Joshua 7:1-26
7 Nidi Bóhólníihii bichʼįʼ nideetʼánígíí Ízrel dineʼé doo ákǫ́ǫ́ ádayííłʼįįd da; jó, Éíkan éí Kármii biyeʼ éí Zábdai biyeʼ éí Zíírah biyeʼ éí Júdah dineʼé jílı̨́įgo, díí Bóhólníihii bichʼįʼ nideetʼánígíí łaʼ nízhdiinilgo Bóhólníihii tsʼídá doo hashtʼéʼégóó Ízrel dineʼé yichʼįʼ báhóóchįįd.
2 Áko Jáshowa éí Jériko kin haalʼáádóó Éíʼai kin haalʼáajįʼ diné łaʼ dah dahizhdiiłʼaʼ; Éíʼai éí Bethʼéíven kin shijaaʼ bíighahgi Béthel haʼaʼaahjígo kin haalʼáhígóó dazdeesʼaʼgo ábizhdííniid, Nihílááh, kéyah hadaahsííd. Áko éí diné naalchiʼí danilı̨́įgo Éíʼaigóó eekaigo hadaʼíísid.
3 Áko Jáshowa yaa nákaigo ádeidííniid, Hániʼdii diné doo tʼáá átʼé ákǫ́ǫ́ dookah da, nidi diné naakidi mííl, doodaiiʼ táadi míilgoda ákǫ́ǫ́ dookahgo Éíʼai hoolyéhígíí yaa tiih dookah. Diné doo tʼáá átʼé naanish biih dooʼnił da, háálá tʼáá díkwíí ákwii kéédahatʼı̨́.
4 Ákohgo diné táadi mííl yiltʼéego daatsʼí ákǫ́ǫ́ dah diikai; nítʼééʼ Ízrel dineʼé éí Éíʼai dineʼé bitsʼą́ąjįʼ dazhdínéezhchą́ą́ʼ.
5 Áko Éíʼaidóó dineʼé tádiindóó baʼaan hastą́ą́h daatsʼí Ízrel dineʼé nideistseed, háálá kin haalʼáhígíí bidáńʼdítı̨́ı̨́hdóó Shébarim hoolyéegi tʼáá yaa nááʼáhíjįʼ baa deíjeehgo deiníłtseed. Áko diné baa nidahwiiskaadgo tʼáá íiyisí niseekai.
6 Ákohgo Jáshowa haʼééʼ ákʼinijooldláadgo Bóhólníihii bitsitsʼaaʼ dílzinii bidáahjįʼ tséʼyaa jishjoolgo hwee iʼííʼą́; hó áádóó Ízrel dineʼé aląąjįʼ naazíinii bił łeezh dibahí ákʼídajiilkaad.
7 Áko Jáshowa ázhdííniid, Bóhólníihii Diyin God nílíinii, dooládóʼ yówéé átʼée da. Haʼátʼíí biniyé díí dineʼé éí Jórdan tooh haʼnaa nííníʼeezhígíí Ámor dineʼé ádanihidoołdįįłgo baa nihidííníʼą́? Hániʼdii tʼáá Jórdan biláahdi kéédahoniitʼı̨́į dooleeł nítʼééʼ.
8 Bóhólníihii nílíinii, Ízrel dineʼé bidaʼanaʼí yitsʼą́ąjįʼ nídadíníchéehgo haʼátʼíí lá dishníi doo!
9 Háálá Kéínan dineʼé áádóó éí kéyahgi kéédahatʼíinii tʼáá ałtso díí yaa dahodidootsʼı̨́įłgo nihinídootʼihgo nihízhiʼ baa hodiyooʼnah, áko nishąʼ, éí haitʼéego nízhiʼ ayóó átʼéii íínísin doo?
10 Bóhólníihii éí Jáshowa áyidííniid, Nídiidááh, haʼátʼíishąʼ biniyé tséʼyaa shíníjool?
11 Ízrel dineʼé ádił daʼasiih áádóó shibee ahaʼdeetʼáanii bichʼįʼ bee haasdzíiʼgo bee hazʼánígíí kʼídeiztiʼ, áádóó ałdóʼ Bóhólníinii bichʼįʼ nideetʼáanii łaʼ deineezʼı̨́ı̨́ʼ, áádóó chʼaadeishchı̨́, índa dabiyoochʼíidgo dabinaalyeʼé bitahdi nideiznil.
12 Éí bąą Ízrel dineʼé bidaʼanaʼí doo yídaníłdzil da, nidi bidaʼanaʼí tʼóó yitsʼą́ąjįʼ nídadíníchééh, háálá ádooldįįłii dadzizlı̨́ı̨́ʼ. Áko doo nihił nááhonishdlǫ́ǫ da doo; tʼáá hazhóʼó ádadooldįįłgo nideetʼáanii nihitahdóó ádasoołdįįdgo tʼéiyá.
13 Nídiiʼnééh, díí diné diyingo ánílééh áádóó ábididííniił, Yiską́ągo biniyé tʼáá nihí doo nihąąh daachingóó diyingo ádadiʼdoołnííł, háálá Ízrel dineʼé biBóhólníihii Diyin God ání, Ízrel dineʼé danohłíinii, nihiníiʼgi Bóhólníihii bichʼįʼ nideetʼáanii łaʼ hólǫ́; éí bąą nihidaʼanaʼí doo bídanółdzilgo nidasoozı̨́į leʼ átʼée da; Bóhólníihii bichʼįʼ nideetʼáanii nihitahdóó nahgóó kódaahłaago tʼéiyá.
14 Éí bąą tʼah abínídą́ą́ʼ tʼááłáʼí dineʼé danohłíinii bikʼehgo ahidahidoohkaigo nidahidoohkah, áko Bóhólníihii éí dineʼé néidiinilígíí bitahdóó diné hadaʼáłchíní dah dajíʼéeshii bikʼehgo tʼáá hoł nidahidookah, áádóó tʼáá éí náábítahdóó łaʼ Bóhólníihii néidiinilígíí éí dabighandóóígíí bikʼehgo nihidookah, áko łaʼ hooghandóó Bóhólníihii néidiinilígíí éí diné tʼááłáʼí nítínígo nidahidookah.
15 Áko kótʼée doo: Bóhólníihii bichʼįʼ nideetʼáanii nízhdiinilii ahodiʼdoolkʼą́ą́ł áádóó hanaalyeʼé tʼáá ałtso bił hwiih hodidooʼnił, háálá Bóhólníihii bibee ahaʼdeetʼáanii bee hazʼánígíí kʼízhnítiʼ áádóó Ízrel dineʼé bitahgi doo hóshkał baa nijiyá.
16 Ákohgo tʼah abínídą́ą́ʼ Jáshowa nídiiʼnaʼgo Ízrel dabidineʼé bikʼehgo nijiizhʼeezh; nítʼééʼ Júdah dineʼé nídiiʼnil.
17 Áko Júdah dineʼé niyiizhʼeezh áádóó Zíírah baʼáłchíní néidiinil, áko Zíírah baʼáłchíní bitahdóó diné tʼááłáʼí nítínígo niyiizhʼeezh, áko Zábdai néidiiłtı̨́.
18 Áko Jáshowa éí Zíírah bighandóóígíí diné tʼááłáʼí nítínígo niyiizhʼeezh índa Éíkan éí Kármii biyeʼ éí Zábdai biyeʼ éí Zíírah biyeʼ éí Júdah dineʼé jílı̨́įgo néidiiłtı̨́.
19 Áko Jáshowa éí Éíkan áyidííniid, Shiyeʼ nílíinii, Ízrel biBóhólníihii Diyin God baa haʼniihgo éí bichʼįʼ ádaa hodíílnih. Tʼáadoo shitsʼąą naníłʼiní; íínítʼįįdígíí kʼad bee shił hólneʼ.
20 Áko Éíkan éí Jáshowa ánéidooʼniidgo ání, Tʼáá aaníí Ízrel dineʼé biBóhólníihii Diyin God bichʼįʼ ádił asésiih, áko díigi íítʼįįd.
21 Jériko dineʼé bindaalyeʼé bitahgi éénééz ayóó ánóolninii Bábilandę́ʼígíí áádóó béésh łigaii naakidi neeznádiin shékel* wolyéhígíí bíighahgo, índa óola éí shékel ashdladiin dah hidídloʼ bíighahgo yiiłtsą́ągo bidáníshnihgo tʼóó nídiinil. Jó, shiníbaal biyiʼ góneʼ łeeyiʼdi béésh łigaii atłʼáahdi sinilgo nídeesʼı̨́ı̨́ʼ.
22 Ákohgo Jáshowa éí nidaalʼaʼí dah dazhdiiłʼaʼgo níbaal siʼánígóó níjééʼ; nítʼééʼ haníbaal biyiʼ góneʼ béésh łigaii atłʼáahdi sinilgo nídeesʼı̨́ı̨́ʼ lá.
23 Áko níbaal biyiʼdóó chʼídeizhjaaʼ áádóó Jáshowa índa Ízrel dineʼé tʼáá ałtso bichʼįʼ nidajiizhjaaʼgo Bóhólníihii binááł niʼ nidadziiznil.
24 Áko Jáshowa áádóó Ízrel dineʼé tʼáá ałtso bił Zíírah binálí Éíkan éí béésh łigaii áádóó éénééz, óolada, hayeʼkéda, hatsiʼkéda, habéégashii áádóó hatélii índa hadibéda, áádóó haníbaal, índa hanaalyeʼé tʼáá ałtso nídeidiinilgo yíldzis Éíkor hoolyéhígi áłah ádayiilaa.
25 Áko Jáshowa ádííniid, Haʼátʼéegoshąʼ nihikʼijįʼ hwííníłchįįd? Díí jı̨́ Bóhólníihii nikʼijįʼ hodoołchįįł. Áko Ízrel dineʼé tʼáá ałtso tsé yee hoł nidadzisneʼ, áko tsé yee hoł nidadziyiisneʼdóó bikʼijįʼ adahodiyiiskʼą́ą́ʼ.
26 Áko éí tsé ayóó átʼéego hakʼi yáádayiitsigo díí jı̨́ı̨́góó ákótʼé. Índa Bóhólníihii tʼóó báhádzidgo báháchįʼí łahgo ánáyiidlaa. Éí bąą díí jı̨́įjįʼ éí hazʼą́ągi yíldzisii Éíkor hoosyeʼ.
Footnotes
^ Tádiindóó baʼaan ashdlaʼ shékel wolyéii éí tʼááłáʼí dah hidiidloh.
