Judges 11:1-40
11 Jéfthah éí Gíliyad kéyahdóó diné jílı̨́įgo anaaʼ ííłʼíinii doo nánílyéesii jílı̨́, áádóó asdzání ałjiłnii biyáázh jílı̨́. Gíliyad éí Jéfthah bizhéʼé jílı̨́.
2 Áko Gíliyad hweʼasdzą́ą́ hayeʼ há niyiishchı̨́, índa hweʼasdzą́ą́ biyáázhké daneeyą́ągo Jéfthah chʼídeineeshchxą́ąʼgo ádeidííniid, Nihizhéʼé baʼáłchíní bitahdóó nihííʼ dadooleełígíí doo łaʼ nííʼ dooleeł da, háálá asdzání déʼéyóní nilíinii biyáázh nílı̨́.
3 Ákohgo Jéfthah éí hakʼisóó bitsʼąą yóóʼajoolwodgo Tob kéyahgi kééhojitʼı̨́ı̨́ nítʼééʼ índa diné doo yáʼádaatʼéehii Jéfthah yił ahínéikahgo yił naanáájah nítʼééʼ.
4 Éí ákweʼé hoolzhish yę́ędą́ą́ʼ Áman dineʼé éí Ízrel dineʼé yichʼįʼ anaaʼ dahasłı̨́ı̨́ʼ.
5 Áko Áman dineʼé éí Ízrel dineʼé yichʼįʼ anaaʼ ánáádahoodlaago Gíliyad kéyahdóó dineʼé aląąjįʼ naazíinii Tob kéyahdę́ę́ʼ Jéfthah yił nídadookah yiniyé eekai.
6 Áko Jéfthah ádeidííniid, Nihaa díínáałgo nihinanítʼáago Áman dineʼé bił daʼahidiigą́ą́ł.
7 Nidi Jéfthah éí Gíliyad kéyahdóó dineʼé aląąjįʼ naazíinii áyidííniid, Shą́ą́ʼ dashijiinohłáa niʼ, áádóó shizhéʼé bighandę́ę́ʼ chʼídashinoołchą́ąʼ niʼ. Haʼátʼíísh biniyé áłtʼąą nihichʼįʼ dahodiiznáaʼgo shaa noohkai?
8 Áko Gíliyad kéyahdóó diné aląąjįʼ naazíinii éí Jéfthah ádeidííniid, Kʼad nichʼįʼ nináániikai ni: Áman dineʼé bił daʼahidiigą́ą́ł biniyé bichʼįʼ nihił dadííbah. Áko Gíliyad kéyahgi kééhwiitʼíinii tʼáá áníiltso nihinanítʼáa doo.
9 Áádóó Jéfthah éí Gíliyadóó dineʼé aląąjįʼ naazíinii áyidííniid, Áman dineʼé bił daʼahidiigą́ą́ł biniyé hooghangóó shił nánoohkaigo índa Bóhólníihii shílákʼee hodííʼą́ągo, ákódzaagoósh tʼáá aaníí nihinanishtʼáa doo?
10 Áko Gíliyad kéyahdóó diné á naazíinii éí Jéfthah ádeidííniid, Bóhólníihii nihitaʼgi ooʼíinii nilı̨́įgo tʼáá aaníí tʼáá ádínínígi ádadiiʼnííł.
11 Ákohgo Jéfthah éí Gíliyadóó dineʼé aląąjįʼ naazíinii yił dah diikaigo bóhólníihgo nantʼáago ádayiilaa. Áko Bóhólníihii binááł Mízpeh kin haalʼáagi Jéfthah hazaad tʼáá átʼé bee yájííłtiʼ.
12 Áko Jéfthah éí Áman dineʼé aláahgo binanitʼaʼí bichʼįʼ naalʼaʼí adziisʼaʼgo ábizhdííniid, Haa dashohłéehgo shikéyah biiʼ hoł daʼahidiigą́ą́ł dashíínóhʼníigo shaatįįh wooná?
13 Áko Áman dineʼé binanitʼaʼí éí Jéfthah binaalʼaʼí áyidííniid, Jó, Ízrel dineʼé éí Ííjip kéyahdę́ę́ʼ nááʼnééł yę́ędą́ą́ʼ Árnan tooh nílínídóó Jábak tooh nílíníjįʼ índa Jórdan toohjįʼ shikéyah shighadeideestʼą́. Éí bąą kʼad éí kédaayahígíí hashtʼehodítʼé bił nihaa náhididííʼááł.
14 Áádóó Jéfthah éí Áman dineʼé aláahgo binanitʼaʼí bichʼįʼ naalʼaʼí anáádziisʼaʼgo
15 ábizhdííniid, Jéfthah ání, Ízrel dineʼé éí Móʼab kéyahígíí índa Áman dineʼé bikéyahígíí tʼáadoo bighadeitʼą́ą da,
16 nidi Ííjip kéyahdę́ę́ʼ chʼíníná yę́ędą́ą́ʼ honoojíígóó Tónteel Łichííʼ tséʼnaa niikaigo Kéídesh hazʼáníjįʼ yíkai.
17 Ákohgo Ízrel dineʼé éí Íídam dineʼé aláahgo binanitʼaʼí yichʼįʼ nidaalʼaʼí adayiisʼaʼgo ádaaní, Nikéyah biyiʼgóó chʼídiiʼnéełgo baa nídaniikąąh. Nidi Íídam dineʼé aláahgo binanitʼaʼí doo hwíistsʼą́ą da nítʼééʼ. Tʼáá ákótʼéego ałdóʼ Móʼab dineʼé aláahgo binanitʼaʼí yichʼįʼ anáádaʼasʼaʼ, nidi doo tʼáá kʼad haʼdiʼníʼą́ą da. Ákohgo Ízrel dineʼé éí tʼáá Kéídesh hazʼánígi dah yinééł nítʼééʼ.
18 Ákohgo honoojíígóó chʼíkaigo Íídam kéyah áádóó Móʼab kéyah yikʼeeʼąą ahénáʼná. Áádóó Móʼab kéyah haʼaʼaahjígo Árnan tooh nílíní wónaaníjígo niníná, nidi Móʼab kéyah tʼáadoo biih jíínáa da, háálá Árnan tooh nílíní éí Móʼab kéyah bee ałtsʼáhoodzo.
19 Áádóó Ízrel dineʼé éí Héshban kin haalʼáádóó aláahgo naatʼáanii Ámor dineʼé binanitʼaʼí Sáíhan yichʼįʼ naalʼaʼí adeisʼaʼ, áko Ízrel dineʼé ádahałní, Nihaʼdiʼníʼaah, tʼáá shǫǫdí nikéyah biyiʼgóó chʼídiiʼnéełgo nihikéyahjįʼ nidiiʼnééł.
20 Nidi Sáíhan éí hakéyah bibąąhgóó Ízrel dineʼé chʼídoonéłígíí doo beijólíi da, nidi hadineʼé áłah ájiilaago Jéíhaz kin haalʼáagi nizhnínáago Ízrel dineʼé bił daʼahijoogą́ą́ʼ.
21 Áko Ízrel dineʼé biBóhólníihii Diyin God éí Sáíhan áádóó bidineʼé tʼáá ałtso Ízrel dineʼé yílákʼeidííʼą́ągo hakʼeh dadeesdlı̨́ı̨́ʼ. Áko Ámor dineʼé bikéyah tʼáá átʼé Ízrel dineʼé bííʼ daazlı̨́ı̨́ʼ.
22 Áko Ámor dineʼé bił hazʼáanii Árnan tooh nílíní áádóó Jábak tooh nílíní bitaʼgi índa honoojíídóó Jórdan toohjįʼ tʼáá átʼé bííʼ daazlı̨́ı̨́ʼ.
23 Áko Ízrel dineʼé biBóhólníihii Diyin God éí bidineʼé Ízrel wolyéii binááł Ámor dineʼé bikéyahdóó Ámor dineʼé nahjįʼ hainííłkaadgo, ákoósh éí kéyah danihííʼ dooleeł?
24 Daʼ doósh nihidiyin bidiʼníinii Kíímash wolyéii nihaa yiiníłígíí tʼéí nihííʼ nidahaleeh da? Tʼáá ákótʼéego nihí Bóhólníihii nihiDiyin God nihinááł kéyah bitsʼą́ąjįʼ chʼíhoniiłkaadígíí éí nihííʼ nidahaleeh doo.
25 Daʼ Zípor biyeʼ Béílak Móʼab dineʼé aláahgo binanitʼaʼí biláahgoósh yáʼádanohtʼééh? Daʼ łahgoósh Ízrel dineʼé yichʼįʼ anaʼndzin, doodaiiʼ daatsʼí łahgo yił ałkʼi néijah?
26 Ízrel dineʼé éí Héshban kin haalʼáii binaagóó kin dah naazhjaaʼígíí tʼáá bił, áádóó Aróʼer kin haalʼáii binaagóó kin dah naazhjaaʼígíí tʼáá bił, índa Árnan tooh nílíní bibąąhgóó kin hadaasʼáhígóó tʼáá átʼé kéédahatʼı̨́įgo táadi neeznádiin nááhai. Haʼátʼéegoshąʼ tʼáadoo bighanídasidoohtʼą́ą da?
27 Éí bąą doo nichʼįʼ ádił asísiih da, nidi shichʼįʼ nídinibaaʼígíí bee doo yáʼátʼéhígi áshiinilaa. Bóhólníihii éí ánihwiiʼaahii nilı̨́įgo Ízrel dineʼé índa Áman dineʼé bitaʼgi díí jı̨́ ánihodooʼááł.
28 Nidi Áman dineʼé aláahgo binanitʼaʼí éí Jéfthah bizaad hachʼįʼ yił iʼííłʼaʼígíí doo dzíistsʼą́ąʼ da nítʼééʼ.
29 Ákohgo Bóhólníihii biNíłchʼi éí Jéfthah bikʼi hooleʼgo, Gíliyad kéyahgóó áádóó Manáseh kéyahgóó chʼízhníyá áádóó Gíliyad kéyahgi Mízpeh kin haalʼáadi jiníyá índa Gíliyad kéyahgi Mízpehdóó Áman dineʼé bichʼįʼ ajííyá.
30 Áko Jéfthah éí Bóhólníihii yichʼįʼ ádee haadzíiʼgo ání, Tʼáá aaníí Áman dineʼé shílákʼedííníʼą́ągo,
31 Áman dineʼé hashtʼedadíítʼeʼgo, hooghanjįʼ nááshdáałgo shighan bichʼéʼétiindóó tʼáá haʼátʼíhída shaa níyáhígíí éí Bóhólníihii bííʼ átʼé. Áko éí didlidgo nááhániihii nááhideeshnih.
32 Áko Jéfthah éí haʼnaajígo Áman dineʼé bił daʼahizhdoogą́ą́ł biniyé bichʼįʼ haʼnaa nizhníbaaʼgo Bóhólníihii éí Áman dineʼé hálákʼeidííʼą́.
33 Áko Aróʼer kin haalʼáádóó Mínith kin haalʼáajįʼ ałtso nidzistseed; éí naadiingo kin haalʼáá nítʼééʼ; tʼáá Éíbel-kéramim hazʼáníjįʼ tsʼídá ayóó átʼéego nabídzísdįįd. Ákohgo kótʼéego Ízrel dineʼé dabinááł Áman dineʼé bikʼeh dahodeesdlı̨́ı̨́ʼ.
Jéfthah bitsiʼ
34 Ákohgo Mízpeh kin haalʼáagi Jéfthah bighanjįʼ náádáałgo, jó, hatsiʼ éí ásaaʼ yilghaałígíí bikʼehgo hachʼįʼ chíʼílzhiizhgo haa ílzhiizh; tʼáá éí tʼéiyá hweʼawééʼ nilı̨́; hayeʼ índa hatsiʼ doo łaʼ nááhódlǫ́ǫ da.
35 Áko hatsiʼ dziiłtsą́ągo haʼééʼ ákʼi nijooldláadgo ájíní, Héiʼ, shitsiʼ nílíinii, ayáhígo áshiinilaago biniinaa tʼáá íiyisí shichʼįʼ hodiiznááʼ, háálá Bóhólníihii bichʼįʼ ádee hadeesdzíiʼgo kʼad doo łahgo ánáoshdleʼ átʼée da.
36 Áko hatsiʼ áhodííniid, Shizhéʼé, Bóhólníihii bichʼįʼ ádee hadíínídzíiʼgo shí ałdóʼ bikʼehgo háínídzíʼígíí shichʼįʼ ádoonííł, háálá Bóhólníihii éí Áman dineʼé niʼanaʼí nilíinii ná kʼéidiidlaa.
37 Áko éí hazhéʼé ábizhdííniid, Hániʼdii díí tʼáadoo leʼégóó shá áhodoonííł nisin: shíniʼdii naaki nídeezidjįʼ tʼáá sáhí dziłghą́ą́ʼgóó adeesháałgo bizháán naasháhígíí shí áádóó shikʼis ałdóʼ bikʼédí hódlǫ́ǫ dooleeł.
38 Áko ázhdííniid, Nílááh yínááł. Áko naaki nídeezidjįʼ yóóʼahojííłʼaʼgo hatsiʼ áádóó bikʼis yił dah diikaigo bizháán nijigháhígíí bikʼédí jílı̨́įgo dziłghą́ąʼdi nijikai nítʼééʼ.
39 Áko naaki hwee nídeezidgo hazhéʼé bichʼįʼ nídzídzá; éí ádee haadzíʼígíí bikʼehgo ádzaa. Jó, tʼah doo diné łaʼ bił jiniteesh da. Áko Ízrel dineʼé bibee éʼélʼįʼ bikʼehgo ákódaʼałʼı̨́;
40 tʼáá nináháhááh bikʼeh Ízrel dineʼé bitsiʼké danilíinii Jéfthah éí Gíliyad dineʼé nilı̨́įgo bitsiʼ baa nídajichahgo dı̨́ʼí jı̨́ náʼádleehgo nínáhah nítʼééʼ.
