Joshua 9:1-27
9 Áko aláahgo naatʼáanii danilíinii tʼáá ałtso Jórdan tooh biláahdi dah daaskʼidgóó áádóó deíldzisgóó índa Dził Lébanan bichʼįʼgo ayóó átʼé tónteel siyínígíí bibąąhgóó kéédahatʼíinii éí Het dineʼé, Ámor dineʼé, Kéínan dineʼé, Píírez dineʼé, Háíva dineʼé índa Jííbas dineʼé díí yaa dahodiiztsʼą́ąʼgo
2 tʼááłáhíjįʼ áłah silı̨́ı̨́ʼ; Jáshowa áádóó Ízrel dineʼé yikʼiidoojah yiniyé łáʼí daazlı̨́ı̨́ʼ.
3 Nidi Gíbiyangi kéédahatʼíinii éí Jériko kin haalʼáagi áádóó Éíʼai kin haalʼáagi Jáshowa áátʼįįdígíí yaa dahodiiztsʼą́ąʼgo
4 bindaʼadloʼgo diné á yádaałtiʼgo aląąjįʼ naazíinii nahalingo tʼóó ádahodilʼı̨́įgo dah dadiikai. Azis dadiizhaazhii áádóó tó abid wáin bee naagéhígíí dadiizhaazhii índa nidahaaztʼóodgo bidanídaʼdeestʼáanii éí dabitélii yéédayíiztłʼin.
5 Áádóó ké dadiizhaazhii bidanídaʼdeestʼáanii yiih daazʼeez áádóó ééʼ dadiizhaazhii yiih daaskai. Áko bááh tʼáá ałtso dayiyííłkiinígíí daazgango dláád daazlı̨́ı̨́ʼ.
6 Áko Gílgaldi dah oonéłígóó yíkaigo Jáshowa áádóó Ízrel dineʼé ádeidííniid, Kéyah doo deeghánídę́ę́ʼ niikai, áko kʼad bee ahaʼdeetʼáanii bee nihił ahadadiʼdiitʼááł.
7 Nidi Ízrel dineʼé éí Háíva dineʼé ádeidííniid, Tʼáá nihitahgi kéédahohtʼı̨́įgo haʼátʼéegoshąʼ bee ahaʼdeetʼáanii bee nihił ahadadiʼdiitʼááł?
8 Nítʼééʼ Jáshowa ádeidííniid, Ninaalʼaʼí daniidlı̨́. Áko Jáshowa áhodííniid, Háishąʼ ádaahtʼı̨́? Háádę́ęʼshąʼ nidaahkaigo ádaahtʼı̨́?
9 Áko ádahodííniid, Kéyah doo deeghánídę́ę́ʼ ninaalʼaʼí yíkai, háálá Bóhólníihii niDiyin God bízhiʼ bee chʼíbiditʼááh, áádóó Ííjip kéyahdi áátʼįįdígíí tʼáá átʼé baa dahosidiitsʼą́ą́ʼ.
10 Áádóó Ámor dineʼé aláahgo binanitʼaʼí nidiltʼéego Jórdan tooh biláahdi Héshban kin haalʼáádóó aláahgo naatʼáanii Sáíhan wolyéii índa Béíshan kéyahdóó aláahgo naatʼáanii Ag wolyéii, éí Áshtarath kin haalʼáagi bighanígíí áyííłʼįįdii tʼáá átʼé baa dahosidiitsʼą́ą́ʼ.
11 Áko nihá aląąjįʼ naazíinii índa nihikéyahgóó kéédahatʼíinii tʼáá ałtso ádanihidííniid, Bikiin wohkah dooígíí łaʼ nídadoohníiłgo bidááh nohkáahgo ádabididoohniił, Ninaalʼaʼí daniidlı̨́. Kʼad bee ahaʼdeetʼáanii bee nihił ahadadiʼdiitʼááł.
12 Kǫ́ǫ́ nihibááh tʼáá sidogo nihighandóó chʼídashiijaaʼígíí danihistʼeʼgo deíníikáahgo nihaa niikai, nidi kʼad shoo, daazgango dláád daazlı̨́ı̨́ʼ lá.
13 Díí tó abid wáin bee naagéhígíí ádaaniidígo wáin biiʼ hadadeelbįįd nítʼééʼ, shoo, nidahaazdláád, índa doo deeghánídę́ę́ʼ niikaígíí bąą nihiʼééʼ áádóó nihikeeʼda ałdóʼ dadiizhaazh lá.
14 Áko Ízrel dineʼé éí diné bistʼeʼ łaʼ nídeidiinil, áádóó tʼáadoo Bóhólníihii nídeídíłkidí nídeidiinil.
15 Áádóó Jáshowa éí bił kʼé hólǫ́ǫgo diné bił ahaʼdazdeestʼą́ągo bíniʼdii dahináa doo, áko dah oonéłígíí bindanitʼaʼí hachʼįʼ ádee hadadeesdzííʼ.
16 Bee ahaʼdeetʼáanii bił ádajiilaadóó bikʼijįʼ tááʼ yiską́ągo tʼáá hoł kéédahatʼíinii danilı̨́įgo índa hatahgóó kéédahatʼı̨́įgo baa dahozdiiztsʼą́ą́ʼ.
17 Áko Ízrel dineʼé dah dadiináádóó tááʼ yiską́ągo Gíbiyan dineʼé bikin hadaasʼáadi níná. Nítʼééʼ bikin hadaasʼáhígíí éí Gíbiyan áádóó Kiifáírah áádóó Biyérath índa Kírjath-jíyarim dahoolyé.
18 Nidi Ízrel dineʼé danilíinii éí Gíbiyan dineʼé tʼáadoo nideistseed da, háálá Ízrel dineʼé dah yinéłígíí bindanitʼaʼí éí Ízrel dineʼé biBóhólníihii Diyin God binahjįʼ yichʼįʼ ádee hadadeesdzííʼ. Ákohgo dah oonéłígíí tʼáá ałtso saad dahółǫ́ǫgo bindanitʼaʼí yikʼídahaʼááh.
19 Nidi bindanitʼaʼí tʼáá ałtso éí dah oonéłígíí ádeidííniid, Ízrel dineʼé biBóhólníihii Diyin God biniitʼaa bichʼįʼ bee ádee hadadeedzííʼ; éí bąą kʼad doo baa nídadíitʼįįł da.
20 Díí kódadiilníiłgo bíniʼ dahináa doo, doodaiiʼ bee atíʼélʼíinii nihikʼijįʼ dooleeł, háálá bee ahaʼdeetʼáanii bee bichʼįʼ ádee hadadeedzííʼ.
21 Áko hondanitʼaʼí ádahodííniid, Bíniʼ dahiná. Ákohgo Ízrel dineʼé dah yinéłígíí yá chizh ahideidiłkaałí áádóó tó yá nideikáhí daazlı̨́ı̨́ʼ; naatʼáanii ádabidííniidígi ádaadzaa.
22 Áko Jáshowa éí Gíbiyan dineʼé hágo yidííniidgo ííłní, Tʼáá nihitahgi kéédahohtʼı̨́įgo, Nízaadę́ę́ʼ neiikai, dadohníigo haʼátʼíísh biniyé nihindaʼsooloʼ?
23 Éí bąą kʼad hóyéeʼgo nihá hadaʼiisdzííʼ índa tʼáá áłahjįʼ naalteʼ danohłı̨́į dooleeł. ShiDiyin God bikin bá chizh ahideidiłkaałígíí áádóó tó nideikáhígíí danohłı̨́į dooleeł.
24 Nítʼééʼ Jáshowa áńdeidooʼniid, Ninaalʼaʼí daniidlíinii tʼáá aaníígóó nihił dahóoneʼ; Bóhólníihii niDiyin God nilíinii binaalʼaʼí Mózes éí kéyah tʼáá átʼé nihaididooʼáałgo éí kéyahgi kéédahatʼíinii tʼáá ałtso tʼáá nihilą́ąjįʼ íidoołdįįłgo yichʼįʼ yee haadzííʼ. Éí bąą ádanihidoołdįįłgi bikʼee tʼáá íiyisí nihił daayéeʼgo nihiniinaa ákódeiitʼįįd.
25 Áko kʼad, shoo, nihee ádídahwíínółnííh. Tʼáá ni nínízinígi átʼéego nił yáʼátʼééh góneʼ áádóó nił tʼáá ákwii átʼéé góneʼ ánihílééh.
26 Áko ádaanínígíí bá biʼjiilaa áádóó Ízrel dineʼé bílákʼeedóó yisdájíínilgo Ízrel dineʼé tʼáadoo nidahastseed da.
27 Áádóó tʼáá éí bijı̨́ı̨́dą́ą́ʼ Jáshowa éí dah oonéłígíí bá índa Bóhólníihii bibikááʼ nááʼiiniihí bá chizh ahideidiłkaałígíí áádóó tó neikáhí danilı̨́įgo ádajiilaa; díí jı̨́įjįʼ Bóhólníihii náhodidooʼáałgi tʼáá ákótʼé.
