Joshua 21:1-45
21 Áko Líívai dineʼé bizhéʼé danilíinii badaʼáłchíní yá aląąjįʼ naazíinii éí nááʼiiłniihii Eliyéízer áádóó Nan biyeʼ Jáshowa índa Ízrel dineʼé bizhéʼé danilíinii badaʼáłchíní yá aląąjįʼ naazíinii yaa yíkai,
2 áko Sháíloh hoolyéedi Kéínan kéyahgi ádahodííniidgo ádaaní, Bóhólníihii éí Mózes biniitʼaa kóníigo yee haadzíiʼii, kin hadaasʼáii biiʼ kéédahwiitʼı̨́į dooígíí, dahootso dooígíí tʼáá bił nihilı̨́ı̨́ʼ bá nihaa hodidootʼááł.
3 Áko Ízrel dineʼé bikin hadaasʼáii bííʼ daazlı̨́ʼígíí łahjįʼ, índa dahootsooígíí Líívai dineʼé yaa deideezʼą́; éí Bóhólníihii yee haadzíiʼii bikʼehgo ádzaa.
4 Yááʼiiltʼeʼ bikʼehgo Kóhath dineʼé bííʼ dooleełii bá bééhoozin. Áko nááʼiiłniihii Éran joolyéii haʼáłchíní náás ahoolchíiłii, Líívai dineʼé danilı̨́įgo, yááʼiiltʼeʼ bikʼehgo Júdah áádóó Símiyan índa Bénjamin dineʼé tááʼtsʼáadahgo bikin hadaasʼáhígíí Líívai dineʼé bííʼ daazlı̨́ı̨́ʼ.
5 Áádóó Kóhath dineʼé łahjįʼígíí yááʼiiltʼeʼ bikʼehgo Íífreiyim dineʼé áádóó Dan dineʼé índa Manáseh dineʼé ałnííʼdóóígíí éí badaʼáłchíní ahiiʼ hááʼahiyoolchíiłii bikin hadaasʼáii neeznáá kin haalʼá bíighahgo bííʼ daazlı̨́ı̨́ʼ.
6 Áádóó Gérshan dineʼé yááʼiiltʼeʼ bikʼehgo Ísakar dineʼé áádóó Ásher dineʼé áádóó Náftalai dineʼé índa Manáseh dineʼé ałnííʼdóóígíí Béíshan kéyahgi kéédahatʼínígíí badaʼáłchíní ahiiʼ hááʼahiyoolchíiłii bikin hadaasʼáii tááʼtsʼáadahgo bííʼ daazlı̨́ı̨́ʼ.
7 Áádóó Miirárai dineʼé baʼáłchíní ahiiʼ hááʼahiyoolchíiłii bikʼehgo Rúben dineʼé áádóó Géed dineʼé índa Zébyulan dineʼé bikin hadaasʼáii naakitsʼáadahgo bííʼ daazlı̨́ı̨́ʼ.
8 Áko Ízrel dineʼé éí yááʼiiltʼeʼ bikʼehgo Líívai dineʼé díí kin hadaasʼáii áádóó binaagóó dahootsooígíí yaa deideezʼą́; Bóhólníihii éí Mózes biniitʼaa yee haadzíiʼii yikʼeh ádaadzaa.
9 Áádóó Júdah dineʼé índa Símiyan dineʼé dabikéyahgi díí kin hadaasʼáii bitaaʼééjiʼígíí yaa deideezʼą́,
10 éí Éran baʼáłchíní náás ahoolchíiłii łaʼ Kóhath dineʼé ahiiʼ hááʼahiyoolchíiłii, éí Líívai dineʼé danilı̨́įgo yááʼiiltʼeʼ bikʼehgo alą́ąjįʼ bá bééhoozinígíí bííʼ daazlı̨́ı̨́ʼ.
11 Éínak dineʼé yizhéʼé nilíinii Árba wolyéii bikin haalʼáii Hííbran hoolyéhígíí baa dazdeezʼą́; éí Júdah dineʼé bikéyah dah daaskʼidígi dahootsooígíí tʼáá bił baa dazdeezʼą́.
12 Nidi kin haalʼáagi dádaʼakʼehígíí índa ákwii kin dah naazhjaaʼígíí éí Jiifáneh biyeʼ Kéíleb bííʼ dooleełgo yaa deideezʼą́.
13 Ákohgo nááʼiiłniihii Éran dineʼé éí Hííbran kin haalʼáii binaagóó dahootsooígíí tʼáá bił yaa deideezʼą́; éí kin haalʼáii biiʼjįʼ yisdáʼniichéehii iisxíinii bá átʼé, áádóó Líbnah kin haalʼáii binaagóó dahootsooígíí tʼáá bił yaa deideezʼą́.
14 Áádóó ałdóʼ díí kin hadaasʼáii kódahoolyéhígíí: Játer binaagóó dahootsooígíí tʼáá bił, Éshtiimowa binaagóó dahootsooígíí tʼáá bił,
15 Hólan binaagóó dahootsooígíí tʼáá bił, Dííber binaagóó dahootsooígíí tʼáá bił,
16 Áyiin binaagóó dahootsooígíí tʼáá bił, Játah binaagóó dahootsooígíí tʼáá bił índa Beth-shíímesh binaagóó dahootsooígíí tʼáá bił; díí naakigo dineʼé bikéyah biyiʼ náhástʼéigo kin hadaasʼáii Éran dineʼé bííʼ daazlı̨́ı̨́ʼ.
17 Áádóó Bénjamin dineʼé bikéyah biyiʼ éí Gíbiyan kin haalʼáii binaagóó dahootsooígíí tʼáá bił, Gííba kin haalʼáii binaagóó dahootsooígíí tʼáá bił,
18 Ánathath kin haalʼáii binaagóó dahootsooígíí tʼáá bił índa Álman kin haalʼáii binaagóó dahootsooígíí tʼáá bił; éí dı̨́įʼgo kin hadaasʼáii Éran dineʼé bííʼ daazlı̨́ı̨́ʼ.
19 Áko Éran dineʼé nááʼiiłniihii danilíinii bikin hadaasʼáii tʼáá ałtsogo binaagóó dahootsooígíí tʼáá bił tááʼtsʼáadahgo kin haalʼá bííʼ daazlı̨́ı̨́ʼ.
20 Kóhath dineʼé ahiiʼ hááʼahiyoolchíiłii tʼáá éí Kóhath dineʼé łahjįʼígíí, Líívai dineʼé danilı̨́įgo, yááʼiiltʼeʼ bikʼehgo Íífreiyim dineʼé bikéyah biyiʼ kin hadaasʼáii baa dahideestʼą́.
21 Éí baa dahideestʼánígíí Shííkem hoolyéii dahootsooígíí tʼáá bił Íífreiyim dineʼé bidziłgo nahazʼánígi kin haalʼáii biiʼjįʼ yisdáʼniichéehii iisxíinii bá átʼé, áádóó Gíízer kin haalʼáii binaagóó dahootsooígíí tʼáá bił yaa deideezʼą́,
22 áádóó Kibzéíyim binaagóó dahootsooígíí tʼáá bił índa Beth-hóran binaagóó dahootsooígíí tʼáá bił; éí dı̨́įʼgo kin hadaasʼáhígíí hóóʼ daazlı̨́ı̨́ʼ,
23 áádóó Dan dineʼé bikéyah biyiʼ Éltiikii kin haalʼáii binaagóó dahootsooígíí tʼáá bił, Gíbithan kin haalʼáii binaagóó dahootsooígíí tʼáá bił,
24 Éíjalan kin haalʼáii binaagóó dahootsooígíí tʼáá bił índa Gath-ríman kin haalʼáii binaagóó dahootsooígíí tʼáá bił; éí dı̨́įʼgo kin hadaasʼáii hóóʼ daazlı̨́ı̨́ʼ,
25 áádóó Manáseh dineʼé ałnííʼdóóígíí bikéyah biyiʼ éí Téíyanak kin haalʼáii binaagóó dahootsooígíí tʼáá bił áádóó Gath-ríman kin haalʼáii binaagóó dahootsooígíí tʼáá bił, éí naakigo kin haalʼáii hóóʼ daazlı̨́ı̨́ʼ.
26 Áko kin hadaasʼáhígíí tʼáá ałtsogo neeznáá kin haalʼáá lá; binaagóó dahootsooígíí tʼáá bił Kóhath dineʼé baʼáłchíní ahiiʼ hááʼahiyoolchíiłii łahjįʼígíí bííʼ daazlı̨́ı̨́ʼ.
27 Áádóó Gérshan dineʼé, éí Líívai dineʼé danilı̨́įgo baa deetʼánígíí, éí Manáseh dineʼé ałnííʼdóóígíí bikéyah biyiʼ kin hadaasʼáhígíí, éí Béíshan kéyahgi Gólan kin haalʼáii binaagóó dahootsooígíí tʼáá bił yaa deideezʼą́; éí kin haalʼáii biiʼjįʼ yisdáʼniichéehii iisxíinii bá átʼé, áádóó Beʼéshtarah kin haalʼáii binaagóó dahootsooígíí tʼáá bił; éí naakigo kin haalʼáii hóóʼ daazlı̨́ı̨́ʼ.
28 Áádóó Ísakar dineʼé bikéyah biyiʼ Kíshyan kin haalʼáii binaagóó dahootsooígíí tʼáá bił, Dábareth kin haalʼáii binaagóó dahootsooígíí tʼáá bił,
29 Jármath kin haalʼáii binaagóó dahootsooígíí tʼáá bił índa Engánim kin shijaaʼgi binaagóó dahootsooígíí tʼáá bił; éí dı̨́įʼgo kin hadaasʼáii hóóʼ daazlı̨́ı̨́ʼ.
30 Áádóó Ásher dineʼé bikéyah biyiʼ Méíshal kin haalʼáii binaagóó dahootsooígíí tʼáá bił, Ábdan kin haalʼáii binaagóó dahootsooígíí tʼáá bił,
31 Hélkath kin haalʼáii binaagóó dahootsooígíí tʼáá bił índa Rííhob kin haalʼáii binaagóó dahootsooígíí tʼáá bił; éí dı̨́įʼgo kin hadaasʼáii hóóʼ daazlı̨́ı̨́ʼ.
32 Áádóó Náftalai dineʼé bikéyah biyiʼ kin hadaasʼáhígíí éí Gálilii kéyahgi Kíídesh kin haalʼáii binaagóó dahootsooígíí tʼáá bił hóóʼ daazlı̨́ı̨́ʼ; éí kin haalʼáii biiʼjįʼ yisdáʼniichéehii iisxíinii bá átʼé, áádóó Hámath-dóor kin haalʼáii binaagóó dahootsooígíí tʼáá bił índa Kártan kin haalʼáii binaagóó dahootsooígíí tʼáá bił; éí táaʼgo kin hadaasʼáii hóóʼ daazlı̨́ı̨́ʼ.
33 Áko Gérshan dineʼé badaʼáłchíní ahiiʼ hááʼahiyoolchíiłii bikʼehgo bikin hadaasʼáii tʼáá ałtsogo binaagóó dahootsooígíí tʼáá bił tááʼtsʼáadahgo kin haalʼá bííʼ daazlı̨́ı̨́ʼ.
34 Áádóó Zébyulan dineʼé bitsʼą́ą́dóó Miirárai dineʼé ahiiʼ hááʼahiyoolchíiłii, éí Líívai dineʼé danilı̨́įgo łahjįʼígíí, éí díí baa deetʼą́: Jákniyam kin haalʼáii binaagóó dahootsooígíí tʼáá bił, Kártah kin haalʼáii binaagóó dahootsooígíí tʼáá bił,
35 Dímnah kin haalʼáii binaagóó dahootsooígíí tʼáá bił índa Néíhalal kin haalʼáii binaagóó dahootsooígíí tʼáá bił; éí dı̨́įʼgo kin hadaasʼáii Miirárai dineʼé bííʼ daazlı̨́ı̨́ʼ.
36 Áádóó Rúben dineʼé bikéyah biyiʼ Bíízer kin haalʼáii binaagóó dahootsooígíí tʼáá bił, Jahéízah kin haalʼáii binaagóó dahootsooígíí tʼáá bił,
37 Kédiimath kin haalʼáii binaagóó dahootsooígíí tʼáá bił índa Méfeiyath kin haalʼáii binaagóó dahootsooígíí tʼáá bił; éí dı̨́įʼgo kin hadaasʼáii Miirárai dineʼé bííʼ daazlı̨́ı̨́ʼ.
38 Áádóó Géed dineʼé bikéyah biyiʼ, éí Gíliyad kéyahgi Réímath kin haalʼáii binaagóó dahootsooígíí tʼáá bił hóóʼ daazlı̨́ı̨́ʼ; éí kin haalʼáii biiʼjįʼ yisdáʼniichéehii iisxíinii bá átʼé, áádóó Meihanéíyim kin haalʼáii binaagóó dahootsooígíí tʼáá bił,
39 Héshban kin haalʼáii binaagóó dahootsooígíí tʼáá bił, Jéízer kin haalʼáii binaagóó dahootsooígíí tʼáá bił; éí tʼáá ałtsogo dı̨́įʼgo kin hadaasʼáii hóóʼ daazlı̨́ı̨́ʼ.
40 Áko kin hadaasʼáii tʼáá ałtso éí Miirárai dineʼé badaʼáłchíní ahiiʼ hááʼahiyoolchíiłii bikʼehgo éí Líívai dineʼé danilı̨́įgo badaʼáłchíní ahiiʼ hááʼahiyoolchíiłii łahjįʼígíí yááʼiiltʼeʼ bikʼehgo naakitsʼáadahgo kin haalʼá bííʼ daazlı̨́ı̨́ʼ.
41 Kin hadaasʼáii tʼáá ałtso éí Ízrel dineʼé bikéyah biyiʼ Líívai dineʼé haa daaszįįdígíí binaagóó dahootsooígíí tʼáá bił dízdiindóó baʼaan tseebíigo kin hadaasʼáhígíí hóóʼ daazlı̨́ı̨́ʼ.
42 Díí kin hadaasʼáii tʼáá ałtso binaagóó dahootso; kótʼéego díí kin hadaasʼáii tʼáá ałtso binaagi dahootso.
Ízrel dineʼé kéyah bííʼ daazlı̨́ı̨́ʼ
43 Áko Bóhólníihii éí Ízrel dineʼé dabizhéʼé yę́ę bichʼįʼ kéyah tʼáá átʼé yee ádee hadoodzíiʼii yeidiníʼą́, áádóó bííʼ daazlı̨́įʼgo yikáaʼgi nidahaazná.
44 Áádóó Bóhólníihii éí Ízrel dineʼé hanaagóó tʼáá átʼé hodéesyéelgo áyiilaa; éí dahazhéʼé yę́ę yichʼįʼ yee ádee hadoodzíiʼii tʼáá átʼé bikʼehgo áyiilaa; éí hweʼanaʼí tʼáá ałtso bitahdóó doo łaʼ hakʼeh dódleʼ átʼée da, háálá Bóhólníihii éí hweʼanaʼí tʼáá ałtso hálákʼeidííʼą́.
45 Bóhólníihii éí Ízrel dineʼé yichʼįʼ yáʼátʼéehgo áhodooníiłii yee nihoníʼáanii tʼáadoo łaʼ chʼééh áyííłʼįįd da; éí tʼáá ałtso tʼáá ákóyiilaa.
