Joshua 23:1-16
23 Áádóó nízaad nihoolzhiizhgo Ízrel dineʼé binaagóó bidaʼanaʼí ásdįįdgo Bóhólníihii hashtʼehodítʼé beidiníʼą́ągo Jáshowa biʼniitih áádóó tʼóó ahayóí binááhai,
2 áko Jáshowa éí Ízrel dineʼé tʼáá ałtso áádóó hastóí danilíinii áádóó aląąjįʼ naazíinii áádóó ándahodiiʼaahii índa á dah naazdáii hágo yidííniidgo áyidííniid, Kʼad tʼáá íiyisí hasistih áádóó tʼóó ahayóí shinááhai,
3 áádóó díí hazhóʼó baa ákódanoozı̨́ı̨́ʼ: Bóhólníihii nihiDiyin God éí díí ałʼąą dineʼé tʼáá ałtso nihiniinaa atíyííłʼįįd, háálá Bóhólníihii nihiDiyin God nihá anaaʼ áyiilaa.
4 Jó, yááʼiiltʼeʼ bikʼehgo díí ałʼąą anaʼí ałʼąą dah naazhjaaʼgo áshłaii tʼah nihił kéédahatʼínígíí, éí Jórdan toohdóó eʼeʼaahjí ayóó átʼé tónteel siyíníjįʼ ałʼąą anaʼí tʼáá ałtso tʼáá íídą́ą́ʼ áséłdįįdígíí bikédaayah nítʼéʼígíí tʼáá bił nihííʼ dooleeł.
5 Bóhólníihii nihiDiyin God éí nihilą́ąjįʼ yinoołkałgo doo nídeidoołtsééłgóó baa chʼíhidoojah; bikédaayah tʼáá átʼé nihííʼ dadooleeł; jó, ákótʼéego Bóhólníihii nihiDiyin God nihá yee nihoníʼą́.
6 Éí bąą yéego chánah danohłı̨́įgo naaltsoos biiʼ Mózes bibee hazʼáanii bee akʼeʼashchínígíí tʼáá ałtso bikʼeh dahonołʼı̨́įgo bikʼeh ádanohtʼée doo, áko nishʼnáajigo, doodaiiʼ nishtłʼajigo tsʼídá doo bitsʼą́ąjįʼ kódadoohníił da,
7 áádóó díí ałʼąą anaʼí nihił kéédahatʼínígíí doo bitahgóó dahohjah da doo, áádóó bidiyin dabidiʼníinii doo baa yádaałtiʼ da doo, áádóó doo bee ádee hadahidohdziih da doo, áádóó doo bá nidaałʼaʼ da doo, índa doo bichʼįʼ yaa áńdaahtʼįįh da doo,
8 nidi Bóhólníihii nihiDiyin God bíʼádadíínółtąʼ; ákónóhtʼéego díí jı̨́ı̨́góó hoolzhish.
9 Háálá Bóhólníihii éí ałʼąą anaʼí ayóó ádaatʼéii índa ayóó ádabóodziilii nihinááł baa chʼíheezhjééʼ, nidi nihí éí tsʼídá tʼáadoo nihéébóodziilígóó díí jı̨́ı̨́góó hoolzhish.
10 Tʼáá łah dinołtʼéhígo diné tʼááłáhídi mííl nihaa nídidoojah, háálá Bóhólníihii nihiDiyin God éí nihá anaaʼ ííłʼı̨́; jó, ákótʼéego nihá yee nihoníʼą́.
11 Éí bąą hazhóʼó tʼáá nihí ádaa ádahołyą́ągo, Bóhólníihii nihiDiyin God ayóóʼádeínóhʼní.
12 Háálá tʼą́ą́ʼ dah nídahidoohkaigo díí ałʼąą anaʼí nihitahgi daadzíʼígíí tʼáá éí nihił kéédahatʼínígíí bił ahółdahgo bił ahándaʼohgehgo ídadiʼdoołnííł, áádóó bił ahółdahgo, índa nihił ahíldahgo,
13 díí tʼáá yíní átʼéegi baa ákodanohsin: Bóhólníihii nihiDiyin God éí díí ałʼąą anaʼí doo nihilą́ąjįʼ baa chʼínááhájeehgóó, nidi tʼóó biloh áádóó bibee ódleehí biih wohkáah doo, áádóó nihooshkʼiizh nídanilsxis doo índa chʼil dadeeníinii nihinákʼee nídaajił doo. Bóhólníihii nihiDiyin God kéyah yáʼátʼéehii nihaidiníʼáanii bąąh ásoohdįįdjįʼ ákónóhtʼée doo.
14 Áko nihokááʼ dineʼé tʼáá ałtso bá nidahwiitʼééhjí bikááʼgóó dah diishááh, éí nihijéí índa nihiiʼ sizíinii tʼáá átʼé bee nihił béédahózin; tʼááłáʼí nidi doo łaʼ chʼééh áálʼįįdgóó tsʼídá yáʼádaatʼéehii tʼáá ałtso Bóhólníihii nihiDiyin God nihídéétʼiʼgo nihichʼįʼ yee hahadziih; tsʼídá tʼáá ałtso nihá bidahoolyaa; tʼááłáʼí nidi tʼáadoo łaʼ chʼééh áálʼįįd da.
15 Éí bąą kótʼée dooleeł: tʼáá ałtso yáʼátʼéehgo áhooníiłii nihá bidahoolnííł; éí Bóhólníihii nihiDiyin God nihá yee nihoníʼą́; tʼáá ákótʼéego ałdóʼ tʼáá ałtsoní doo yáʼádaatʼéehii Bóhólníihii nihikʼijįʼ kwíidoolííł; Bóhólníihii nihiDiyin God díí kéyah yáʼátʼéehii nihaidiníʼáanii yąąh ánihisdįįdjįʼ ákónihidoolííł.
16 Bóhólníihii nihiDiyin God bibee ahaʼdeetʼáanii nihichʼįʼ yee haadzíiʼii bilááh niʼádinoohʼnilgo áádóó diyin dabidiʼníinii bá nidaałʼaʼgo índa éí bichʼįʼ yaa áńdaahtʼįįhgo Bóhólníihii tʼáá íiyisí nihichʼįʼ báhodoochįįł, áádóó kéyah yáʼátʼéehii nihaidiníʼáanii ałtso tsı̨́įłgo bąąh ánihidiʼdooldįįł.
