Judges 1:1-36
1 Jáshowa daaztsą́ą́dóó bikʼijįʼ Ízrel dineʼé éí Bóhólníihii nideídééłkidgo ádaaní, Háishąʼ nihá alą́ąjįʼ Kéínan dineʼé yichʼįʼ anaaʼ ádahodoolíiłgo yił daʼahidoogą́ą́ł?
2 Bóhólníihii ádííniid, Júdah dineʼé anaaʼ ádahodoolííł; jó, éí kéyah bílákʼedííʼą́.
3 Áko Júdah dineʼé éí hakʼis Símiyan dineʼé ádabizhdííniid, Haaʼíshąʼ kéyah nihaa deetʼánígíí bichʼįʼ nihił doohkahgo Kéínan dineʼé bił daʼahidiigą́ą́ł. Índa nihí ałdóʼ tʼáá ákótʼéego kéyah nihaa deetʼánígíí bichʼįʼ nihił dadiibah. Áko Símiyan dineʼé hodiikaigo hoł dah diikai.
4 Áádóó Júdah dineʼé dashdiiná, áko Bóhólníihii éí Kéínan dineʼé índa Píírez dineʼé hálákʼeidííʼą́ągo Bíízek kin haalʼáagi neeznáadi mííl nidadzistseed.
5 Áádóó Bíízek kin haalʼáhígi Adónai-bíízek wolyéii bikʼídazneeztą́ąʼgo bił daʼahijoogą́ą́ʼ, áko Kéínan dineʼé índa Píírez dineʼé bitsʼą́ą́ʼ nidzistseed.
6 Nidi Adónai-bíízek éí dah díníichą́ą́ʼ, áko yikééʼ nídiijéeʼgo yił dadeezdéél, índa bílátsoh áádóó bikétsoh yitsʼą́ą́ʼ dayiizhgizh.
7 Adónai-bíízek ání, Tsostsʼidiingo aláahgo naatʼáanii bílátsoh índa bikétsoh dahágizh; éí shibikááʼ adání bikááʼdę́ę́ʼ chʼiyáán hadahineezdeeʼígíí deiyą́ą́ nítʼééʼ. Ákódeishłaaígi átʼéego Diyin God kʼééshidiidlaa. Áko Jerúsalem kin haalʼáágóó dahazyı̨́įgo áadi dadziztsą́.
Júdah dineʼé éí Jerúsalem dineʼé áádóó Hííbran dineʼé deisná
8 Áádóó Júdah dineʼé éí Jerúsalem dineʼé yikʼiijéeʼgo deisná índa diltłish yee ałtso nideistseedgo kin haalʼáii yiih dahodeeznil.
9 Éí bikʼijįʼ Júdah dineʼé éí Kéínan dineʼé dził bąąhgóó áádóó shádiʼááhjí hazʼánígóó índa halgaijigo kéédahatʼínígíí yikʼiijééʼ.
10 Áádóó Júdah dineʼé éí Kéínan dineʼé Hííbran kin haalʼáagi kéédahatʼínígíí yikʼiijéeʼgo deisná; (Hííbran hoolyéhígi átséédą́ą́ʼ Kírjath-árba hoolyéé nítʼééʼ); áadi Shííshai áádóó Aháíman índa Tálmai nideistseed.
Áthniyel éí Dííber kin haalʼáii yisná áádóó Áksa hweʼasdzą́ą́ silı̨́ı̨́ʼ (Josh. 15:15-19)
11 Áádóó dah náádiikaigo Dííber kin haalʼáagi kéédahatʼíinii yikʼiijéeʼgo deisná. (Dííber hoolyéegi átséédą́ą́ʼ Kírjath-síífer hoolyéé nítʼééʼ.)
12 Áko Kéíleb ání, Tʼáá háiida Kírjath-síífer baatįįh jííyáago bikʼeh dzideesdlı̨́ʼígíí éí shitsiʼ Áksa hweʼasdzą́ą doo biniyé haa deeshtééł.
13 Áko Kéíleb bitsilí Kíínez biyeʼ Áthniyel wolyéii éí akʼeh deesdlı̨́įʼgo Kéíleb bitsiʼ Áksa éí Áthniyel beʼasdzą́ą dooleełgo yeiníłtı̨́.
14 Ákódzaago Áksa éí Áthniyel bił ahizhdiiʼáazhgo níjookąąhgo ábijiní, Shizhéʼé kéyah łaʼ bíídííkił. Áádóó Áksa éí hatélii bikʼi nijííyáago Kéíleb áhodííniid, Haʼátʼíí lá haniná?
15 Áko ábizhdííniid, Shikʼijiinídliih; jó, shádiʼááhjí kéyah hóółtseii shaa dííníʼą́; kéyah tó hadaazlı̨́įgi ałdóʼ łahgo shaa nááhodidííʼááł. Áko Kéíleb éí wódahdi áádóó wóyahdi tó hadaazlı̨́ı̨́góóígíí haidiníʼą́.
Áhoníłtéelgo Júdah dineʼé áádóó Bénjamin dineʼé naazbaaʼígíí
16 Mózes yaadaaní nilíní baʼáłchíní, Kííni dineʼé jílíinii, éí Mózes haadaaní nilı̨́ı̨́ nítʼéeʼgo haʼáłchíní ahoolchíiłii, éí tsin páam kin haalʼá hoolyéhídóó dashdiináago Éírad kin haalʼáii shádiʼááhjígo Júdah honoojíidi Júdah dineʼé bił jíkaigo áadi bił kéédahojitʼı̨́ı̨́ nítʼééʼ.
17 Júdah dineʼé éí bikʼis Símiyan dineʼé yił dah diináago Kéínan dineʼé Zíífath kin haalʼáadi kéédahatʼínígíí nideistseedgo ałtso ádeisdįįd. Áko éí kin haalʼáii Hórmah hoolyée doo, dadííniid.
18 Júdah dineʼé éí Géíza kin haalʼáii bikéyah tʼáá bił áádóó Áshkelan kin haalʼáii bikéyah tʼáá bił índa Ékran kin haalʼáii bikéyah tʼáá bił ałdóʼ deisná.
19 Júdah dineʼé éí Bóhólníihii bił hólǫ́ǫgo dziłgo nahazʼánígóó kéédahatʼíinii chʼídeineeskaad, nidi halgaigóó kéédahatʼíinii tʼáadoo chʼídeineeskaad da, háálá tsindaabąąs bijáád naakiígíí béésh nitłʼizii bee ádaalyaii bee bitsʼádahazyééʼ.
20 Áko Hííbran kin haalʼáii éí Kéíleb yaa deideezʼą́; Mózes ádííniidígi ídaʼiilaa. Éínak biyeʼké táltʼéego baa chʼíníjééʼ.
21 Nidi Bénjamin dineʼé éí Jííbas dineʼé Jerúsalemgi kéédahatʼínígíí tʼáadoo baa chʼídahaazhjéeʼ da. Jííbas dineʼé éí Bénjamin dineʼé Jerúsalem kin haalʼáagi tʼahdii díí jı̨́ı̨́góó ahił kéédahatʼı̨́.
Jóseph dineʼé éí Béthel kin haalʼáii deisná
22 Áko Jóseph dineʼé ałdóʼ Béthel kin haalʼáii baatįįh jookai; jó, Bóhólníihii hoł hólǫ́ǫgo ákódaʼjiilaa.
23 Jóseph dineʼé bitsʼą́ą́dóó naalchiʼí Béthel kin haalʼáágóó adayiisʼaʼ; éí ákwii átséédą́ą́ʼ Luz hoolyéé nítʼééʼ.
24 Áko naalchiʼí éí kin haalʼáhídóó diné łaʼ chʼíníyáago dayiiłtsą́ągo ádeidííniid, Nihił hólneʼ, baa nídaniikąąh, kintah góneʼ yah eʼetiinígi nihił ííshją́ą́ áhólééh, áko naa aʼááh daniidzin doo.
25 Áko kintah góneʼ yah eʼetiinígíí hachʼįʼ ííshjání áyiilaago kin haalʼáagi kéédahatʼíinii diltłish bee nidadzistseed, nidi diné hoł hoolneʼígíí índa baʼáłchíní éí tʼáá ałtso tʼóó bidaʼjiisʼniiʼ.
26 Áádóó éí diné dah diináago Het dineʼé bikéyahgóó ííná; áadi kin haalʼáago áhoolaago Luz hoolyée doo, dííniid; díí jı̨́ı̨́góó ákóhoolyé.
Manáseh dineʼé áádóó Íífreiyim dineʼé haa honíłtéelgo kéyah deisná
27 Manáseh dineʼé ałdóʼ díí kin hadaasʼáágóó índa binaagóó kin dah naazhjaaʼígi kéédahatʼínígíí tʼáadoo chʼídahizneeskaad da; éí kódahoolyéego kin hadaasʼá: Beth-shíyan, Téíyanak, Dóor, Íbliyam índa Megído dahoolyé, nidi Kéínan dineʼé éí tʼáá ákǫ́ǫ́ kéédahatʼı̨́.
28 Ákódzaago Ízrel dineʼé bidziil daazlı̨́įʼgo Kéínan dineʼé bá nidaalnishgo ádayiilaa, áko tʼáadoo ałtso chʼídeineeskaad da.
29 Íífreiyim dineʼé ałdóʼ Kéínan dineʼé Gíízer kin haalʼáagi kéédahatʼínígíí tʼáadoo chʼídeineeskaad da, nidi Kéínan dineʼé éí tʼáá Gíízergi hatahgóó kéédahatʼı̨́.
Dadineʼé łaʼígíí éí haa honíłtéelgo kéyah deisná
30 Zébyulan dineʼé ałdóʼ Kítran kin shijaaʼgi índa Néíhalal kin shijaaʼgi kéédahatʼínígíí tʼáadoo chʼídeineeskaad da, nidi Kéínan dineʼé tʼáá ákǫ́ǫ́ hatahgóó kéédahatʼı̨́įgo hanaalteʼ ádajiilaa.
31 Ásher dineʼé ałdóʼ éí díí kin hadaasʼáhígi kéédahatʼínígíí tʼáadoo chʼídeineeskaad da; éí kódahoolyéego kin hadaasʼá: Éko, Sáídan, Álab, Ákzib, Hélba índa Rííhob dahoolyé.
32 Nidi Ásher dineʼé éí Kéínan dineʼé yitahgóó kéédahatʼı̨́, háálá éí kéyahdóó tʼáadoo chʼídeineeskaad da.
33 Náftalai dineʼé ałdóʼ Beth-shíímesh kin haalʼáagi áádóó Beth-éínath kin haalʼáagi kéédahatʼíinii tʼáadoo chʼídahizneeskaad da, nidi Kéínan dineʼé bitahgóó éí kéyahgi bił kéédahojitʼı̨́. Azhą́ ákótʼée nidi Beth-shíímesh kin haalʼáagi áádóó Beth-éínath kin haalʼáagi kéédahatʼíinii handaalteʼ danilı̨́įgo ádajiilaa.
34 Ámor dineʼé tʼáá bizááká Dan dineʼé dziłghą́ą́ʼgóó anídeiniłkaʼgo halgaijįʼ dadookahgo doo yadaʼdiʼaah da.
35 Nidi Ámor dineʼé éí Dził Hérezdi Éíjalan kin haalʼáagi índa Sheiyálbim kin shijaaʼgi kéédahatʼı̨́; ákótʼée nidi Jóseph dineʼé hakʼeh deesdlı̨́įʼgo binaalteʼ dajílı̨́įgo ádahoolaa.
36 Áko Ámor dineʼé bikéyah bá hoodzooígíí éí Akrábim báhátis áádóó tsékooh hoolyéédóó náhookǫsjigo hoodzo.
