Joshua 19:1-51
19 Naaki góneʼ yááʼiiltʼeʼígíí Símiyan dineʼé bá ánáánályaa; Símiyan dineʼé ahiiʼ hááʼahiyoolchíiłii bikʼehgo bikéyah bá bénááhoosdzin; éí Júdah dineʼé bikéyah łahjįʼ báʼdoodzo.
2 Áádóó Símiyan dineʼé kéyah bííʼ silı̨́ʼígíí biyiʼ kin hadaasʼáhígíí éí kódahoolyé: Bíyer-shííba, Sííba, Móladah,
3 Héízar-shúwal, Béílah, Íízem,
4 Eltólad, Béthol, Hórmah,
5 Zíklag, Beth-márkabath, Héízar-súsah,
6 Beth-lebéíyath índa Sharúhen; bikin dah naazhjaaʼígíí tʼáá bił tááʼtsʼáadahgo kin hadaasʼáhígíí,
7 áádóó Áyiin, Ríman, Ííther índa Éíshan; bikin dah naazhjaaʼígíí tʼáá bił dı̨́įʼgo kin hadaasʼáhígíí ałdóʼ Símiyan dineʼé bííʼ daazlı̨́ı̨́ʼ;
8 tʼáá łaʼ bizhiʼee díí tʼáá ałtso kin hadaasʼáhígíí binaagóó kin dah naazhjaaʼígíí tʼáá bił éí Béíyalath-bíyer kin shijaaʼ bíighahjįʼ nineelʼą́; éí shádiʼáahgi Réímath ałdóʼ hoolyé. Díí kéyah tʼáá átʼé Símiyan dineʼé ahiiʼ hááʼahiyoolchíiłii bikʼehgo bííʼ daazlı̨́ı̨́ʼ.
9 Áko Júdah dineʼé bikéyah łahjįʼ Símiyan dineʼé bikéyah silı̨́ı̨́ʼ, háálá Júdah dineʼé tʼáá áchą́hwíídéeniʼgo baa deetʼą́; éí bąą Símiyan dineʼé kéyah ííʼ dooleełii Júdah dineʼé bikéyah łahjįʼ baa hodeetʼą́.
Zébyulan dineʼé kéyah baa deetʼą́
10 Tááʼ góneʼ yááʼiiltʼeʼígíí Zébyulan dineʼé ahiiʼ hááʼahiyoolchíiłii bikʼehgo bikéyah bá bénááhoosdzin. Áádóó éí kéyah bííʼ daazlı̨́įʼgo Séírid kin shijaaʼ bíighahjįʼ hodeesdzo,
11 áko éí tónteel eʼeʼaahjígo Máralah kin haalʼá góde hodeesdzo, áádóó Dábasheth kin shijaaʼ bíighahgóó índa Jákniyam kin shijaaʼ haʼaʼaahjí tó nílínígíí bíighahgóó hodeesdzo,
12 Séírid kin shijaaʼdóó náánáłahjigo haʼaʼaahjigo hááʼátʼáhígíí bichʼįʼgo Kíslath-téíber kin shijaaʼ bihoodzooígíí bichʼįʼgo hodeesdzo; éí áádóó Dáberath kin shijaaʼgóó índa Jafáíya kin haalʼáá góde hodeesdzo,
13 áádóó éí haʼaʼaahjí chʼíhoodzooígíí Gítah-híífer kin shijaaʼgóó, áádóó Ítah-kéízin hazʼánígóó, Ríman-méthowar kin shijaaʼ bichʼįʼgo áádóó Níyah kin shijaaʼjįʼ nááhodeesdzo,
14 áko náhookǫsjigo hoodzooígíí éí Hánathan kin haalʼáajįʼ nááhodeesdzo, áádóó Jífthayel yíldzisíjįʼ nihoodzo,
15 Kátath kin haalʼáii, Néíhalal kin haalʼáii, Shímran kin haalʼáii, Ídalah kin haalʼáii índa Béthlehem kin haalʼáii; kin dah naazhjaaʼígíí tʼáá bił naakitsʼáadahgo kin hadaasʼáhígíí Zébyulan dineʼé bííʼ daazlı̨́ı̨́ʼ.
16 Díí éí Zébyulan dineʼé ahiiʼ hááʼahiyoolchíiłii bikʼehgo ííʼ dadooleełii éí kin hadaasʼáhígíí binaagóó kin dah naazhjaaʼígíí tʼáá bił bííʼ daazlı̨́ı̨́ʼ.
Ísakar dineʼé kéyah baa deetʼą́
17 Dı̨́ı̨́ʼ góneʼ yááʼiiltʼeʼígíí Ísakar dineʼé ahiiʼ hááʼahiyoolchíiłii bikʼehgo bikéyah bá bénááhoosdzin.
18 Éí bikéyah biyiʼgóó Jézriyel kin haalʼá bichʼįʼjígo áádóó Kiisólath kin shijaaʼ, Shúnem kin shijaaʼ,
19 Hafréíyim kin haalʼáii, Sháíyan kin shijaaʼ, Anéíharath kin shijaaʼ,
20 Rábith kin shijaaʼ, Kíshyan kin haalʼáii, Éíbez kin shijaaʼ,
21 Rémeth kin haalʼáii, Engánim kin shijaaʼ, Enhádah kin shijaaʼ, Beth-pázez kin shijaaʼ,
22 Téíber kin shijaaʼ, Shéíha-záímah kin shijaaʼ índa Beth-shíímesh kin shijaaʼ áádóó Jórdan tooh bihoodiidzo; kin dah naazhjaaʼígíí tʼáá bił hastą́ʼáadahgo kin hadaasʼáhígíí Ísakar dineʼé bííʼ daazlı̨́ı̨́ʼ.
23 Díí éí Ísakar dineʼé ahiiʼ hááʼahiyoolchíiłii bikʼehgo ííʼ dadooleełii éí kin hadaasʼáhígíí binaagóó kin dah naazhjaaʼígíí tʼáá bił bííʼ daazlı̨́ı̨́ʼ.
Ásher dineʼé kéyah baa deetʼą́
24 Ashdlaʼ góneʼ yááʼiiltʼeʼígíí Ásher dineʼé ahiiʼ hááʼahiyoolchíiłii bikʼehgo bikéyah bá bénááhoosdzin.
25 Éí bikéyah biyiʼgóó Hélkath kin shijaaʼ, Héílai kin shijaaʼ, Bííten kin haalʼáii, Ákshaf kin haalʼáii,
26 Alámelek kin shijaaʼ, Éímad kin shijaaʼ, Méíshal kin shijaaʼ, eʼeʼaahjígo Kármel kin shijaaʼ índa Sháíhar-líbnath tó níłtsʼą́ʼígíí
27 índa haʼaʼaahjígo nááhoodzo éí Beth-déígan kin shijaaʼgóó áádóó Zébyulan kin haalʼáii bíighahgóó índa Jífthayel yíldzisígíí náhookǫsjígo Beth-íímek kin haalʼáádóó Niyáíyel kin shijaaʼgóó, áádóó náhookǫsjí Kéíbul kin haalʼáii bichʼįʼgo nihoodzo,
28 áádóó Hííbran kin haalʼáii, Rííhob kin shijaaʼ, Háman kin shijaaʼ, Kéínah kin shijaaʼ índa Sáídan kin haalʼáii ayóó átʼéego hazʼáníjįʼ,
29 áádóó Réímah kin haalʼáágóó nááhoodzo áádóó Táir kin haalʼá ditą́ągo binaa ahééʼítłʼiníjįʼ hodeesdzo, áádóó Hósah kin shijaaʼjįʼ nínááhásdzo, índa Ákzib kin haalʼáii bíighahgi tónteel siyíníjįʼ nihoodzo,
30 Ámah kin haalʼáii ałdóʼ, áádóó Éífek kin haalʼáii índa Rííhob kin shijaaʼ; bikin dah naazhjaaʼígíí tʼáá bił naadiin naakigo kin hadaasʼáhígíí Ásher dineʼé bííʼ daazlı̨́ı̨́ʼ.
31 Díí éí Ásher dineʼé ahiiʼ hááʼahiyoolchíiłii bikʼehgo ííʼ dadooleełii, éí kin hadaasʼáhígíí binaagóó kin dah naazhjaaʼígíí tʼáá bił bííʼ daazlı̨́ı̨́ʼ.
Náftalai dineʼé kéyah baa deetʼą́
32 Hastą́ą́h góneʼ yááʼiiltʼeʼígíí Náftalai dineʼé ahiiʼ hááʼahiyoolchíiłii bikʼehgo bikéyah bá bénááhoosdzin.
33 Áádóó éí bihoodzooígíí Híílef kin shijaaʼdóó áádóó Álan kin shijaaʼdóó Zeiyanánim hazʼáníjįʼ áádóó Ádamai hazʼáníjįʼ, Nííkeb kin shijaaʼjįʼ, Jábniyel kin shijaaʼjįʼ índa Léíkam kin shijaaʼjįʼ hodeesdzo, áádóó Jórdan toohjįʼ bihoodiidzo,
34 áádóó eʼeʼaahjigo Áznath-téíber hazʼánígóó nááhoodzo, éí áádóó Hákak kin shijaaʼjįʼ áádóó shádiʼááhjí Zébyulan kin haalʼáii bíighahgóó, áádóó eʼeʼaahjí Ásher dineʼé bikéyahgóó, índa haʼaʼaahjí Jórdan toohgi Júdah dineʼé bikéyahgóó hodeesdzo.
35 Kin hadaasʼá ditą́ągo binaa ahéédaʼastłʼinígíí éí kódahoolyé: Zídim, Zer, Hámath, Rákath, Kíniireth,
36 Ádamah, Réímah, Héízor,
37 Kíídesh, Édriyai, En-héízor,
38 Íran, Mígdal-el, Hórem, Beth-éínath índa Beth-shíímesh; kin dah naazhjaaʼígíí tʼáá bił náhástʼéítsʼáadahgo kin hadaasʼáhígíí Náftalai dineʼé bííʼ daazlı̨́ı̨́ʼ.
39 Díí éí Náftalai dineʼé ahiiʼ hááʼahiyoolchíiłii bikʼehgo ííʼ dadooleełii éí kin hadaasʼáhígíí binaagóó kin dah naazhjaaʼígíí tʼáá bił bííʼ daazlı̨́ı̨́ʼ.
Dan dineʼé kéyah baa deetʼą́
40 Tsostsʼid góneʼ yááʼiiltʼeʼígíí Dan dineʼé ahiiʼ hááʼahiyoolchíiłii bikʼehgo bikéyah bá bénááhoosdzin.
41 Éí kéyah bííʼ dooleełii biyiʼgóó kin hadaasʼáhígíí, doodaiiʼ kin dah naazhjaaʼígíí kódahoolyé: Zórah kin haalʼáii, Éshteiyal kin shijaaʼ, Ír-shíímesh kin haalʼáii,
42 Shéíya-lábin kin shijaaʼ, Éíjalan kin haalʼáii, Jéthlah kin shijaaʼ,
43 Íílan kin shijaaʼ, Thímnathah kin shijaaʼ, Ékran kin haalʼáii,
44 Éltiikii kin haalʼáii, Gíbiithan kin haalʼáii, Béiyalath kin shijaaʼ,
45 Jííhad kin shijaaʼ, Béne-bíírak kin shijaaʼ, Gath-ríman kin haalʼáii,
46 Mii-járkan hazʼání índa Rákan hazʼání éí Jéífo kin shijaaʼ kéyahígíí tʼáá bił bííʼ daazlı̨́ı̨́ʼ.
47 Áko Dan dineʼé kéyah biʼoh neelʼą́ągo, éí bąą Dan dineʼé nídahidiibáahgo Lííshem kin haalʼáii yichʼįʼ anaaʼ dahasłı̨́ı̨́ʼ, áádóó bikʼijįʼ dadzisnáago diltłish yee nideistseedgo ákwii nídahodiiʼą́ áádóó ákwii nidahaazná, áko Lííshem hoolyéii dahazhéʼé yę́ę Dan bízhiʼ bee dahojíízhiʼ.
48 Díí éí Dan dineʼé ahiiʼ hááʼahiyoolchíiłii bikʼehgo ííʼ dadooleełii éí kin hadaasʼáhígíí binaagóó bikin dah naazhjaaʼígíí tʼáá bił bííʼ daazlı̨́ı̨́ʼ.
Jáshowa kéyah baa deetʼą́
49 Kéyah ííʼ dadooleełii ałtso ałtaa dazdeestʼą́ągo Ízrel dineʼé dabitahgi Nan biyeʼ Jáshowa kéyah hóóʼ dooleełii haa deideezʼą́.
50 Bóhólníihii éí saad yee haadzíiʼii bikʼehgo kin haalʼáhígíí jííkeedii haa deideezʼą́, éí Tímnath-síírah kin haalʼáii éí dziłgo nahazʼánígóó Íífreiyim dineʼé bikéyah biyiʼ, ákwii kin haalʼáago áńjiidlaago ákwii kééhojitʼı̨́ı̨́ nítʼééʼ.
51 Díí éí kéyah hóóʼ dadooleełii nááʼiiłniihii Eliyéízar áádóó Nan biyeʼ Jáshowa índa Ízrel dineʼé bidóoneʼé bikʼehgo yá aląąjįʼ naazíinii éí yááʼiiltʼeʼ bikʼehgo Ízrel dineʼé bá kéyah ałtsʼádeizogo, Sháíloh hazʼánídi Bóhólníihii binááł níbaal biiʼ dahozdísinii bichʼéʼétiingi kéyah ałtso ałtaa deisdzo.
