Judges 12:1-15
12 Íífreiyim dineʼé tʼáá bí tʼááłáhíjįʼ áłah daazlı̨́įʼgo náhookǫsjígo Zéífan hoolyéejįʼ haʼnaa niikaigo Jéfthah ádeidííniid, Haʼátʼéegoshąʼ Áman dineʼé bił ałkʼiijeehgo nił dadiibah biniyé tʼáadoo nihíká ádííníniid da? Nighan tʼáá bił adandidiilkʼą́ą́ł.
2 Áko Jéfthah áhodííniid, Shí índa shidineʼé ałdóʼ éí Áman dineʼé bił ayóó átʼéego anaaʼ nídaʼahiilchííh, áko nihíká ádííniid, nidi tʼáadoo bitsʼą́ąjįʼ yisdádashisoołtı̨́į da.
3 Áko doo yisdádashinołteehgóó shił bééhoozingo tʼáá shí sheʼiinaʼ ninádiníʼą́ągo Áman dineʼé bichʼįʼ anaaʼ áhooshłaa. Bóhólníihii éí shílákʼee hodííʼą́. Haʼátʼéegoshąʼ díí jı̨́ índa shikʼiidoohjah biniyé noohkai?
4 Ákohgo Jéfthah éí Gíliyad dineʼé tʼáá ałtso áłah áyiilaago Íífreiyim dineʼé yił ałkʼiijééʼ. Áko Gíliyad dineʼé éí Íífreiyim dineʼé yikʼeh dadeesdlı̨́ı̨́ʼ, háálá ádaaní, Gíliyad dineʼé nohłíinii, Íífreiyim dineʼé áádóó Manáseh dineʼé bitahgóó kéédahohtʼíinii áłtʼąą laʼ Íífreiyim dineʼé bitsʼą́ą́dóó yóóʼadahaazhjéeʼii dasoolı̨́ı̨́ʼ.
5 Áko Gíliyad dineʼé éí Jórdan tooh haʼnaa nihonítʼiʼídóó Íífreiyim dineʼé baa jíishjééʼ. Áádóó Íífreiyim dineʼé yóóʼadahizhneezhchą́ąʼii ádazhdííniid, Tséʼnaa ninishááh bee shaʼdiníʼaah. Nítʼééʼ Gíliyad dineʼé ádahałní, Daʼ Íífreiyim dineʼésh nílı̨́? Áko dooda jiníigo hadzoodzíiʼgo
6 ádahałní, Kʼad Shíbboleth diní, nítʼééʼ, Síbboleth, jidííniid, háálá doo hazhóʼó józhíi da. Áko dahasiłgo Jórdan tooh haʼnaa nihonítʼiʼgi dahwiisxı̨́. Áko íídą́ą́ʼ Íífreiyim dineʼé dízdiindóó baʼaan naakidi míilgo nabídzísdįįd.
7 Jéfthah éí Ízrel dineʼé bá nihozhdiyiiʼaahgo hastą́ą́h nááhai. Áko Jéfthah éí Gíliyad diné jílíinii dadziztsą́ągo tʼáá hó hakin haalʼáadi Gíliyadgi yóóʼáhoʼdiilyaa.
Íbzan áádóó Íílan índa Ábdan éí Ízrel dineʼé yá nidahodiyiiʼaah nítʼééʼ
8 Hakééʼ góneʼ Béthlehem kin shijaaʼdóó Íbzan wolyéii éí Ízrel dineʼé yá nihodiyiiʼaah nítʼééʼ.
9 Hayeʼké éí tádiin yiltʼé índa hatsiʼké ałdóʼ tádiin yiltʼé. Éí náánáłahgóó biʼdziisʼniiʼgo náánáłahdę́ę́ʼ diné danilíinii baa dziiznil. Asdzání náánáłahdę́ę́ʼ dineʼé danilíinii hayeʼké baa dziiznil. Áádóó tsostsʼid nááhaijįʼ Ízrel dineʼé bá nihozhdiyiiʼaah nítʼééʼ.
10 Ákohgo Íbzan dadziztsą́ągo Béthlehem kin shijaaʼdi yóóʼáhoʼdiilyaa.
11 Hakééʼ góneʼ Íílan éí Zébyulan dineʼé jílíinii Ízrel dineʼé bá nihozhdiyiiʼaah nítʼééʼ, áko Ízrel dineʼé bá nihozhdiyiiʼaahgo neeznáá nááhai.
12 Áko Íílan éí Zébyulan dineʼé jílíinii dadziztsą́ągo Zébyulan bikéyahgi Éíjalan hazʼánídi yóóʼáhoʼdiilyaa.
13 Hakééʼ góneʼ Híllel biyeʼ Ábdan éí Pírathan kin shijaaʼdę́ę́ʼ nijigháago Ízrel dineʼé bá nihozhdiyiiʼaah nítʼééʼ.
14 Áko hayeʼké dízdiin áádóó hanálíké tádiin yiltʼé; éí tsostsʼidiingo dabitélii nidabiyéé nítʼééʼ. Áko tseebíí nááhaijįʼ Ízrel dineʼé bá nihozhdiyiiʼaah nítʼééʼ.
15 Híllel biyeʼ Ábdan éí Pírathan kin shijaaʼdę́ę́ʼ nijigháago dadziztsą́. Áko Íífreiyim kéyahgi Ámalek dineʼé bidził siʼánígi Pírathan kin shijaaʼdi yóóʼáhoʼdiilyaa.
