Joshua 5:1-15
5 Ákódzaago Ámor dineʼé aláahgo bindanitʼaʼí tʼáá ałtso Jórdan tooh biláahdi eʼeʼaahjigo kéédahatʼínígíí índa Kéínan dineʼé aláahgo bindanitʼaʼí tʼáá ałtso tónteel bíighahgóó kéédahatʼínígíí Bóhólníihii éí Jórdan tooh haʼnaa niiníłtseiigo Ízrel dineʼé binááł tséʼnaa ałtso niniiʼnánígíí yaa dahodiiztsʼą́ąʼgo éí yikʼee bijéí nitsidaastłah índa doo bił chodahóóʼįįd da, háálá Ízrel dineʼé biniinaa ákódadziidzaa.
2 Ákwii nahalzhiish yę́ędą́ą́ʼ Bóhólníihii éí Jáshowa áyidííniid, Tsé deeníinii ádadííliiłgo naakidi aleeh góneʼ Ízrel dineʼé bąąh nídahidínííłgish.
3 Ákohgo Jáshowa éí tsé deeníinii ádajiilaa, áko ąąh hadaalgizh dah yiskʼid hoolyéegi ákweʼé Ízrel dineʼé bąąh nídahizhneeshgizh.
4 Díí bąą Jáshowa ąąh nídahizhneeshgizh: éí diné danilínígíí tʼáá ałtso Ííjip kéyahdę́ę́ʼ chʼínáʼnánígíí diné anaaʼ daʼałʼíinii tʼáá ałtso honoojíigi oonéełgo daneeznánígíí éí Ííjip kéyahdę́ę́ʼ chʼínáʼnáádóó bikʼijįʼ bikééʼ ádahasdįįd.
5 Diné tʼáá ałtso Ííjipdę́ę́ʼ chʼídahaaznánígíí éí bąąh nídahineeshgizh, nidi diné tʼáá ałtso Ííjip kéyahdę́ę́ʼ chʼídahaaznáádóó bikʼijįʼ honoojíigi oonéełgo nidabiʼdiizhchínígíí éí tʼah doo bąąh nídahinilgish da nítʼééʼ.
6 Háálá Ízrel dineʼé éí honoojíidi naaldeehgo dízdiin nááhai; éí diné anadaʼałʼíinii tʼáá ałtso Ííjip kéyahdę́ę́ʼ chʼídahaaznánígíí tʼáá ałtso ádadzisdįįdjįʼ tádííná, háálá Bóhólníihii bizaad doo bikʼeh dahojíłʼı̨́į da nítʼééʼ. Bóhólníihii éí kéyah doo deizdoołtsééłgóó yichʼįʼ yee ádee hadoodzííʼ; tʼáá éí kéyahígíí dahazhéʼé yę́ę yichʼįʼ yee ádee hadoodzíiʼgo nihaididooʼáłígíí bikááʼ abeʼ índa tsésʼná bitłʼizh bee ádaʼazįįd.
7 Áko hadaʼáłchíní dahatsáskʼehgi Bóhólníihii hainínilígíí éí Jáshowa tʼáá bí yąąh nídeineeshgizh, háálá oonééłdę́ę́ʼ tʼah doo bąąh nídahinilgish da nítʼééʼ.
8 Ałtso diné tʼáá átʼé bąąh nídahineeshgizhgo, éí nídadzoodzíiʼjįʼ dahaghangi tʼóó nidadzíiztą́ą́ nítʼééʼ.
9 Áko Bóhólníihii éí Jáshowa áyidííniid, Díí jı̨́ Ííjip kéyahgi bee iʼdéédzíiʼgo baa yáhóósįįdígíí nihitsʼą́ąjįʼ yóóʼííłmááz. Díí jı̨́įjįʼ éí hazʼą́ągi yízhí bee wójíigo Gílgal* hoolyé.
10 Ízrel dineʼé éí Gílgalgi ninínáago éí átsé nídízídígíí binih, dı̨́ı̨́ʼtsʼáadahgóó yoołkáałgo iʼííʼą́ągo Jériko honíteelgi atisʼadeesdzá bee bééhániihii bee nidahojisá.
11 Áádóó atisʼadeesdzá baa naʼasdeeʼdóó biiskání kéyahgi nínádantʼı̨́hígíí łaʼ dayííyą́ą́ʼ; tʼáá éí bijı̨́ dííkʼǫsh tʼáágééd bááh ályaii índa tłʼoh naadą́ą́ʼ sitʼéhígíí dayííyą́ą́ʼ.
12 Tʼáá éí kéyahdóó nínádantʼı̨́įhii dajííyą́ą́ʼdóó biiskání mána ánászįįd, áádóó Ízrel dineʼé éí mána baa ánászįįd, nidi éí náháhígíí biyiʼ Kéínan kéyahgi nínádantʼı̨́hígíí dajiyą́ą́ nítʼééʼ.
Jáshowa áádóó diné léiʼ bidiltłish hayíítą́ągo dah yootı̨́ı̨́ł
13 Ákódaadzaadóó Jáshowa éí Jériko kin haalʼáii bíighahgi nijigháago, hajííghalgo jidééʼı̨́ı̨́ʼ nítʼééʼ; jó, diné léiʼ sizı̨́įgo bidiltłish hayíítą́ągo dah yootı̨́įłgo jiiłtsą́, áko Jáshowa éí bichʼįʼ nizhníyáago ábizhdííniid, Daʼ nihichʼijíísh nílı̨́, doodaiiʼ nihiʼanaʼí daatsʼí bichʼijí nílı̨́?
14 Áko éí diné ání, Dooda, nidi kʼad Bóhólníihii bisiláo dah deínéehii binanitʼaʼí nishłı̨́įgo níyá. Áádóó Jáshowa niʼjįʼ yaa ádziidzaago nahodzisá, áko ábijiní, Shinanitʼaʼí binaalʼaʼí nishłı̨́įgo haʼátʼíí lá shiłní?
15 Áádóó Bóhólníihii bisiláo dah deínéehii binanitʼaʼí éí Jáshowa áyidííniid, Nikeeʼ hadiidlé, háálá sínízínígi hodiyingo hazʼą́. Áko Jáshowa tʼáá ákódziidzaa.
Footnotes
^ Gílgal jiníigo éí Hííbrew kʼehjígo yóóʼelmááz jinínígi átʼéego diitsʼaʼ.
