Judges 10:1-18
10 Abímelek abíyííłką́ą́dóó bikʼijįʼ Ízrel dineʼé yichʼą́ą́h naabaahii éí Ísakar bitsʼą́ą́dóó oochíiłii Dódo biyeʼ Púwa éí náábiyeʼ Tóla wolyé. Shéímer kin shijaaʼgi Dził Íífreiyimgi kééhojitʼı̨́.
2 Áko naadiin tááʼ nááhaijįʼ Ízrel dineʼé bá nihozhdiyiiʼaah nítʼééʼ. Ákohgo dadziztsą́ągo Shéímer kin shijaaʼgi yóóʼáhoʼdiilyaa.
3 Ahóyííłką́ą́dóó bikʼijįʼ Jéíyer éí Gíliyad dineʼé nilı̨́įgo naadiin naaki nááhaijįʼ Ízrel dineʼé bá nihozhdiyiiʼaah nítʼééʼ.
4 Áko hayeʼké tádiin yiltʼéego télii ałdóʼ tádiin; éí tʼááłáʼí bikʼeh nítı̨́įgo nidabiyéé nítʼééʼ, índa Gíliyad kéyahgi tádiingo bikin hadaasʼá; éí díí jı̨́ı̨́góó Héívath-jéíyer hoolyé.
5 Áko Jéíyer dadziztsą́ągo Kéíman hoolyéedi yóóʼáhoʼdiilyaa.
Áman dineʼé éí Ízrel dineʼé yide ádahósin
6 Áko Ízrel dineʼé éí Bóhólníihii bichʼįʼ doo yáʼáshónígi ánáádáátʼįįdgo Béíyalda, Áshtarothda, áádóó Síriya dineʼé bidiyin dabidiʼníinii, Sáídan dineʼé bidiyin dabidiʼníinii, Móʼab dineʼé bidiyin dabidiʼníinii, Áman dineʼé bidiyin dabidiʼníinii índa Filístiya dineʼé bidiyin dabidiʼníinii yichʼįʼ nidahałáá nítʼééʼ. Áko Bóhólníihii éí doo deiniizı̨́ı̨́ʼgóó doo nidi yichʼįʼ nidahałáa da nítʼééʼ.
7 Áko Bóhólníihii éí Ízrel dineʼé yichʼįʼ báhóóchįįdgo tʼóó Filístiya dineʼé índa Áman dineʼé yílákʼee hodííʼą́.
8 Éí yihah góneʼ bikʼee Ízrel dineʼé chaał nidahoyiiníihgo áádóó yide ádahósin nítʼééʼ. Tseebíítsʼáadah nááhaijįʼ Ízrel dineʼé tʼáá ałtso yide ádahósingo Jórdan tooh biláahdi Gíliyad nahósʼaʼgi Ámor dineʼé bikéyahdi kéédahatʼı̨́ı̨́ nítʼééʼ.
9 Áko Áman dineʼé éí Jórdan tooh tséʼnaagóó Júdah áádóó Bénjamin índa Íífreiyim dineʼé yikʼijįʼ anaaʼ nídahałeeh nítʼééʼ, áko Ízrel dineʼé tʼáá íiyisí nisinákah nítʼééʼ.
10 Áko Ízrel dineʼé éí Bóhólníihii nídayookąąhgo ádaaní, Nichʼįʼ ádił nidaʼayeelzíiʼgo nihiDiyin God yóóʼadadeetʼą́ągo Béíyal bichʼįʼ nidahwiidláá nítʼééʼ.
11 Áko Bóhólníihii éí Ízrel dineʼé áyidííniid, Daʼ Ííjip dineʼé áádóó Ámor dineʼé áádóó Áman dineʼé índa Filístiya dineʼé bitsʼą́ąjįʼísh doo yisdánihíínil da?
12 Sáídan dineʼé áádóó Ámalek dineʼé índa Méíyana dineʼé nihide ádahósingo biniinaa nídashoohkąąhgo bitsʼą́ąjįʼ yisdánihíínil.
13 Ákondi yóóʼadashidooʼą́ągo diyin dabidiʼníinii bichʼįʼ nidahohłáá nítʼééʼ; éí bąą doo yisdánáánihideeshnił da.
14 Nílááh, diyin dabidiʼníinii nidadinooʼánígíí nídaohkąąh; achʼįʼ nahwiiʼná biih noodeeʼígíí hániʼdii bitsʼą́ąjįʼ yisdánihónííł.
15 Áko Ízrel dineʼé éí Bóhólníihii ádeidííniid, Tʼáá íiyisí ádił nidaʼayeelzííʼ; tʼáá nił yáʼátʼéhí góneʼ ánihílééh nidi díí jı̨́ yisdánihidííniłígíí baa nídaniikąąh.
16 Áko diyin dabidiʼníinii nahjįʼ kódayiilaago Bóhólníihii yichʼįʼ nidahasá, áádóó Ízrel dineʼé tiʼdahooníhígíí yaa nídzoozbaʼ.
17 Ákohgo Áman dineʼé éí siláo danilíinii yíká ádadííniidgo Gíliyad kéyahgi nidahaazná, índa Ízrel dineʼé ałdóʼ áłah silı̨́įʼgo Mízpeh kin haalʼáagi nidahaazná.
18 Áko diné danilíinii éí Gíliyad kéyahdóó aląąjįʼ naazíinii yił ahidiníłnáago ádaʼahidiʼní, Háí diné shı̨́įshąʼ Áman dineʼé bichʼįʼ anaaʼ áhojiléeh dooleeł? Áko éí Gíliyad kéyahgi kéédahatʼíinii tʼáá ałtso binazhnitʼáa doo.
