Joshua 4:1-24
4 Ákódaadzaago diné tʼáá ałtso Jórdan tooh haʼnaa ałtso ninínáago Bóhólníihii éí Jáshowa áyidííniidgo ání,
2 Diné bitahdóó diné naakitsʼáadahgo nídidíínił; tʼááłáʼí nítínígo ałʼąą dóoneʼé danilı̨́įgo nídidíínił.
3 Áádóó bichʼįʼ hadíídzihgo ábididííniił, Jórdan toohdę́ę́ʼ éí náádaʼiiłniihii naazínídóó tsé naakitsʼáadahgo nídadidoohnił; éí danihiidoołkáłíjįʼ dadoohjihgo díí tłʼééʼ danihiiłkaahígi nidadoohnił.
4 Áko Jáshowa éí diné naakitsʼáadahgo nízhdiinilígíí bíká ázhdííniid; éí Ízrel dineʼé bitahdóó tʼááłáʼí nítínígo ałʼąą dóoneʼé danilı̨́.
5 Áko Jáshowa éí áyidííniid, Bóhólníihii nihiDiyin God bitsitsʼaaʼ dílzinii bilą́ąjįʼ Jórdan tooh nílı̨́ı̨́ nítʼééʼ yę́ęgóó dohkááh áádóó tʼááłáʼí nootínígo nihiwos bee tsé hadahidoohjih; Ízrel dineʼé ałʼąą dóoneʼé nohłínígíí éí bikʼehgo ákódaahnééh.
6 Éí nihitahgóó bee ééhózinii átʼée doo; náás hodeeshzhiizhgóó nihadaʼáłchíní éí dabizhéʼé nideídíłkidgo ádadidooniił, Díí tséshąʼ, haʼátʼíí biniyé átʼé?
7 Áko éí bee bił nídahołneʼ dooleeł, Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii bidáahgi Jórdan tooh dah néískʼol; éí Jórdan tooh haʼnaa niitʼaahgo Jórdan tooh ałʼąą niilkʼol. Áko díí tséhígíí éí Ízrel dineʼé bee ééhániihii átʼéego ahóyéelʼáa dooleeł.
8 Áko Ízrel dineʼé éí Jáshowa yee haadzíʼígíí yikʼeh ádaadzaa; Jórdan tooh nílı̨́ı̨́ nítʼééʼ yę́ęgi ałnííʼdę́ę́ʼ tsé naakitsʼáadahgo hadeizhjaaʼ; Bóhólníihii éí Jáshowa áyidííniidígi átʼéego Ízrel dineʼé éí ałʼąą dóoneʼé bikʼehgo dahwiidoołkáłíjįʼ tsé deizhjaaʼgo ákwii nideiznil.
9 Áádóó Jáshowa éí tsé naakitsʼáadahgo Jórdan tooh nílı̨́ı̨́ nítʼééʼ yę́ę ałníiʼgi ałkʼi dziztłʼin; náádaʼiiłniihii éí tsitsʼaaʼ dílzinii éí bee ahaʼdeetʼáanii biiʼ sinilii deíʼaahígíí naazínígi niinínil, áko éí díí jı̨́ı̨́góó tʼahdii tʼáá ákwii sinil.
10 Háálá náádaʼiiłniihii éí tsitsʼaaʼ dílzinii deíʼaahígíí Jórdan tooh nílı̨́ı̨́ nítʼééʼ yę́ę ałníiʼgi naazı̨́įgo Bóhólníihii éí Jáshowa yichʼįʼ yee haadzíiʼii diné bichʼįʼ ałtso bee hazdoodzih biniyé, Jáshowa éí Mózes hachʼįʼ yee haadzíiʼii tʼáá átʼé bikʼeh ádziidzaa.
Haneetehee diné tséʼnaa niildeeʼ.
11 Áádóó ákódzaago diné tʼáá átʼé ałtso tséʼnaa niikaigo Bóhólníihii bitsitsʼaaʼ dílzinii tséʼnaa niitʼą́ índa náádaʼiiłniihii diné dabinááł tséʼnaa niikai.
12 Rúben dineʼé áádóó Géed dineʼé índa Manáseh dineʼé ałnííʼdóóígíí Ízrel dineʼé yilą́ąjįʼ anaaʼ yiniyé hashtʼeʼádadiilyaago tséʼnaa niikai; Mózes hachʼįʼ yee haadzíiʼii bikʼeh ídaʼjiilaa.
13 Diné dízdiindi míilgo anaaʼ yiniyé hashtʼeʼádadólzinígíí haʼnaa nidahaaznáago Bóhólníihii binááł Jériko honíteeljigo adahaazbaaʼ.
14 Éí bijı̨́ı̨́dą́ą́ʼ Ízrel dineʼé tʼáá ałtso dabinááł Bóhólníihii éí Jáshowa ayóó átʼéii nilı̨́įgo áyiilaa, áádóó Jáshowa deidísin nítʼééʼ; Mózes deidísin yę́ęgi átʼéego Jáshowa abíyííłką́ąjįʼ bił danilı̨́ı̨́ nítʼééʼ.
15 Áádóó Bóhólníihii éí Jáshowa áyidííniidgo ání,
16 Náádaʼiiłniihii bichʼįʼ handziihgo éí tsitsʼaaʼ dílzinii éí neeznáago bikʼeh óʼooʼníiłii bee bééhániihii biiʼ sinilii deíʼaahgo Jórdan tooh nílı̨́ı̨́ nítʼééʼ yę́ędę́ę́ʼ tsítsʼádookah.
17 Éí bąą Jáshowa éí náádaʼiiłniihii bichʼįʼ hadzoodzíiʼgo ájíní, Jórdan tooh nílı̨́ı̨́ nítʼééʼ yę́ędóó wóshdę́ę́ʼ tsítsʼánóhkááh.
18 Áádóó náádaʼiiłniihii éí Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii deíʼaahígíí Jórdan tooh nílı̨́ı̨́ nítʼééʼ yę́ędę́ę́ʼ haaskaigo náádaʼiiłniihii éí hóółtseijįʼ niikaigo Jórdan tooh tʼą́ąjįʼ anídahaazgoʼgo tʼáá átséédą́ą́ʼ nílı̨́ı̨́ nítʼééʼ yę́ęgi átʼéego náádląąd.
19 Átsé nídízídígíí binih, neeznáá jı̨́ı̨́ góneʼ Jórdan tooh haʼnaa ninínáago Jériko bihoodzo haʼaʼaahjígo Gílgal hoolyéegi niníná.
20 Áko tsé naakitsʼáadahgo Jórdan tooh nílı̨́ı̨́ nítʼééʼ yę́ędóó hadajiizhjaaʼígíí Gílgalgi Jáshowa ałkʼi yiztłʼin.
21 Áko Ízrel dineʼé ábizhdííniid, Náás hodeeshzhiizhgóó nihadaʼáłchíní bizhéʼé nideídíłkidgo ádadidooniił, Díí tséshąʼ, haʼátʼíí biniyé átʼé?
22 Ákohgo díí nihadaʼáłchíní bee bił dahołneʼgo bił béédahodoozįįł, Ízrel dineʼé bá díí Jórdan tooh haʼnaa nihoníłtseiigo tséʼnaa niníná.
23 Háálá Bóhólníihii nihiDiyin God éí Jórdan tooh nihilą́ąjįʼ nihá nihoníłtseiigo haʼnaa ałtso ninooná; Bóhólníihii nihiDiyin God éí Tónteel Łichííʼ siyínígíí nihá haʼnaa niiníłtseiigo haʼnaa ałtso niniiʼnánígi áhoodzaa.
24 Ákohgo nihokááʼ dineʼé tʼáá átʼé bił béédahodoozįįł: Bóhólníihii bigaan ayóó ábóodziilii nilı̨́, áádóó Bóhólníihii nihiDiyin God dadíínóhsingo ahoolʼáa doo.
