Joshua 17:1-18
17 Áko yááʼiiltʼeʼ bikʼehgo Manáseh dineʼé éí kéyah łaʼ bá haadzo, háálá éí Jóseph alą́ąjįʼ bá yizhchı̨́, Méíkir éí Manáseh alą́ąjįʼ bá yizhchı̨́; éí Gíliyad dineʼé bizhéʼé jílı̨́; jó, diné naabaahii jílı̨́įgo bąą Gíliyad áádóó Béíshan kéyahígíí há haadzo.
2 Áádóó yááʼiiltʼeʼ bikʼehgo Manáseh dineʼé łahjįʼígíí ahiiʼ hááʼahiyoolchíiłii bikʼehgo kéyah bá haadzo; éí Éíbiyíízer dineʼé, Híílek dineʼé, Ásriyel dineʼé, Shííkem dineʼé, Híífer dineʼé índa Shiimáída dineʼé; díí éí Jóseph biyeʼ Manáseh wolyéii baʼáłchíní ahiiʼ hááʼahiyoolchíiłii ádaatʼı̨́.
3 Ákondi Ziilófehad éí Híífer biyeʼ átʼé, éí Gíliyad biyeʼ átʼé, éí Méíkir biyeʼ átʼé, éí Manáseh biyeʼ átʼé, áko Ziilófehad éí biyeʼké ádin, nidi bitsiʼké tʼéí hólǫ́; díí bitsiʼké kódaolyé: Mála, Nóah, Hágla, Mílka índa Tírza.
4 Éí nááʼiiłniihii Eliyéízar áádóó Nan biyeʼ Jáshowa áádóó naatʼáanii danilíinii yaa yíkaigo ádayidííniid, Nihikʼéí bitahgi kéyah nihííʼ dadooleełii nihaa dadidootʼáałgo Bóhólníihii éí Mózes yichʼįʼ yee haadzíiʼ niʼ. Éí bąą Bóhólníihii yee haadzíiʼii bikʼehgo bizhéʼé bikʼisóó nilíinii bitahgi kéyah bííʼ dooleełii beidiníʼą́.
5 Áko neeznáá hahoodzo Manáseh dineʼé baa deetʼą́, áádóó Jórdan tooh bilááhjí Gíliyad kéyah áádóó Béíshan kéyah ałdóʼ bił baa deetʼą́,
6 háálá Manáseh dineʼé bitsiʼké danilíinii łaʼ éí Manáseh baʼáłchíní ahoolchíiłii bił kéyah bííʼ daazlı̨́ı̨́ʼ. Manáseh dineʼé łahjįʼígíí éí Gíliyad kéyah baa deetʼą́.
7 Manáseh dineʼé bikéyah hoodzooígíí éí Ásher dineʼé bikéyahdóó Míkmiitha hazʼáníjįʼ, éí Shííkem kin haalʼáii bíighahgi áádóó shádiʼáahjigo Entapúwah tó háálínígi kéédahatʼíníjįʼ bihodiidzo.
8 Manáseh dineʼé bikéyah éí Tapúwah hoolyé índa Manáseh dineʼé bihoodzogi Tapúwah kin shijaaʼígíí éí Íífreiyim dineʼé daabí.
9 Áko Kéína tó nílínígíí shádiʼáahjigo hazʼáníjįʼ hodeesdzo. Ákwii Manáseh dineʼé bikin hadaasʼáhígíí bitahgi Íífreiyim dineʼé ałdóʼ bikin hadaasʼá. Áko Manáseh dineʼé bihoodzooígíí náhookǫsjigo tó nílíníjįʼ hodeesdzo áádóó tónteel siyíníjįʼ nihoodzo,
10 shádiʼáahjigo Íífreiyim dineʼé bikéyah siʼánígíí, índa náhookǫsjigo Manáseh dineʼé bikéyah siʼánígíí, éí tónteel bee hodeesdzo, índa náhookǫsjí Ásher dineʼé bikéyahjįʼ áádóó haʼaʼaahjigo Ísakar dineʼé bikéyahjįʼ hodeesdzo.
11 Áádóó Ísakar dineʼé bikéyah bikááʼ índa Ásher dineʼé bikéyah bikááʼ ałdóʼ Manáseh dineʼé bikin łaʼ hadaasʼá; éí Beth-shíyan kin haalʼáii áádóó bikin dah naazhjaaʼígíí, Íbliyam kin haalʼáii áádóó bikin dah naazhjaaʼígíí, Dóor kin haalʼáii ákwii kéédahatʼíinii áádóó bikin dah naazhjaaʼígíí, Éndor kin haalʼáii ákwii kéédahatʼíinii áádóó bikin dah naazhjaaʼígíí, Téíyanak kin haalʼáii ákwii kéédahatʼíinii áádóó bikin dah naazhjaaʼígíí índa Megído kin haalʼáii ákwii kéédahatʼíinii áádóó bikin dah naazhjaaʼígíí tʼáá daabił; éí táaʼgo kéyahígíí bikááʼ ákóhootʼé.
12 Ákondi Manáseh dineʼé éí kin hadaasʼáagi kéédahatʼínígíí haa chʼídahidoojahígíí doo bídazhneelʼą́ą da, nidi éí kéyah biyiʼ Kéínan dineʼé tʼáá kéédahatʼı̨́ı̨́ nítʼééʼ.
13 Azhą́ ákótʼée nidi Ízrel dineʼé dabidziil daazlı̨́įʼgo Kéínan dineʼé tʼáá bizááká nidaalnishgo ádayiilaa, áádóó tʼáadoo tsʼídá tʼáá átʼé baa chʼídahaazhjéeʼ da.
14 Áádóó Jóseph dineʼé Jáshowa yichʼįʼ hadaasdzíiʼgo ádeidííniid, Haʼátʼéegoshąʼ tʼóó ahoniiʼyóí nidi tʼááłáhídi yááʼiiltʼeʼígíí bikʼehgo kéyah tʼááłáʼí haadzo nihííʼ dooleełgo Bóhólníihii éí áłchíní yee nihikʼijoodliiłgo yiidląąłgoósh tʼáá ákódígo nihaa dííníʼą́.
15 Áko Jáshowa áhodííniid, Tʼóó ahonohyóigo kéyah bikáaʼgi tsin deílʼáágóó dadohnéehgo tʼáá nihí ádá daahtsxeełgo Píírez dineʼé áádóó yéʼiitsoh bikéyahgi hashtʼedadohnééh; Dził Íífreiyim hadaazʼáhígi doo nihidahóóghahgóogo ákódaahnééh.
16 Jóseph dineʼé ádadííniid, Díí dah daaskʼidígi yeeʼ doo nihidahóóghah da, áádóó dzígaigi Kéínan dineʼé tʼáá ałtso kéédahatʼínígíí tsindaabąąs bijáád naakiígíí béésh bee ádaalyaii bee dahólǫ́; éí tʼáá ałchʼishjí Beth-shíyan kin haalʼáagi áádóó bikin dah naazhjaaʼígíí índa Jézriyel kin haalʼá yíldzisgi kéédahatʼı̨́įgo ádaatʼı̨́.
17 Áko Jáshowa éí Jóseph baʼáłchíní ahoolchíiłii, éí Íífreiyim dineʼé áádóó Manáseh dineʼé danilı̨́įgo áyidííniid, Nihí tʼóó ahonohyóí áádóó ayóó átʼéego bee adziilii nihee dahólǫ́; doo tʼááłáʼí yááʼiiltʼeʼ tʼéiyá bíighahgo kéyah nihííʼ dadooleeł da,
18 nidi díí dziłgo nahazʼánígíí nihííʼ dadooleeł; jó, tsin yílʼá, áádóó dah hidoohtsxiłgo bee hashtʼedadidoohnííł, áádóó biláahdi hoodzooígíí bíighahgo tsʼídá tʼáá átʼé nihííʼ dooleeł, háálá Kéínan dineʼé nihaa chʼídahidoojah; azhą́ tsindaabąąs bijáád naakiígíí béésh bee ádaalyaii bee dahólǫ́ǫ nidi áádóó dabidziil nidi ákódadoohłííł.
