Joshua 20:1-9
20 Bóhólníihii éí Jáshowa áyidííniid,
2 Ízrel dineʼé ábididííniił, Kin hadaasʼáagi biiʼjįʼ yisdádaʼniichéeh dooígíí łaʼ nidahididoohʼááł; éí Mózes biniitʼaa bee nihichʼįʼ haasdzíiʼ niʼ.
3 Áko doo tʼáá ákónééhgóó áádóó doo yinahazʼą́ą́góó diné yiyiisxínígíí éí kin haalʼáajįʼ yisdádínóochééł; dił biniinaa kʼééhodidoodlíłígíí bitsʼąą yisdádínóochéełii átʼée doo.
4 Díí kin hadaasʼáhígíí łaʼ bichʼįʼ nízhdidoolwołgo kin haalʼáii bichʼéʼétiingi kin haalʼáhídóó aląąjįʼ naazíinii bichʼįʼ nizhdoogáałgo ádaa nahozhdoolnih, áko kin haalʼáhí góneʼ hoł yah adookahgo há dahwiidoołʼaał, áko tʼáá ákwii bił kééhojitʼı̨́į dooleeł.
5 Áádóó diné jiisxíinii bikʼéí hakʼíháʼáhígíí hakééʼ yílwodgo éí doo yaa dahodidooʼáał da, háálá éí hoł kééhatʼíinii tʼáadoo baa ákozníziní jiisxı̨́, índa éí doo jijoołáa da nítʼééʼ.
6 Áádóó éí kin haalʼáhígi kééhojitʼı̨́į doo, áko áłah náʼádleehgi jidoogáałgo haa hwiidínóotʼįįł, áádóó aláahgo nááʼiiłniihii daaztsą́ bijı̨́ı̨́dóó diné iisxínígíí nihéédoodááł; bikin haalʼáhídóó dah diilwod yę́ęgóó nídoodááł.
7 Áko díí kin hadaasʼáii nideidiyiizʼą́: éí Kíídesh kin haalʼáii Gálilii kéyah biyiʼ, tʼáá éí Náftalai dineʼé bikéyah átʼéego dah daaskʼidígi, áádóó Shííkem kin haalʼáii Íífreiyim dineʼé bikéyah dah daaskʼidígi, índa Kírjath-árba kin haalʼáii, tʼáá éí Hííbran ałdóʼ hoolyé; éí Júdah dineʼé bikéyah dah daaskʼidígi,
8 áádóó Jórdan tooh wónaanídi Jériko kin haalʼáii haʼaʼaahjígo honoojíígóó dziłgo hazʼánígi Bíízer hoolyéego Rúben dineʼé bikin haalʼáii, áádóó Gíliyad kéyah biyiʼ Réímath hoolyéego Géed dineʼé bikin haalʼáii índa Béíshan kéyah biyiʼ Gólan hoolyéego Manáseh dineʼé bikin haalʼáii nideidiyiizʼą́.
9 Díí éí kin hadaasʼáii nideetʼánígíí Ízrel dineʼé tʼáá ałtso bá áádóó bitahgóó déʼéyóní tʼóó átsééd kéédahatʼínígíí bá ádaatʼé, áko doo tʼáá ákónéehgo diné yiyiisxínígíí ákǫ́ǫ́ nídidoolwoł áádóó áłah náʼádleehgi doogáałgo haa náhódóotʼįįłjįʼ dił biniinaa kʼééhodidoodlíiłii doo hodiyoołhéeł da.
