Joshua 22:1-34
22 Áko Jáshowa éí Rúben dineʼé áádóó Géed dineʼé índa Manáseh dineʼé ałnííʼdóóígíí hágo bizhdííniidgo
2 ábizhdííniid, Bóhólníihii yá naalʼaʼí Mózes nihichʼįʼ yee haadzíiʼii tʼáá ałtso bidaʼíínóhsin nítʼééʼ, índa nihichʼįʼ bee hahásdzíiʼii shizaad tʼáá ałtso bikʼeh dahonołʼı̨́ı̨́ nítʼééʼ;
3 nihikʼisóó danilíinii tʼáadoo bitsʼą́ą́ʼ dadínóhchéhí tʼóó ahayóí yiską́ díí jı̨́ı̨́góó ákódaahtʼı̨́, nidi Bóhólníihii nihiDiyin God nihichʼįʼ yee haadzíiʼii bikʼeh ádanohtʼéé nítʼééʼ.
4 Áko kʼad Bóhólníihii nihiDiyin God éí nihikʼisóó hááʼáyı̨́ı̨́h yeidiníʼą́; jó, tʼáá ákótʼéego yichʼįʼ yee ádee hadoodzííʼ; éí bąą kʼad nihéédahohkááh; danihighangóó áádóó kéyah nihííʼ daazlı̨́ʼígóó, éí Bóhólníihii yá naalʼaʼí Mózes wolyéii Jórdan tooh wónaanídi nihaa hodiníʼánígóó nihéédahohkááh.
5 Haleebee hazhóʼó ádaa ádahołyą́ągo bikʼeh óʼooʼníiłii áádóó bee hazʼáanii bikʼeh dahonołʼı̨́; éí Bóhólníihii yá naalʼaʼí Mózes hazhóʼó yee ánihidííniid, áko Bóhólníihii nihiDiyin God ayóóʼádeínóhʼní, áádóó bihonítʼiʼii tʼáá ałtso bikʼehgo dayínóhkááh, áádóó bibikʼeh óʼooʼníiłii bikʼeh dahonołʼı̨́, áádóó tʼáá bí tʼéí bíʼádadíínółtąʼ, índa nihijéí tʼáá átʼé bee áádóó nihiiʼ sizíinii tʼáá átʼé bee bá nidaałʼaʼ.
6 Áko Jáshowa hakʼijisdliʼgo hwééʼníłniiʼ áádóó dahaghangóó anídadziiskai.
7 Áko Mózes éí Manáseh dineʼé ałnííʼdóóígíí Béíshan kéyah biyiʼ bííʼ dooígíí yeidiníʼą́, nidi Manáseh dineʼé łahjįʼ ałnííʼdóóígíí éí dabikʼis bikédaayah bitahgi Jórdan tooh eʼeʼaahjígo bííʼ dooígíí Jáshowa beidiníʼą́. Áádóó dahaghangóó Jáshowa hwééʼiisniiʼgo hakʼijisdliʼ,
8 áádóó áhodííniid, Daʼohtʼı̨́įgo nihighangóó nídeínóhkááh; nihilı̨́ı̨́ʼ tʼóó adahayóigo áádóó béésh łigaii áádóó óola áádóó béésh łitsoii áádóó béésh nitłʼizii índa ééʼ tʼóó ahayóí nihee dahólǫ́ǫgo nihiʼanaʼí bindaalyeʼé bąąh nidaʼsoołtseedígíí nihikʼisóó bił ałtsʼádadiʼdoohnił.
9 Áko Rúben dineʼé áádóó Géed dineʼé índa Manáseh dineʼé ałnííʼdóóígíí dabighangóó anídahaaskai; Ízrel dineʼé áłah nilínídóó, éí Sháíloh hazʼánígi Kéínan kéyah biyiʼdóó Gíliyad kéyahgóó dah nídahidiikai; kéyah bííʼ daazlı̨́įʼgo bííʼ ádayiilaaígíí yichʼįʼ anáhaaskai; éí Mózes biniitʼaa Bóhólníihii yee haadzíiʼii bikʼehgo hóóʼ ádajiilaa.
10 Áádóó Kéínan kéyahgi Jórdan tooh bibąąhgóó hoodzoíjįʼ yíkaigo Rúben dineʼé áádóó Géed dineʼé índa Manáseh dineʼé ałnííʼdóóígíí ákweʼé Jórdan tooh bibąąhgi bikááʼ nááʼiiniihí nitsxaago ádayiilaa.
11 Áádóó Ízrel dineʼé éí kóháʼníigo deidiiztsʼą́ą́ʼ, Jó, Rúben dineʼé áádóó Géed dineʼé índa Manáseh dineʼé ałnííʼdóóígíí Kéínan kéyahgi Jórdan tooh bibąąhgóó Ízrel dineʼé ninínánígi bikááʼ nááʼiiniihí ádayiilaa.
12 Áko Ízrel dineʼé díí yaa dahodiiztsʼą́ąʼgo yichʼįʼ anaaʼ ádahodoolííł biniyé Sháíloh hazʼánígi Ízrel dineʼé áłah silı̨́ı̨́ʼ.
13 Áko Ízrel dineʼé éí Gíliyad kéyahgóó Rúben dineʼé áádóó Géed dineʼé índa Manáseh dineʼé ałnííʼdóóígíí bichʼįʼ nááʼiiłniihii Eliyéízar biyeʼ Fíniyas adeisʼaʼ,
14 áádóó bídahólníhígíí neeználtʼéego aláahgo hwee ádídahólníihgo Ízrel dineʼé dah deínéehii yikʼeh nízíinii hoł adeisʼaʼ; dahazhéʼé yę́ę baʼáłchíní dajílı̨́įgo hódahólníhígíí Ízrel dineʼé miil daaltʼéii bá aląąjįʼ nidzizı̨́.
15 Áádóó Gíliyad kéyahdi Rúben dineʼé áádóó Géed dineʼé índa Manáseh dineʼé ałnííʼdóóígíí yaa yíkaigo ádeidííniid,
16 Bóhólníihii bidineʼé áłah silı̨́ʼígíí tʼáá ałtso ádaaní, Haʼátʼíí lá bee Ízrel dineʼé biDiyin God bichʼįʼ doo ákǫ́ǫ́ ádaotʼįįdgóó Bóhólníihii bikééʼ deínóhkááh nítʼééʼ yę́ę díí jı̨́ bitsʼáhisoohkaigo bikááʼ nááʼiiniihí ádá ádaahłaa? Jó, éí bee díí jı̨́ Bóhólníihii bichʼįʼ nidasoołteeʼ.
17 Daʼ Píyor kin shijaaʼdiísh tʼįįhdígo doo ákwii ádeiitʼįįd da? Jó, tʼáá nihí nidi doo nihidaʼdódééh átʼée da. Azhą́ Bóhólníihii bidineʼé dah yinéłígíí bee atíʼélʼíinii yee atíyiilaa nidi ákóniitʼé.
18 Ákoósh díí jı̨́ Bóhólníihii bikééʼ deínóhkááh nítʼééʼ yę́ę bitsʼánóhkááh lá? Áko kótʼée doo: díí jı̨́ Bóhólníihii tʼáá bichʼįʼ nidasoołteeʼgo yiską́ągo Ízrel dineʼé dah yinéłígíí tʼáá ałtso yichʼįʼ báhodoochįįł.
19 Nidi kʼad nihikéyah doo yáʼáhootʼééhgóogo, Bóhólníihii bikéyah biyiʼjįʼ haʼnaa ninádoohʼnéełgo Bóhólníihii biníbaal biiʼ hodílzinii siʼánígóó nihitahgi kéyah nídahodidoohʼááł. Bóhólníihii bichʼįʼ áádóó nihí nihichʼįʼ tʼááká ádił nidaołteeł lágo, Bóhólníihii nihiDiyin God bibikááʼ nááʼiiniihí tʼah biláhídi átʼéii tʼááká bikááʼ nááʼiiniihí náánáłaʼ ánáádaohdlééh lágo.
20 Zíírah biyeʼ Éíkan wolyéii Bóhólníihii bichʼįʼ nideetʼáanii yee doo ákǫ́ǫ́ áátįįdígíí biniinaa doósh Bóhólníihii yee hashké nídzinii yee Ízrel dineʼé dah yinéłígíí tʼáá ałtso atíyiilaa da? Áádóó éí doo ákwii áátʼįįdígíí tʼéiyá biniinaa diné náánáłaʼ ałdóʼ ádabiʼdisdįįd.
21 Áko Rúben dineʼé áádóó Géed dineʼé índa Manáseh dineʼé ałnííʼdóóígíí áńdahodooʼniidgo Ízrel dineʼé mííl daaltʼéego yiląąjįʼ naazíinii ádeidííniid,
22 Diyin God, Diyin God, éí Bóhólníihii nilíinii, Diyin God, Diyin God, éí Bóhólníihii nilíinii, éí díí bił bééhózin, índa Ízrel dineʼé tʼáá bí bił béédahodoozįįł! Nideiilteehgo, doodaiiʼ Bóhólníihii bichʼįʼ doo ákǫ́ǫ́ ádeiitʼı̨́ı̨́góó, áko díí jı̨́ yisdánihóónííł lágo,
23 jó, bikááʼ nááʼiiniihí ádeiilyaago Bóhólníihii bikééʼ deíníikáahii bitsʼáhaakaigo, doodaiiʼ bikáaʼjįʼ didlidgo náádahaniihii, doodaiiʼ akʼáán náádahaniihii, doodaiiʼ hózhǫ́ǫ́jí náádahaniihii náádahiilniiʼgo bíniʼdii Bóhólníihii tʼáá bí kʼéénihidódleʼ.
24 Nidi díí bikʼee nihił daayéeʼgo biniinaa ákódeiidzaago ádadiiʼní, Háadida náasdi nihí aají nihadaʼáłchíní nihí kojí nihadaʼáłchíní daatsʼí ádeididooniił, Ízrel dineʼé biBóhólníihii Diyin God hanii nihídadéétʼiʼgo ádaahtʼı̨́?
25 Jó, Bóhólníihii éí Jórdan tooh bee nihitaʼgi hoodzogo áyiilaa; nihí Rúben dineʼé áádóó Géed dineʼé danohłíinii, Bóhólníihii doo nihídéétʼiʼ da. Daʼahidiʼníigo aají nihadaʼáłchíní éí nihí kojí nihadaʼáłchíní Bóhólníihii doo deidísingóó ádeidoolííł.
26 Éí bąą ádadiiʼní, Haaʼíshąʼ kʼad bikááʼ nááʼiiniihí ádadiilnííł; éí didlidgo náádahaniihii, doodaiiʼ náádahidoonihii doo biniyé ádadiilníił da,
27 nidi nihitaʼgi áádóó nihaʼáłchíní náás daʼahílchíihii bitaʼgi bee ééhózinii átʼée doo, áko Bóhólníihii bichʼįʼ nidahwiidláago Bí hólǫ́ǫgi didlidgo nihinááhániihii áádóó nihináádaʼiiniihii índa hózhǫ́ǫ́jí nihináádahaniihii bichʼįʼ náádahiilniih doo, áko nihí aají nihadaʼáłchíní éí nihí kojí nihadaʼáłchíní náasdi doo ádeididooʼniił da, Aají nihí Bóhólníihii doo nihídéétʼiʼ da.
28 Áádóó kódeiniidzı̨́ı̨́ʼ, Náasdi ákónihiʼdooʼniidgo, doodaiiʼ nihadaʼáłchíní ákódabiʼdooʼniidgo, kódadidiiʼniił, Shoo, Bóhólníihii bibikááʼ nááʼiiniihí bééʼályaaii éí danihizhéʼé yę́ę ádayiilaa; éí didlidgo náádahaniihii índa náádahidoonihii doo yiniyé ádayiilaa da, nidi éí nihitaʼgi bee ééhózinii biniyé átʼé.
29 Dooda lą́ą! Bóhólníihii doo bichʼįʼ nideiilteeh da, áádóó Bóhólníihii bikééʼ deíníikáhígíí doo bitsʼádiikah da; éí bikááʼ nááʼiiniihí ádeiilyaago, bikáaʼjįʼ didlidgo náádahaniihii, doodaiiʼ akʼáán náádahaniihii, doodaiiʼ náádahidoonihii náádahiilniiʼgo, Bóhólníihii nihiDiyin God bibikááʼ nááʼiiniihí, éí biníbaal biiʼ hodílzinii bidáahgi siʼánígíí tʼah biláhídi átʼéii tsʼídá doo ádeiilʼı̨́į da.
30 Áko nááʼiiłniihii Fíniyas índa áłah ílínídóó bídahólníihii Ízrel dineʼé mííl daaltʼéego yiląąjįʼ naazíinii hoł naakaígíí saad deidiiztsʼą́ąʼgo, éí Rúben dineʼé áádóó Géed dineʼé índa Manáseh dineʼé hadaasdzíʼígíí bił yáʼádaatʼééh.
31 Áádóó nááʼiiłniihii Eliyéízar biyeʼ Fíniyas éí Rúben dineʼé áádóó Géed dineʼé índa Manáseh dineʼé danilíinii áyidííniid, Díí jı̨́ Bóhólníihii nihitahgi hólǫ́ǫgo nihił béédahózin; jó, kótʼéego Bóhólníihii bichʼįʼ tʼáadoo doo ákǫ́ǫ́ ádaotʼįįd da lá, áko kʼad Ízrel dineʼé éí Bóhólníihii yee atíʼéłʼíinii bitsʼą́ąjįʼ yisdádasoonil.
32 Áko nááʼiiłniihii Eliyéízar biyeʼ Fíniyas áádóó bídahólníhígíí éí Rúben dineʼé áádóó Géed dineʼé yitsʼą́ą́dę́ę́ʼ nákai; Gíliyad kéyahdóó Kéínan kéyahgóó Ízrel dineʼé bichʼįʼ tʼą́ą́ʼ níjíkaigo haneʼ baa nídadzizʼą́.
33 Áko haneʼígíí Ízrel dineʼé yaa bił dahóózhǫǫd, áko Ízrel dineʼé éí Diyin God yaa dahaniihgo Rúben dineʼé áádóó Géed dineʼé kéyah yiiʼ kéédahatʼínígíí bikʼiidiijahgo ádadiildįįł doo náádadooʼniid da.
34 Rúben dineʼé áádóó Géed dineʼé éí bikááʼ nááʼiiniihí Ed* wolyée doo, dadííniid, háálá ádaaní, Jó, éí nihitaʼgi díí bee ééhózin: Bóhólníihii Diyin God nilı̨́.
Footnotes
^ Ed jiníigo éí Hííbrew kʼehjígo bee ééhózinii jiníigo óolyé.
