Joshua 16:1-10
16 Yááʼiiltʼeʼ bikʼehgo Jóseph dineʼé bikéyah dooígíí éí Jériko kin haalʼáii nahósʼaʼgi Jórdan tooh nílínídóó Jériko tó háálínígíí haʼaʼaahjígo hazʼáníjįʼ áádóó Jériko kin haalʼáhídóó Dził Béthelgóó honoojíigo hazʼánígóó hodeesdzo,
2 áádóó Dził Bétheldóó Luz kin haalʼáajįʼ áádóó Átarath kin haalʼáii éí Árkai dineʼé kéédahatʼı̨́įjįʼ hodeesdzo,
3 áádóó eʼeʼaah bichʼįʼgo Jaflíítai dineʼé bikéyahjįʼ índa Beth-hóran kin shijaaʼ wóyahdiígíí bíighahjįʼ áádóó Gíízer kin haalʼáágóó índa tónteel siyíníjįʼ hodeesdzo.
4 Kótʼéego Jóseph baʼáłchíní éí Manáseh dineʼé áádóó Íífreiyim dineʼé kéyah bííʼ dooleełii nídahodiiʼą́.
5 Íífreiyim dineʼé ahiiʼ hááʼahiyoolchíiłii bikʼehgo bikédaayah ííʼ dooleełii bináhásdzo dooígíí éí Átarath-ádar kin haalʼáii haʼaʼaahjígo Beth-hóran kin shijaaʼ wódahdiígíí bíighahjįʼ hodeesdzo,
6 áádóó hahoodzooígíí tónteel bichʼįʼgo hoodzo, náhookǫsjiígíí éí Míkmiitha hazʼáníjįʼ hodeesdzo índa haʼaʼaahjigo hoodzooígíí éí Téíyanath-sháíloh kin shijaaʼgóó ahééhoodzo, áádóó éí biláahdi haʼaʼaahjigo Janówah kin shijaaʼgóó hodeesdzo
7 índa Janówahdóó Átarath kin shijaaʼjįʼ índa Néíyarah kin shijaaʼ góyaa hodeesdzo, áádóó Jériko kin haalʼáajįʼ índa Jórdan toohjįʼ hodeesdzo.
8 Tapúwah kin shijaaʼdóó hahoodzo dooígíí éí eʼeʼaahjigo Kéínah tó nílíníjįʼ hoodzo, áádóó tónteel siyíníjįʼ hodeesdzo. Díí éí Íífreiyim dineʼé ahiiʼ hááʼahiyoolchíiłii bikʼehgo kéyah bííʼ daazlı̨́įʼii átʼé,
9 áádóó kin hadaasʼáii éí Íífreiyim dineʼé bee bíhoʼdoosníiʼgo Manáseh dineʼé bitahgóó ííʼ dooleełgo kin hadaasʼáhígíí kin dah naazhjaaʼígíí tʼáá bił bee bíhoʼdoosnííʼ.
10 Nidi Íífreiyim dineʼé éí Kéínan dineʼé Gíízer kin haalʼáagi kéédahatʼínígíí tʼáadoo baa chʼídahaazhjéeʼ da, áko díí jı̨́įjįʼ Kéínan dineʼé éí Íífreiyim dineʼé yitahgi kéédahatʼı̨́įgo yinaalteʼ daazlı̨́įʼgo tʼáá hazááká bá nidajilnish nítʼééʼ.
