Joshua 8:1-35
8 Bóhólníihii éí Jáshowa áyidííniid, Tʼáadoo nił yéʼí; tʼáadoo ádił nisindáhí; nídiidáahgo diné nidaabaahii tʼáá ałtso dah diiʼéeshgo nihílááh, Éíʼai kin haalʼáágóó dohkááh; jó, Éíʼai dineʼé áádóó aláahgo binanitʼaʼí áádóó bidineʼé áádóó bikin haalʼáhígíí índa bikéyah nihílákʼeidííʼą́.
2 Áko tʼáá Jériko kin haalʼáii áádóó aláahgo naatʼáanii ííníłʼįįdígi átʼéego Éíʼai kin haalʼáii áádóó aláahgo naatʼáanii ákónáádíídlííł. Nidi Éíʼai dineʼé bindaalyeʼé áádóó dabilı̨́ı̨́ʼ deidoołbįįłígíí tʼáá nihí ádá nídadidoohnił. Kin haalʼáhígíí bineʼdę́ęʼgo baa nidahidoohkah.
3 Áko Jáshowa dah diiyáago diné nidaabaahii tʼáá ałtso bił Éíʼai kin haalʼáágóó dashdiikai, áko Jáshowa éí diné ayóó átʼéego nidaabaahii tádiindi míilgo nízhdiinilgo tłʼéeʼgo adziisʼaʼ.
4 Áko bichʼįʼ hadzoodzíiʼgo ájíní, Jó, kin haalʼáhígíí bineʼdę́ęʼgo baa nihidoohkah. Kin haalʼáhídóó tʼáadoo nízaadgóó anáhjahí, nidi tʼáá ánółtso hashtʼeʼádadíínółzin dooleeł.
5 Áko shí áádóó diné tʼáá ałtso shił naakaígíí bił díí kin haalʼáhígíí bitʼááh diijah. Áko átséédą́ą́ʼ ádzaa yę́ęgi átʼéego éí nihichʼįʼ chʼíníjéeʼgo bitsʼą́ąjįʼ dadíníichééł.
6 Áko nihikééʼ nídidoojahgo kin haalʼáhídóó nízaadgóó bá iijéeʼgo ádadidooniił, Áłtséédą́ą́ʼ yę́ęgi átʼéego nihikʼee yóóʼadahizhneezhchą́ą́ʼ. Éí bąą bikʼee yóóʼadiijah.
7 Áko baa nihinoohkaídóó nídidoohjahgo kin haalʼáhígíí dadoołnééł, háálá Bóhólníihii nihiDiyin God éí nihaididooʼááł.
8 Áko kótʼée doo: kin haalʼáhígíí dasoołnáago biih dahodidoohnił; Bóhólníihii nihichʼįʼ yee haadzíiʼii bikʼehgo ídaʼdoohłííł. Jó, ákótʼéego nihichʼįʼ bee haasdzíiʼ niʼ.
9 Áko Jáshowa éí adahwiisʼaʼgo aa nihizhdookahgóó ajookai; éí Béthel kin shijaaʼígíí áádóó Éíʼai kin haalʼáhígíí bitaʼgi Éíʼai eʼeʼaahjígo aa nijiyeekai. Nidi tʼáá éí bitłʼééʼ Jáshowa éí Ízrel dineʼé bitahdi biiską́.
10 Áko tʼah abínídą́ą́ʼ Jáshowa nízhdiiʼnaʼgo diné dadeezbaaʼígíí hadzíísid áádóó Ízrel dineʼé yiląąjįʼ naazíinii bił alą́ąjįʼ Éíʼai kin haalʼáágóó dashdiikai.
11 Áko diné nidaabaahii tʼáá ałtso hoł naakai nítʼéʼígíí hoł dah diikaigo kin haalʼáhígíí bichʼįʼ tʼáá áyídíjįʼ nijíkai índa Éíʼai náhookǫsjígo nizhníná, áko Éíʼai kin haalʼáii bił hataʼgi bokooh lá.
12 Áko ashdladi mííl diné nízhdiinilgo Béthel kin shijaaʼígíí áádóó Éíʼai kin haalʼáhígíí bitaʼgi Éíʼai eʼeʼaahjígo aa héeshjéeʼgo ájiilaa.
13 Áko kin haalʼáhígíí náhookǫsjígo diné nidaabaahii tʼáá ałtso áádóó eʼeʼaahjígo diné aa héeshjéʼígíí ninínáago Jáshowa tʼáá éí bitłʼééʼ yíldzisdi biiską́.
14 Áko Éíʼai dineʼé aláahgo binanitʼaʼí díí yiyiiłtsą́ągo kin haalʼáhídóó dineʼé tʼáá ałtso tʼah abínídą́ą́ʼ tsı̨́įłgo nídiijééʼ; bí índa bidineʼé tʼáá bee nihootʼą́ą́ góneʼ honíteelgi Ízrel dineʼé bidááshníjéeʼgo anaaʼ dahodzisłı̨́ı̨́ʼ, nidi kin haalʼáhígíí bineʼdę́ęʼgo baa neheekaígíí doo bił bééhózin da.
15 Áko Jáshowa áádóó Ízrel dineʼé tʼáá ałtso hakʼeh hodeesdlı̨́ı̨́ʼ ádahozhdilʼı̨́įgo dabinááł nídazhdíníchéehgo honoojíijigo ajííjééʼ.
16 Ákohgo kin haalʼáá góneʼ diné kéédahatʼínígíí tʼáá ałtso hágo bidooʼniidgo hakééʼ dah diijééʼ, áko Jáshowa yikééʼ ííjéeʼgo kin haalʼáádóó nízaadgóó yitsʼáníjééʼ.
17 Éíʼai kin haalʼáagi áádóó Béthel kin shijaaʼígi doo nidaagháhí da; éí tʼáá ałtso Ízrel dineʼé yikééʼ ííjééʼ, áko kin haalʼáhígíí tʼáá ąą átʼéego ádayiilaago Ízrel dineʼé yikééʼ ííjééʼ.
18 Ákohgo Bóhólníihii éí Jáshowa áyidííniid, Tsiidétáán dah yítı̨́łígíí Éíʼai kin haalʼáii bichʼįʼgo bił dah didiilnííh, háálá éí nílákʼee dideeshʼááł áádóó Jáshowa éí tsiidétáán neitinígíí kin haalʼáhígíí yichʼįʼgo yił dah didiilniiʼ.
19 Áko aa héeshjéeʼgo naháaztánídóó tsı̨́įłgo nídiijééʼ. Jáshowa tʼáá dah didiilniiʼgóó tʼáá áko dah diijéeʼgo kin haalʼáá góneʼ ííjééʼ áádóó éí deisnáago kin haalʼáhígíí tsı̨́įłgo yiih dahodeeznil.
20 Ákohgo Éíʼai dineʼé tʼą́ą́ʼ nídadéétʼı̨́ı̨́ʼ nítʼééʼ; jó, kin haalʼáhídóó łid yá biyiʼ góde hááyá, áko tʼáá háajigoda dah didoojahígi doo bíighah da silı̨́ı̨́ʼ, háálá Ízrel dineʼé honoojíígóó danéechéhígíí hachʼįʼ tʼą́ą́ʼ naanázhjééʼ.
21 Áko Jáshowa áádóó Ízrel dineʼé tʼáá ałtso éí aa nidahaaskaígíí kin haalʼáii deisnáago łid hááyáhígíí dayiiłtsą́ągo Éíʼai dineʼé yichʼįʼ tʼą́ą́ʼ naanázhjéeʼgo nideistseed.
22 Áko Ízrel dineʼé łaʼígíí kin haalʼáhídóó éí yichʼįʼ chʼíníjééʼ, ákohgo Éíʼai dineʼé éí Ízrel dineʼé bitaʼgi tsístłʼaaskai, áko Ízrel dineʼé ałtsʼą́ą́hjí niníjéeʼgo ałtso nidahastseed; łáʼí nidi doo łaʼ joodzíiʼ da, índa doo łaʼ yisdájííyáhí da.
23 Nidi Éíʼai dineʼé aláahgo binanitʼaʼí nilíinii deisnáago Jáshowa yaa deizlóóz.
24 Áádóó ákódzaago Ízrel dineʼé éí Éíʼaigi kéédahatʼíinii honoojíígóó hakééʼ yóóʼííjéʼígíí tʼáá ałtso nideistseedgo Éíʼai dineʼé tsʼídá ałtso diltłish yee dayííghą́ą́ʼ, áko Ízrel dineʼé éí tʼáá ałtso Éíʼaijįʼ tʼą́ą́ʼ nákai; áadi ałdóʼ diltłish yee nideistseed.
25 Áko éí bijı̨́ diné áádóó asdzání danilíinii tʼáá ałtso daneeznánígíí naakitsʼáadahdi mííl ánéelą́ą́ʼ lá; éí tʼáá ałtso Éíʼai dineʼé danilı̨́ı̨́ nítʼééʼ.
26 Háálá Jáshowa éí tʼáadoo tʼą́ą́ʼ anídílníhí tsiidétáán tʼáá yił dah doolnihgo Éíʼaigi kéédahatʼíinii ałtso ádeisdįįdjįʼ yił dah doolnih nítʼééʼ.
27 Tʼáá hazhóʼó éí kin haalʼáhídóó dabilı̨́ı̨́ʼ áádóó bindaalyeʼé éí Ízrel dineʼé dayoosbą́ągo tʼáá bí ádá nídeidiiʼnil; Bóhólníihii bizaad kʼehgo Jáshowa yichʼįʼ yee haadzíiʼii ádayiilaa.
28 Áko Jáshowa éí Éíʼai kin haalʼáhígíí iidííłkʼą́ą́ʼ áádóó éí hoolʼáágóó ałkʼi yanáaʼáago yíchxǫʼgo éí díísh jı̨́ı̨́góó ákótʼé.
29 Áádóó Éíʼai dineʼé aláahgo binanitʼaʼí yę́ę tsin bąąh dah hizhdiiloʼgo tʼáá yąąh dahidíłtı̨́įgo iʼííʼą́, áko jı̨́honaaʼéí ííyáago Jáshowa áníinii bikʼehgo éí aláahgo naatʼáanii bitsʼíís éí tsin bąąhdę́ę́ʼ nidaʼiidiiłtı̨́įgo kin haalʼáhígíí bichʼéʼétiinjįʼ adayiisxan áádóó ayóó átʼéego tsé éí yikʼi yáádayiitsi; éí díí jı̨́įjįʼ ákótʼé.
Dził Ííbal siʼánídi bee hazʼáanii bee akʼeʼashchı̨́ (Deut. 27:1-26)
30 Áko Jáshowa éí Ízrel dineʼé biBóhólníihii Diyin God bá Dził Ííbal siʼánídi bikááʼ nááʼiiniihí ájiilaa.
31 Mózes éí Bóhólníihii yá naalʼaʼí nilíinii Ízrel dineʼé yichʼįʼ yee haadzííʼ yę́ęgi átʼéego íʼjiilaa; tʼáá Mózes bibee hazʼáanii biyiʼ naaltsoos bikʼeʼashchínígi átʼéego tsé hadaałtʼéii diné doo łaʼ béésh yee néidííłneʼii bee bikááʼ nááʼiiniihí ájiilaago bikáaʼgi didlidgo náádahaniihii éí Bóhólníihii bichʼįʼ náádajiiłniih nítʼééʼ, índa hózhǫ́ǫ́jí nááhániihii ałdóʼ náádadziisniiʼ.
32 Áko ákwii Mózes bibee hazʼáanii tsé bikáaʼgi bee akʼeʼjishchı̨́; éí Ízrel dineʼé dabinááł bee akʼeʼashchı̨́įgo ájiilaa.
33 Áko Ízrel dineʼé tʼáá ałtso áádóó éí aląąjįʼ naazíinii áádóó naatʼáanii danilíinii índa biʼándahwiiʼaahii éí Líívai dineʼé náádaʼiiłniihii danilínígíí Bóhólníihii bitsitsʼaaʼ dílzinii éí bee ahaʼdeetʼáanii biiʼ sinilii deíʼaahígíí ałnaashiijí naazı̨́; éí déʼéyóní danilíinii, Ízrel dineʼé tʼáá bił ałnííʼdóó Dził Gérazim bitsı̨́ı̨́dóó naazı̨́, índa nááʼáłnííʼdóó éí Dził Ííbal bitsı̨́ı̨́dóó nináádaasdzı̨́; tʼáá Mózes éí Bóhólníihii yá naalʼaʼí nilíinii yichʼįʼ yee haadzíiʼii bikʼehgo éí Ízrel dineʼé danilíinii yikʼidajidlíi doo.
34 Íídą́ą́ʼ Jáshowa éí bee hazʼáanii bitsʼą́ą́dóó saadígíí tʼáá ałtso jííłtaʼ; bee akʼihojidlí áádóó hóyéeʼgo á haʼiidziih bikʼehgo éí tʼáá ałtso naaltsoos biiʼ bee hazʼáanii bee akʼeʼashchı̨́.
35 Mózes saad yee haadzíiʼii tʼáadoo doodaí tʼáá átʼé Ízrel dineʼé áłah nilínígíí tʼáá ałtso binááł Jáshowa saad jííłtaʼ; éí asdzánída áádóó áłchíní tʼáá ádaałtsʼíísíjįʼ índa déʼéyóní danilíinii hatahgóó kéédahatʼínígíí daʼíistsʼą́ą́ʼ nítʼééʼ.
