼ yę́ędą́ą́ʼ, saadígíí shijéí biyiʼdi baa ákoniizı̨́ʼígíí bee bił náhweeshneʼ.
8 Nidi shikʼisóó danilíinii shił naaskaígíí éí diné bijéí nitsideistłahgo tʼóó yił dahóółhééʼ, nidi shí éí tʼáá sézı̨́ı̨́ nítʼééʼ Bóhólníihii shiDiyin God bikééʼ yishááł nítʼééʼ.
9 Áádóó éí bijı̨́ı̨́dą́ą́ʼ Mózes ádee hadoodzíiʼgo ání, Tʼáá aaníí kéyah bikááʼ nisíníyáhígíí ni áádóó naʼáłchíní bił éí kéyah ííʼ dooleełii danihíiʼgo ahoolʼáa doo, háálá tʼáá sínízı̨́ı̨́ nítʼééʼ Bóhólníihii shiDiyin God bikééʼ yínááł nítʼééʼ.
10 Áko kʼad, shoo, Bóhólníihii hinishnáago áshósin, tʼáá ádííniidígi átʼéego, dízdiindóó baʼaan ashdlaʼ nááhaijįʼ Bóhólníihii díí saad yee Mózes yichʼįʼ haadzíiʼii bee Ízrel dineʼé honoojíidi naaldeeh yę́ędą́ą́ʼ hinishnáago áshósingo hoolzhiizh, áko kʼad, shoo, díí jı̨́ tseebídiindóó baʼaan ashdlaʼ shinááhai.
11 Azhą́ ákótʼée nidi díí jı̨́ı̨́góó tʼahdii ayóó ásóodziil; Mózes dah shidiiłʼaʼgo shíyoołkááł yę́ędą́ą́ʼ ásóodziil yę́ę tʼahdii tʼáá ákótʼé; anaaʼ bichʼįʼ áádóó tʼáá shí hinishnánígíí tʼahdii bidziilgo hidishááh índa nináháshdááh.
12 Éí bąą kʼad díí dziłgo hazʼánígíí shaa diníʼaah; jó, łah Bóhólníihii tʼáá ákótʼéego yee haadzíiʼ niʼ; jó, éí bijı̨́ı̨́dą́ą́ʼ ákwii Éínak dineʼé kéédahatʼı̨́ı̨́ nítʼééʼ áádóó ayóó átʼé kin hadaasʼá ditą́ągo binaa ahéédaʼastłʼingo baa dahodisínítsʼą́ą́ʼ, áko Bóhólníihii shił hólǫ́ǫgo éí ałtso shaa chʼíhidoojah; jó, Bóhólníihii ákódííniid niʼ.
13 Ákohgo Jáshowa hakʼijisdliʼgo Jiifáneh biyeʼ Kéíleb éí Hííbran dineʼé bikéyah hóóʼ dooleeł biniyé haidiníʼą́.
14 Éí bąą Hííbran kéyah éí Jiifáneh éí Kíínez dineʼé nilínígíí biyeʼ Kéíleb bí dooleełígíí yeidiníʼą́, háálá tʼáá dzizı̨́ı̨́ nítʼééʼ Ízrel dineʼé biBóhólníihii Diyin God bikééʼ joogááł nítʼééʼ.
15 Éí bítséédą́ą́ʼ Hííbran hoolyéhígi Kírjath-árba* hoolyéé nítʼééʼ. Éínak dineʼé bitahgi díí diné Árba wolyéii ayóó átʼéii nilı̨́ı̨́ nítʼééʼ. Ákohgo éí kéyahgi anaaʼ doo hólǫ́ǫ́góó hashtʼehodítʼéé nítʼééʼ.
Footnotes
^ Kírjath-árba jiníigo éí Árba bikin haalʼáii jiníigo óolyé.
