Joshua 2:1-24
2 Áádóó Nan biyeʼ Jáshowa éí Shíttim hoolyéédóó diné naalchiʼí nidiltʼéego dashdiiłʼaʼgo ábijiní, Nihílááh, nahontʼin nahazʼą́ą́dóó Jériko kéyah hazhóʼó hadoohsiłgóó dohʼaash. Áádóó ákǫ́ǫ́ jiníʼáazhgo ałjiłnii asdzání léiʼ Réíhab wolyéii bighan góneʼ yah ajííʼáazhgo ákwii dzizkéé nítʼééʼ.
2 Áádóó Jérikodóó aláahgo naatʼáanii yił dahoolneʼgo ádaaní, Shoo, tłʼéédą́ą́ʼ diné łaʼ Ízrel dineʼé nilı̨́įgo kéyah haidoohsił yiniyé kweʼé níʼáázh lá.
3 Áádóó Jérikodóó aláahgo naatʼáanii éí Réíhab yichʼįʼ iʼííłʼaʼgo ání, Diné naa níʼázhígíí shaa níʼéésh; jó, nighan góneʼ yah ííʼáázh, háálá éí kéyah tʼáá átʼé haidoosił yiniyé níʼáázh.
4 Áádóó asdzání éí diné tʼáá áłah dah yidiiʼeezh áádóó néideesʼı̨́įʼgo ání, Tʼáá lá aaníí diné shaa níʼáazh ni, nidi naaʼaashdę́ʼígíí éí doo shił bééhózin da.
5 Áádóó tłʼéeʼgo chʼéʼétiingi dáʼdeelkaalgo éí diné chʼíníʼáázh lá. Háajigo ahiʼnoolchą́ʼígíí doo shił bééhózin da. Tsxı̨́įłgo, bikééʼ dohjeehgo bikʼídanohtááh.
6 Nidi asdzání éí kin bighą́ą́ʼgóó diné hajizhʼeezhgo nidikʼąʼ ditsʼidígíí éí biyaagi nízdeesʼı̨́ı̨́ʼ.
7 Áko diné akééʼ ííjéʼígíí Jórdan tooh áłtʼą́ʼą́jįʼ tséʼnaa nideetiiníjįʼ akééʼ niníjééʼ, áádóó éí diné tʼóó chʼíníjéʼégo tʼáá áko dáníʼdeetą́.
8 Áko diné nídeesʼı̨́ʼígíí tʼah doo niteeshgóó, asdzání éí kin bighą́ą́ʼgóó diné yichʼįʼ hanáánásdzá.
9 Áádóó diné ábijiní, Díí shił bééhózin: Bóhólníihii éí kéyah nihaididooʼááł áádóó nihikʼedaʼíyéeʼgo bikʼee nisiniikai, áádóó kéyah bikáaʼgi diné kéédahatʼínígíí tʼáá átʼé nihikʼee bitah doo dahwiinaʼ da.
10 Háálá nihaa dahosidiitsʼą́ąʼgo haash yitʼéego Bóhólníihii éí Tónteel Łichííʼ tséʼnaa nihilą́ąjįʼ nihá nihoníłtseii éí Ííjip kéyahdę́ę́ʼ náohʼnééł yę́ędą́ą́ʼ áhóótʼįįdígíí áádóó Ámor dineʼé aláahgo binanitʼaʼí nidiltʼéego Jórdan tooh wónaanídi bichʼįʼ ádaotʼįįdígíí éí Sáíhan índa Ag wolyéii nidasoołtseedii baa dahosidiitsʼą́ą́ʼ.
11 Áádóó tʼóó baa dahodisiitsʼą́ą́ʼ yę́ędą́ą́ʼ tʼóó nihił ádahasdįįd; tʼáadoo yee diné hadaʼóolníʼígóó nihiniinaa ákódeiidzaa, háálá Bóhólníihii éí nihí aají nihiDiyin God éí Diyin God nilı̨́įgo wódahdi yáʼąąshdi índa wóyahdi nihokáaʼgi hólǫ́.
12 Éí bąą kʼad nánihooshkąąh, Bóhólníihii bee shichʼįʼ ádee hadidoohdzih; jó, shí nihaa jooshbaʼígi átʼéego nihí ałdóʼ shizhéʼé bighandóó dah ooldahígíí baa jiinohbaʼ dooleeł, áádóó tʼáá aaníinii bee ééhózinii shichʼįʼ bééhózingo ádoohłííł,
13 shizhéʼé áádóó shimá áádóó ashiiké áádóó atʼééké bił háájééʼ danilíinii, índa badaʼáłchíní tʼáá ałtso tʼáá bił dahiniiʼnáa doo biniyé aniné bitsʼą́ąjįʼ yisdánihidoohnił.
14 Áko diné nidiltʼé níʼázhígíí áháłní, Yisdánihíínínilígi átʼéego nihí ałdóʼ yisdánihidiiʼnił; nihinaanish nilíinii tʼáadoo baa hwíínílneʼgóogo ákótʼé. Áko ákótʼée doo: Bóhólníihii éí kéyah nihaidiníʼą́ągo naa dajiiniibaʼ doo, índa tʼáá aaníí nichʼįʼ ákódaniitʼée doo.
15 Áko tłʼóół bee tsésǫʼ góyaa hadahóóloʼ, háálá kin haalʼáii binaa ahéénátłʼinígíí bikáaʼdi bighan.
16 Áko asdzání áháłní, Nílááh, dziłgóó dohʼaash, áko nihikééʼ nidahaakaígíí doo nihikʼídookah da; áadi naʼádinołʼingo tááʼ yidoołkááł; nihikééʼ nidahaakaígíí tʼą́ą́ʼ nináhaaskaijįʼ, áádóó bikʼijįʼ índa nikéédoohtʼash.
17 Diné nidiltʼé níʼázhígíí áháłní, Jó, tsʼídá tʼáadoo bee nihikʼíhodootʼahígóó díí bee ádee hadidiidzihgo bee nihichʼįʼ háínídzíʼígíí tʼáá ákódiiʼnííł.
18 Jó, kéyahgi niikaigo tsésǫʼdę́ę́ʼ hadanihííníloʼ yę́ęgi díí tłʼóół tsʼósí łichxíʼígíí náátʼiʼgo ádíílííł, áko nizhéʼé áádóó nimá áádóó nilahkéí índa nizhéʼé bighandóó dah ooldahígíí tʼáá ałtso nighan góneʼ áłah ádíílííł.
19 Áko kótʼée dooleeł: łaʼda nighandóó chʼíníyáii kintaa atiinjįʼ ííyáago éí tʼáá bí dił bikʼee chxiiʼgo ánábiʼdiilyaago dadootsaał; nihí éí doo bee ádidahodidiiltʼih da, áádóó tʼáá háiida nighan góneʼ bił nahíínítánígíí bidił bikʼee chxiiʼgo ályaii daaztsą́ągo nihí éí bá naniideeh doo; łaʼda atíbiilaago ákótʼée doo.
20 Áko nihinaanish nilíinii baa hwíínílneʼgo bee ádee hadidiidzihgo nihichʼįʼ bee háínídzíʼígíí doo ádiilníił da.
21 Áádóó asdzání ání, Nihizaad kʼehgo tʼáá ákótʼée doo. Áko índa diné níʼázhígíí dah nízhdiiłʼaʼ áádóó tsésǫʼgi tłʼóół tsʼósí łichxíʼígíí náátʼiʼgo ájiilaa.
22 Diné dah diiʼáázh áádóó dziłgóó níʼáázh índa áadi tágí jı̨́ dzizkéé nítʼééʼ; hakééʼ nidahaakaígíí tʼą́ą́ʼ nákaigo índa dah náázhdiitʼáázh; jó, diné tʼáá ałtsogóó hadahoneeztą́ą́ʼ, nidi tʼáadoo hakʼídaneeztą́ąʼ da.
23 Áko diné nihinátʼáázh; dziłghą́ą́ʼdę́ę́ʼ hadanáátʼáazhgo tséʼnaa ninátʼáázh áádóó Nan biyeʼ Jáshowa baa nijítʼáazhgo hachʼįʼ áhoodzaaígíí tʼáá átʼé bee bił náhojoolneʼ.
24 Áádóó Jáshowa ábizhdííniid, Tʼáá aaníí Bóhólníihii éí kéyah tʼáá átʼé nihaidiníʼą́ą́ lá; jó, kéyahgi tʼáá átʼé kéédahojitʼínígíí nidi tʼáá ádzíłtso nihikʼee hatah doo dahwiinaʼ da.
