Joshua 18:1-28
18 Áko Ízrel dineʼé tʼáá átʼé Sháílohgi áłah silı̨́įʼgo ákwii níbaal biiʼ dahozdísinii nideizʼą́. Ízrel dineʼé éí kéyahgi kéédahatʼíinii tʼáá ałtso yikʼeh dadeesdlı̨́ı̨́ʼ.
2 Nidi Ízrel dineʼé bitahgi Ízrel tʼáá bí bidineʼé tsostsʼidgo dah yinééł kéyah bííʼ dooleełii tʼah doo baa deetʼaah da.
3 Áko Jáshowa éí Ízrel dineʼé áyidííniid, Haa nízádígishąʼ nidaʼáhodołziidgo kéyah ííʼ dooleełii bichʼįʼ wohnééł? Éí danihizhéʼé yę́ę biBóhólníihii Diyin God nihaidiníʼą́ą́ nítʼééʼ.
4 Dadineʼígíí bitahdóó diné tááʼ níjaaʼgo nídoohnííł, áko éí dadeeshʼaałgo ákǫ́ǫ́ dadookah áádóó kéyah tʼáá átʼé hazhóʼó hadeidoosił biniyé tádidookah índa kéyah bííʼ dadooleełii átʼéhígíí yee akʼedaʼdoołchííł áádóó índa shaa nínáádookah.
5 Áko éí kéyah tsostsʼidgo ałtsʼádadoodzo; shádiʼááhjígoígíí Júdah dineʼé bikéyahígíí tʼáá yiiʼ kéédahatʼı̨́į doo áádóó náhookǫsjígoígíí éí Jóseph baʼáłchíní náás ahoolchíiłii dabikéyahígíí tʼáá yiiʼ kéédahatʼı̨́į doo.
6 Áádóó kéyah tsostsʼidgo ałtsʼádaasdzooígíí átʼéhígíí bee akʼedaʼdoołchííł, áádóó éí shichʼįʼ ííshjání ádadoohłííł, áko índa kéyah háidíígíí bííʼ dadooleeł biniyé yááʼiiltʼeʼ bikʼehgo Bóhólníihii nihiDiyin God binááł nihá ádeeshłííł.
7 Nihitahgóó Líívai dineʼé bííʼ dooleełii doo łaʼ baa deetʼą́ą da, háálá Bóhólníihii bá nááʼiiłniihii ídlínígíí éí ííʼ dooleełii átʼé áádóó Géed dineʼé áádóó Rúben dineʼé índa Manáseh dineʼé ałnííʼdóóígíí Jórdan tooh wónaanídi haʼaʼaahjígo kéyah bííʼ dadooleełii nídahodiiʼą́. Mózes éí Bóhólníihii yá naalʼaʼí nilíinii beidiníʼą́.
8 Áko diné hashtʼeʼádadiilyaa áádóó dah diikáahgo Jáshowa hazhóʼó ábidííniidgo kéyah bééhózínígo ádeidoolíłígóó dah diikáahgo ííłní, Nihílááh, kéyah tʼáá átʼé biiʼ tádidoohkah, áádóó éí átʼéhígíí bee akʼedaʼdoołchííł, índa shaa nínáádoohkah, áko yááʼiiltʼeʼígíí nihá ádeeshłíiłgo bikʼehgo kéyah háidíígíí nihííʼ dadooleełii Bóhólníihii binááł Sháílohgi nihá hashtʼedeeshłííł.
9 Áko diné ákǫ́ǫ́ eekaigo kéyah tʼáá átʼé yiiʼ tádookai áádóó kéyah tsostsʼidgo ałtsʼádaasdzooígíí biyiʼ kin dah naazhjaaʼígíí bikʼehgo átʼéhígíí naaltsoos bikááʼ ádajiilaa, áko dah daʼínéhígóó dah nízhdiikaigo Sháílohgi Jáshowa baa níjíkai,
10 áádóó Jáshowa éí yááʼiiltʼeʼ ádajiilaago Ízrel dineʼé bá Sháílohgi Bóhólníihii binááł baa nijiiyá; ákwii Jáshowa éí Ízrel dineʼé kéyah baa dahideestʼánígíí bikʼehgo bá ałtsʼádadzizo.
Bénjamin dineʼé kéyah baa deetʼą́
11 Áádóó yááʼiiltʼeʼ bikʼehgo Bénjamin dineʼé ahiiʼ hááʼahiyoolchíiłii bikʼehgo bikéyah bééhoozin; nítʼééʼ Júdah dineʼé bikéyah áádóó Jóseph dineʼé bikéyah bitaʼ gónaa kéyah haadzooígíí bííʼ daazlı̨́ı̨́ʼ.
12 Náhookǫsjígo bihoodzooígíí Jórdan toohdóó hodeesdzo; éí hoodzooígíí Jériko kin haalʼáii bíighah góde náhookǫsjí hodeesdzo áádóó dziłgo nahazʼání góde eʼeʼaahjigo hodeesdzo áádóó Beth-éíven honoojíijįʼ hodeesdzo,
13 áádóó shádiʼáahjigo Luz kin haalʼáii bichʼįʼgo tʼáá éí Luz kin haalʼáhígíí bíighahgóó hodeesdzo; éí kin haalʼáhígíí Béthel ałdóʼ hoolyé, áádóó Átarath-éídar kin haalʼáá góyaa éí Beth-hóran kin shijaaʼ wóyahdiígíí shádiʼááhjígo dziłígíí bíighahgóó hodeesdzo.
14 Áádóó náánáłahjigo nááhodeesdzo, éí eʼeʼaahjígoígíí shádiʼááhjígo Beth-hóran kin shijaaʼ binaashii shádiʼááhjí dził siʼánídóó naanáhásdzo áádóó Kírjath-béíyal kin haalʼáajįʼ nihoodzo; éí Kírjath-jíyarim ałdóʼ hoolyéego kin haalʼáhígíí Júdah dineʼé daabí. Díí eʼeʼaahjígo hodeesdzo.
15 Áádóó shádiʼáahjigoígíí éí Kírjath-jíyarim bíighahdóó hanááhoodzo, éí eʼeʼaahdóó Neftówah tó hadaazlı̨́įjįʼ hodeesdzo,
16 áádóó éí hoodzooígíí yéʼiitsoh biyíldzis náhookǫsjígo nineelʼánídi Hínam biyeʼ biyíldzisígíí binaashii dziłígíí bitsı̨́įjįʼ hoodzo, áádóó Hínam biyíldzis góyaa índa Jííbas dineʼé bikéyah bíighahgóó shádiʼááhjí áádóó Enrógel tó háálíní góyaa hodeesdzo.
17 Áko náhookǫsjigo Enshíímesh tó háálı̨́ı̨́góó nááhodeesdzo, éí áádóó Geláílath hazʼánígóó Adámim báhátis áádóó Rúben biyeʼ Bóhan bitsé siʼání góyaa hodeesdzo,
18 áádóó Beth-áraba kin shijaaʼ bíighahgóó náhookǫsjí Áraba dzígai góyaa hodeesdzo,
19 áko Beth-hágla hazʼání bíighahgóó náhookǫsjí chʼínááhoodzo áádóó Tónteel Dókʼǫ́ǫzhii náhookǫsjí táłtsʼá hiníyínígi nihoodzo; éí shádiʼááhjígo Jórdan tooh nílínígíí nineelʼą́; díí éí shádiʼááhjígo hodeesdzo.
20 Haʼaʼaahjígo hoodzooígíí éí Jórdan tooh bee hodeesdzo. Díí Bénjamin dineʼé ahiiʼ hááʼahiyoolchíiłii bikʼehgo kéyah bííʼ dadooleełii bináhásdzo.
21 Bénjamin dineʼé ahiiʼ hááʼahiyoolchíiłii bikʼehgo dabikin hadaasʼáhígíí éí kódahoolyé: Jériko, Beth-hágla, Kííziz yíldzisii,
22 Beth-áraba, Zemaréíyim, Béthel,
23 Éívim, Péírah, Áfrah,
24 Kíífar-haʼámonai, Áfnai índa Géíba; bikin dah naazhjaaʼígíí tʼáá bił naakitsʼáadahgo kin hadaasʼáhígíí Bénjamin dineʼé bííʼ daazlı̨́ı̨́ʼ.
25 Áádóó Gíbiyan, Réímah, Biyérath,
26 Mízpeh, Kiifáírah, Mózah,
27 Rííkem, Érpaiyel, Táralah,
28 Zíílah, Íílef, Jííbas, tʼáá éí Jerúsalem hoolyé, Gíbiyath índa Kírjath; kin dah naazhjaaʼígíí tʼáá bił dı̨́ı̨́ʼtsʼáadahgo kin hadaasʼáhígíí Bénjamin dineʼé bííʼ daazlı̨́ı̨́ʼ. Díí kéyah tʼáá átʼé Bénjamin dineʼé ahiiʼ hááʼahiyoolchíiłii bikʼehgo bííʼ daazlı̨́ı̨́ʼ.
