Joshua 15:1-63
15 Júdah dineʼé ahiiʼ hááʼahiyoolchíiłii bikʼehgo shádiʼáahjigo Íídam kéyah bihoodzojįʼ tʼáá Zin honoojíígóó shádiʼáahjigo hazʼánígíí bíighahgo bííʼ dooleełgo baa deetʼą́.
2 Áádóó shádiʼááhjí bihoodzo dooígíí éí Tónteel Dókʼǫ́ǫzhii nineelʼánídóó, táłtsʼá hiníyínídóó hodeesdzo,
3 éí shádiʼáahjigo hahoodzogo Akrábim báhátis, Zin honoojíígóó hodeesdzo áádóó Kéídesh-barníyají shádiʼááh góde índa Hézran kin shijaaʼ bíighahgóó, Ádar hazʼáníjįʼ índa Kárka hazʼáníjįʼ hodeesdzo,
4 áádóó Ázmangóó nááhoodzooígíí éí Ííjip tooh níłtsʼąʼígíí bíighahgóó áádóó tónteel siyíníjįʼ nihoodzo. Díí éí shádiʼááhjí nihihoodzo dooleeł.
5 Áádóó Tónteel Dókʼǫ́ǫzhii siyı̨́įgo bee hoodzooígíí éí Jórdan tooh biih yílíníjįʼ éí haʼaʼaahjígo hoodzo dooígíí átʼé. Áádóó náhookǫsjí hoodzo dooígíí éí Tónteel Dókʼǫ́ǫzhii táłtsʼá hiníyínígi Jórdan tooh biih yílínídóó hahoodzo.
6 Áádóó éí Beth-hágla hazʼánígóó hodeesdzo áádóó Beth-áraba kin shijaaʼ náhookǫsjí hodeesdzo índa Rúben biyeʼ Bóhan bitsé siʼání góde hodeesdzo,
7 áádóó Éíkor yíldzisdóó Dííber kin haalʼáá góde hodeesdzo; kodóó náhookǫsjígo Gílgal hazʼánígóó hodeesdzo, éí Adámim báhátis shádiʼááhjí yíldzis binaashiijí hodeesdzo, áádóó Enshíímesh tó háálínígóó hodeesdzo índa Enrógel tó háálíníjįʼ nihoodzo,
8 áko Hínam biyeʼ bikéyah yíldzis bíighah góde éí Jííbas kin haalʼáhígíí shádiʼááhjígo hodeesdzo; tʼáá éí Jerúsalem hoolyé, áádóó eʼeʼaahjígo Hínam yíldzis binaashii dziłígíí bighą́ą́ʼ góde hodeesdzo, éí náhookǫsjí yéʼiitsoh biyíldzis nineelʼánídi átʼé,
9 áko dził bighą́ą́ʼdę́ę́ʼ hoodzo dooígíí Neftówah tó nílíníjįʼ hodeesdzo, éí áádóó Dził Íífran kin hadaasʼáajįʼ, áádóó Béíyala kin haalʼáajįʼ hodeesdzo; tʼáá éí Kírjath-jíyarim hoolyé,
10 áádóó éí hoodzo dooígíí Béíyala kin shijaaʼdóó eʼeʼaahjí Dził Síyerjįʼ hodeesdzo áádóó Dził Jíyarim náhookǫsjí hodeesdzo; tʼáá éí Késalan hoolyé áádóó Beth-shíímesh kin shijaaʼ góyaa índa Tímnah kin shijaaʼ bíighahgóó hodeesdzo;
11 éí Ékran kin haalʼáii náhookǫsjí dah yiskʼidíjįʼ hodeesdzo áádóó Shíkeran kin shijaaʼjįʼ hodeesdzo áádóó Dził Béíyala kin haalʼáajįʼ áádóó Jábniyel kin shijaaʼgóó hodeesdzo índa tónteel siyíníjįʼ hodeesdzo.
12 Áko eʼeʼaahjí hoodzo dooígíí éí ayóó átʼé tónteel siyínígíí bibąąhgóó hodeesdzo. Díí éí Júdah dineʼé ahiiʼ hááʼahiyoolchíiłii bikʼehgo bináhásdzo.
Kéíleb éí Hííbran áádóó Dííber kin haalʼáii yisná (Judg. 1:10-15)
13 Jiifáneh biyeʼ Kéíleb éí Júdah dineʼé bitahgi Jáshowa wolyéii kéyah łaʼ haidiníʼą́; Bóhólníihii éí Jáshowa yichʼįʼ tʼáá ákótʼéego yee haadzííʼ; éí Éínak dineʼé Árba wolyéii bizhéʼé bikin haalʼáii Hííbran hoolyéii yeidiníʼą́.
14 Áko Kéíleb éí Éínak biyeʼké táltʼéhígíí Shííshai áádóó Aháíman índa Tálmai haa chʼéheezhjééʼ; díí Éínak yaʼáłchíní danilı̨́.
15 Áádóó dashdiiyáago Dííber kin haalʼáagi kéédahatʼíinii bichʼįʼ anaaʼ hodzisłı̨́ı̨́ʼ; kin haalʼáii Dííber hoosyeʼígíí bítséedidą́ą́ʼ Kírjath-síífer hoolyéé nítʼééʼ.
16 Áko Kéíleb ání, Tʼáá háiida Kírjath-síífer yichʼįʼ anaaʼ hasłı̨́įʼgo bikʼeh dzideesdlı̨́ʼígíí éí shitsiʼ Áksa hweʼasdzą́ą doo biniyé haa deeshtééł.
17 Áko Kéíleb bikʼis Kíínez biyeʼ nilíinii Áthniyel éí akʼeh deesdlı̨́įʼgo Kéíleb bitsiʼ Áksa éí Áthniyel beʼasdzą́ą dooleeł biniyé hainíłtı̨́.
18 Áádóó ákódzaago asdzání éí Áthniyel yaa níyáago náyookąąhgo ání, Shizhéʼé kéyah łaʼ bíídííkił. Áádóó éí asdzání bitélii yikʼi nááyáago Kéíleb ábíłní, Haʼátʼíísh nínízin?
19 Áko ábizhdííniid, Shikʼijiinídliih; jó, shádiʼááhjí kéyah hóółtseii shaa dííníʼą́; tó hadaazlı̨́įgi ałdóʼ łahgo shaa nááhodidííʼááł. Áko Kéíleb éí wódahdi áádóó wóyahdi tó hadaazlı̨́ı̨́góóígíí haidiníʼą́.
Júdah dineʼé bikin hadaasʼáii
20 Díí ííʼ dooleełii Júdah dineʼé ahiiʼ hááʼahiyoolchíiłii bikʼehgo bííʼ daazlı̨́ı̨́ʼ.
21 Wózhǫ́ shádiʼááhjígo Júdah dineʼé bikin hadaasʼáii éí Íídam kéyah hoodzo bichʼįʼgoígíí éí kódahoolyé: Kábziyel, Ííder, Jéígar,
22 Kíína, Daimóna, Adéída,
23 Kíídesh, Héízar, Íthnan,
24 Zif, Tíílem, Bíyalath,
25 Héízor-hadátah áádóó Kííriyath-hézran, tʼáá éí Héízar hoolyé,
26 Éímam, Shííma, Móladah,
27 Héízar-gáda, Héshman, Beth-péílet,
28 Héízar-shúwal, Bíyer-shííba, Bizjáthjah,
29 Béíyala, Áíyim, Íízem,
30 Eltólad, Kíísil, Hórmah,
31 Zíklag, Madmána, Sansána,
32 Lebéíyath, Shílhim, Áyiin índa Ríman; tʼáá átʼégo bikin dah naazhjaaʼígíí tʼáá bił naadiin náhástʼéigo kin hadaasʼáii Júdah dineʼé bííʼ daazlı̨́ı̨́ʼ.
33 Áádóó dzígaigi kin hadaasʼáii kódahoolyé: Éshteiyal, Zóriyah, Áshma,
34 Zanówah, Engánim, Tapúwah, Íínam,
35 Jármath, Adálam, Sóko, Azííka,
36 Sharéíyim, Adithéíyim, Gedíírah índa Gedíírah-théíyim; éí bikin dah naazhjaaʼígíí tʼáá bił dı̨́ı̨́ʼtsʼáadahgo kin hadaasʼáii ałdóʼ Júdah dineʼé bííʼ daazlı̨́ı̨́ʼ.
37 Áádóó Zíínan, Hadásha, Mígdal-géed,
38 Díliyan, Mízpeh, Jákthiyel,
39 Léíkish, Bázkath, Églan,
40 Kában, Lámam, Kíthlish,
41 Gedíírath, Beth-déígan, Néíyamah índa Makíídah; éí bikin dah naazhjaaʼígíí tʼáá bił haastą́ʼáadahgo kin hadaasʼáhígíí ałdóʼ Júdah dineʼé bííʼ daazlı̨́ı̨́ʼ.
42 Áádóó Líbna, Ííther, Éíshan,
43 Jífta, Áshna, Níízib,
44 Kiiʼáílah, Ákzib índa Maríísha; éí bikin dah naazhjaaʼígíí tʼáá bił náhástʼéigo kin hadaasʼáhígíí Júdah dineʼé bííʼ daazlı̨́ı̨́ʼ.
45 Áádóó Ékran kin haalʼáii, bikin dah naazhjaaʼígíí tʼáá bił;
46 Ékrandóó tónteel siyíníjįʼ, tʼáá átʼé Áshdad kin haalʼáii bíighahgóó éí bikin dah naazhjaaʼígíí tʼáá bił.
47 Áshdad kin haalʼáii, bikin dah naazhjaaʼígíí tʼáá bił; Géíza kin haalʼáii, bikin dah naazhjaaʼígíí tʼáá bił; Ííjip tó nílíníjįʼ índa ayóó átʼé tónteel siyínígíí bibąąhgóó kin naazhjaaʼígíí tʼáá bił Júdah dineʼé bííʼ daazlı̨́ı̨́ʼ.
48 Áádóó dziłgo nahazʼánígóó kin hadaasʼáii kódahoolyé: Shéímer, Játer, Sóko,
49 Dána, Kírjath-sána, tʼáá éí Dííber hoolyé,
50 Éínab, Éshtiimoh, Éínim,
51 Góshen, Hólan índa Gáílo; éí bikin dah naazhjaaʼígíí tʼáá bił łaʼtsʼáadahgo kin hadaasʼáhígíí Júdah dineʼé bííʼ daazlı̨́ı̨́ʼ.
52 Áádóó Árab, Dúmah, Éshiyan,
53 Jéínam, Beth-tapúwah, Afííkah,
54 Hámtah áádóó Kírjath-árba, tʼáá éí Hííbran hoolyé índa Záíyor; éí bikin dah naazhjaaʼígíí tʼáá bił náhástʼéigo kin hadaasʼáhígíí Júdah dineʼé bííʼ daazlı̨́ı̨́ʼ.
55 Áádóó Méíyan, Kármel, Zif, Játah,
56 Jézriyel, Jákdiyam, Zanówah,
57 Kéin, Gíbiyah índa Tímnah éí bikin dah naazhjaaʼígíí tʼáá bił, tʼáá éí neeznáá kin hadaasʼáhígíí Júdah dineʼé bííʼ daazlı̨́ı̨́ʼ.
58 Áádóó Hálhal, Beth-zer, Gíídar,
59 Méíyarath, Beth-ánath índa Éltiikan; éí bikin dah naazhjaaʼígíí tʼáá bił hastą́ągo kin hadaasʼáhígíí Júdah dineʼé bííʼ daazlı̨́ı̨́ʼ.
60 Áádóó Kírjath-béíyal, tʼáá éí Kírjath-jíyarim hoolyé índa Rábah; éí bikin dah naazhjaaʼígíí tʼáá bił naakigo kin haalʼáhígíí ałdóʼ Júdah dineʼé bííʼ silı̨́ı̨́ʼ.
61 Áádóó honoojíidi Beth-áraba, Mídin, Siikéíkah,
62 Níbshan áádóó Áshįįh kin haalʼáii índa Engíídai; éí bikin dah naazhjaaʼígíí tʼáá bił hastą́ągo kin hadaasʼáhígíí ałdóʼ Júdah dineʼé bííʼ daazlı̨́ı̨́ʼ.
63 Nidi Júdah dineʼé éí Jííbas dineʼé Jerúsalem kin haalʼáagi kéédahatʼínígíí baa chʼídahidoojahígíí doo yídaneelʼą́ą da; éí bąą díí jı̨́įjįʼ Jííbas dineʼé éí Júdah dineʼé yił Jerúsalem kin haalʼáagi kéédahatʼı̨́.
