Joshua 6:1-27
6 Íídą́ą́ʼ Ízrel dineʼé biniinaa Jériko kin haalʼáhígíí yéego dáʼdeelkaal; doo łaʼda chʼígháhí da, doo łaʼda yah iigháhí da.
2 Bóhólníihii éí Jáshowa áyidííniid, Shoo, Jériko kin haalʼáii áádóó aláahgo naatʼáanii índa bisiláo dahayóii tʼáá bił nílákʼedííʼą́.
3 Diné anaaʼ daʼałʼíinii danohłíinii tʼáá ánółtso, díí kin haalʼáhígíí tʼááłáhídi binínáhkah doo. Ákódaahtʼı̨́įgo hastą́ą́h jı̨́ adooleeł.
4 Áko náádaʼiiłniihii tsostsʼid yiltʼéego éí deenástsʼaaʼ bideeʼ bee íʼdílzoołí éí tsitsʼaaʼ dílzinii yilą́ąjįʼ deíjáah dooleeł, áko tsostsʼid jı̨́ aleeh góneʼ kin haalʼáhígíí tsostsʼidi binídoohkah, áádóó náádaʼiiłniihii éí deenástsʼaaʼ bideeʼ yee ádadidooniił.
5 Áko kótʼée dooleeł: deenástsʼaaʼ bideeʼ bee íʼdílzoołí nízaadgóó yee ádadidooniił, áko yee ádadidooniiłígíí éí dasidootsʼą́ąʼgo diné tsʼídá tʼáá ałtso hahodidoołdlałgo ayóó átʼéego hahóóʼáa doo, áádóó kin haalʼáhígíí ditą́ągo binaa ahééʼítłʼinígíí naaʼahiłdaasgo éí bitis góʼąą Ízrel dineʼé tʼááłáʼí nítínígo tʼáá kʼéhézdon yah adoojah.
6 Áko Nan biyeʼ Jáshowa éí náádaʼiiłniihii hágo bizhdííniidgo ábizhdííniid, Tsitsʼaaʼ dílzinii éí bee ahaʼdeetʼáanii biiʼ sinilii nídadoohʼaah áádóó hániʼ náádaʼiiłniihii tsostsʼid yiltʼéego éí Bóhólníihii bitsitsʼaaʼ dílzinii bilą́ąjįʼ deenástsʼaaʼ bideeʼ bee íʼdílzoołí tsostsʼidgo dayíjáah doo.
7 Áádóó Ízrel dineʼé ábizhdííniid, Nihílááh, díí kin haalʼáhígíí bináhkááh, áko diné nidaabaahii éí Bóhólníihii bitsitsʼaaʼ dílzinii yilą́ąjįʼ yikah doo.
8 Áko Jáshowa éí diné bichʼįʼ hadzoodzíiʼgo náádaʼiiłniihii tsostsʼid yiltʼéego éí deenástsʼaaʼ bideeʼ bee íʼdílzoołí tsostsʼidgo dayíjáahgo Bóhólníihii binááł náásgóó yikahgo éí adeeʼ bee íʼdílzoołí yee ádaaní, áádóó Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii tʼáá bikééʼ yitʼááł.
9 Áko diné nidaabaahii éí náádaʼiiłniihii adeeʼ bee íʼdílzoołí yee ádaanínígíí yilą́ąjįʼ yikah, índa akééʼdóó hadaʼídílʼı̨́ʼígíí éí tsitsʼaaʼ dílzinii yikééʼdóó yikahgo náádaʼiiłniihii náás yikahgo éí adeeʼ bee íʼdílzoołí tʼááłáhígi átʼéego yee ádaaní.
10 Nidi Jáshowa éí diné bichʼįʼ hadzoodzíiʼgo ájíní, Tʼáadoo dadołwoshí, doodaiiʼ nihiinééʼ tʼáadoo dadoołtsʼaʼí doo, doodaiiʼ tʼáadoo saad bee hadahohdziihí; hadadołgháásh nihidideeshniiłjįʼ ayííłką́ągo índa hadadidoołwosh.
11 Kótʼéego Bóhólníihii bitsitsʼaaʼ dílzinii éí kin haalʼáhígíí tʼááłáhídi binídadzizʼą́, índa dah oonéłíjįʼ níjíkaigo áadi dahwiiską́.
12 Áko Jáshowa tʼah abínídą́ą́ʼ nídiiʼnaʼgo náádaʼiiłniihii éí Bóhólníihii bitsitsʼaaʼ dílzinii nídeidiiʼą́.
13 Náádaʼiiłniihii tsostsʼid yiltʼéego éí deenástsʼaaʼ bideeʼ bee íʼdílzoołí deíjáahgo Bóhólníihii bitsitsʼaaʼ dílzinii bilą́ąjįʼ tʼááłáhígi átʼéego náásgóó yikahgo deenástsʼaaʼ bideeʼ bee íʼdílzoołí yee ádaaní, áko diné nidaabaahii éí bilą́ąjįʼ yikah áádóó akééʼdóó hadaʼídílʼı̨́ʼígíí éí Bóhólníihii bitsitsʼaaʼ dílzinii yikééʼdóó yikahgo náádaʼiiłniihii náás yikahgo tʼááłáhígi átʼéego adeeʼ bee íʼdílzoołí yee ádaaní.
14 Áko naaki jı̨́ aleeh góneʼ kin haalʼáhígíí binínáádzískaigo dah oonéłíjįʼ tʼą́ą́ʼ nínáájíkai. Ákódajitʼı̨́įgo hastą́ą́h jı̨́ azlı̨́ı̨́ʼ.
15 Ákódzaago tsostsʼid jı̨́ aleeh góneʼ tʼóó hayííłką́ą́dą́ą́ʼ nízhdiijééʼ áádóó tʼáá ádajitʼı̨́ı̨́ nítʼééʼ yę́ęgi átʼéego kin haalʼá tsostsʼidi binínáádzískai; tʼáá hazhóʼó éí bijı̨́ tʼéí kin haalʼáhígíí tsostsʼidi binídzískai.
16 Áko ákódadziidzaago tsostsʼidi biníjíkááh góneʼ náádaʼiiłniihii éí deenástsʼaaʼ bideeʼ bee íʼdílzoołí yee ádadííniidgo, Jáshowa éí diné áyidííniid, Hadadołgháásh, háálá Bóhólníihii díí kin haalʼáhígíí nihaidiníʼą́.
17 Díí kin haalʼáhígi kéédahatʼíinii índa tʼáá ałtso biiʼ dahólónígíí tʼáá bił Bóhólníihii bichʼįʼ nideetʼą́; tʼáá hazhóʼó Réíhab ałjiłnii nilíinii índa bighan góneʼ yił naháaztánígíí tʼéiyá tʼáá ałtso dahináa dooleeł, háálá díí asdzání éí naalchiʼí adasiilʼaʼígíí néideesʼı̨́ı̨́ʼ.
18 Nidi nihí tʼáadoo leʼé Bóhólníihii bichʼįʼ nideetʼánígíí tsʼídá bitsʼąą ádaa ádahołyą́ą doo, éí doodaiiʼ nídadooláago tʼáá nihí hóyéeʼii biih ádidoohnił índa Ízrel dineʼé dah yinéłígíí ałdóʼ hóyéeʼii biih dadoohnił áádóó bichʼįʼ dahodiyoołnááł.
19 Nidi béésh łigaii áádóó óola tʼáá átʼé índa béésh łitsoii áádóó béésh nitłʼizii bee łeetsʼaaʼ ádaalyaaígíí éí Bóhólníihii bichʼįʼ dílzin, éí Bóhólníihii binaalyeʼé daʼílíinii ahiʼníiłjįʼ nidahohjááh.
20 Áko náádaʼiiłniihii éí deenástsʼaaʼ bideeʼ bee íʼdílzoołí yee ádadííniidgo Ízrel dineʼé hadadeeshghaazh. Ákódzaago éí deenástsʼaaʼ bideeʼ bee íʼdílzoołí diistsʼą́ʼígíí deidiiztsʼą́ąʼgo tʼáá áko ayóó átʼéego hadadeeshghaazhgo kin haalʼáhígíí ditą́ągo binaa ahééʼítłʼinii naaʼadahałdaasgo éí bitis góʼąą Ízrel dineʼé łáʼí nítínígo tʼáá kʼéhézdon yah ííjééʼ, áko kin haalʼáhígíí deisná.
21 Áko kin haalʼáhígi dahólónígíí, diné áádóó asdzání ániid nidaakaii áádóó hadaastihii, béégashiida, dibéda índa téliida tsʼídá ałtso diltłish yee ádeisdįįd.
22 Áko Jáshowa éí diné nidiltʼéego kéyah hayíísidígíí ábizhdííniid, Nihílááh, asdzání ałjiłnii bighan góneʼ yah oohʼaashgo áádę́ę́ʼ bił chʼínóhkááh; bikʼéí tʼáá ałtso tʼáá bił bichʼįʼ bee ádee hadoohdzíʼígíí biʼohłééh.
23 Áko dinééh naalchiʼí nilı̨́ı̨́ nítʼéʼígíí yah ííʼáazhgo áádę́ę́ʼ Réíhab bił níjíkai, bizhéʼé áádóó bimá áádóó yił háájééʼ índa bikʼéí tʼáá ałtso bił níjíkai, áádóó bikʼéí danilíinii tʼáá ałtso dah deidiiʼeezhgo Ízrel dineʼé dah yinéłígíí bíighahgi nideizhʼeezh.
24 Áko kin haalʼáhígíí áádóó biiʼ dahólónígíí ałtso adeideeskʼą́ą́ʼ; tʼáá hazhóʼó béésh łigaii áádóó óola áádóó béésh łitsoii índa béésh nitłʼizii bee łeetsʼaaʼ ádaalyaii tʼéiyá éí Bóhólníihii bikin biyiʼ naalyeʼé daʼílíinii ahiʼnííł góneʼ yah adajizhjaaʼ.
25 Nidi Jáshowa éí Réíhab ałjiłnii nilíinii áádóó bizhéʼé bighandóóígíí índa bikʼéí tʼáá ałtso dahináa doo biniyé yisdájíínil, áko díí jı̨́įjįʼ Ízrel dineʼé bitahgi kéédahatʼı̨́, háálá Jáshowa éí naalchiʼí nidiltʼéego Jériko kin haalʼáii haidoosił biniyé nidzisʼaʼígíí néideesʼı̨́ı̨́ʼ.
26 Áko íídą́ą́ʼ Jáshowa éí hazhóʼó diné bizhníłniiʼgo ábijiní, Bóhólníihii binááł hóyéeʼgo diné łaʼ bá haʼdoodzih, háálá díí Jériko kin haalʼáii áńjídlééh. Éí díí kin haalʼáhígíí bitłʼááh nástłʼiní nídzíztłʼingo hayeʼ alą́ąjįʼ yizhchínígíí hatsʼą́ą́ʼ dadootsaał, áádóó kin haalʼáii bidáńʼdítı̨́ı̨́h áńjiidlaago hayeʼ akéédę́ʼígíí hatsʼą́ą́ʼ dadootsaał.
27 Áko Bóhólníihii éí Jáshowa yił hólǫ́ǫ́ nítʼééʼ, áádóó éí kéyah biyiʼgóó tʼáá átʼéé nítʼééʼ bééhózínígo tádííyá.
